ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ກອງ​ປະ​ຊຸມ​ສຸດຍອດອົງ​ການ NATO ຈະ​ເປີດ​ຕົວ​ບາດ​ກ້າວ​ທີ່​ເປັນ​ຮູບ​ປະ​ທຳ​ສຳ​ລັບ​ການ​ຮັບ​ເອົາ ຢູ​ເຄ​ຣນ ເຂົ້າ​ເປັນ​ສະ​ມາ​ຊິກ


​ທ່ານ ດັກ​ລາ​ສ ໂຈນ​ສ໌, ຮອງ​ລັດ​ຖະ​ມົນ​ຕີ​ການ​ຕ່າງ​ປະ​ເທດ ສະ​ຫະ​ລັດ ທີ່​ຮັບ​ຜິດ​ຊອບ​ສຳ​ລັບ​ບັນ​ຫາ ຢູ​ໂຣບ ແລະ ຢູ​ໂຣບ​ເອ​ເຊຍ, ໃຫ້​ສຳ​ພາດ​ກັບ ວີ​ໂອ​ເອ ເມື່ອ​ວັນ​ທີ 2 ກໍ​ລະ​ກົດ 2024.
​ທ່ານ ດັກ​ລາ​ສ ໂຈນ​ສ໌, ຮອງ​ລັດ​ຖະ​ມົນ​ຕີ​ການ​ຕ່າງ​ປະ​ເທດ ສະ​ຫະ​ລັດ ທີ່​ຮັບ​ຜິດ​ຊອບ​ສຳ​ລັບ​ບັນ​ຫາ ຢູ​ໂຣບ ແລະ ຢູ​ໂຣບ​ເອ​ເຊຍ, ໃຫ້​ສຳ​ພາດ​ກັບ ວີ​ໂອ​ເອ ເມື່ອ​ວັນ​ທີ 2 ກໍ​ລະ​ກົດ 2024.

ອົງ​ການ NATO ຈະ​ເປີດ​ຕົວ “ວິ​ທີ​ທາງ​ທີ່​ເປັນ​ຮູບ​ປະ​ທຳ​ຕ່າງ​ໆ” ເພື່ອ​ເລັ່ງ​ການ​ເຂົ້າເປັນ​ສະ​ມາ​ຊິກ​ຂອງ ຢູ​ເຄ​ຣນ ໃນ​ພັນ​ທະ​ມິດ​ມະ​ຫາ​ສະ​ໝຸດ ແອັດ​ຕິກ ດັ່ງ​ກ່າວ​ໃນ​ລະ​ຫວ່າງກອງ​ປະ​ຊຸມ​ສຸດ​ຍອດ​ໃນ​ອາ​ທິດ​ໜ້າ​ຢູ່​ນະ​ຄອນຫຼວງ ວໍ​ຊິງ​ຕັນ. ກອງ​ປະ​ຊຸມ​ສຸດຍອດ​ນັ້ນ​ຍັງ​ຈະ​ແກ້​ໄຂ​ບັນ​ຫາ​ດ້ານ​ຄວາມ​ໝັ້ນ​ຄົງ​ລະ​ດັບ​ສູງ ທ່າມ​ກາງ​ສົງ​ຄາມ​ທີ່​ດຳ​ເນີນ​ຢູ່​ຂອງ ຣັດ​ເຊຍ ໃນ ຢູ​ເຄ​ຣນ ແລະ ສິ່ງ​ທ້າ​ທາຍ​ຕ່າງໆ​ໃນ​ພາກ​ພື້ນ ອິນ​ໂດ-ປາ​ຊີ​ຟິກ. ນັກ​ຂ່າວ​ວີ​ໂອ​ເອ ໄນ​ກີ ຈິງ ມີ​ລາຍ​ງານນີ້, ເຊິ່ງ ພຸດ​ທ​ະ​ສອນ ຈະ​ນຳ​ເອົາ​ລາຍ​ລະ​ອຽດ​ມາ​ສ​ະ​ເໜີ​ທ່ານ​ໃນ​ອັນ​ດັບ​ຕໍ່​ໄປ.

ໃນ​ຂະ​ນະ​ທີ່​ສົງ​ຄາມ​ລະ​ຫວ່າງ ຣັດ​ເຊຍ ກັບ ຢູ​ເຄ​ຣນ ດຳ​ເນີນ​ໄປ​ໂດຍ​ການ​ສິ້ນ​ສຸດ​ແມ່ນບໍ່​ຄາດ​ວ່າ​ຈະ​ເກີດ​ຂຶ້ນ​ໃນ​ໄວ​ໆ​ນີ້…

ສະ​ຫະ​ລັດ ຈະ​ຕ້ອນ​ຮັບ​ບັນ​ດາ​ຜູ້​ນຳ​ 32 ຄົນ​ຂອງ​ບັນ​ດາ​ສະ​ມາ​ຊິກ​ພັນ​ທະ​ມິດ ສຳ​ລັບ​ກອງ​ປະ​ຊຸມ​ສຸດຍອດ​ອົງ​ການ NATO ທີ່​ຈະ​ດຳ​ເນີນ​ໄປ​ຈາກ​ວັນ​ທີ 9 ຫາ 11 ກໍ​ລະ​ກົດ​ໃນ​ນະ​ຄອນຫຼວງ ວໍ​ຊິງ​ຕັນ.

ການ​ຂະ​ຫຍາຍ​ການ​ຮັກ​ສາ​ຄວາມ​ປອດ​ໄພ​ຂອງ ຢູ​ເຄ​ຣນ ແລະ ແກ້​ໄຂ​ສິ່ງ​ທ້າ​ທາ​ຍ​ຕ່າງໆ​ຈາກ ຈີນ ແມ່ນ​ຢູ່​ໃນ​ລະ​ດັບ​ຕົ້ນໆ​ຂອງວະ​ລະ​ກອງ​ປະ​ຊຸມ, ອີງ​ຕາມ​ບັນ​ດາ​ເຈົ້າ​ໜ້າ​ທີ່ ສະ​ຫະ​ລັດ.

ທ່ານ ດັກ​ລາ​ສ ໂຈນ​ສ໌, ຮອງ​ລັດ​ຖະ​ມົນ​ຕີ​ການ​ຕ່າງ​ປະ​ເທດ ກ່າວ​ວ່າ “ບໍ່ວ່ານັ້ນ​ຈະ​ເປັນ​ການ​ສະ​ໜັບ​ສະ​ໜູນ ຢູ​ເຄ​ຣນ ແລະ ການ​ປ້ອງ​ກັນ​ຂອງ​ເຂົາ​ເຈົ້າ​ຕໍ່​ການ​ຮຸກ​ຮານ​ຂອງ ຣັດ​ເຊຍ, ບໍ່​ວ່າ​ຈະ​ເປັນ​ການ​ເຮັດ​ວຽກ​ກັບ​ຄູ່​ຮ່ວມ​ມື, ວິ​ທີ​ຕ່າງໆ​ທີ່​ພວກ​ເຮົາ​ສາ​ມາດ​ສ້າງ​ຄວາມ​ຍືດ​ຢຸ່ນ​ຂອງ​ບັນ​ດາ​ພັນ​ທະ​ມິດ ເພື່ອ​ປະ​ເຊີນ​ໜ້າ​ກັບ​ໄພ​ຂົ່​ມ​ຂູ່ ແລະ ສິ່ງ​ທ້າ​ທາຍ​ຈາກ​ສາ​ທາ​ລະ​ນະ​ລັດ ປະ​ຊາ​ຊົນ ຈີນ, ບໍ່​ວ່ານີ້ຈະ​ເປັນ​ໄພ​ຂົ່ມ​ຂູ່​ປະ​ສົມ​ກັນ, ໄພ​ຂົ່ມ​ຂູ່​ທາງ​ຄອມ​ພິວ​ເຕີ, ສິ່ງ​ທີ່​ວ່ານີ້​ແມ່ນ​ບັນ​ຫາ​ທັງ​ໝົດ​ທີ່​ພວກ​ເຮົາ​ຈະ​ເພັ່ງ​ເລັງ​ໃສ່​ຢູ່ກອງ​ປະ​ຊຸມ​ສຸດຍອດ.”

ສະ​ຫະ​ລັດ ແລະ ບັນ​ດາ​ພັນ​ທະ​ມິດ​ອົງ​ການ NATO ຂອງ​ເຂົາ​ເຈົ້າ​ໄດ້​ກ່າວ​ວ່າ ອະ​ນາ​ຄົດ​ຂອງ ຢູ​ເຄ​ຣນ ແມ່ນ​ຂຶ້ນ​ກັບ​ພັນ​ທະ​ມິດ, ແລະ ໃນ​ອາ​ທິດ​ໜ້າ, ກຸ່ມ​ດັ່ງ​ກ່າວ​ຈະ​ເປີດ​ເຜີຍ​ບາດ​ກ້າວ​ທີ່​ເປັນ​ຮູບ​ປະ​ທຳ ເພື່ອ​ນຳ​ເອົາ ຢູ​ເຄ​ຣນ ມາ​ສູ່​ການ​ເປັນ​ສະ​ມາ​ຊິກ​ຂອງ​ອົງ​ການ NATO.

ສະ​ມາ​ຊິກ​ສະ​ພາ​ ສະ​ຫະ​ລັດ ບາງ​ຄົນ​ແມ່ນ​ໄດ້​ສະ​ແດງ​ຄວາມ​ເປັນ​ຫ່ວງ…

ກ່ຽວ​ກັບ ຄວາມ​ພ້ອມ​ຂອງ ຢູ​ເຄ​ຣນ ທີ່​ຈະ​ເຂົ້າ​ຮ່ວມ​ພັນ​ທະ​ມິດ​ດັ່ງ​ກ່າວ ໃນ​ຂະ​ນະ​ທີ່​ປະ​ເທດ​ທີ່​ຖືກ​ທຳ​ລາຍ​ນັ້ນ ໃຫ້​ຄຳ​ໝັ້ນ​ສັນ​ຍາ​ຕົນ​ເອງ​ທີ່​ຈະ​ທຳ​ການ​ປະ​ຕິ​ຮູບ​ພາຍ​ໃນ​ປະ​ເທດ.

ແຕ່​ຈຸດ​ເພັ່ງ​ເລັງ​ຂອງກອງ​ປະ​ຊຸມ​ສຸດຍອດ​ແມ່ນບໍ່​ມີ​ແຕ່ ກ່ຽວ​ກັບ ຄວາມ​ໝັ້ນ​ຄົງ​ຂອງ ຢູ​ເຄ​ຣນ ແລະ ຢູ​ໂຣບ ເທົ່າ​ນັ້ນ.

ບັນ​ດາ​ນັກ​ວິ​ເຄາະ​ຢ້ຳ​ວ່າ ອົງ​ການ NATO ກໍ​ຍັງ​ເລີ່ມ​ທີ່​ຈະ​ຊອກ​ຫາ​ບົດ​ບາດ​ທີ່​ໃຫຍ່​ຂຶ້ນ​ໃນ​ເຂດ​ອິນ​ໂດ​-ປາ​ຊີ​ຟິກ.

ທ່ານ ສ​ເຕ​ເຟັນ ຟ​ລາ​ເນ​ແກັນ ຈາກ​ບໍ​ລິ​ສັດ ແຣນ ກ່າວ​ວ່າ “ປະ​ເທດ ອອ​ສ​ເຕ​ຣ​ເລຍ, ນິວ ຊີ​ແລນ, ສາ​ທາ​ລະ​ນະ​ລັດ ເກົາຫຼີ ແລະ ຍີ່​ປຸ່ນ ແມ່ນ​ມີ​ຄວາມ​ສົນ​ໃຈ​ຫຼາຍ​ໃນ​ການ​ຂະ​ຫຍາຍ​ການ​ຮ່ວມ​ມື​ຂອງ​ເຂົາ​ເຈົ້າ​ຢ່າງ​ເລິກ​ເຊິ່ງ​ກັບ​ອົງ​ການ NATO, ແລະ ໃນ​ຂົງ​ເຂດ​ທີ່​ວ່າ​ນັ້ນ​ບໍ່​ຈຳ​ເປັນ​ຕ້ອງ​ແມ່ນ​ການ​ຮ່ວມ​ມື​ດ້ານ​ທະ​ຫານ​ຕໍ່​ທະ​ຫານ​ໂດຍ​ກົງ, ແຕ່​ບາງ​ຂົງ​ເຂດ​ບ່ອນ​ທີ່​ມັນ​ມີ​ການ​ຮ່ວມ​ມື​ດຳ​ເນີນ​ຢູ່​ແລ້ວ.”

ໃນ​ການ​ສະ​ເຫຼີມ​ສະຫຼອງວັນ​ຄົບ​ຮອບ 75 ປີ​ຂອງ​ອົງ​ການ NATO, ຜູ້​ຊັກ​ຊວນ​ໃນ​ສື່​ສັງ​ຄົມຫຼາຍກວ່າ​ຊາວ​ຄົນ ແມ່ນ​ໄດ້​ຖືກ​ເຊື້ອ​ເຊີນ​ໃຫ້​ໄປ​ເຂົ້າ​ຮ່ວມ​ພິ​ທີ​ດັ່ງ​ກ່າວ ແລະ ສ້າງວິ​ດີ​ໂອ​ເພື່ອ​ລະ​ນຶກ​ເຖິງ​ຄວາມ​ສຳ​ເລັດ​ນັ້ນ.

ອ່ານ​ລາຍ​ງານນີ້​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG