ລິ້ງ ສຳຫລັບເຂົ້າຫາ

ພວກນຳພາປີນພູ ຢູ່ເນປານ ພິຈາລະນາ ຈະຢຸດງານປະທ້ວງ (ວີດີໂອ)


ພວກພີ່ນ້ອງພາກັນຮ້ອງໄຫ້ ຂະນະທີ່ສົບຂອງ ຄົນພາປີນພູຄົນນຶ່ງ ຖືກນຳ ໄປໄວ້ຢູ່ວັດຂອງເຜົ່າ Sherpa ໃນນະຄອນຫລວງ Kathmandu, ວັນທີ 19 ເມສາ 2014.
ພວກນຳ​ພາ​ປີນ​ພູ ​ເຜົ່າ Sherpa ທີ່​ມີ​ຊື່​ສຽງຂອງ​ເນ​ປານ
ພິຈາລະນາ ຈະ​ທຳ​ການນັດ​ຢຸດ​ງານປະ​ທ້ວງ ພາຍຫຼັງທີ່ໄດ້
​ເກີດຫິມະ​ເຈື່ອນ​ທີ່​ຮ້າຍ​ແຮງ ຢູ່ເທິງພູ​ເຂົາເອ​ເວີ​ແຣັສ ​ເຮັດ​
ໃຫ້​ເພື່ອ​ນນຳພາ​ປີນ​ພູ 13 ຄົນ ເສຍ​ຊີວິດ ໃນ​ອາທິດແລ້ວ​ນີ້.
ພວກ​ເຂົາ​ເຈົ້າ​ຮຽກຮ້ອງ​ເອົາ ຄ່າ​ຈ້າງສູງ​ຂຶ້ນ ແລະສະຫວັດດີ​
ການອີກຫລາຍໆ​ຢ່າງ.

ພວກ​ພາ​ປິ່ນ​ພູ ​3 ຄົນ ຖືກ​ສົ່ງ​ໄປ​ຮັກສາ​ຕົວຢູ່​ໂຮງພະຍາບານ
ຫຼັງ​ເກີດ​ເຫດ​ຫິມະ​ເຈື່ອນ​ ໃນ​ວັນ​ສຸກຜ່າ​ນມາ ​ແລະອີກ 3 ​ຄົນ
ທີ່​ຍັງ​ຫາຍ​ສາບ​ສູນນັ້ນ ສັນນິຖານ​ວ່າ​ ເສຍ​ຊີວິດ​ແລ້ວ.

ນັກປີນພູຄົນນີ້ ທ້າວ Chhring Sherpa ເວົ້າວ່າ:

"ເອີ... ພວກ Sherpa ບາງຄົນ ຄິດວ່າ ພວກເຮົາຄວນກັບຄືນໄປເຮັດວຽກ. ສ່ວນຄົນອື່ນໆນັ້ນ ເຖິງແມານບໍ່ໄດ້ເວົ້າອອກມາຢ່າງຈະແຈ້ງ ແຕ່ກໍຮູ້ສຶກວ່າ ຈຳເປັນຕ້ອງໄດ້ຄືນໄປເຮັດວຽກ ຊຶ່ງເຫດຜົນຫລັກກໍແມ່ນເງິນ ເພາະວ່າເຂົາ
ເຈົ້າບໍ່ ມີວຽກອື່ນເຮັດ. ເຂົາເຈົ້າກໍເລີຍຄິດວ່າ ຈະກັບຄືນໄປເຮັດວຽກ. ໃນ
ຄວາມເຫັນສ່ວນໂຕ ຂອງຂ້ອຍແລ້ວ ຂ້ອຍຄິດວ່າ ໃນເມື່ອມັນເກີດອຸບັດ ເຫດຮ້າຍແຮງແບບນີ້ ມັນຈະດີກ່ວາ ຖ້າຫາກວ່າ ເຮົາລົບລ້າງການປີນພູ ໝົດຕະຫລອດລະດູນີ້.”


ໃນ​ເວລາ​ທີ່ເກີດຫິມະ​ເຈື່ອນນັ້ນ ພວກ​ Sherpa ຈຳນວນ​ນຶ່ງ ກຳລັງພາກັນເນັ່ງ​ເຊືອກ​
ແລະ​ທັບ​ຫິມະ​ກັບ​ນ້ຳ​ແຂງ ​ເພື່ອແປງ​ທາງ​ຂຶ້ນໄປ ສຳ​ລັບພວກນັກ​ປີນ​ເຂົາຊາວ​ຕ່າງ​
ຊາດທັງຫຼາຍ ທີ່​ລໍຖ້າ​ຢູ່​ຄ້າຍ​ຂ້າງ​ລຸ່ມ. ອຸບັດຕິ​ເຫດທີ່​ເກີດ​ຂຶ້ນ​ນີ້ ​ໄດ້ດຶງ​ຄວາມ​ສົນ​ໃຈ
​ໄປ​ໃສ່​ ວຽກ​ງານທີ່ອັນຕະລາຍ​ຂອງ​ພວກ​ພາ​ປີນ​ພູ ​ຊາວ Sherpa ທັງຫຼາຍ.

​ເນ​ປານ​ໄດ້ປະກາດ ຈະຈ່າຍ​ຄ່າ​ຊົດ​ເຊີຍ ປະມານ 4​00 ​ໂດ​ລາ ​ໃຫ້​ແກ່ຄອບຄົວຂອງ
ພວກທີ່ເສຍ​ຊີ​ວິດ. ພວກ Sherpa ຢາກ​ໄດ້ຄ່າຊົດ​ເຊີຍ ຫລາຍ​ກວ່າ​ນັ້ນ ສຳ​ລັບຄອບ
ຄົວຂອງ​ພວກ​ເຄາະຮ້າຍ.

ພວກ​ພາ​ປີນ​ພູ ທີ່​ເອີ້ນ​ວ່າ Sherpa ຕາມ​ຊື່​ເຜົ່າ​ຂອງ​ເຂົາ​ເຈົ້າ​ນັ້ນ ມີ​ລາຍ​ໄດ້ ​ປະມານ
5,000 ​ໂດ​ລາ ຕໍ່​ລະດູ​ການນຶ່ງ ສຳ​ລັບ​ວຽກ​ງານ​ທີ່​ລຳບາກ​ ທີ່​ເຂົາ​ເຈົ້າ​ສະໜອງ​ໃຫ້
ພວກ​ລູກ​ຄ້າທີ່​ວ່າ​ຈ້າງເຂົາ​ເຈົ້າ​ໃຫ້​ພາ​ປີນ​ພູ ຊຶ່ງ​ເປັນພວກທີ່ມີ​ຄວາມສາມາດ​ໃຊ້​ຈ່າຍ
ເງິນ ຫຼາຍສິບ​ພັນໂດ​ລາ ໃນ​ການກະກຽມ​ ​ເພື່ອ​ປີນຂຶ້ນພູ​ເຂົາ​ເອເວີ​ເ​ເຣັສນັ້ນ.

​ພວກເຈົ້າໜ້າ​ທີ່ເນ​ປານ ກ່າວວ່າ ການ​ຢຸດງານຂອງ​ພວກ​ Sherpa ຈະ​ສົ່ງ​ຜົນ​ກະທົບ​
ຢ່າງແຮງ ​ຕໍ່ຊ່ວງທີ່​ມີ​ຄົນ​ປີນ​ພູ​ຫລາຍ​ທີ່​ສຸດ ຂອງລະດູ​ການປີນ​ພູ​ ຊຶ່ງ​ຈະ​ເລີ້ມ​ຂຶ້ນ​ ໃນ​
ເດືອນພຶດສະພາ​ນີ້.
XS
SM
MD
LG