ທ່ານ ທອງສິງ ທໍາມະວົງ ນາຍົກລັດຖະມົນຕີຄົນໃຫມ່ຂອງລາວ ໄດ້ຖະແຫຼງເນັ້ນຢໍ້າວ່າ
ການຂຸດຄົ້ນແຫລ່ງລາຍຮັບຂອງລັດຖະບານລາວໃນປັດຈຸບັນເຖິງແມ້ວ່າ ຈະມີທ່າອ່ຽງເພີ່ມ
ຫຼາຍຂຶ້ນຢ່າງຕໍ່ເນື່ອງກໍຕາມ ຫາກແຕ່ກໍເປັນລາຍຮັບທີ່ເພີ່ມຂຶ້ນຈາກການຂຸດຄົ້ນແຫລ່ງຊັບ
ພະຍາກອນທຳມະຊາດເປັນສ່ວນໃຫຍ່ ເຊັ່ນ ການຂຸດຄົ້ນບໍ່ແຮ່ ການຂຸດຄົ້ນໄມ້ ແລະການ
ກໍ່ສ້າງເຂື່ອນຜະລິດກະແສໄຟຟ້າເພື່ອສົ່ງອອກ ເປັນຕົ້ນ.
ຊຶ່ງແນ່ນອນວ່າລາຍຮັບທີ່ເພີ່ມຂຶ້ນດັ່ງກ່າວນີ້ຍ່ອມຈະເຮັດໃຫ້
ສາມາດສະເລ່ຍເປັນລາຍໄດ້ຂອງປະຊາຊົນລາວໄດ້ເພີ່ມຂຶ້ນ
ເຊັ່ນດຽວກັນ. ຫາກແຕ່ວ່າໃນຄວາມເປັນຈິງແລ້ວ ລາຍໄດ້ທີ່
ເພີ່ມຂຶ້ນດັ່ງກ່າວນີ້ກໍ່ເປັນພຽງການສະເລ່ຍຢ່າງສະເໝີພາບກັນ
ໂດຍບໍ່ມີການແບ່ງແຍກລະຫວ່າງຄົນຮັ່ງກັບຄົນທຸກຍາກແຕ່
ຢ່າງໃດ ຈຶ່ງຖືເປັນກໍລະນີທີ່ຍັງບໍ່ມີຄວາມສອດຄ່ອງກັບສະ
ພາບການທີ່ເປັນຈິງຢູ່ໃນລາວ. ດັ່ງທີ່ ທ່ານທອງສິງ ໄດ້ໃຫ້
ການຢືນຢັນ ແລະອະທິບາຍເຖິງສະພາບການທີ່ເກີດຂຶ້ນນັ້ນ
ໃນຕອນນຶ່ງວ່າ:
"ພວກເຮົາມີລາຍຮັບຍອດຜະລິດຕະພັນພາຍໃນເພີ່ມ
ຂຶ້ນແມ່ນຍ້ອນການຂຸດຄົ້ນແຫລ່ງຊັບພະຍາກອນ ແລະ ການນຳໃຊ້ໂຄງການ
ໃຫຍ່ ຕົວຢ່າງຄືເຂື່ອນໄຟຟ້ານໍ້າຕົກ ແລະການຂຸດຄົ້ນບໍ່ແຮ່. ອັນນີ້ເປັນລາຍ
ຮັບ ທີ່ເພີ່ມຂຶ້ນຫຼາຍແທ້ ແຕ່ລາຍຮັບຕົວຈິງຂອງປະຊາຊົນ ແຕ່ລະຄອບຄົວ
ທີ່ຢູ່ຕົວເມືອງ ແລະຊົນນະບົດ ຕົວນີ້ຍັງເພີ່ມຂຶ້ນບໍ່ທັນໄດ້ຫຼາຍ ບໍ່ທັນເທົ່າໃດ
ອັນນີ້ຍັງເປັນອັນອ່ອນອັນນຶ່ງທີ່ຕີລາຄາເປັນບັນຫາສຳຄັນ”
ທ່ານ ທອງສິງ ໄດ້ຖືກເລືອກໃຫ້ເປັນນາຍົກລັດຖະມົນຕີຄົນໃໝ່ຂອງລາວ ໃນລະຫວ່າງກອງ
ປະຊຸມສະໄໜສາມັນຄັ້ງ ທີ່10 ຂອງສະພາແຫ່ງຊາດລາວຊຸດທີ່ 6 ໃນຕອນແລງຂອງວັນທີ່
23 ທັນວາ ໂດຍເປັນມື້ດຽວກັນກັບການຂໍລາອອກຈາກຕຳແໜ່ງນາຍົກລັດຖະມົນຕີຂອງ
ທ່ານ ບົວສອນ ບຸບຜາວັນ ແລະການມີມະຕິຕົກລົງດັ່ງກ່າວຂອງສະພາແຫ່ງຊາດ ກໍ່ເປັນໄປ
ຕາມການນຳສະເໜີຂອງທ່ານ ຈູມມະລີ ໄຊຍະສອນ, ປະທານປະເທດລາວ ແລະພ້ອມ
ກັນນັ້ນ ກອງປະຊຸມກໍ່ຍັງໄດ້ມີມະຕິແຕ່ງຕັ້ງໃຫ້ ທ່ານນາງ ປານີ ຢາທໍຕູ້ ເປັນປະທານສະພາ
ແຫ່ງຊາດລາວຄົນໃຫມ່ແທນທ່ານ ທອງສິງ ອີກດ້ວຍ.
ທ່ານ ທອງສິງ ໃນຖານະນາຍົກລັດຖະມົນຕີຄົນໃໝ່ຂອງ
ລາວໄດ້ໃຫ້ການຢືນຢັນວ່າ ທ່ານຈະປະຕິບັດໜ້າທີ່ຢ່າງດີ
ທີ່ສຸດ ດ້ວຍການປະຕິບັດຕາມກົດໝາຍຢ່າງເຄັ່ງຄັດ ມີ
ຄວາມໂປ່ງໃສ ມີເອກກະພາບ ແລະເສີມສ້າງເງື່ອນໄຂ
ສະດວກໃຫ້ແກ່ພາກທຸລະກິດ ການຄ້າ ການລົງທຶນ
ຮວມເຖິງການພັດທະນາ ເພື່ອຍົກລະດັບຄວາມເປັນຢູ່
ທີ່ດີຂຶ້ນຂອງປະຊາຊົນລາວບັນດາເຜົ່າທີ່ມີຄວາມສະເໝີ
ພາບກັນພາຍໃຕ້ກົດໝາຍ.
ໃນປັດຈຸບັນ ທ່ານ ທອງສິງ ມີອາຍຸໄດ້ 66 ປີ. ທ່ານເກີດຢູ່
ໃນເຂດເມືອງວຽງທອງ ແຂວງຫົວພັນໃນປີ 1944, ເປັນຄົນ
ລາວລຸ່ມ, ຈົບການສຶກສາລະດັບມັດທະຍົມ ແລະຈົບຫຼັກສູດ
ທິດສະດີການເມືອງຊັ້ນສູງ ໂດຍເຂົ້າຮ່ວມໃນຂະບວນການ
ປະຕິວັດເມື່ອປີ 1959 ຫຼືເມື່ອມີອາຍຸໄດ້ພຽງແຕ່ 15 ປີເທົ່າ
ນັ້ນ ແລະຕໍ່ມາໃນປີ 1967 ກໍ່ໄດ້ເປັນສະມາຊິກພັກປະຊາຊົນປະຕິວັດລາວ.
ທ່ານ ທອງສິງ ເຄີຍເປັນແພດທະຫານ ປະຈຳການຢູ່ບັ້ນສູ້ລົບທີ່ຊາຍແດນລາວກັບຫວຽດ
ນາມໃນຊ່ວງປີ 1959-1960 ຫຼັງຈາກນັ້ນ ກໍ່ໄດ້ເຂົ້າຮັບການຝຶກອົບຮົມດ້ານວັດທະນາທໍາ ແລະເຕີບໂຕໃນສາຍງານໃນດ້ານການສຶກສາ ຈົນໄດ້ເປັນລັດຖະມົນຕີວ່າການກະຊວງວັດ
ທະນາທຳໃນຊ່ວງປີ 1983-1988 ແລະກໍ່ໄດ້ເປັນຜູ້ຮັກສາການປະທານສະພາປະຊາຊົນ
ສູງສຸດໃນປີ 1991-1992.
ທ່ານ ທອງສິງ ໄດ້ເປັນກຳມະການກົມການເມືອງສູນກາງພັກ ນັບຕັ້ງແຕ່ປີ 1991 ເປັນ
ຕົ້ນມາ ແລະໄດ້ຮັບຕຳແໜ່ງເປັນເຈົ້າຄອງກຳແພງນະຄອນວຽງຈັນໃນຊ່ວງປີ 2002-
2006 ຕິດຕາມດ້ວຍການໄດ້ຮັບຕໍາແຫນ່ງປະທານສະພາແຫ່ງຊາດລາວ ຊຸດທີ່ 6 ໃນປີ
2006 ຈົນເຖິງວັນທີ່ 23 ທັນວາ 2010 ທີ່ຜ່ານມານີ້.
