ສະບາຍດີທຸກໆທ່ານ ກັບມາພົບກັບວັນນະສອນ ເຊັ່ນເຄີຍໃນຄໍ່າຄືນຂອງວັນອາທິດນີ້ ພ້ອມກັບເພງລາວມ່ວນໆ ໃນລາຍການສຽງເພງຈາກແດນໄກຂອງ VOA ຊຶ່ງທາງເຮົາ ກໍຈະພະຍາຍາມສົ່ງເສີມແລະສະໜັບສະໜຸນ ສິນລະປິນລາວ ໃນທົ່ວສາລະທິດ ເພື່ອຮັກສາ
ພາສາ ສິນລະປະ ແລະວັດທະນະທຳ ຜ່ານທາງການດົນຕີ ຂໍເລີ່ມດ້ວຍເພງ ຄົບຮອບ 35 ປີ ຂອງວົງດົນຕີສາຍສັມພັນຊຶ່ງເທົ່າທີ່ວັນນະສອນ ຊາບມານີ້ ກໍຖືວ່າ ເປັນວົງດົນຕີລາວຕ່າງແດນ ທີ່ຢືນຍົງຄົງຢູ່ ແລະຮັບໃຊ້ສັງຄົມລາວ ທັງໃນການາດາ ແລະສະຫະລັດ ມາໄດ້ນານກວ່າ 3 ທົດສະວັດ ວັນນະສອນ ຈຶ່ງຂໍນຳສະເໜີຜົນງານເພງ Quebec Je Me Souviens ທີ່ຂັບຮ້ອງແລະປະພັນໂດຍ ອະນຸສັກ ທັມມະວົງສາ ຫົວໜ້າວົງ ສາຍສັມພັນ ຊຶ່ງຫຼາຍໆທ່ານຄົງຈະໄດ້ຟັງການສຳພາດຂອງຜູ້ກ່ຽວ ໃນລາຍການຊີວິດຊາວລາວໃນຕ່າງແດນແລ້ວ ແລະຄັ້ງຕໍ່ໄປທາງເຮົາກໍຈະຫາເພງໃໝ່ໆ ຈາກສິນລະປິນລາວໃນທົ່ວໂລກມາຈັດໃຫ້ທ່ານຜູ້ຟັງ ໄດ້ຮັບຟັງກັນອີກ.
Quebec Je Me Souviens- ອະນຸສັກ ທັມມະວົງສາ
ສ່ວນເພງ “ຈ້າງກະບໍ່ງຶດ” ທີ່ຈະເປີດໃຫ້ຟັງ ຕໍ່ໄປນີ້ ເປັນເພງຂອງສາວນ້ອຍສຽງໃສ ສິນລະ
ປິນສາວ ຈາກສປປ ລາວ ປຸກກີ້ ເງິນລ້ານ ຊຶ່ງເພງນີ້ມີເນື້ອໄນທີ່ຕໍ່ລໍ້ຕໍ່ຖຽງແບບບໍ່ງໍ້ກັນ
ເປັນເພງແນວໜ້າຮັກ ທີ່ວັນນະສອນ ຕັ້ງໃຈຈັດເພື່ອມອບໃຫ້ແຟນເພງທີ່ີພາກັນຂຽນຂໍ້ຄວາມເຂົ້າມາ ແລະກົດ Like Facebook ທັງຂອງ VOA ແລະໜ້າ Facebook ສ່ວນຕົວ ກໍຕ້ອງຂໍຂອບໃຈທຸກໆທ່ານທີ່ຄອຍຕິດຕາມຮັບຟັງແລະເປັນກຳລັງໃຈໃຫ້ VOA
ສະເໜີມາ ແລະໂອກາດໜ້າ ວັນນະສອນ ຫວັງວ່າຄົງຈະເຫັນບັນດາທ່ານຂຽນເຂົ້າມາຫາທາງເຮົາອີກ. ຂໍເຊີນໄປມ່ວນກັບເພງຂອງນ້ອງປຸກກີ້ ພ້ອມໆກັນເລີຍ.
ຂໍປິດທ້າຍລາຍການດ້ວຍເພງຂອງ ດາວ ສີວິໄລ ສິນລະປິນຈາກສປປ ລາວ ໃນບົດເພງ
“ບໍ່ຈ້າງໃຫ້ງຶດ” ຊຶ່ງເປັນເພງຕອບຂອງຝ່າຍຊາຍ ແບບວ່າພໍ່ແງ່ແມ່ງອນ ຊຶ່ງວັນນະສອນ
ວ່າມັນສຳຄັນແລະຈຳເປັນ ທີ່ຈະເຂົ້າໃຈແລະເອົາໃຈໃສ່ອີກຝ່າຍ ຊຶ່ງກັນແລະກັນ ບໍ່ແມ່ນການເອົາລັດເອົາປຽບ ປະຊົດປະຊັນກັນ ແຕ່ຢ່າງໃດ ແບບເນື້ອໄນຂອງເພງນີ້ ແລະກໍຫວັງ
ຢ່າງຍິ່ງວ່າ ໜຸ່ມໆທີ່ໄດ້ຮັບຟັງເພງນີ້ ຄົງຈະປ່ຽນຄວາມຄິດ ເປັນຝ່າຍເຂົ້າໃຈແລະເຫັນໃຈ ຍອມຮັບຜິດກ່ອນ ຍອມງໍ້ກ່ອນ ເອົາໄປຟັງພ້ອມໆກັນເລີຍ. ຂໍໃຫ້ທຸກໆທ່ານນອນລັບຝັນດີ.
