ຜົນຂອງການເລືອກຕັ້ງປະທານາທິບໍດີຂອງໄນຈີເຣຍສະແດງ
ໃຫ້ເຫັນວ່າປະທານາທິບໍດີ Jonathan Goodluck ແຫ່ງ
ໄນຈີເຣຍ ໄດ້ຮັບຄະແນນສຽງນໍາໜ້າຢ່າງຂາດຮອຍໃນວັນ
ຈັນມື້ນີ້ ໃນຂະນະທີ່ທາງການກ່າວວ່າ ຂໍ້ກ່າວຫາຕ່າງໆທີ່
ວ່າມີການສໍ້ໂກງບັດຄະແນນສຽງນັ້ນໄດ້ກະຕຸ້ນໃຫ້ເກີດ
ຄວາມວຸ້ນວາຍຂຶ້ນໃນພາກເໜືອຂອງປະເທດ.
ການນັບບັດຄະແນນສຽງເລືອກຕັ້ງກໍານົດຈະດຳເນີນຕໍ່ໄປ
ໃນຕອນເຊົ້າວັນຈັນມື້ນີ້ ຊຶ່ງຄະນະກໍາມະການກໍາກັບການເລືອກຕັ້ງແຫ່ງຊາດທີ່ເປັນອິດສະລະສະແດງໃຫ້ເຫັນວ່າ ທ່ານ Jonathan ຊະນະໃນ 20 ລັດໃນຈໍານວນທັງໝົດ 36 ລັດຂອງປະເທດ ແລະໃນເຂດນະຄອນຫລວງຂອງປະເທດ. ທ່ານ Muhammadu Buhari ຄູ່ແຂ່ງຄົນສໍາຄັນ ໄດ້ຊະນະໃນ 7 ລັດ.
ຕໍາຫລວດກ່າວວ່າ ພວກປະທ້ວງໄດ້ພາກັນເອົາໄຟຈູດໃນຖະໜົນສາຍໜຶ່ງໃນເມືອງ Kaduna ໃນພາກເໜືອຂອງປະເທດ ບ່ອນທີ່ລະເບີດແຕກຂຶ້ນໃນແລງວັນເສົາຜ່ານມານີ້ທີ່ໂຮມແຮງຫລັງໜຶ່ງ ເຮັດໃຫ້ປະຊາຊົນ 8 ຄົນໄດ້ຮັບບາດເຈັບ.ນອກນັ້ນທາງການຍັງແຈ້ງໃຫ້ຊາບຕື່ມວ່າມີຄວາມວຸ້ນວາຍເກີດຂຶ້ນໃນວັນຈັນມື້ນີ້ທີ່ເມືອງ Kano ແລະເມືອງ Zaria.
ການປ່ອນບັດເລືອກຕັ້ງໃນວັນເສົາຜ່ານມານີ້ ໄດ້ດໍາເນີນໄປຕາມທ້ອງຖິ່ນ ຊຶ່ງທ່ານ Jonathan ໄດ້ຄອບງໍາຄະແນນສຽງໃນພາກໃຕ້ ຊຶ່ງປະຊາຊົນສ່ວນໃຫຍ່ເປັນຊາວຄຣສີຕຽນ ແລະທ່ານ Buhari ອະດີດຜູ້ປົກຄອງປະເທດທີ່ເປັນທະຫານ ຊຶ່ງຊະນະການເລືອກຕັ້ງໃນພາກເໜືອຊຶ່ງປະຊາຊົນສ່ວນຫລາຍເປັນຊາວມຸສລິມນັ້ນ. ບັນດານັກສັງເກດການການເລືອກຕັ້ງກ່າວວ່າ ການປ່ອນບັດເລື້ອກຕັ້ງສ່ວນຫລາຍໄດ້ດໍາເນີນໄປຢ່າງງຽບສະຫງົບ ຊຶ່ງມີການສໍ້ໂກງບັດເລືອກຕັ້ງພຽງບໍ່ເທົ່າໃດກໍລະນີ.
ຖ້າຫາກຜົນຂອງການເລືອກຕັ້ງຂັ້ນສຸດທ້າຍສະແດງໃຫ້ເຫັນວ່າ ທ່ານ Jonathan ເປັນຜູ້
ຊະນະດັ່ງທີ່ທ່ານໄດ້ຮັບຄະແນນສຽງໃນເວລານີ້ ແມ່ນຖືກຕ້ອງຕາມຂໍ້ບັງຄັບ ທີ່ຈໍາເປັນເພື່ອຫລີກລ້ຽງບໍ່ໃຫ້ມີການປ່ອນບັດເລືອກຕັ້ງຮອບຊີ້ຂາດ. ຜູ້ສະໝັກຄົນໃດກໍຕາມ ຕ້ອງການພຽງແຕ່ໄດ້ຮັບຄະແນນສຽງຂ້າງຫລາຍເທົ່ານັ້ນ ແລະຢ່າງນ້ອຍໄດ້ຮັບຄະແນນສຽງໃນຈໍານວນ 1 ສ່ວນ 4 ຂອງບັດເລືອກຕັ້ງທັງໝົດໃນ 24 ລັດໃນຈໍານວນ 36 ລັດທັງໝົດຂອງປະເທດ.
