ຂໍ້ຄວາມຂອງພັກເດໂມແຄຣັດ ທີ່ໄດ້ນຳສະເໜີ ຢູ່ທີ່ກອງປະຊຸມໃຫຍ່ຂອງພັກ ໃນຄ່ຳຄືນ ຂອງວັນພຸດວານນີ້ ຢູ່ທີ່ນະຄອນ Philadelphia ແມ່ນເປັນທີ່ຈະແຈ້ງ ຄືທ່ານນາງ Hillary Clinton ແມ່ນພ້ອມແລ້ວ ທີ່ຈະເປັນປະທານາທິບໍດີ ຄົນຕໍ່ໄປ ຂອງສະຫະລັດ ແລະ ບໍ່ ແມ່ນ ທ່ານ Donald Trump.
ປະທານາທິບໍດີ ບາຣັກ ໂອບາມາໄດ້ສະທ້ອນໃຫ້ເຫັນດ້ວຍນ້ຳສຽງທີ່ ມີຄວາມຫວັງແບບ ດຽວກັນກັບການໂຄສະນາຫາສຽງ ເປັນປະທານາທິ ບໍດີຂອງທ່ານ ໃນການກ່າວ ຄຳ ປາໄສ ທີ່ໄດ້ເນັ້ນໃສ່ທັງຜົນສຳເລັດໂດຍລັດຖະບານຂອງທ່ານ ແລະ ໄດ້ພັນລະນາ ເຖິງ ທ່ານນາງ Clinton ທີ່ເປັນຜູ້ສະໝັກໃນແຂ່ງຂັນປີນີ້ ຜູ້ທີ່ເຊື່ອວ່າ ປະເທດຊາດແມ່ນດີຂຶ້ນ ເວ ລາໃດປະຊາຊົນ ຈາກທຸກພື້ນຖານ ປຸ້ມລຸມສາມັກຄີກັນ.
ທ່ານໄດ້ກ່າວວ່າ ບໍ່ມີຜູ້ຊາຍ ຫຼື ແມ່ຍິງຜູ້ໃດ ທີ່ມີຄຸນສົບບັດພຽບພ້ອມຫຼາຍທີ່ສຸດ ທີ່ຈະເປັນ ປະທານາທິບໍດີ ກວ່າ ທ່ານນາງ Clinton ຜູ້ທີ່ເຄີຍຮັບໃຊ້ເປັນລັດຖະມົນຕີ ການຕ່າງ ປະເທດ ໃນລະຫວ່າງສະໄໝທຳອິດຂອງທ່ານ.
ທ່ານໂອບາມາ ເວົ້າວ່າ “ປີນີ້ ໃນການເລືອກຕັ້ງນີ້ ຂ້າພະເຈົ້າຂໍໃຫ້ທ່ານເຂົ້າຮ່ວມກັບ ຂ້າພະເຈົ້າ ເພື່ອປະຕິເສດ ຕໍ່ການເຍາະເຢີ້ຍຖາກຖາງ ແລະ ປະຕິເສດ ຕໍ່ຄວາມ ຢ້ານກົວ ແລະ ໃຫ້ຮວບຮວມ ອັນທີ່ດີເດັ່ນໃນຈິດໃຈພວກເຮົາ ເພື່ອເລືອກເອົາທ່ານ ນາງ Hillary Clinton ເປັນປະທານາທິບໍດີ ສະຫະລັດ ຄົນຕໍ່ໄປ ແລະ ສະແດງ ໃຫ້ໂລກເຫັນວ່າ ພວກເຮົາຍັງເຊື່ອໃນສັນຍາ ຂອງປະເທດທີ່ຍິ່ງໃຫຍ່ນີ້.”
ທ່ານໄດ້ກ່າວອີກວ່າ ບໍ່ມີຫຍັງເລີຍ ທີ່ກຽມພ້ອມບຸກຄົນຜູ້ໜຶ່ງໄດ້ຢ່າງແທ້ຈິງ ໃຫ້ເປັນ ປະທານາທິບໍດີ ແຕ່ທຽບໃສ່ ປະສົບປະການຂອງທ່ານນາງ Hillary Clinton ກັບທ່ານ Trump ນັ້ນ ນັກທຸລະກິດ ທີ່ບໍ່ເຄີຍກຳຕຳແໜ່ງໃນລັດຖະບານມາກ່ອນ.
ທ່ານ ໂອບາມາ ເວົ້າຕື່ມວ່າ “ຈົນກວ່າວ່າ ທ່ານຈະໄດ້ນັ່ງທີ່ໂຕະນັ້ນ ແລ້ວ ທ່ານກໍຈະ ບໍ່ຮູ້ຈັກເລີຍວ່າ ມັນເປັນຄືຈັ່ງໃດໃນການຈັດການກັບວິກິດການຂອງໂລກ ຫຼື ສົ່ງ ພວກຄົນໜຸ່ມນ້ອຍໄປສົງຄາມ. ແຕ່ທ່ານນາງ Hillary ໄດ້ເຂົ້າໄປຢູ່ໃນຫ້ອງນັ້ນ ມາກ່ອນ ທ່ານນາງເຄີຍມີສ່ວນ ໃນການຕັດສິນໃຈເຫລົ່ານັ້ນ. ທ່ານນາງຮູ້ວ່າ ມັນມີຄວາມສຳຄັນສ່ຳໃດໃນ ການຕັດສິນໃຈຂອງລັດຖະບານຂອງພວກເຮົາ ມັນມີຄວາມສຳຄັນ ສ່ຳໃດຕໍ່ບັນດາຄອບຄົວທີ່ເຮັດວຽກເຮັດການ ຕໍ່ພວກທີ່ສູງອາຍຸ ຕໍ່ພວກເຈົ້າຂອງທຸລະກິດຂະໜາດນ້ອຍ ຕໍ່ພວກທະຫານ ແລະຕໍ່ພວກນັກລົບເກົ່າ. ”
ມື້ທີ 3 ຂອງກອງປະຊຸມໃຫຍ່ ພັກເດໂມແຄຣັດ
ພວກທີ່ເຂົ້າຮ່ວມກອງປະຊຸມໃຫຍ່ຂອງພັກທີ່ນະຄອນ Philadelphia ໄດ້ພາກັນຮ້ອງໂຮສະແດງຄວາມບໍ່ພໍໃຈເວລາທ່ານໂອບາມາ ກ່າວເຖິງ ທ່ານ Trump ຊຶ່ງທ່ານໂອບາມາ ກ່າວຕອບວ່າ ບໍ່ຈຳເປັນຕ້ອງຮ້ອງສະແດງຄວາມບໍ່ພໍໃຈ ແຕ່ຕ້ອງໄປປ່ອນບັດລົງຄະແນນສຽງ.
ອ່ານຂ່າວນີ້ຕື່ມ ເປັນພາສາອັງກິດ
