ເກົາຫຼີເໜືອ ຊີ້ໃຫ້ຮູ້ວ່າ ພວກເຂົາອາດຈະວາງແຜນການທົດລອງລູກສອນໄຟຂີປະນາວຸດຄັ້ງໃໝ່ ຫຼືການເກາະຜິດທາງດ້ານ ທະຫານອື່ນໆ ຫຼາຍຊົ່ວໂມງຫຼັງຈາກພວກເຂົາໄດ້ກ່າວວ່າ ພວກ ເຂົາບໍ່ມີຄວາມສົນໃຈໃນການເຈລະຈາກ່ຽວກັບ ເລື່ອງອາວຸດນິວເຄລຍຂອງພວກເຂົາ.
ນັກວິເຄາະໄດ້ຄາດຄະເນມາຫຼາຍອາທິດແລ້ວວ່າ ພຽງຢາງອາດຈະຍິງ ທົດລອງລູກສອນໄຟໃນເດືອນຕຸລາ ເພື່ອສະເຫຼີມສະຫຼອງວັນຄົບຮອບ 70 ປີຂອງພັກທີ່ປົກຄອງປະເທດໃນປະຈຸບັນ, ເຊິ່ງເປັນວັນທີ່ສຳຄັນໃນປະຕິທິນການເມືອງຂອງ ເກົາຫຼີເໜືອ.
ເມື່ອຖືກຖາມ ກ່ຽວກັບຄວາມເປັນໄປໄດ້ ຂອງການທົດລອງໃນວັນອັງ ຄານວານນີ້, ທູດປະຈຳ ສະຫະປະຊາຊາດ ຂອງ ເກົາຫຼີເໜືອ ທ່ານ Jang Il Han ໄດ້ກ່າວຕໍ່ນັກຂ່າວວ່າ ທ່ານບໍ່ສາມາດປະຕິເສດ ເຖິງຄວາມເປັນໄປໄດ້, ໂດຍເວົ້າເພີ່ມເຕີມວ່າ “ຂ້າພະເຈົ້າແນ່ໃຈວ່າ ພວກເຮົາຈະມີການສະເຫຼີມສະຫຼອງ ອັນໃຫຍ່ໂຕ ມະໂຫລານ.”
ທ່ານ Jang ໄດ້ກ່າວໃນການຖະແຫຼງຂ່າວທີ່ບໍ່ຄ່ອຍມີໃນ ນະຄອນ ນິວຢອກວ່າ “ພວກເຮົາໄດ້ກ່າວໃນເມື່ອກ່ອນວ່າ ພວກເຮົາຈະຕອບໂຕ້ຕໍ່ການກີດຂວາງທາງດ້ານການທະຫານ ແລະ ຄວາມກົດດັນຂອງ ສະຫະລັດ ດ້ວຍການປັບປຸງໃຫ້ທັນສະໄໝ ແລະ ຂະຫຍາຍກຳລັງນິວເຄລຍຂອງພວກເຮົາ.”
ຄວາມເປັນຫ່ວງກ່ຽວກັບ ຄວາມເປັນໄປໄດ້ຂອງການທົດລອງ ແມ່ນໄດ້ຮັບການສະໜັບ ສະໜຸນເພີ່ມຕື່ມ ໃນວັນອັງຄານວານນີ້ ເມື່ອເວັບໄຊທ໌ ບລັອກຂຽນຂໍ້ຄວາມ 38 North ໄດ້ລາຍງານວ່າ ເກົາຫຼີເໜືອ ປະກົດວ່າໄດ້ສຳເລັດການຍົກລະດັບສະຖານທີ່ຍິງລູກສອນໄຟໃຫຍ່ຂອງພວກເຂົາແລ້ວ.
ບລັອກດັ່ງກ່າວ ທີ່ກຳກັບໂດຍສະຖາບັນສະຫະລັດເກົາຫຼີ ທີ່ມະຫາວິ ທະຍາໄລ Johns Hopkins, ໄດ້ກ່າວວ່າ ພຽງຢາງ ໄດ້ສຳເລັດການກໍ່ສ້າງອາຄານຮອງຮັບ ທີ່ຖານຍິງລູກສອນໄຟ Sohae ແລ້ວເຊິ່ງເປັນບ່ອນທີ່ລູກສອນໄຟຫຼາຍລູກໄດ້ຖືກກະກຽມ.
