ປະທານາທິບໍດີສະຫະລັດ ທ່ານບາຣັກ ໂອບາມາ ໄດ້ຮ້ອງຂໍໃຫ້
ລັດຖະສະພາສະຫະລັດ ອະນຸມັດງົບປະມານສຸກເສີນຈຳນວນ
6 ພັນ 180 ລ້ານໂດລ່າເພື່ອຮັບມືກັບໂຣກອີໂບລາໃນອາຟຣິກາ
ຕາເວັນຕົກແລະການປ້ອງກັນບໍ່ໃຫ້ມີການແຜ່ລະບາດຂອງໂຣກ
ດັ່ງກ່າວຢູ່ໃນສະຫະລັດ.
ການຮຽກຮ້ອງນີ້ບັງເອີນມີຂຶ້ນພ້ອມກັບລາຍງານຈາກອົງການ
ອະນາໄມໂລກ ຫຼື WHO ໃນວັນພຸດວານນີ້ ທີ່ໄດ້ລະບຸວ່າ
ມີກໍລະນີຕິດເຊຶ້ອອີໂບລາໃໝ່ນ້ອຍລົງໃນ Liberia ໃນສັບປະດານີ້ ສ່ວນໃນ Guinea ມີຈຳນວນເທົ່າໆກັນກັບອາທິດແລ້ວ ແລະເພີ້ມຂຶ້ນໃນ Sierra Leone.
ສຫລ-ໄລບີເຣຍ ເປີດສູນ ປິ່ນປົວ ອີໂບລາ ແຫ່ງທຳອິດ
ທະນາຄານໂລກຮ່ວມກັບອົງການສະຫະປະຊາຊາດ ກ່າວວ່າ ພວກຕົນຈະສົ່ງເງິນຈຳນວນ 1 ພັນລ້ານໂດລ່າ ໄປໃຫ້ 3 ປະເທດ ທີ່ໄດ້ຮັບຜົນກະທົບຢ່າງຮ້າຍແຮງສຸດຈາກໂຣກອີໂບລາ
ຄື Liberia Guinea ແລະ Sierra Leone. ເງິນຈຳນວນດັ່ງກ່າວນີ້ ແມ່ນເພື່ອຊ່ອຍເຫຼືອ ໃນການຈັດສົ່ງເຈົ້າໜ້າທີ່ການແພດເຂົ້າໄປປະຕິບັດງານໃນປະເທດເຫຼົ່ານີ້ ໃຫ້ໄວຂຶ້ນ
ກວ່າເກົ່າ.
ປະທານທະນາຄານໂລກ ທ່ານ Jim Yong Kim ກ່າວວ່າ “ທຳອິດແລະກ່ອນອື່ນໃດ ທັງ ໝົດ ໂຣກອີໂບລານີ້ແມ່ນເປັນວິກິດການທາງດ້ານມະນຸດສະທຳ ແຕ່ວ່າ ມັນກໍຍັງເປັນ ໄພພິບັດທາງດ້ານເສດຖະກິດ ສຳຫລັບ Guinea Liberia ແລະ Sierra Leone. ເພາະສະນັ້ນ ນອກຈາກການຊ່ອຍເຫຼືອສຸກເສີນແລ້ວ ພວກເຮົາຍັງຈະເຮັດຈົນສຸດຄວາມສາມາດເພື່ອໃຫ້ການສະໜັບສະໜຸນຕໍ່ພາກເອກກະຊົນໃນປະເທດເຫຼົ່ານີ້ ໃຫ້ບູລະນະສ້າງ ສາທຸລະກິດຂອງພວກເຂົາເຈົ້າ ໃຫ້ກັບຄືນມາຄືເກົ່າ.”
