ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

​ເກົາ​ຫຼີ​ເໜືອ ສົ່ງ​ບາ​ລ​ລູນ​ທີ່​ອາດ​ຈະ​ບັນ​ຈຸ​ຂີ້​ເຫຍື້ອ​ເຂົ້າ​ໄປ​ໃນ ເກົາຫຼີ​ໃຕ້ ອີກ​ຄັ້​ງ​ນຶ່ງ


​ຜູ້​ປະ​ທ້ວງ​ຈັດ​ການ​ຊຸມ​ນຸມ​ເພື່ອ​ຮຽກ​ຮ້ອງ​ໃຫ້​ຢຸດ​ການ​ຊ້ອມ​ລົບ ແລະ ການ​ໂຄ​ສະ​ນາ​ຊວນ​ເຊື່ອ​ທ່າມ​ກາງ​ຄວາມ​ເຄັ່ງ​ຕຶ​ງ​ທີ່​ເພີ່ມ​ຂຶ້ນ​ລະ​ຫວ່າງ ເກົາຫຼີ​ເໜືອ ແລະ ເກົາຫຼີ​ໃຕ້, 24 ມິ​ຖຸ​ນາ 2024.
​ຜູ້​ປະ​ທ້ວງ​ຈັດ​ການ​ຊຸມ​ນຸມ​ເພື່ອ​ຮຽກ​ຮ້ອງ​ໃຫ້​ຢຸດ​ການ​ຊ້ອມ​ລົບ ແລະ ການ​ໂຄ​ສະ​ນາ​ຊວນ​ເຊື່ອ​ທ່າມ​ກາງ​ຄວາມ​ເຄັ່ງ​ຕຶ​ງ​ທີ່​ເພີ່ມ​ຂຶ້ນ​ລະ​ຫວ່າງ ເກົາຫຼີ​ເໜືອ ແລະ ເກົາຫຼີ​ໃຕ້, 24 ມິ​ຖຸ​ນາ 2024.

ເກົາຫຼີ​ເໜືອ ໄດ້​ສືບ​ຕໍ່​ສົ່ງ​ບາ​ລ​ລູນ ທີ່​ເຕັມ​ໄປ​ດ້ວຍ​ຂີ້​ເຫຍື້ອ​ເຂົ້າ​ໄປ​ສູ່​ເກົາຫຼີ​ໃຕ້​ ໃນ​ຄືນ​ວັນ​ຈັນ​ວານນີ້, ອັນຖື​ເປັນ​ການເລີ່ມ​ຕົ້ນ​ຂັ້ນ​ຕອນໃໝ່ໃນ​ປະ​ຕິ​ບັດ​ການ​ແບບ​ສົງ​ຄາມ​ເຢັນ​ທີ່​ກຳ​ລັງ​ດຳ​ເນີນ​ຢູ່​ຂອງ​ເຂົາ​ເຈົ້າ​ໃນ​ແຫຼມ​ເກົາຫຼີ.

ອີງ​ຕາມ​ເສ​ນາ​ທິ​ການ​ຮ່ວມ​ຂອງ​ເກົາຫຼີ​ໃຕ້, ບາ​ລ​ລູນ​ທີ່​ມາ​ຈາກ ເກົາຫຼີເໜືອ, ​ມີ​ຄວາມ​ເປັນ​ໄປ​ໄດ້​ວ່າ​ ຈະ​ບັນ​ຈຸ​ຂີ້​ເຫຍື້ອ, ແມ່ນ​ກຳ​ລັງ​ລອຍ​ໄປ​ທິດ​ໃຕ້​ສູ່​ເຂດ​ແດນ​ຂອງ​ເກົາຫຼີ​ໃຕ້. ກອງ​ທັບ​ໄດ້​ເຕືອນ​ປະ​ຊາ​ຊົນ​ບໍ່​ໃຫ້​ແຕະ​ຕ້ອງວັດ​ຖຸໃດໆ​ທີ່​ຕົກ​ລົງ​ມາ ແລະ ໃຫ້​ລາຍ​ງານ​ການ​ພົບ​ເຫັນ​ຕໍ່​ເຈົ້າ​ໜ້າ​ທີ່​ຢ່າງຮີບດ່ວນ.

ເສ​ນາ​ທິ​ການ​ຮ່ວມ​ຂອງ​ເກົາຫຼີ​ໃຕ້ ​ໄດ້​ກ່າວ​ໃນ​ຖະ​ແຫຼງ​ການ​ສະ​ບັບ​ນຶ່ງວ່າ “ການ​ປ່ອຍ​ດັ່ງ​ກ່າວ​ ໄດ້​ເກີດ​ຂຶ້ນບໍ່​ດົນຫຼັງ​ຈາກ​ຜູ້​ນຳ​ເກົາຫຼີ​ເໜືອ ທ່ານ ກິມ ຈົງ ອຶນ ແລະ ປະ​ທາ​ນາ​ທິ​ບໍ​ດີ ຣັດ​ເຊຍ ທ່ານ ວ​ລາ​ດິ​ເມຍ ປູ​ຕິນ ໄດ້​ເຊັນ​ຂໍ້​ຕົກ​ລົງ​ປ້ອງ​ກັນ​ປະ​ເທດ​ທີ່​ສຳ​ຄັນ.”

ການ​ເຮັດ​ຂໍ້​ຕົກ​ລົງ​ປ້ອງ​ກັນ​ປະ​ເທດ​ເມື່ອ​ບໍ່​ດົນ​ມານີ້ ​ລະ​ຫວ່າງ​ທ່ານ ກິມ ແລະ ທ່ານ ປູ​ຕິນ ໄດ້​ກໍ່​ໃຫ້​ມີ​ຄວາມ​ເປັນ​ຫ່ວງ​ໃນ​ບັນ​ດາ​ນັກ​ສັງ​ເກດ​ການ​ສາ​ກົນ ກ່ຽວ​ກັບ ການ​ຍຸ​ແຍ່​ທີ່​ອາ​ດ​ເປັນ​ໄປ​ໄດ້​ຈາກ ພຽງ​ຢາງ.

ໃນ​ຖະ​ແຫຼງ​ການ​ຮ່ວມ, ເກົາຫຼີ​ໃຕ້, ສະ​ຫະ​ລັດ ແລະ ຍີ່​ປຸ່ນ ໄດ້​ກ່າວ​ປະ​ນາມ​ການ​ຮ່ວມ​ມື​ທາງ​ທະ​ຫານຫຼາຍ​ຂຶ້​ນ​ລະ​ຫວ່າງ ເກົາຫຼີ​ເໜືອ ແລະ ຣັດ​ເຊຍ, ໂດຍ​ກ່າວ​ຢ້ຳ​ເຖິງ​ຄຳ​ໝັ້ນ​ສັນ​ຍາ​ຂອງ​ເຂົາ​ເຈົ້າ​ຕໍ່​ການ​ເສີມ​ຂະ​ຫຍາຍ​ການ​ຮັກ​ສາ​ຄວາມ​ໝັ້ນ​ຄົງ​ໃນ​ພາກ​ພື້ນ.

ເຂົາ​ເຈົ້າ​ໄດ້​ກ່າວ​ວ່າ “ຄຳ​ໝັ້ນ​ສັນ​ຍາ​ຂອງ ສະ​ຫະ​ລັດ ທີ່​ຈະ​ປ້ອງ​ກັນ ເກົາຫຼີ​ໃຕ້ ແລະ ຍີ່​ປຸ່ນ ຍັງ​ຄົງ​ແຂງ​ແກ່ນຫຼາຍ.”

ຂະ​ບວນ​ການ​ສົ່ງ​ບາ​ລ​ລູນ​ຂອງ ເກົາຫຼີ​ເໜືອ ໄດ້​ເລີ່ມ​ຂຶ້ນ​ໃນ​ເດືອນ​ພຶດ​ສະ​ພາ​ທີ່​ຜ່ານ​ມາ, ເວ​ລາ​ທີ່​ເຂົາ​ເຈົ້າ​ໄດ້​ສົ່ງ​ບາ​ລ​ລູນຫຼາຍກວ່າ 1,000 ໜ່ວຍ​ທີ່​ເຕັມ​ໄປ​ດ້ວຍ​ວັດ​ຖຸ​ຕ່າງໆ​ຄື ອາ​ຈົມ, ເສດ​ຜ້າ​, ແລະ ຖ່ານ​ແບັດ​ເຕີ​ຣີ​ທີ່​ຖິ້ມ​ແລ້ວ ເຂົ້າ​ໄປ​ໃນ ເກົາຫຼີ​ໃຕ້. ພຽງ​ຢາງ ອ້າງວ່າ​ ການ​ກະ​ທຳ​ດັ່ງ​ກ່າວນີ້​ ແມ່ນ​ການ​ແກ້​ແຄ້ນ​ຕໍ່​ນັກ​ເຄື່ອນ​ໄຫວ ເກົາຫຼີ​ໃຕ້ ຜູ້​ທີ່​ໄດ້​ສົ່ງ​ໃບ​ປິວ​ຕໍ່​ຕ້ານ​ລະ​ບອບ​ການ​ປົກ​ຄອງ ແລະ ວັດ​ຖຸ​ທາງ​ດ້ານ​ວັດ​ທະ​ນະ​ທຳ​ຂຶ້ນ​ໄປ​ທິດ​ເໜືອ.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG