ເກົາຫຼີເໜືອພວມວາງແຜນ ທີ່ຈະໄຂກອງປະຊຸມທາງການ ເມືອງທີ່ໃຫຍ່ທີ່ສຸດໃນຮອບ 30 ປີ ໃນອັນທີ່ອາດຈະເປັນ ການເປີດເຜີຍເທື່ອທຳອິດ ໂສມໜ້າຂອງຜູ້ນຳຄົນຕໍ່ໄປຂອງ ເກົາຫຼີເໜືອ ທີ່ຢູ່ຢ່າງໂດດດ່ຽວນັ້ນ.
ໄດ້ມີການຕິດປ້າຍໂຄສະນາຂະໜາດໃຫຍ່ ເພື່ອຊຸກຍູ້ກອງ ປະຊຸມ ຂອງພັກກຳມະກອນເກົາຫຼີ ຢູ່ໃນທົ່ວນະຄອນຫຼວງ ພຽງຢາງ.
ສື່ມວນຊົນຂອງທາງການເກົາຫຼີເໜືອລາຍງານວ່າ ພວກຜູ້ ແທນຂອງພັກ ຈາກທົ່ວປະເທດ ພວມໄປເຕົ້າໂຮມກັນທີ່ ນະຄອນຫຼວງພຽງຢາງ ເພື່ອເຂົ້າຮ່ວມກອງປະຊຸມໃຫຍ່ ຊຶ່ງກອງປະຊຸມແນວນີ້ ຖືກຮຽກ ໃຫ້ມີຂຶ້ນ ກໍຕໍ່ເມື່ອໄດ້ເກີດ ເຫດການສຸກເສີນ ຫຼືບໍ່ກໍມີເລື່ອງພິເສດ ເກີດຂຶ້ນທໍ່ນັ້ນ.
ພວກນັກວິເຄາະ ທີ່ໄດ້ຕິດຕາມເຫດການ ໃນເກົາຫຼີເໜືອຢ່າງໃກ້ຊິດ ຄາດຄະເນວ່າ ທ່ານ ກິມ-ຈົງ-ອິລ ຜູ້ນຳ ທີ່ມີສຸຂະພາບຊຸດໂຊມ ຂອງເກົາຫຼີເໜືອ ຈະໃຊ້ກອງປະຊຸມໃຫຍ່ຄັ້ງນີ້ ມອບຕຳແໜ່ງທີ່ສຳຄັນ ຂອງພັກໃຫ້ລູກຊາຍຄົນທີ 3 ຂອງທ່ານ ຄືທ້າວກິມ-ຈົງ-ອຸນ ໃນ ການກະກຽມ ເພື່ອໃຫ້ຜູ້ກ່ຽວ ໄດ້ເຂົ້າກຳຕຳແໜ່ງ ເປັນຜູ້ນໍາຄົນຕໍ່ໄປ ຂອງປະເທດ.
ໃນການຮັກສາ ທຸກຢ່າງໄວ້ເປັນຄວາມລັບ ຕາມປະເພນີ ຢູ່ໃນເກົາຫຼີເໜືອນັ້ນ ບໍ່ໄດ້ມີການ ເອີ່ຍເຖິງເລີຍວ່າ ເວລາໃດ ກອງປະຊຸມຈະໄຂຂຶ້ນ ນອກເໜືອໄປຈາກເວົ້າແຕ່ພຽງວ່າ ກອງປະຊຸມຈະໄຂຂຶ້ນ ໃນຕົ້ນເດືອນກັນຍານີ້.
