ປະທານາທິບໍດີ Daniel Ortega ປາກົດວ່າຈະມຸ້ງໜ້າໄປສູ່ການໄດ້ຮັບໄຊຊະນະຢ່າງ
ຖ້ວມລົ້ນໃນຄວາມພະຍາຍາມຂອງທ່ານເພື່ອໃຫ້ໄດ້ດໍາລົງຕໍາແໜ່ງປະທານາທິບໍດີເປັນ
ສະໄໝທີສາມນັ້ນ.
ບັນດາເຈົ້າໜ້າທີ່ກໍາກັບການເລືອກຕັ້ງກ່າວວ່າ ປະທານາທິບໍດີ ໄວ 65 ປີ ທີ່ປົກຄອງ
ປະເທດໃນປັດຈຸບັນ ໄດ້ຮັບສຽງສະໜັບສະໜຸນຫລາຍກວ່າ 60 ສ່ວນຮ້ອຍຂອງຈໍາ
ນວນບັດເລືອກຕັ້ງທັງໝົດໃນວັນອາທິດວານນີ້ ຊຶ່ງເປັນການພຽງພໍເພື່ອຫລີກລ່ຽງການ
ເລືອກຕັ້ງຮອບສອງຫລືຮອບຕັດສິນຊີ້ຂາດ ຈາກຈໍານວນບັດເລືອກຕັ້ງ ທີ່ນັບໄປແລ້ວ
ປະມານ 1 ສ່ວນ 3 ຂອງບັດທັງໝົດນັ້ນ.
ພວກນັກສັງເກດການນາໆຊາດ ແຈ້ງໃຫ້ຊາບວ່າ ມີບັນຫາເລັກນ້ອຍໃນການເຂົ້າຫາ
ໜ່ວຍປ່ອນບັດເລືອກຕັ້ງ.
ທ່ານ Ortega ໄດ້ຮັບການສະໜັບສະໜຸນຈາກພວກປະຊາຊົນ Nicaragua ທີ່ທຸກຈົນ
ຫລາຍຄົນຍ້ອນໂຄງການປະຊາສົງເຄາະຂອງທ່ານທີ່ໄດ້ຮັບການຊ່ອຍເຫລືອດ້ານການ
ເງິນຈາກປະທານາທິບໍດີ Hugo Chavez ແຫ່ງ Venezuela ຊຶ່ງເປັນພັນທະມິດຫົວ
ສັງຄົມນິຍົມທີ່ໃກ້ຊິດຂອງປະທານາທິບໍດີ Nicaragua ນັ້ນ. ຄະແນນນິຍົມຂອງທ່ານ
ນັ້ນກໍໄດ້ຮັບການຊຸກຍູ້ໃຫ້ສູງຂຶ້ນ ຍ້ອນການສະໜັບສະໜຸນຂອງທ່ານຕໍ່ນະໂຍບາຍ
ເສດຖະກິດຕະຫຼາດເສລີນັ້ນ.
ທ່ານ Ortega ຊຶ່ງເທື່ອນຶ່ງເຄີຍເຂົ້າຮ່ວມໃນການປະຕິວັດ Sandinista ແມ່ນຈະໄດ້
ເປັນປະທານາທິບໍດີ Nicaragua ຄົນທໍາອິດທີ່ຈະດໍາລົງຕໍາແໜ່ງ 2 ສະໄໝຊ້ອນ ນັບ
ແຕ່ການປົກຄອງປະເທດແບບຜະເດັດການຂອງທ່ານ Somoza ໄດ້ຍຸດຕິລົງໃນປີ
1979 ເປັນຕົ້ນມາ.
ທ່ານ Ortega ໄດ້ຂຶ້ນຄອງອໍານາດໃນປີ 1984 ຫລັງຈາກນໍາພາຂະບວນການນຶ່ງທີ່
ໄດ້ໂຄ່ນລົ້ມຈອມຜະເດັດການ Anatasio Somoza ລົງຈາກອໍານາດ. ທ່ານ Ortega
ໄດ້ປາໄຊໃນການເລືອກຕັ້ງຄືນອີກສະໄໝນຶ່ງ ໃນປີ 1990 ແຕ່ໄດ້ກັບຄືນມາມີອໍານາດ
ອີກ ໃນປີ 2006.
