ທ່ານນາງ ອອງຊານ ຊູຈີ ຜູ້ນໍາປະຊາທິປະໄຕມຽນມາ ກ່າວວ່າ ລາງວັນ ໂນແບລຂະແໜງສັນຕິພາບທີ່ທ່ານນາງໄດ້ຮັບນັ້ນ ໄດ້ເປີດປະຕູຢູ່ໃນຫົວໃຈຂອງທ່ານນາງ ແລະຊ່ວຍເສີມຂະຫຍາຍຄວາມເປັນຫ່ວງຂອງທ່ານນາງໃນເລື້ອງປະຊາທິປະໄຕ ແລະສິດທິມະນຸດອອກໄປກາຍເຂດຊາຍແດນແຫ່ງຊາດຂອງທ່ານນາງ.
ຜູ້ນໍາຝ່າຍຄ້ານຂອງມຽນມາ ໄດ້ຮຽກຮ້ອງໃຫ້ປ່ອຍຕົວພວກນັກໂທດການ ເມືອງທັງໝົດ ໃນຄໍາປາໄສທີ່ທ່ານນາງກ່າວໃນພິທີຮັບລາງວັນໂນແບລ ທີ່ປະເທດນໍເວ ເມື່ອວັນເສົາວານນີ້ ຊຶ່ງເປັນເວລາ 21 ປີ ຫຼັງຈາກທ່ານນາງ ໄດ້ຮັບລາງວັນດັ່ງກ່າວ. ທ່ານນາງໄດ້ຖືກກັກບໍລິເວນຢູ່ໃນມຽນມາ ໃນປີ 1991 ນັ້ນ ແລະສາມີກັບລູກຊາຍຂອງທ່ານນາງເປັນຜູ້ຮັບເອົາລາງວັນ ກຽດຕິຍົດດັ່ງກ່າວ ໃນນາມທ່ານນາງໃນເວລານັ້ນ.
ທ່ານນາງອອງຊານ ຊູຈີ ກ່າວວ່າ ການຖືກກັກບໍລິເວນ ໄດ້ໂດດດ່ຽວທ່ານ ນາງຈາກໂລກພາຍນອກກໍຈິງ ແຕ່ລາງວັນໂນແບລອັນຊົງກຽດນີ້ ແມ່ນໄດ້ ຊ່ວຍໃຫ້ທ່ານນາງໄດ້ເຊຶ່ອມໂຍງກັບປະຊາຄົມນານາຊາດ.
ທ່ານນາງກ່າວວ່າ ເຖິງແມ່ນການດໍາເນີນການປະຕິຮູບໄດ້ເລີ່ມຕົ້ນຂຶ້ນຢູ່ໃນມຽນມາແລ້ວກໍຕາມ ແຕ່ກໍຍັງມີນັກໂທດການເມືອງທີ່ຍັງຖືກກັກຂັງຢູ່ໃນມຽນມາ ແລະທ່ານນາງເປັນຫ່ວງວ່າ ພວກເຂົາເຈົ້າອາດຖືກມອງຂ້າມໃນເມື່ອວ່າ ບັດນີ້ ພວກນັກໂທດອື່ນໆ ທີ່ຮູ້ຈັກກັນດີ ໄດ້ຖືກປ່ອຍຕົວໄປແລ້ວ.
ທ່ານນາງ ອອງຊານ ຊູຈີ ກ່າວຕໍ່ໄປວ່າ ນັກໂທດຈິດສໍານຶກພຽງຄົນດຽວທີ່ຖືກກັກນັ້ນ ກໍແມ່ນຫຼາຍເກີນໄປແລ້ວ ຊຶ່ງໄດ້ຮັບສຽງຕົບມືຊົມເຊີຍຢ່າງໃຫຍ່ຈາກບັນດາຜູ້ຟັງຜູ້ຊົມ ໃນເມືອງຫຼວງຂອງປະເທດນໍເວນັ້ນ.
ທ່ານນາງກ່າວອີກວ່າ ການດິ້ນຮົນຕໍ່ສູ້ຂອງທ່ານນາງເພື່ອປະຊາທິປະໄຕ ແລະເສລີພາບມາເປັນເວລາດົນນານນັ້ນ ໄດ້ສິດສອນໃຫ້ທ່ານນາງຮູ້ເຖິງພະລັງແຫ່ງຄວາມເມດຕາປານີ ແລະກ່າວຕື່ມວ່າ ເວລາໃດທີ່ຄວາມເຈັບປວດທຸກທໍລະມານໄດ້ຖືກເມີນເສີຍ ມັນກໍຈະປູກຝັງແກ່ນແຫ່ງການຂັດ ແຍ້ງກັນ ເພາະວ່າຄວາມເຈັບປວດນັ້ນ ພາໃຫ້ເກີດຄວາມຮູ້ສຶກຕ້ອຍຕໍ່າ ຄວາມຂົມຂື່ນ ແລະເຄືອງແຄ້ນ ຢູ່ໃນບັນດາຜູ້ທີ່ໄດ້ປະສົບກັບມັນ.