ການສືບທອດອໍານາດ ໃນເກົາຫລີເໜືອ

ສື່​ມວນ​ຊົນແຫ່ງ​ລັດ​ເກົາ​ຫລີເໜືອ​ກໍາລັງ​ໂຄສະນາ​ເຜີຍ​ແຜ່​ກອງ​ປະ​ຊຸມ​ໃຫຍ່​ດັ່ງກ່າວ ຊຶ່ງ​ຄາດ​ວ່າ​ຈະ​ໄຂ​ຂຶ້ນ​ໃນ​ລາວ​ວັນ​ທີ 6 ​ເດືອນ​ກັນຍາ​ນີ້ ​ໂດຍ​ຜ່ານ​ການ​ປະກາດ​ທາງ​ປະຊາ​ສໍາພັນ​ຕ່າງໆ​ ເຊ່ນ​ການ​ປະກາດແບບ​ນີ້ທາງ​ໂທລະພາບ​ຂອງລັດ​.

“ສຽງພາສາ​ເກົາຫລີ”

ຄໍາ​ປະກາດ​ນີ້ເວົ້າວ່າ: “ຂໍ​ໃຫ້​ພວກ​ເຮົາຈົ່ງມາ​ພາກັນສະ​ແດງ​ການ​ຂໍ່ານັບ​ຮັບ​ຕ້ອນ ກອງ​ປະຊຸມຂອງ​ພວກ​ຜູ້​ແທນພັກ​ຄົນ​ງານ​ເກົາຫລີ​ ຢ່າງ​ມີ ຄວາມໝາຍ​ ​ໃນ​ຖານະເປັນ​ເຫດການ​ອັນ​ສະງ່າ​ງາມ​ເປັນ​ສິລິມົງຄົນທີ່​ຈະ​ສ່ອງ​ແສງ​ເຮືອງ​ຮຸ່ງ​ຕະຫລອດ​ໄປ​ ໃນ​ບັນທຶກ​ປະວັດ​ສາດ​ຂອງ​ພັກ​ຂອງ​ເຮົາ​ແລະ​ປິ​ຕິ​ພູມ​ແຫ່ງ​ນີ້.”

ມັນ​ຈະ​ເປັນ​ເຫດການ​ທີ່​ບໍ່​ສູ້​ມີ​ຂຶ້ນ​ເລື້ອຍ. ​ກອງ​ປະຊຸມ​ໃນທໍານອງ​ດຽວ​ກັນ​ນີ້ເທື່ອ​ຫລ້າ​ສຸດ ແມ່ນ​ໄຂ​ຂຶ້ນ​ໃນ​ປີ 1980 ​ແລະ​ກອງ​ປະຊຸມ​ຂອງ​ບັນດາຜູ້​ແທນ​ພັກ​ຄັ້ງ​ກ່ອນໜ້າ​ນັ້ນ ທີ່​ມີ​ຜູ້​ປະກອບ ສ່ວນນໍາຫລາຍ​ພັນ​ຄົນ​ ​ແມ່ນ​ມີ​ຂຶ້ນ​ໃນ​ປີ 1966.

ໃນ​ຊ່ວງ​ເວລາ​ຫລາຍ​ປີ​ລະຫວ່າງ​ສອງ​ເຫດການ​ດັ່ງກ່າວ ອໍານາດ​ໄດ້​ຕົກ​ຢູ່​ກັບ​ພວກ​ທະຫານ ຫລາຍ​ຂຶ້ນ​ເລື້ອຍໆ ບໍ່​ແມ່ນ​ຂຶ້ນ​ຢູ່​ກັບ​ພັກ ພາຍ​ໃຕ້ການ​ປົກຄອງ​ທີ່​ເດັດຂາດ​ຂອງ​ທ່ານ​ກິມອິລ ຊຸງ ແລະ​ນັບຕັ້ງ​ແຕ່​ຜູ້ກ່ຽວ​ໄດ້​ເຖິງ​ແກ່​ອະສັນ​ຍະ​ກໍາ​ໄປ​ໃນ​ປີ 1994 ອໍານາດ​ກໍ​ໄດ້​ຕົກ​ຢູ່​ໃນ​ກໍາມື​ຂອງ​ລູກ​ຊາຍ​ຂອງ​ທ່ານ​ຄື ທ່ານ​ກິມຈົງ​ອິລ ທີ່ປົກຄອງ​ປະ​ເທດ​ໃນ​ປັດຈຸບັນ.

ທ່ານ​ນາງ Balbina Hwang ສາດສະດາຈານ​ຢ້ຽມຢາມທີ່​ມາ​ສອນ​ຊົ່ວຄາວ​ທີ່​ມະຫາວິທະຍາ​ໄລ​ປ້ອງ​ກັນຊາ​ດສະຫະລັດ ກ່າວ​ວ່າ ການ​ຍ້າຍຈຸດ​ສົນ​ໃຈຂອງປະຊາຊົນ​ ໃນນະຄອນຫລວງ​ພຽງ​ຢ້າງ ກັບ​ຄືນ​ໄປ​ຍັງ​ພັກ​ນີ້ແມ່ນ​ມີ​ຄວາມ​ໝາຍ​ສໍາຄັນ ຊຶ່ງ​ທ່ານ​ນາງ Hwang ກ່າວ​ຊີ້​ແຈງ​ວ່າ:

“ການ​ທີ່ ພວກເຂົາເຈົ້າເບິ່ງຄືວ່າ ກຳລັງປັບປ່ຽນສູນກາງອໍານາດ ຊຶ່ງກໍອາດເປັນ ໄປໄດ້ນັ້ນ ອອກຈາກຄະນະກຳມາທິການປ້ອງກັນຊາດ ແລະວົງການທະຫານໄປ ສູ່ພັກຄົນ​ງານ​ນັ້ນ ຂ້າພະເຈົ້າຄິດວ່າ ມັນ​ໝາຍ​ຄວາມ​ວ່າ ກໍາລັງ​ຈະມີການສືບ ຕໍ່ແລະໂອນອໍານາດຢ່າງໃຫຍ່ເກີດຂື້ນ ​ໃນທາງສະຖາບັນ.”

ພວກ​ນັກວິ​ເຄາະ​ເຫດການ​ເກົາຫລີ​ເໜືອ​ຫລາຍ​ຄົນ​ ພາກັນ​ຄາດ​ວ່າ ທ່ານ​ກິມຈົງ​ອຸນ ລູກ​ຊາຍ​ ຜູ້​ທີ​ສາມ​ຂອງ​ທ່ານ​ກິມຈົງ​ອິລ ທີ່​ເຊື່ອ​ກັນ​ວ່າມີ​ອາຍຸ​ປະມານ 27 ປີນັ້ນ ຈະ​ເປັນ​ຄົນ​ນຶ່ງ​ຢູ່​ໃນ​ຈໍານວນ​ພວກ​ທີ່​ຈະ​ໄດ້​ຮັບ​ຕໍາ​ແໜ່​ງໃນ​ຄະນະ​ກໍາມະການ​ສູນ​ກາງ​ພັກ​ນັ້ນ. ທ່ານ​ກິມຈົງ​ອິລ ຜູ້​ເປັນພໍ່​ ໄດ້​ຮັບ​ຕໍາ​ແໜ່​ງສູງ​ໃນ​ພັກ​ ເວລາ​ມີອາຍຸປະມານ​ເທົ່າໆ​ກັນ​ ແລະ​ໄດ້​ຮັບ​ການ​ເຝິກ​ຝົນ​ກະກຽມ​ເປັນ​ເວລາ​ຫລາຍ​ທົດ​ສະ​ວັດ ​ເພື່ອໃຫ້​ເຂົ້າຄວບ​ຄຸມປະ​ເທດ​.

ເກົາຫລີ​ເໜືອ​ໄດ້​ປະຕິບັດ​ລັດທິບູຊາ​ບຸກຄົນ ໃນ​ຕົວ​ຜູ້​ນໍາ​ຄົນ​ທໍາ​ອິດ​ຂອງ​ຕົນ ຄືທ່ານ​ກິ​ມອິລຊຸງ ທີ່​ເອີ້ນ​ກັນ​ວ່າ ປະທານຕະຫລອດ​ການ​ ​ແລະ​ຜູ້​ນໍາ​ຄົນ​ປັດຈຸບັນ​ຂອງ​ຕົນ. ບັນດາ​ນັກ​ຊ່ຽວຊານ ກ່ຽວ​ກັບ​ເກົາຫລີ​ເໜືອ​ກ່າວ​ວ່າ ​ເບິ່ງ​ຄື​ວ່າ ທ່ານ​ກິມຈົງ​ອິລຫວັງທີ່​ຈະ​ເຮັດ​ໃຫ້ເປັນ​ທີ່​ແນ່ນອນ​ວ່າ ລູກ​ຊາຍ​ຂອງ​ທ່ານ​ຈະສ້າງ​ຖານ​ສະໜັບສະໜຸນ​ແລະ​ອໍານາດ​ຂຶ້ນ​ໄດ້ ຢູ່ພາຍ​ໃນ​ວົງ​ການພວກ ຜູ້​ນໍາ​ຂັ້ນ​ສູງ​ແລະ​ທະຫານ​ ເພື່ອ​ຮັບປະກັນ​ໃຫ້​ມີ​ການໂອນ​ອໍານາດໃຫ້​ລູກ​ຊາຍ​ຢ່າງ​ລາບ​ລື່ນ. ທ່ານ Park Hyeong Jung ນັກ​ຊ່ຽວຊານ​ການ​ຄົ້ນຄວ້າ​ຂັ້ນ​ອາວຸ​ໂສທີ່​ສະ​ຖາ​ບັນ​ເພື່ອ​ການ​ ທ້ອນ​ໂຮມ​ຊາດ​ຂອງ​ເກົາຫລີ ກ່າວ​ວ່າ ລູກ​ຊາຍ​ຂອງ​ທ່ານ​ກິມຈົງ​ອິລອາດ​ຈະ​ຖືກ​ແຕ່ງ​ຕັ້ງ​ໃຫ້ ​ເປັນ​ຜູ້​ກໍາກັບ​ດູ​ແລ ກົມ​ອົງການ​ແລະ​ການຊີ້​ນໍາ ທີ່ຢູ່​ພາຍ​ໃຕ້​ກອງ​ເລຂາທິການ​ຂອງຄະນະ​ກໍາ ມະການ​ສູນ​ກາງ​ພັກ​ນັ້ນ ຊຶ່ງ​ທ່ານ Park ກ່າວຕື່ມວ່າ :

“ສຽງ​ພາສາ​ເກົາຫລີ…”

ທ່ານ Park Hyeong ​ເວົ້າວ່າ ຕໍາ​ແໜ່​ງ​ເຊ່ນ​ນັ້ນ​ ຈະ​ອໍານວຍ​ໃຫ້​ທ້າວກິມຈົງ​ອຸນ ​ທໍາ​ການ​ແຕ່ງ​ຕັ້ງ​ຕໍາ​ແໜ່​ງຕ່າງໆ​ດ້ວຍ​ຕົນ​ເອງ​ໄດ້ ຊຶ່ງ​ຈະເຮັດໃຫ້ຜູ້ກ່ຽວມີ​ຖານອໍານາດ​ທີ່​ເປັນ​ຂອງຕົນ​ເອງ. ​ທ່ານ Park Hyeong ກ່າວ​ຊີ້​ແຈງ​ຕໍ່​ໄປວ່າ:

“ສຽງ​ພາສາ​ເກົາຫລີ”

ທ່ານ Park ​ເວົ້າວ່າ ຫລັງ​ຈາກ​ນັ້ນ​ ທ້າວ​ກິມກໍ​ຈະ​ສາມາດ​ກ​ວດກາ ແລະ​ຕໍາ​ໜິຕິຕຽນທຸກໆ​ອົງການ​ຢູ່ພາຍ​ໃນ​ພັກ​ນັ້ນໄດ້ ຊຶ່ງ​ກໍ​ເທົ່າ​ກັບ​ເປັນ​ການອໍານວຍ​ໃຫ້​ຜູ້ກ່ຽວສາມາດຕິດຕາມເບິ່ງ ແລະ​ຄວບ​ຄຸມ​ພຶດຕິກໍາຕ່າງໆ​ຂອງ​ພວກ​ຜູ້​ນໍາ​ຂັ້ນ​ສູງທັງຫລາຍໄດ້. ແຕ່​ທ່ານ​ນາງ Balbina Hwang ຄຶດ​ວ່າ ຜົນ​ທີ່​ຈະ​ອອກມາ​ຈາກກອງ​ປະຊຸມ​ນີ້​ ອາດ​ຈະ​ບໍ່ເປັນ​ໄປຕາມຄວາມ​ຄາດ ໝາຍ​ຂອງ​ພວກ​ນັກວິ​ເຄາະເຫດການຢູ່​ຂ້າງ​ນອກ​ ຊຶ່ງ​ທ່ານ​ນາງ Hwang ກ່າວ​ຊີ້​ແຈງ​ວ່າ :

“ຂ້າພະເຈົ້າບໍ່ຄິດວ່າພວກເຮົາຈະພໍໃຈນໍາຜົນທີ່ຈະອອກມາ ໝາຍຄວາມວ່າ ຂ້າພະ ເຈົ້າຄິດວ່າ ບໍ່ຈຳເປັນທີ່ພວກເຂົາເຈົ້າຈະຕ້ອງ​ປະກາດອອກມາ​ ກ່ຽວ​ກັບກິມຈົງອຸນ ນັ້ນ ຫລືວ່າລະບຸຕໍາແໜ່ງຫລືຍົດໃດໆ ໂດຍສະເພາະ.”

ທ່ານ​ນາງ Hwang ບໍ່​ມີ​ຄວາມ​ສົງ​ໄສ​ໃດໆ​ເລີຍ ທີ່​ວ່າ​ທ່ານ​ກິມຈົງ​ອິລເປັນ​ຜູ້​ຕັດສິນ​ໃຈ​ກ່ຽວ​ກັບ​ທຸກໆ​ເລື້ອງ ​ແຕ່​ທ່ານ​ນາງທໍານາຍ​ວ່າ​ ຄົງຈະ​ມີ​ການ​ນອງ​ເລືອດ​ກັນ​ເລັກ​ນ້ອຍ ກ່ອນ​ທີ່ຜູ້​ເປັນ​ລູກ ຊາຍ​ຈະໄດ້​ຂຶ້ນຄອງອໍານາດ​ຢ່າງ​ໜັກ​ແໜ້ນ​ນັ້ນ.

“ຈະມີການ​ໂຕ້​ແຍ້​ງຖົກ​ຖຽງ​ກັນຢູ່ພາຍໃນ ກ່ຽວ​ກັບຄວາມຖືກຕ້ອງຊອບທໍາຂອງກິມ ຈົງ​ອຸນ ​ໃນ​ຖານະເປັນຜູ້ນຳປະເທດຄົນຕໍ່ໄປນັ້ນ. ມັນເປັນຄວາມເຊື່ອສ່ວນຕົວຂອງ ຂ້າພະເຈົ້າ ທີ່ວ່າມັນເປັນເລຶ່ອງທີ່ໄດ້ກໍາໜົດໄວ້ແລ້ວ ສິ່ງ​ໃດ​ກໍ​ຕາມ​ທີ່ທ່ານ​ກິມຈົງ ອິລ ຕ້ອງການນັ້ນ. ແລະນັ້ນກໍແມ່ນສິ່ງທີ່ທ່ານ​ກິມຈົງອິລ ກໍາລັງ​ເຮັດ​ຢູ່ຢ່າງຕັ້ງໜ້າ ເພື່ອ​ໃຫ້​ເປັນ​ໄປ​ຕາມ​ທີ່​ທ່ານ​ຕ້ອງການ.”

ທ່ານ​ນາງ Hwang ກ່າວ​ຕໍ່​ໄປວ່າ ການ​ແຂ່ງຂັນ​ກັນ​ດ້ານ​ການ​ເມືອງ​ໃນ​ຂະນະ​ທີ່​ລູກ​ຊາຍ​ຂອງ​ທ່ານ​ກິມ ສ້າງ​ອໍານາດຂອງ​ຕົນ​ຂຶ້ນ​ນັ້ນ ອາດ​ສາມາດ​ພາ​ໃຫ້​ມີ​ການກວາດ​ລ້າງແລະ​ການ​ປະ ຫານ ຊີວິດ​ພວກ​ຜູ້​ນໍາ​ຂັ້ນ​ສູງ​ຂອງເກົາຫລີ​ເໜືອ​ ບາງ​ຄົນ​ໄດ້.

ພວກ​ທີ່​ສິ້ງ​ຊອມ​ເບິ່ງ​ເຫດການ​ໃນ​ເກົາຫລີ​ເໜືອ​ຫລາຍ​ຄົນ​ຄຶດ​ວ່າ ​ເວລາ​ກໍາລັງ​ຈະ​ໝົດ​ໄປ​ແລ້ວ​ ສໍາລັບ​ຜູ້​ນໍາ​ຂັ້ນ​ສູງ​ສຸດຂອງ​ເກົາຫລີ​ເໜືອ​ນັ້ນ. ທ່ານ​ກິມຈົງ​ອິລ ຊຶ່ງ​ມີ​ອາຍຸ 68 ປີ ນັ້ນ ປາກົດ​ວ່າ​ມີບັນຫາ​ສຸຂະພາບ​ທີ່​ຮ້າຍ​ແຮງຂຶ້ນ​ນັບ​ມື້ ​ແລະ​ໄດ້​ເປັນລົມ​ສາລະ​ບາດ​ຫລື stroke ​ເມື່ອ 2 ປີຜ່ານມາ. ພວກ​ບັນຫາ​ສຸຂະພາບເຫລົ່າ​ນີ້​ ອາດ​ໄດ້​ສົ່ງ​ຜົນ​ກະທົບ​ຕໍ່​ສະມັດຖະພາບ​ໃນ​ການ​ຕັດສິນ​ໃຈ​ຂອງ​ທ່ານ ​ຢູ່ໃນ​ປະ​ເທດ​ທີ່​ກໍາລັງ​ປະ​ເຊີນ​ກັບການ​ທ້າ​ທາຍ​ທີ່​ຮ້າຍ​ແຮງ​ຕ່າງໆ ​ເຊ່ນ​ ​ເສດຖະກິດທີ່ເກືອ​ບພັງ​ທະລາ​ຍລົງຂອງ​ປະ​ເທດ ການ​ຂາດ​ແຄນ​ເຂົ້າປາ​ອາຫານ ການ​ຖືກ​ລົງ​ໂທດ​ຢ່າງ​ໜັກ​ຈາກ​ນາໆ​ຊາດ ​ແລະ​ບໍ່​ມີ​ປະ​ເທດ​ພັນທະ​ມິດ​ທີ່​ສໍາຄັນ​ໃດໆເຫລືອຢູ່ ນອກ ຈາກ​ຈີນ​ເທົ່າ​ນັ້ນ.