ລິ້ງ ສຳຫລັບເຂົ້າຫາ

logo-print

ມຽນມາ ຈຳກັດ ສື່ມວນຊົນ ກ່ອນການເລືອກຕັ້ງ ດ້ວຍການຂົ່ມຂູ່


ນັກເຄື່ອນໄຫວຖືກປ້າຍໃນລະຫວ່າງການປະທ້ວງຕໍ່ການສັງຫານນັກຂ່າວອິດສະຫຼະ Aung Kyaw Naing ຢູ່ນອກຫ້ອງການລັດຖະບານໃນນະຄອນ ຢາງກຸ້ງ ປະເທດ ມຽນມາ. 26 ຕຸລາ 2014.

ມີການເບິ່ງກັນວ່າ ມຽນມາ ກຳລັງເພີ່ມທະວີການຂົ່ມຂູ່ຫຼາຍຂຶ້ນຕໍ່ ສື່ມວນຊົນກ່ອນໜ້າການເລືອກຕັ້ງ. ພຸດທະສອນ ມີລາຍງານ
ກ່ຽວກັບເລື່ອງນີ້ ມາສະເໜີທ່ານ ໃນອັນດັບຕໍ່ໄປ.

ອຳນາດ​ການ​ປົກຄອງ​ຂອງ​ ມຽນມາ ​ເພີ່​ມທະວີການຈຳກັດ ​ສື່​ມວນ​ຊົນຫຼາຍຂຶ້ນ​ກວ່າເກົ່າ​ ໃນ​ຂະນະ​ທີ່ປະ​ເທດ​ຂອງ​ຕົນ​ກຳລັງ​ຫຍັບເຂົ້າ ໃກ້ການ​ເລືອກ​ຕັ້ງແຫ່ງ​ຊາດ ທີ່ມີຄວາມສຳຄັນເປັນພິເສດ, ໂດຍໃຊ້​ການ​ຂົ່ມຂູ່, ການ​ຮາວີລົບກວນ ​ແລະ ການຈັບກຸມເພື່ອ ປາບປາມ​ບັນດາ​ນັກ​ຂ່າວ ​ແລະອົງການຂ່າວຕ່າງໆ, ອີງ​ຕາມ​ການ​ລະ​ງານ​ຂອງ​ອົງການນິລະ ໂທດກຳ​ສາກົນ ທີ່ນຳອອກເຜີຍແຜ່ເມື່ອ​ວັນ​ທີ 17 ມິຖຸນາ ​ທີ່​ຜ່ານ​ມານີ້.

ທ່ານ Rupert Abbott ຫົວໜ້າ​ການ​ຄົ້ນ​ຄວ້າ​ສຳລັບເຂດ​ເອ​ເຊຍ​ຕາ​ເວັນ​ອອກ​ສຽງ​ໃຕ້ຂອງ​ອົງການ​ນິລະ​ໂທດກຳສາກົນ ໄດ້​ກ່າວ​ຕໍ່ VOA ວ່າ “ບັນດາ​ນັກ​ຂ່າວ​ມີບົດບາດ​ທີ່​ສຳ​ຄັນ​ຫຼາຍ​ຕໍ່​ການ​ເລືອກ​ຕັ້ງ. ​ພວກ​ເຂົາ​ສາມາດ​ຊ່ວຍ​ພັດທະນາ​ການ​ເຂົ້າ​ເຖິງ​ຂໍ້​ມູນ​ຂ່າວສານ, ຊ່ວຍ​ໃຫ້​ປະຊາຊົນ​ເ​ຂົ້າ​ໃຈ​ທາງ​ເລືອກ ທີ່​ພວກ​ເຂົາ​ຕ້ອງ​ໄດ້​ຕັດສິນ. ​ ບົດ​ບາດ​ຂອງບັນດາ​ນັກ​ຂ່າວ, ບົດບາດ​ຂອງສິດເສລີພາບ​ໃນ​ການສະແດງ​ອອກ​ຄຳຄິດຄຳ​ເຫັນ ​ອ້ອມຮອບ​ການ​ເລືອກຕັ້ງ ​ແມ່ນ​ມີ​ຄວາມ​ສຳຄັນ​ຫຼາຍ​ແທ້ໆ.”

ລາຍງານແຈ້ງວ່າ ມີ​ນັກ​ຂ່າວ​ສື່​ມວນ​ຊົນ ມຽນມາ ຢ່າງ​ໜ້ອຍ 1​0 ຄົນ​ໄດ້​ຖືກ​ຈັບ​ກຸມ, ທັງ​ໝົດ​ແມ່ນ ​ຖື​ກຈຳ​ຄຸກໃນໄລຍະ 12 ​ເດືອນຜ່ານມານີ້.

ບັນດາ​ນັກ​ຂ່າວ​ໃນ ມຽນມາ, ​ອີງ​ຕາມ​ການ​ລາຍ​ງານແລ້ວ, ​ແມ່ນ​ມີ​ຄວາມ​ລະມັດ​ລະ​ຫວັງ​ເປັນ​ຢ່າງ​ດີ​ຕໍ່ “​ເສັ້ນຂີດ​ສີ​ແດງ” ທີ່​ພວກ​ເຂົາ​ບໍ່​ສາມາດ​ຂ້າມ​ໄດ້​, ລວມທັງ​ເລື່ອງ​ກ່ຽວກັບ​ທະຫານ​ທີ່​ມີ​ອິດທິພົນສູງ, ພວກ​ຫົວ​ຮຸນ​ແຮງ​ສາສະໜາ​ພຸ​ດ ​ແລະ ຊາຕາກຳຂອງພວກ​ຊົນ​ກຸ່ມ​ນ້ອຍ ​ໂຣຮິງ​ຢາ, ​ເຊິ່ງລັດຖະບານພຽງ​ແຕ່​ອ້າງອີງ​ເຖິງພວກ​ເຂົາວ່າ​ເປັນ​ຊາວ ເບັງລີ ທີ່ມາຈາກ ບັງກລາແດັສ. ​ໃນ​ປີ 2014 ນັກ​ລາຍ​ງານຂ່າວ​ອິດສະຫຼະ Aung Kyaw Naing ໄດ້​ຖືກ​ຂ້າ​ຕາຍໃນລະຫວ່າງ ທີ່ຖືກ​ຄວບ​ຄຸມໂຕ​ໂດຍ​ທະຫານ ຫຼັງ​ຈາກ​ທີ່​ລາວ​ໄດ້​ລາຍ​ງານ​ການ​ປະ​ທະ​ກັນ ​ລະຫວ່າງ​ທະຫານ ມຽນມາ ​ແລະ ກຳລັງຊົນເຜົ່າກະຫລ່ຽງ.

ອົງການ​ນິລະ​ໂທດກຳ​ກ່າວ​ວ່າ ​ເຫດການດັ່ງກ່າວໄດ້ສະແດງໃຫ້ເຫັນ ເຖິງແນວໂນ້ມ​ແຫ່ງ​ຄວາມ​ຢ້ານ​ກົວ​ ແມ່ນ​ຍັງມີ​ຢູ່ ​ສຳລັບ​ບັນດາ​ນັກ​ຂ່າວ​ພາຍໃນ​ປະ​ເທດ.

ນັກ​ຂ່າວ​ບາງ​ຄົນ, ​ທີ່​ໄດ້​ຂຽນອ້າງ​ອີງ​ຢູ່​ໃນ​ບົດ​ລາຍ​ງານ ໂດຍ​ບໍ່​ລະບຸ​ຊື່ ຍ້ອນ​ວ່າ​ຢ້ານ​ຖືກ​ໂຕ້ຕອບ ຄືນ, ​ເຊິ່ງໄດ້​ອະທິ​ບາຍ​ວ່າ​ເຈົ້າ​ໜ້າ​ທີ່​ທະຫານ​ໄດ້​ຂົ່ມຂູ່​ວ່າ​ຈະ​ທຳ​ຮ້າຍ​ຮ່າງ​ກາຍ​ຂອງພວກເຂົາ ຫຼື ​ໂຍນ​ເຂົ້າ​ຄຸກ​ໃນ​ຂະນະ​ທີ່​ພວກ​ເຂົາ​ກຳລັງ​ເຮັດ​ຂ່າວ ​ທີ່​ກ່ຽວ​ຂ້ອງ​ກັບ​ທະຫານ ​ເຊັ່ນ​ວ່າ ການ​ປະ​ທະ​ກັນ​ ໃນ​ບັນດາເຂດ​ທີ່​ມີ​ຊົນ​ເຜົ່າ.

ທ່ານ Abbott ​ເວົ້າວ່າ “ພວກ​ເຂົາປິດ​ປົກຕົວ​ຕົນ​ຂອງ​ພວກ​ເຂົາ. ການທີ່ຈະອ້າງຄຳເວົ້າຄົນ ທີ່ພວກເຮົາໄດ້ສຳພາດໂດຍກົງ ພວກເຂົາຈະຕ້ອງ ໄດ້ລະມັດລະວັງໂຕຫຼາຍ. ພວກເຂົາມີ ຄວາມສ່ຽງ ທີ່ຈະຖືກນຳໄປຂື້ນ ສານເວລາໃດກໍໄດ້ ແລະຍິ່ງກວ່ານັ້ນ, ພວກເຂົາເປັນຫ່ວງ ວ່າຂໍ້ມູນດັ່ງ ກ່າວອາດຈະຖືກນຳໃຊ້ມາຕໍ່ຕ້ານພວກເຂົາເອງ ຖ້າສະຖານະການຂອງ
ການເມືອງມີການປ່ຽນແປງອີກຄັ້ງ.”

ສື່ມວນຊົນຂອງ ມຽນມາ ຕັ້ງແຕ່ການລັດຖະປະຫານຂອງທະຫານໃນປີ 1962 ໄດ້ໃຊ້ເວລາ ເປັນຫຼາຍທົດສະວັດໃນການກວດພິຈາລະນາທີ່ເຄັ່ງຄັດຕໍ່ຮູບເງົາ ແລະແມ່ນກະທັ້ງບົດກອນ. ການປະຕິຮູບຕັ້ງແຕ່ປີ 2011 ມາໄດ້ນຳພາໄປສູ່ການຍົກເລີກໃນການຫ້າມເຂົ້າໄປເບິ່ງ ເວັບໄຊທ໌ຂ່າວ ຕ່າງປະເທດ ແລະ ການກວດພິຈາລະນາ ກ່ອນການເຜີຍແຜ່ຂ່າວ. ການເປັນ ເຈົ້າຂອງໜັງສືພິມເອກະຊົນກໍຍັງຕ້ອງໄດ້ຮັບອະນຸຍາດ ແຕ່ວ່າ ລັດຖະບານ ຍັງສືບຕໍ່ເປັນຜູ້ ຄວບຄຸມການອອກອາກາດຂ່າວແລະ ໜັງສືພິມທີ່ສຳຄັນຕ່າງໆ.

ການກະຈາຍຂ່າວທາງໂທລະພາບ ແລະ ວິທະຍຸຂອງ ວີໂອເອ ພາກພາສາ ມຽນມາ ແມ່ນບໍ່ ໄດ້ຖືກກີດກັ້ນ. ແລະ ກໍຍັງມີຫ້ອງການ ຕັ້ງຢູ່ນະຄອນ ຢາງກຸ້ງ ອີກດ້ວຍ.

ລັດຖະມົນຕີຖະແຫຼງຂ່າວ ມຽນມາ ທ່ານ Ye Htut ໃນບໍ່ເທົ່າໃດ ເດືອນຜ່ານມານີ້ໄດ້ກ່າວ ປ້ອງ ກັນການໂຍະຍານຂອງກົດໝາຍການ ກວດກາ ເຊິ່ງຄັ້ງໜຶ່ງເຄີຍຖືກພິຈາລະນາວ່າ ເຄັ່ງຄັດທີ່ ສຸດໃນໂລກ. ທ່ານໄດ້ກ່າວຕໍ່ບັນດາຜູ້ລາຍງານຂ່າວວ່າ ມຽນມາ ເຄີຍມີປະສົບການ ໃນການ ພັດທະນາທັງໃນແງ່ບວກ ແລະ ແງ່ລົບ ໃນບໍ່ເທົ່າໃດປີມານີ້, ເຊິ່ງໄດ້ສະແດງໃຫ້ເຫັນວ່າ ລັດຖະບານ ຕ້ອງການທີ່ຈະເຮັດວຽກກັບ ສື່ມວນຊົນຂອງສາກົນ. ທ່ານຍັງ ໄດ້ກ່າວວ່າ ການ ປະຕິຮູບເພີ່ມເຕີມ ຂອງນະໂຍບາຍ ການຄຸ້ມຄອງສື່ມວນຊົນ ເບິ່ງຄືວ່າ ຈະບໍ່ທັນມີເທື່ອ ຈົນກວ່າ ຫຼັງຈາກການເລືອກຕັ້ງແຫ່ງຊາດ ເຊິ່ງຄາດວ່າ ຈະມີຂຶ້ນປະ ມານເດືອນພະຈິກ.

ການປ່ອນບັດເລືອກຕັ້ງຂອງປະເທດເມື່ອຫ້າປີທີ່ຜ່ານມາ ໄດ້ມອບອຳນາດໃຫ້ລັດຖະບານ ປະຕິຮູບເຄິ່ງພົນລະເຮືອນ.

ພັກຝ່າຍຄ້ານ ສັນນິບາດແຫ່ງຊາດເພື່ອປະຊາທິປະໄຕ ຫຼື NDL ຂອງ ທ່ານນາງ Aung San Suu Kyi ທີ່ໄດ້ຮັບລາງວັນ Nobel ຂະແໜງສັນຕິພາບ ແມ່ນເບິ່ງຄືວ່າ ຈະໄດ້ຮັບບ່ອນນັ່ງ ຫລາຍທີ່ສຸດ ໃນສະພາແຫ່ງຊາດ ອີງຕາມນັກວິເຄາະຫຼາຍຄົນ.

ພັກ NLD ໃນປີ 1990 ໄດ້ກວາດເອົາ 82 ເປີເຊັນຂອງບ່ອນນັ່ງທັງໝົດ ແຕ່ຜົນການເລືອກຕັ້ງ ໄດ້ຖືກປະກາດໃຫ້ເປັນໂມຄະໂດຍທະຫານ.

ຫຼັງຈາກຫຼາຍທົດສະວັດຂອງຄວາມວຸ້ນວາຍກາງເມືອງທີ່ຍືຶດເຍື້ອ ແລະ ການໃຊ້ກຳລັງປາບປາມ ທີ່ໂຫດຮ້າຍ ທາງກອງທັບແຫ່ງຊາດ ໃນບໍ່ເທົ່າ ໃດປີມານີ້ ໄດ້ເອົາບາດກ້າວເພື່ອແກ້ໄຂຄວາມບໍ່ ພໍໃຈຂອງພວກຊົນເຜົ່າ ກຸ່ມນ້ອຍຫຼາຍສິບກຸ່ມ ແລະໄດ້ເຊັນສັນຍາການຢຸດ ຍິງເປັນລຳດັບມາກັບ ທະຫານກະບົດຫຼາຍກຸ່ມ.

ທ່ານ Abbott ຈາກອົງການນິລະໂທດກຳສາກົນ ກ່າວມ້ວນທ້າຍວ່າ “ພວກເຮົາຮຽກຮ້ອງໃຫ້ ປະຊາຄົມນານາຊາດຈົ່ງຍັງຕ້ອງຕື່ນຕົວມີຄວາມລະມັດລະວັງ ເຊິ່ງໃນຕອນນີ້ ມຽນມາ ກຳລັງ ກ້າວໄປສູ່ການເລືອກຕັ້ງ. ມຽນມາ ແມ່ນກຳລັງເປັນຈຸດດຶງດູດຄວາມສົນໃຈຂອງ ນານາຊາດ ນີ້ແມ່ນໂອກາດດຽວ ທີ່ຈະສາມາດຜັກດັນໃຫ້ລັດຖະບານ ຮັບປະກັນວ່າ ຄຳສັນຍາບາງອັນ ຂອງພວກເຂົາ ແມ່ນຈະຕ້ອງໄດ້ຮັບການປະຕິບັດ.”

ລາຍງານບລອກສົດ! ຜົນການເລືອກຕັ້ງ ປະທານາທິບໍດີ ສະຫະລັດ 2020

ລາຍງານບລອກສົດ! ການເລືອກຕັ້ງ ໃນ ສະຫະລັດ ປີ 2020

ອະດີດຮອງປະທານາທິບໍດີິສະຫະລັດ ທ່ານໂຈ ໄບເດັນ ຊຶ່ງເປັນບຸກຄົນທີ່ຮູ້ຈັກກັນດີໃນວົງການເມືອງຂອງນະຄອນ ຫຼວງວໍຊິງຕັນ ເກືອບເຄິ່ງສັດຕະວັດແລ້ວນັ້ນ ຄາດຄະເນກັນວ່າ ຈະເປັນຜູ້ຊະນະການເລືອກຕັ້ງປະທານາທິບໍດີຂອງສະຫະລັດ ແລະຈະໄດ້ສາບານຕົວເຂົ້າຮັບຕຳແໜ່ງໃນວັນທີ 20 ມັງກອນຈະມາ ເປັນປະທານາທິບໍດີທີ່ມີອາຍຸແກ່ທີ່ສຸດ ໃນປະຫວັດສາດ. ທ່ານໄບເດັນ ສັງກັດພັກເດໂມແຄຣັດ ທີ່ໄດ້ເປັນສະມາຊິກສະພາສູງມາ 36 ປີ ແລະ 8 ປີ ເປັນຮອງປະທານາທິບໍດີ ໃນສະໄໝປະທານາທິບໍດີບາຣັກໂອບາມາ ແມ່ນຄາດກັນໂດຍອົງການຂ່າວຕ່າງໆ ໄດ້ເອົາຊະນະປະທານາທິບໍດີດໍໂນລ ທຣຳ ທີ່ລົງສະໝັກແຂ່ງຂັນເອົາຕຳແໜ່ງຕື່ມອີກ ໃນການໂຄສະນາຫາສຽງທີ່ຂົມຂື່ນ ແລະຫຼັງຈາກໄດ້ມີການນັບບັດຄະແນນສຽງຫຼັງຈາກການເລືອກຕັ້ງມາໄດ້ຫຼາຍມື້ແລ້ວ. ຄະແນນສຽງແມ່ນຍັງຈະໄດ້ຮັບການຢືນຢັນຢ່າງເປັນທາງການ ແລະພວມໄດ້ຮັບການທ້າທາຍຢູ່ໃນສານ ແຕ່ກໍຄາດກັນວ່າ ຈະຜ່ານຜ່າໄປໄດ້. ທ່ານໄບເດັນ ໄດ້ຊະນະຕຳແໜ່ງປະທານາທິບໍດີ ໂດຍໄດ້ຮັບຄະແນນຈາກຜູ້ແທນລັດ ຢ່າງໜ້ອຍ 270 ຄະແນນ ຂອງຈຳນວນທັງໝົດ 538 ຄະແນນ. ການໄດ້ຮັບໄຊຊະຂອງທ່ານໄບເດັນ ເຮັດໃຫ້ທ່ານທຣຳເປັນປະທານາທິບໍດີຄົນທີ 3 ໃນຮອບສີ່ທົດສະວັດ ທີ່ບໍ່ສາມາດໄດ້ຮັບເລືອກ ໃຫ້ເຂົ້າຮັບຕຳແໜ່ງຕື່ມອີກ ຫຼັງຈາກໄດ້ຂຶ້ນເປັນປະທານາທິບໍດີ 4 ປີແລ້ວ.

00:30 8.11.2020

ລາຍງານຂ່າວຫຼ້າສຸດ ໃນເຊົ້າວັນເສົາມື້ນີ້ແຈ້ງວ່າ ທ່ານໂຈ ໄບເດັນ ແລະທ່ານນາງຄາມາມາ ແຮຣິສ ຜູ້ສະໝັກເປັນປະທານາທິບໍດີ ຈາກພັກເດໂມແຄຣັດ ໄດ້ຮັບຄະແນນ 273 ຄະແນນສຽງຂອງຜູ້ຕາງໜ້າລັດແລ້ວ ເຊີນເບິ່ງແຜນທີ່ການເລືອກຕັ້ງໃນສະຫະລັດຂອງເຮົາຕື່ມ!

23:51 7.11.2020

ມາຮອດເຊົ້າວັນເສົາມື້ນີ້ ຕາມເວລາໃນພາກຕາເວັນອອກຂອງສະຫະລັດ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍງານໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214 ຄະແນນ. ທ່ານໄບເດັນຕອ້ງການອີກພຽງ 17 ຄະແນນ ຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາ ແມ່ນຕ້ອງການອີກ 56 ຄະແນນຈຶ່ງຈະຮອດ 270 ຄະແນນເພື່ອຈະເຂົ້າກຳຕຳແໜ່ງຕື່ມອີກ 4 ປີ. ເວລານີ້ຫຼາຍລັດຍັງສືບຕໍ່ນັບຄະແນນກັນຢູ່ ແລະລັດຈໍເຈຍ ໄດ້ປະກາດໃນວັນສຸກມື້ວານນີ້ວ່າ ຕົນຈະນັບຄະແນນ ຄືນໃໝ່ທັງໝົດ ຍ້ອນວ່າ ປະທານາທິບໍດີດໍໂນລ ທຣຳ ຜູ້ສະໝັກຂອງພັກຣີພັບບລີກັນ ແລະຜູ້ທ້າຊິງ ຫຼືຄູ່ແຂ່ງຈາກພັກເດໂມແຄຣັດ ທ່ານໂຈ ໄບເດັນ ມີຄະແນນໃກ້ຄຽງກັນຫຼາຍ.

18:52 7.11.2020

ໃນຕອນຄ່ຳຂອງວັນພະຫັດວານນີ້ ປະທານາທິບໍດີດໍໂນລ ທຣຳ ໄດ້ກ່າວອ້າງ ໂດຍບໍ່ມີຫຼັກຖານວ່າ ທ່ານໄດ້ຖືກສໍ້ໂກງ ໃຫ້ອອກຈາກຕໍາແໜ່ງ ໃນສະໄໝທີສອງ. ທ່ານກ່າວວ່າ “ຖ້າທ່ານນັບບັດຄະແນນສຽງທີ່ປ່ອນແບບຖືກຕ້ອງຕາມກົດໝາຍ, ຂ້າພະເຈົ້າຈະໄດ້ຊະນະຢ່າງງ່າຍໆ.” ທ່ານກ່າວຕໍ່ໄປອີກວ່າ "ຖ້າທ່ານນັບບັດຄະແນນສຽງທີ່ຜິດກົດໝາຍ, ພວກເຂົາສາມາດພະຍາຍາມລັກເອົາການເລືອກຕັ້ງໄປ ຈາກພວກເຮົາໄດ້." ທ່ານທຣໍາ ໄດ້ໃຊ້ເວລາ 16 ນາທີ ຢືນກ່າວຄໍາປາໄສ ຢູ່ຫ້ອງປະຊຸມຖະແຫລງຂ່າວ ໃນທຳນຽບຂາວ ໂດຍກ່າວວ່າ ຄະແນນນຳໜ້າຂອງທ່ານທີ່ມີຢູ່ໃນລັດຕ່າງໆກຳລັງຖືກ "ລັກເອົາອອກໄປຢ່າງລັບໆ ເທື່ອລະເລັກລະນ້ອຍ" ໃນຂະນະທີ່ມີການນັບຄະແນນສຽງຍັງສືບຕໍ່ດໍາເນີນໄປຢູ່ນັ້ນ. ມາຮອດວັນສຸກ ຄະແນນສຽງກໍຍັງບໍ່ມີການປ່ຽນແປງ ຈາກທີ່ພວກເຮົາໄດ້ລາຍໄປແລ້ວ ຄື ທ່ານໄບເດັນໄດ້ຮັບ 253 ຄະແນນ ແລະປະທານາທິບໍດີທຣຳ ໄດ້ຮັບ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາແໜ່ງໄວ້ ໃນອີກ 4 ປີຕໍ່ໜ້າ.

19:29 6.11.2020

ໃນຕອນບ່າຍວັນພະຫັດມື້ນີ້ ຕາມເວລາໃນເຂດພາກຕາເວັນອອກຂອງສະຫະລັດ ທ່ານໂຈ ໄບເດັນ ໄດ້ປາກົດຕົວເປັນເວລາສັ້ນໆ ທີ່ນະຄອນວິລມິງຕັນ ໃນລັດເດລາແວ ໂດຍກ່າວວ່າ "ບັດທຸກໆບັດຈະຕ້ອງໄດ້ຖືກນັບ." ທ່ານກ່າວຕື່ມວ່າ "ມັນແມ່ນກ່ຽວກັບວ່າ ປະຊາຊົນໃນປະເທດນີ້ ໄດ້ສະແດງອອກເຖິງການຕັດສິນໃຈຂອງພວກເຂົາເຈົ້າແບບໃດ ແລະມັນເປັນຄວາມປະສົງຂອງຜູ້ມີສິດປ່ອນບັດ ບໍ່ມີໃຜ ແລະບໍ່ມີສິ່ງໃດທັງໝົດ ທີ່ໄດ້ເລືອກເອົາປະທານາທິບໍດີຂອງສະຫະລັດ."

06:13 6.11.2020

ໃນເວລາ 12 ໂມງເຄິ່ງຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທ່ານໂຈ ໄບເດັນ ຄູ່ແຂ່ງຈາກພັກເດໂມແຄຣັດ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ແຕ່ທ່ານປະທານາທິບໍດີ ດໍໂນລ ທຣຳ ໄດ້ຮັບຕື່ມອີກນຶ່ງຄະແນນ ເພີ້ມຂຶ້ນເປັນ 214. ຂະນະນີ້ ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 56 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນຊຶ່ງຄາດໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້. ລາຍງານຂ່າວແຈ້ງວ່າ ມາຮອດວັນພະຫັດມື້ນີ້ ທ່ານໄບເດັນແມ່ນນຳໜ້າ ໃນຄະແນນສຽງຂອງປະຊາຊົນ ຄືໄດ້ 71 ລ້ານ 6 ແສນຄົນ ປຽບທຽບໃສ່ທ່ານທຣຳ ທີ່ໄດ້ຮັບ​ແຕ່ 68​ ລ້ານ 1 ແສນຄົນ ອີງຕາມອົງການຄົ້ນຄວ້າເອດີສັນແລະອົງການຂ່າວເອພີ.

00:38 6.11.2020

ມາຮອດ 7:00 ຕອນເຊົ້າຂອງວັນພະຫັດ, ທີ 5 ພະຈິກ (ຕາມເວລາວໍຊິງຕັນ) ທັງທ່ານໂຈ ໄບເດັນ ແລະປະທານາທິບໍດີດໍໂນລ ທຣຳ ຍັງມີຄະແນນເທົ່າເດີມ ຕາມທີ່ພວກເຮົາໄດ້ລາຍໄປແລ້ວ ຄື 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນ ຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້ ແຕ່ພວກທ່ານກໍສາມາດຕິດຕາມເບິ່ງໜ້າເວັບໄຊຂອງພວກເຮົາ ກ່ຽວກັບຄະແນນຫລ້າສຸດ.

19:20 5.11.2020

ມາຮອດ 9:00 ຕອນຄໍ່າຂອງວັນພຸດ, ທີ 4 ພະຈິກ ທ່ານໂຈ ໄບເດັນໄດ້ຄະແນນຈາກຜູ້ແທນລັດຕື່ມອີກສອງລັດ ຄືມິຊິແກນ ແລະວິສຄັນຊິນ ຈຶ່ງເຮັດໃຫ້ທ່ານນໍາໜ້າ ທ່ານທຣໍາ ໂດຍມີ 253 ຕໍ່ 213 ຄະແນນ. ຂະນະນີ້ທ່ານໄບເດັນຕອ້ງການອີກພຽງ 17 ຄະແນນຈາກຜູ້ແທນລັດ ກໍຈະຊະນະການເລືອກຕັ້ງແລ້ວ. ສ່ວນທ່ານທຣໍາແມ່ນຕ້ອງການອີກ 57 ຄະແນນຈຶ່ງຈະໄດ້ຮອດ 270 ເພື່ອຈະຮັກສາຕໍາ ແໜ່ງຂອງທ່ານໄວ້ອີກ 4 ປີຕໍ່ໜ້າ. ຍັງເຫຼືອອີກຢູ່ 6 ລັດທີ່ຍັງບໍ່ທັນສຳເລັດການນັບຄະແນນເທື່ອບັດເລືອກຕັ້ງທີ່ສົ່ງທາງໄປສະນີ ປະກອບດ້ວຍລັດເພັນຊິລເວເນຍ, ຄາໂຣໄລນາເໜືອ, ຈໍເຈຍ, ເນວາດາ, ອາຣິໂຊນາ ແລະອາລາສກາ. ທ່ານໄບເດັນໄດ້ຊະນະການເລືອກຕັ້ງແບບມີຄະແນນສູສີກັນກັບທ່ານທຣໍາ ໃນລັດວິສຄັນຊິນ ແລະຄະນະໂຄສະນາຫາສຽງຂອງທ່ານທຣໍາ ຢາກໃຫ້ມີການນັບຄະແນນຄືນໃໝ່. ສ່ວນຜົນການເລືອກຕັ້ງຂັ້ນສຸດທ້າຍນັ້ນ ກໍອາດຈະໃຊ້ເວລາອີກຫລາຍວັນຈຶ່ງຮູ້ໄດ້!

ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ
ທ. ໂຈ ໄບເດັນ ໄດ້ຮັບຄະແນນຈາກຜູ້ແທນລັດ 253 ຄະແນນ ແລະ ປ. ດໍໂນລ ທຣຳ ໄດ້ຮັບ 213 ຄະແນນ

08:42 5.11.2020
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະໃນ 3 ລັດ ເທັກຊັສ ມອນຕານາ ແລະ ໄອໂອວາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ປະທານາທິບໍດີ ດໍໂນລ ທຣຳ ໄດ້ຊະນະ ລັດ ຟລໍຣິດາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ
ອະດີດຮອງປະທານາທິບໍດີ ໂຈ ໄບເດັນ ໄດ້ຊະນະ ລັດ ມິນເນໂຊຕາ

ມາເຖິງປັດຈຸບັນນີ້ ຄະແນນຈາກຜູ້ແທນ ຂອງທ່ານດໍໂນລ ທຣຳ ແລະທ່ານໂຈ ໄບເດັນ ສູສີກັນ 213 ຕໍ່ 220 ໃນຂະນະນີ້ ຍັງເຫຼືອອີກຢູ່ 9 ລັດທີ່ຍັງບໍ່ທັນສຳເລັດການນັບຄະແນນສຽງເທື່ອ ປະກອບດ້ວຍລັດ ເມນ ເພັນຊີລເວເນຍ ຄາໂຣໄລນາເໜືອ ຈໍເຈຍ ມິຊິແກນ ວິສຄັນຊິນ ເນວາດາ ອາຣິໂຊນາ ແລະອາລາສກາ ຄາດກັນວ່າ ຜົນການນັບບັດເລືອກຕັ້ງ ທີ່ສົ່ງເຂົ້າໄປທາງໄປສະນີ ຈະເລີ້ມຂຶ້ນໃນຕອນເຊົ້າ ວັນທີ 4 ພະຈິກນີ້ ຢູ່ໃນສະຫະລັດ ແລະຈະໃຊ້ເວລາຫຼາຍສົມຄວນ ບໍ່ຮູ້ວ່າ ຈະແລ້ວເສັດໃນມື້ນີ້ຫຼືບໍ່!

16:01 4.11.2020

ລາຍງານກ່ຽວກັບການນັບຄະແນນສຽງໃນເບື້ອງຕົ້ນຈາກລັດຕ່າງໆທາງພາກຕາເວັນອອກ ທີ່ໄດ້ປິດໜ່ວຍເລືອກຕັ້ງ

ມື້ນີ້ ປະທານາທິບໍດີ ດໍໂນລ ທຣໍາທີ່ສັງກັດພັກຣີພັບບລິກັນ ແລະຄູ່ແຂ່ງຂອງ ທ່ານກໍຄື ອະດີດຮອງປະທານາທິບໍດີ ໂຈ ໄບເດັນໄດ້ຮັບໄຊຊະນະໃນຫລາຍລັດ ແລ້ວ ຂະນະທີ່ຜົນຂອງການເລືອກຕັ້ງກໍາລັງອອກມາເລື້ອຍໆຢູ່ ແລະຊາວອາເມຣິ ກັນຕັດສິນໃຈວ່າໃຜຈະບໍລິຫານປະເທດຈາກທໍານຽບຂາວໃນນຶ່ງສະໄໝກໍຄື 4 ປີຕໍ່ໜ້າ ຊຶ່ງເລີ້ມຈາກເດືອນມັງກອນຈະມາເຖິງນີ້.

ໜ່ວຍເລືອກຕັ້ງຂອງບັນດາລັດຢູ່ໃນເຂດແຄມຝັ່ງທະເລທາງຕາເວັນອອກ ແລະ ຫລາຍໆລັດໃນເຂດພາກໃຕ້ ແລະພາກຕາເວັນຕົກຕອນກາງ ຂອງປະເທດ ໄດ້ປິດລົງ ແລະກໍໄດ້ເລີ້ມນັບຄະແນນສຽງແລ້ວ. ສ່ວນບັນດາລັດໃນພາກຕາເວັນ ຕົກຂອງປະເທດກໍກໍາລັງປິດໜ່ວຍປ່ອນບັດລົງ ແລະກໍຈະເລີ້ມນັບບັດເລືອກຕັ້ງ ໃນໄວໆນີ້.

ໃນຊົ່ວໂມງທີ່ຈະມາເຖິງນີ້ ຄວນເອົາໃຈໃສ່ຕິດຕາມການນັບຄະແນນສຽງໃນລັດທີ່ຕັ້ງແຄມມະຫາສະໝຸດແອດແລນຕິກ ຄືລັດຟລໍຣິດາ ແລະ ຄາໂລໄຣນາເໜືອ- ເຊິ່ງທັງສອງລັດນີ້ໄດ້ຊ່ວຍໃຫ້ທ່ານທຣໍາ ໄດ້ຮັບໄຊຊະນະໃນປີ 2016 ແລະບ່ອນທີ່ການຢັ່ງຫາງສຽງທ້າຍປີນີ້ສະແດງໃຫ້ເຫັນວ່າທ່ານທຣໍາ ແລະທ່ານໄບເດັນມີ ຄະແນນສູສີກັນ. ລັດເພັນໂຊວາເນຍ ທີ່ເປັນລັດຍາດແຍ່ງກັນ ກໍ່ແມ່ນຈຸດສຸມຂອງຄວາມສົນໃຈອີກແຫ່ງນຶ່ງ ແຕ່ອາດຈະບໍ່ລາຍງານຜົນເລືອກຕັ້ງທີ່ສົມບູນເປັນເວລາຫຼາຍມື້. ນັກວິເຄາະກ່າວວ່າທັງສາມລັດແມ່ນມີຄວາມຈຳເປັນ ສຳລັບທ່ານທຣໍາ ຖ້າເພິ່ນຕ້ອງການດຳລົງຕຳແໜ່ງ ເປັນສະໄໝທີສອງແລະຫລີກລ້ຽງການເປັນປະທານາທິບໍດີສະຫະລັດ ຄົນທີສາມໃນສີ່ທົດສະວັດທີ່ຜ່ານມາທີ່ຈະເສຍໄຊຢູ່ໃນການເລືອກຕັ້ງຄືນ.

ສຳລັບທ່ານໄບເດັນແລ້ວ ການໄດ້ໄຊຊະນະໃນລັດໃດກໍ່ຕາມໃນ 3 ລັດນັ້ນແມ່ນຈະເພີ່ມໂອກາດໃຫ້ທ່ານໄດ້ຮັບຕຳແໜ່ງປະທານາທິບໍດີໃນການພະຍາຍາມຄັ້ງທີສາມຂອງທ່ານ. ທ່ານໄດ້ສູນເສຍການແຂ່ງຂັນເປັນຜູ້ຕາງໜ້າພັກເດໂມແຄຣັດ ເພື່ອເຂົ້າຮ່ວມການເລືອກຕັ້ງປະທານາທິບໍດີ ໃນປີ 1988 ແລະ 2008 ມາແລ້ວ.

ໃນການເລືອກເອົາຜູ້ນໍາປະເທດນັ້ນສະຫະລັດແມ່ນໃຊ້ລະບົບປະຊາທິປະໄຕແບບທາງອ້ອມ ຊຶ່ງບໍ່ໄດ້ເອົາຕາມຄະແນນນິຍົມຂອງປະຊາຊົນທັງຊາດ. ຜົນຂອງການເລືອກຕັ້ງແມ່ນຖືກຕັດສິນໂດຍການເລືອກຕັ້ງຢູ່ໃນແຕ່ລະລັດໃນທົ່ວປະເທດ ທີ່ມີ 50 ລັດ ແລະນະຄອນຫລວງວໍຊິງຕັນ. ເພື່ອຈະໃຫ້ໄດ້ໄຊຊະນະ ໃນການເລືອກຕັ້ງ, ຜູ້ສະໝັກປະທານາທິບໍດີຕ້ອງໄດ້ຮັບ 270 ຄະແນນສຽງ ຈາກຜູ້ແທນໃນລັດ ທີ່ມີສະມາຊິກທັງໝົດ 538 ຄົນ ກໍຄື 538 ສຽງນັ້ນ.

ການເລືອກຕັ້ງປະທານາທິບໍດີສະຫະລັດຈັດຂຶ້ນໃນທຸກໆ 4 ປີໃນວັນອັງຄານທໍາອິດຂອງເດືອນພະຈິກ ຊຶ່ງປີນີ້ກໍກົງກັບວັນທີ 3 ກໍຄືມື້ນີ້ເອງ. ຕາມປົກກະຕິແລ້ວປະຊາຊົນອາເມຣິກັນພາກັນໄປປ່ອນບັດດ້ວຍຕົວເອງຢູ່ສະຖານທີ່ບ່ອນບັດຕ່າງໆ. ແຕ່ວ່າໃນປີນີ້ຍ້ອນການລະບາດຂອງໄວຣຣັສໂຄໂຣນາຫລາຍໆ ລັດແມ່ນຈັດໃຫ້ມີການປ່ອນບັດກ່ອນການເລືອກຕັ້ງ ຊຶ່ງຜູ້ມີສິດປ່ອນບັດ ເລືອກຕັ້ງ ສາມາດສົ່ງບັດລົງຄະແນນສຽງຂອງຕົນໄປທາງໄປສະນີ ຫລືໄປປ່ອນບັດດ້ວຍ ຕົວເອງກ່ອນວັນເລືອກຕັ້ງຕາມສະຖານທີ່ທີ່ຈັດໄວ້ໃຫ້ໃນເມືອງ ແລະເຂດເລືອກ ຕັ້ງຕ່າງໆ ອີງຕາມກົດລະບຽບຂອງແຕ່ລະລັດ.

10:47 4.11.2020
ມີລາຍງານ ຕື່ມອີກ

ທ່ານອາດຈະມັກເລື້ອງນີ້ຄືກັນ

XS
SM
MD
LG