ທ່ານບາຣັກ ໂອບາມາ ປະທານາທິບໍດີສະຫະລັດ ຈະອອກເດີນທາງຈາກວໍຊິງຕັນ ໃນວັນ
ສຸກມື້ນີ້ ໄປຍັງຂົງເຂດເອເຊຍ-ປາຊິຟິກ ເປັນເວລາ9 ວັນ ທີ່ເພັ່ງເລັງໃສ່ການເສີມຂະຫຍາຍ
ສາຍພົວພັນຂອງວໍຊິງຕັນກັບຂົງເຂດທີ່ກໍາລັງເຕີບໂຕຂຶ້ນມາມີອໍານາດທາງເສດຖະກິດນັ້ນ.
ທ່ານໂອບາມາ ຈະໃຊ້ເວລາໃນຊ່ວງທໍາອິດຂອງການເດີນທາງຄັ້ງນີ້ ເປັນເຈົ້າພາບກອງປະ
ຊຸມສະພາຮ່ວມມືເສດຖະກິດແຫ່ງຂົງເຂດເອເຊຍ-ປາຊີຟິກ ທີ່ນະຄອນໂຮໂນລູລູ ລັດຮາວາຍ
ບ້ານເກີດເມືອງນອນຂອງທ່ານ.
ຢູ່ໃນລາຍການປະຊຸມຂອງທ່ານປະທານາທິບໍດີ ກໍຄືການປຶກສາຫາລືກ່ຽວກັບເຂດການ
ຄ້າເສລີໃນທົ່ວພາກພື້ນປາຊິຟິກ ທີ່ໂຮມທັງສະຫະລັດແລະອີກ 8 ປະເທດ ອັນມີ ອອສ-
ເຕຣເລຍ ບລູໄນ ຊີເລ ມາເລເຊຍ ນີວຊີແລນ ເປຣູ ສິງຄະໂປ ແລະຫວຽດນາມ. ຍີ່ປຸ່ນ
ກໍອາດເຂົ້າມາຮ່ວມໃນການເຈລະຈານີ້ ເຊ່ນກັນ ຊຶ່ງຈະເປັນການເພິ່ມໂອກາດໃນການດຶງ
ດູດເອົາອໍານາດອື່ນໆທາງເສດຖະກິດໃນຂົງເຂດ ເຊັ່ນຈີນ ເຂົ້າມາຮ່ວມນໍາ.
ຈາກຮາວາຍ ທ່ານໂອບາມາຈະຢຸດແວ່ເປັນເວລາສັ້ນໆທີ່ອອສເຕຣເລຍແລ້ວຫລັງຈາກນັ້ນ
ຈະເດີນທາງໃນໄປຍັງອິນໂອເນເຊຍ ບ່ອນທີ່ທ່ານໄດ້ໃຊ້ຊີວິດໃນຕອນເປັນໜຸ່ມນ້ອຍນັ້ນ.
ໃນລະຫວ່າງການຢ້ຽມຢາມຂອງທ່ານທີ່ອິນໂດເນເຊຍນັ້ນ ທ່ານຈະເປັນປະທານາທິບໍດີ
ສະຫະລັດຄົນທໍາອິດທີ່ຈະເຂົ້າຮ່ວມກອງປະຊຸມສຸດຍອດເອເຊຍຕາເວັນອອກ ຫລື East
Asia Summit ທີ່ຈະຈັດຂຶ້ນທີ່ເກາະບາຫລີ.
ພວກນັກສັງເກດການກ່າວວ່າ ນອກນີ້ແລ້ວ ປະທານາທິບໍດີສະຫະລັດຍັງຈະຖືໂອກາດການ
ໄປຢ້ຽມຢາມຂົງເຂດເອເຊຍ-ປາຊິຟິກຄັ້ງນີ້ ໃຫ້ການຄໍ້າປະກັນແກ່ບັນດາພັນທະມິດຄືນໃໝ່
ວ່າສະຫະລັດຕັ້ງໃຈທີ່ສືບຕໍ່ເອົາບົດບາດສໍາຄັນ ຢູ່ໃນຂົງເຂດ ແລະປະຕິບັດໂຕເປັນນໍ້າໜັກ
ຖ່ວງດຶງການໂຜ່ໂຕຂຶ້ນມາ ມີອິດທິພົນຫລາຍຂຶ້ນນັບມື້ຂອງຈີນນັ້ນ.
ເບິ່ງວີດີໂອ ລາຍງານກ່ຽວກັບກອງປະຊຸມເອເພັກທີ່ໂຮໂນລູລູ:
