ລິ້ງ ສຳຫລັບເຂົ້າຫາ

ລາຍງານ:​ ສະຫະລັດຈະເລີ່ມ ຖອນທະຫານ ອອກຈາກ ອັຟການີສຖານ (ເບິ່ງວີດີໂອ)

  • ວັນນະສອນ ແກ້ວດາຣາ

ທະຫານຂອງສະຫະລັດ ໃນອັຟການີສຖານ

ປະທານາທິບໍດີບາຣັກ ໂອບາມາ ມີແຜນການຈະຖອນທະຫານສະຫະລັດ ປະມານນຶ່ງສ່ວນ ສາມ ອອກຈາກອັຟການີສຖານໃນທ້າຍປີ 2012. ຜູ້ສື່ຂ່າວວີໂອເອ Kent Klein ລາຍງານ ມາຈາກທໍານຽບຂາວວ່າ ປະທານາທິບໍດີໂອບາມາໄດ້ກ່າວ ໃນຕອນຄໍ່າວັນພຸດວານນີ້ວ່າ ການເສີມກໍາລັງທະຫານເມື່ອບໍ່ດົນຜ່ານມານັ້ນ ແມ່ນໄດ້ບັນລຸຕາມເປົ້າໝາຍແລ້ວ. ວັນນະສອນແລະທອງປານ ມີເລຶ່ອງນີ້ມາສະເໜີທ່ານ.

ປະທານາທິບໍດີ ໂອບາມາ ໄດ້ແຈ້ງໃຫ້ປະ​ເທ​ດຊາດ​ຊາບ​ ຜ່ານ​ທາງໂທລະພາບ​ໃນ​ຄືນ
ວານ​ນີ້ ວ່າ ທ່ານກໍາລັງ​ຈະເລີ່ມດໍາ​ເນີນຄວາມພະຍາຍາມ ທີ່ຈະຍຸຕິສົງຄາມທີ່ຍືດເຍື້ອ
ຍາວນານບັ້ນນຶ່ງຂອງອາເມຣິການັ້ນ​ແລ້ວ.

“ມັນເຖິງເວລາແລ້ວ ທີ່ອາເມຣິກາ ຈະເພັ່ງເລັງໃສ່ການສ້າງສາພັດທະນາ
ປະເທດຊາດ ຢູ່ທີ່ບ້ານຂອງຕົນ​ເອງ.”

ທ່ານໂອບາມາ ກ່າວວ່າ ກໍາລັງທະຫານສະຫະລັດຈໍານວນ 100,000 ຄົນ ທີ່ປະຈໍາ
ການຢູ່ໃນອັຟການີສຖານ ແມ່ນໄດ້ສ້າງຄວາມເສຍຫາຍອັນໃຫຍ່ ຫລວງແກ່ເຄືອຂ່າຍ
ກໍ່ການຮ້າຍ ອາລ ຄາອີດາ ຊຶ່ງເປັນກຸ່ມທີ່ທໍາການໂຈມ ຕີຢ່າງໂຫດຮ້າຍປ່າ​ເຖື່ອນ
ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຫລາຍ​ພັນ​ຄົນໃນນະຄອນນີວຢ໊ອກ ແລະວໍຊິງຕັນດີຊີ ໃນປີ
2001 ນັ້ນ.

ເນື່ອງຈາກ​ໄດ້ມີຄວາມກ້າວໜ້າເມື່ອໝໍ່ໆມານີ້ ປະທານາທິບໍດີໂອບາຈຶ່ງໄດ້ປະກາດວ່າ ຈະຖອນທະຫານຈໍານວນນຶ່ງສ່ວນສາມ ຂອງກໍາລັງ​ພົນທັງໝົດ 100,000 ຄົນດັ່ງກ່າວ
ນັ້ນ ອອກຈາກອັຟການີສຖານ ໃນທ້າຍປີໜ້ານີ້.

“ເລີ່ມຕົ້ນໃນເດືອນໜ້ານີ້ ພວກເຮົາກໍຈະສາມາດຖອນທະຫານຂອງພວກເຮົາ
ຈໍານວນ 10,000 ອອກຈາກອາຟການີສຖານໃຫ້ໄດ້ພາຍໃນທ້າຍປີນີ້ ແລະພໍ
ເຖິງລະດູຮ້ອນປີໜ້າ ພວກເຮົາຈະຖອນທະຫານກັບຄືນປະເທດ ຈໍານວນທັງ
ໝົດ 33,000 ຄົນ.”

ປະທານາທິບໍດີໂອບາມາ ໄດ້ສົ່ງກໍາລັງທະຫານຈໍານວນ 33,000 ຄົນໄປ ຍັງອັຟກາ
ນີສຖານໃນທ້າຍປີ 2009 ເພື່ອສຸມ​ຄວາມ​ພະຍາຍາມ​ໃສ່​ກຸ່ມ ອາລຄາອີດາ ຕ່າວປີ້ນ
ຄວາມ​ກ້າວໜ້າ​ຂອງກຸ່ມຕາລິບານ ແລະທໍາ​ການ ເຝິກອົບລົມກໍາລັງຮັກສາຄວາມ
ປອດໄພຂອງອັຟການີສຖານ ເພື່ອ​ໃຫ້​ເຂົາ​ເຈົ້າ​ສາມາດປົກປ້ອງຄຸ້ມຄອງປະເທດຊາດ
ຂອງພວກເຂົາເຈົ້າເອງໄດ້.

ສະຫະລັດໄດ້​ເຂົ້າບຸກລຸກອາຟການີສຖານໃນ​ເວລາບໍ່ເທົ່າໃດອາທິດ ຫລັງ ຈາກການ
ໂຈມຕີຂອງພວກກໍ່ການຮ້າຍຕໍ່ສະຫະລັດ ເມື່ອວັນທີ່ 11 ເດືອນ ກັນຍາ ປີ 2001. ຜົນການຢັ່ງສຽງມະຫາຊົນເມື່ອບໍ່ດົນຜ່ານມານີ້ ພົບວ່າ ຊາວອະເມຣິກັນຫລາຍໆຄົນ
ເມື່ອຍໃຈນໍາສົງຄາມນີ້​ແລ້ວ ແລະຕ້ອງການໃຫ້ ລັດຖະບານໂອບາມາ ເພັ່ງເລັງໃສ່
ການ​ແກ້​ໄຂ​ບັນຫາຄວາມເປັນຫ່ວງຢູ່ພາຍ ໃນປະເທດຫລາຍກວ່າ ຄືຫັນມາສ້າງສາ
ເສດຖະກິດຂອງຊາດເປັນຕົ້ນ.

ສະມາຊິກລັດຖະສະພາບາງຄົນ ໄດ້ຮຽກຮ້ອງໃຫ້ເລັ່ງລັດການຖອນທະຫານ ແຕ່ພວກ
ອື່ນໆກໍໂຕ້ແຍ້ງວ່າ ການຖອນທະຫານໂດຍໄວນັ້ນຈະສ້າງ​ຄວາມ​ເສຍ​ຫາຍ​ໃຫ້​ແກ່
ຄວາມກ້າວໜ້າ ທີ່ໄດ້ກະທໍາມາຢູ່ໃນອັຟການີສຖານນັ້ນ. ປາກົດວ່າ ການອະພິປາຍ
ຖົກຖຽງກັນໃນທໍານອງນີ້ ກໍກໍາລັງມີຂຶ້ນ​ໃນບັນດາ ຄະນະທີ່ປຶກສາລະດັບສູງຂອງປະທາ
ນາທິບໍດີ ເຊ່ນ​ກັນ.

ໃນ​ຄໍາ​ປາ​ໃສ​ຄືນວັນພຸດວານນີ້ ທ່ານ​ໂອ​ບາ​ມາ​ໄດ້ສະ​ແດງ​ການຮັບຮູ້​ບັນຫານີ້ ໂດຍ
ກ່າວວ່າ ນະໂຍບາຍຂອງສະຫະລັດແມ່ນຈະຕ້ອງມີຄວາມ ສົມດຸນອັນເໝາະສົມ.
ທ່ານ​ກ່າວ​ຕໍ່​ໄປ​ວ່າ: “ມີບາງຄົນທີ່ຢາກໃຫ້ອາເມຣິກາປະລະຈາກຄວາມຮັບ
ຜິດຊອບໃນຖານະ ເປັນຜູ້ຄໍ້າປະກັນຄວາມໝັ້ນຄົງຂອງໂລກ ແລະຮັບເອົາ
ການຢູ່​ຢ່າງໂດດດ່ຽວ ເມີນເສີຍຕໍ່ໄພຂົ່ມຂູ່ອັນແທ້ຈິງຕ່າງໆທີ່ພວກເຮົາປະເຊີນ
ຢູ່ນີ້. ພວກ​ອື່ນໆ​ອີກ​ຊໍ້າພັດຢາກໃຫ້ອາເມຣິກາເສີມຂະຫຍາຍບົດບາດຂອງ
ຕົນອອກໄປແລະ ປະເຊີນໜ້າກັບພວກຊົ່ວຮ້າຍທຸກໆຄົນ ທີ່ພົບເຫັນຢູ່ໃນ
ຕ່າງປະເທດ ​ແຕ່ ພວກເຮົາຈະຕ້ອງວາງແຜນການໃນແນວທາງທີ່ຢູ່ໃນ
ສາຍກາງຫລາຍຂຶ້ນ.”

ປະທານາທິບໍດີໂອບາມາກ່າວວ່າ ພາລະກິດຂອງສະຫະລັດໃນອັຟການີສຖານນັ້ນ
ຈະປ່ຽນຈາກການສູ້ລົບ ມາເປັນຜູ້ສະໜັບສະໜຸນ ໃນຂະນະທີ່ ອັຟການີສຖານເລິ່ມຮັບ
ເອົາພາລະຮັບຜິດຊອບ​ໃນ​ການ​ຮັກສາຄວາມໝັ້ນຄົງ ປອດ​ໄພຂອງປະເທດຊາດຂອງ
ຕົນເອງ ຊຶ່ງທ່ານໂອບາມາ ກ່າວວ່າ ການ ປ່ຽນແປງພາລະກິດດັ່ງກ່າວນີ້ ຈະສໍາເລັດ
ລົງ ພາຍໃນປີ 2014.

ເບິ່ງວີດິໂອ ປະທານາທິບໍດີໂອບາມາ ກ່າວຄໍາປາໄສ

ນອກນີ້ແລ້ວ ທ່ານໂອບາມາ ຍັງໄດ້ປະກາດວ່າ ອົງການເນໂຕ້ ຈະຈັດກອງປະຊຸມສຸດ
ຍອດທີ່​ນະຄອນ Chicago ຊຶ່ງເປັນບ້ານຂອງທ່ານນັ້ນ ໃນເດືອນພຶດສະພາປີໜ້ານີ້ ເພື່ອວາງແຜນການດໍາເນີນການຂັ້ນຕໍ່ໄປກ່ຽວ​ກັບການປ່ຽນແປງໃນອັຟການີສຖານນັ້ນ.

ທ່ານໂອບາມາກ່າວວ່າ ໃນລະຫວ່າງນີ້ ສະຫະລັດກໍຈະສະໜັບສະໜຸນ ການເຈລະຈາ
ສັນຕິພາບ ທີ່ໂຮມທັງລັດຖະບານອັຟການີສຖານ ແລະ ກຸ່ມຕາລິບານ. ທ່ານ​ກ່າວ​ຕື່ມ​ວ່າ ມີເຫດຜົນພຽງພໍທີ່ຈະເຊື່ອໄດ້ວ່າ ຄວາມ ກ້າວໜ້າໃນເລຶ່ອງນີ້ ສາມາດ​ມີ​ຂຶ້ນ​ໄດ້.

ນອກຈາກນີ້ແລ້ວ ທ່ານປະທານາທິບໍດີ ກ່າວວ່າ ລັດຖະບານຂອງທ່ານ ຈະກົດດັນ​ໃຫ້
ປາກີສຖານ ໃຫ້ການຮ່ວມ​ໄມ້ຮ່ວມມືຫລາຍຂຶ້ນກວ່າເກົ່າໃນການຕໍ່ສູ້ກັບພວກຫົວຮຸນ
ແຮງທີ່ມັກກໍ່ຄວາມຮຸນແຮງນັ້ນ.

ທ່ານໂອບາມາ ກ່າວຕໍ່ໄປວ່າ ເປົ້າໝາຍໂດຍຮວມຂອງທ່ານນັ້ນ ກໍ​ແມ່ນ ຢາກໃຫ້ອັຟກາ
ນີສຖານເປັນປະເທດທີ່ບໍ່​ມີບ່ອນລີ້ຊ່ອນໃດໆ ສໍາລັບ​ໃຫ້​ກຸ່ມ ອາລ ຄາອີດາ ແລະພວກ
ສະມາຊິກຂອງເຂົາ ສາມາດທໍາ​ການໂຈມຕີ ສະຫະລັດ ແລະພັນທະມິດຂອງສະຫະລັດ
ນັ້ນໄດ້. ທ່ານ​ກ່າວ​ຕໍ່​ໄປ​ວ່າ: “ພວກເຮົາຈະບໍ່ພະຍາຍາມເຮັດໃຫ້ອັຟການີສຖານ
ເປັນບ່ອນຢູ່ທີ່ດີເລີດແຕ່ຢ່າງໃດ ກໍຄືພວກເຮົາຈະບໍ່ອອກລາດຕະເວນຮັກສາ
ຄວາມປອດໄພຕາມຖະນົນຫົນທາງ ຫລືເຂດພູເຂົາໃນອັຟການີສຖານ ຢ່າງບໍ່
ມີກໍານົດ.”

ປະທານາທິບໍດີໂອບາມາ ໄດ້ໃຫ້ຄໍາໝັ້ນສັນຍາຕໍ່ປະຊາຊົນອາເມຣິກັນ ວ່າ ສົງຄາມ
ທີ່ຍືດເຍື້ອຍາວນານໃນອັຟການີສຖານ ແລະອີຣັກ ຈະກ້າວ​ໄປເຖິງຈຸດທີ່ທ່ານເອີ້ນວ່າ
ການ​ສິ້ນ​ສຸດ​ລົງ​ຢ່າງມີຄວາມຮັບຜິດຊອບ.

ເບິ່ງວີດິໂອລາຍງານທີ່ກ່ຽວຂ້ອງກັນ

XS
SM
MD
LG