ລິ້ງ ສຳຫລັບເຂົ້າຫາ

ວັນພະຫັດ, ໒໐ ມິຖຸນາ ໒໐໒໔

ບັນຫາດ້ານເສດຖະກິດ ເຮັດໃຫ້ຊາວໜຸ່ມ ອາເມຣິກັນ ກັບມາອາໄສ ຢູ່ກັບຄອບຄົວ


ຄ່າເຊົ່າອາພາດເມັ້ນທົ່ວໄປໄດ້ເພີ່ມຂຶ້ນ 10.7 ເປີເຊັນປີຕໍ່ປີ ມາຮອດວັນທີ 19 ກັນຍາ 2021, ເຊິ່ງເປັນການເພີ່ມຂຶ້ນທີ່ສູງທີ່ສຸດ ໃນນຶ່ງທົດສະວັດ, ອີງຕາມສະມາຄົມບໍລິສັດອະສັງຫາລິມະຊັບ.
ຄ່າເຊົ່າອາພາດເມັ້ນທົ່ວໄປໄດ້ເພີ່ມຂຶ້ນ 10.7 ເປີເຊັນປີຕໍ່ປີ ມາຮອດວັນທີ 19 ກັນຍາ 2021, ເຊິ່ງເປັນການເພີ່ມຂຶ້ນທີ່ສູງທີ່ສຸດ ໃນນຶ່ງທົດສະວັດ, ອີງຕາມສະມາຄົມບໍລິສັດອະສັງຫາລິມະຊັບ.

ຄົນ​ອາ​ເມ​ຣິ​ກັນ​ທີ່​ມີ​ອາ​ຍຸ 18 ປີ​ຂຶ້ນ​ໄປ​ແມ່ນ​ມີ​ອິດ​ສະຫຼະ​ພາບ​ທີ່​ຈະ​ເຮັດ​ທຸກ​ຢ່າງ ແລະ ມີ​ສິ່ງ​ນຶ່ງ​ທີ່​ເຂົາ​ເຈົ້າ​ຖື​ສຳ​ຄັນ​ທີ່​ສຸດ​ກໍ​ຄື​ການມີ​ຄວາມ​ສາ​ມາດ​ທີ່​ຈະ​ອອກໄປ​ເຊົ່າ​ອາ​ພາດ​ເມັ້ນຢູ່​ເອງຫຼື​ຊື້​ເຮືອນ​ເປັນ​ຂອງ​ຕົນ​ເອງ. ແຕ່ຍ້ອນ​ສະ​ພາບ​ຄວາມ​ຫຍຸ້ງ​ຍາກ​ທາງເສດ​ຖະ​ກິດໃນ​ປັດ​ຈຸ​ບັນ​ນີ້ ມັນ​ໄດ້​ເຮັດ​ໃຫ້​ພວກ​ຊາວ​ໜຸ່ມ​ອາ​ໄສ​ຢູ່​ກັບ​ພໍ່​ແມ່ຫຼາຍ​ຂຶ້ນ. ພຸດ​ທະ​ສອນ ມີ​ລາຍ​ງານນີ້​ມາ​ສະ​ເໜີ​ທ່ານ​ໃນ​ອັນ​ດັບ​ຕໍ່​ໄປ.

ຊາວ​ໜຸ່ມ​ອາ​ເມ​ຣິ​ກັນ​ຈະ​ເລີ່ມ​ອອກ​ຈາກ​ບ້ານ​ໄປ​ຢູ່​ດ້ວຍ​ຕົນ​ເອງ​ເວ​ລາ​ທີ່​ເຂົາ​ເຈົ້າ​ໄປ​ຮຽນ​ຕໍ່​ຢູ່​ມະ​ຫາ​ວິ​ທະ​ຍາ​ໄລ,​ເພື່ອ​ທີ່​ຈະ​ຢູ່​ໃກ້​ໂຮງ​ຮຽນ ແລະ ສະ​ດວກ​ໃນ​ການ​ໄປ​ມາ. ພວກນັກ​ສຶກ​ສາ​ມະ​ຫາ​ວິ​ທະ​ຍາ​ໄລ​ຈະ​ຢັດ​ຄ່າ​ເຊົ່າ​ເຮືອນດ້ວຍ​ການ​ອອກ​ຄ່າເຊົ່າ​ຢູ່​ກັບ​ໝູ່, ຈົນ​ກວ່າ​ເຂົາ​ເຈົ້າ​ຈະ​ຮຽນ​ຈົບ​ຈຶ່ງ​ຍ້າຍ​ກັບ​ມາ​ຫາ​ຄອບ​ຄົວ. ແຕ່ຫຼັງ​ຈາກ​ຮຽນ​ຈົບ​ ແລະ ໄດ້​ວຽກ​ເຮັດ​ແລ້ວ​ເຂົາ​ເຈົ້າ​ກໍ​ຈະ​ຍ້າຍ​ອອກ​ຈາກ​ບ້ານ​ອີກ.

ໃນ​ປັດ​ຈຸ​ບັນ​ນີ້​ການ​ຍ້າຍ​ອອກ​ໄປ​ເຊົ່າ​ເຮືອນ​ຢູ່​ດ້ວຍ​ຕົນ​ເອງ​ແມ່ນ​ເປັນ​ອຸ​ປະ​ສັກ​ໃຫຍ່​ສຳ​ລັບ​ນັກ​ສຶກ​ສາ​ຈົບໃໝ່ ຫຼື ຜູ້​ທີ່​ຫາ​ກໍ່​ໄດ້​ວຽກ​ບາງ​ຄົນ, ຍ້ອນ​ບັນ​ຫາ​ທາງ​ດ້ານ​ເສດ​ຖະ​ກິດ​ໄດ້ເຮັດ​ໃຫ້​ຄ່າເຊົ່າ​ອາ​ພາດ​ເມັ້ນ ແລະ ເຮືອນແພງຂຶ້ນຫຼາຍ.

ອັດ​ຕາ​ສະ​ເລ່ຍ​ຄ່າ​ເຊົ່າ​ອາ​ພາດ​ເມັ້ນສຳ​ລັບນຶ່ງ​ຫ້ອງ​ນອນໃນ​ນະ​ຄອນຫຼວງ ວໍ​ຊິ​ງ​ຕັນ ຮອດ​ວັນ​ເດືອນມີ​ນາ 2023 ແມ່ນ 2,300 ໂດລາ, ເຊິ່ງ​ເພີ່ມ​ຂຶ້ນ​ປະ​ມານ​ປະ​ມານ 3 ເປີ​ເຊັນເມື່ອ​ທຽບ​ໃສ່​ກັບ​ປີ​ກາຍນີ້, ອີງ​ຕາ​ເວັບ​ໄຊ້ Zumper.

ນາງ ເຈັນ​ນີ ຄົນ​ອາ​ເມ​ຣິ​ກັນ​ເຊື້ອ​ສາຍ​ລາວ​ທີ່​ໄດ້​ຮຽນ​ຈົບ​ວິ​ທະ​ຍາ​ໄລ​ໃໝ່ ແລະ ຫາ​ກໍ​ໄດ້​ວຽກ​ເຮັດ​ເມື່ອບໍ່​ດົນ​ມາ​ນີ້​ແມ່ນ​ຍັງ​ອາ​ໄສ​ຢູ່​ກັບ​ພໍ່​ແມ່​ ລາວ​ເວົ້າ​ວ່າ​ລາວບໍ່​ສາ​ມາດ​ເຊົ່າ​ເຮືອນ​ຢູ່​ເອງ​ໃນ​ເວ​ລານີ້ ເພາະ​ວ່າ​ເງິນ​ເດືອນ​ຍັງ​ບໍ່​ພໍ​ທີ່​ຈະ​ຈ່າຍ​ໝົດ​ທຸກ​ຢ່າງ.

ນາງ ເຈັນ​ນີ ກ່າວ​ວ່າ “ຂ້າ​ນ້ອຍກະ​ຢາກ​ເຊົ່າ​ອາ​ພ​າດ​ເມັ້ນ​ຢູ່​ເອງ​ ແຕ່​ຕອນນີ້​ຍັງ​ເຮັດ​ບໍ່​ໄດ້​ເທື່ອ. ຂ້າ​ນ້ອຍ​ຫາ​ກໍ່​ໄດ້​ວຽກ​ເຮັດ​ສອງ​ເດືອນ​, ຢາກ​ທ້ອນ​ເງິນ​ໃຫ້​ໄດ້​ກ່ອນ​ແລ້ວ​ຈຶ່ງ​ຊິ​ຊອກ​ Roommate ຢູ່​ນຳ. ດຽວນີ້​ຂ້າ​ນ້ອຍ​ກະ​ບໍ່​ໄດ້​ຢູ່​ນຳ​ພໍ່​ແມ່​ລ້າໆ, ຂ້າ​ນ້ອຍ​ກະ​ໄດ້​ເສຍ​ຄ່າ​ໄຟ, ຄ່າ​ແກັ​ສ ກັບ​ຄ່າ​ນ້ຳ​ໃຫ້​ເພິ່ນ.”

ໃນ​ສາມ​ເດືອນ​ທຳ​ອິດ​ຂອງ​ປີ 2023 ນີ້​ບໍ​ລິ​ສັດ​ອະ​ສັງ​ຫາ​ລິ​ມະ​ຊັບ RubyHome ໄດ້​ທຳ​ການ​ເຕົ້າ​ໂຮມ ແລະ ວິ​ເຄາະ​ຂໍ້​ມູນ ກ່ຽວ​ກັບ ປະ​ຊາ​ຊົນ​ທີ່​ເຊົ່າ ແລະ ຊື້​ເຮືອ​ນ​ໃນ ສະ​ຫະ​ລັດ.

ໃນ​ການ​ວິ​ເຄາະ​ຂອງ​ເຂົາ​ເຈົ້າ​ນັ້ນ, ເຂົາ​ເຈົ້າ​ໄດ້​ພົບ​ວ່າ 34 ເປີ​ເຊັນ ຫຼື 44 ລ້ານ​ຄົນ​ໃນ​ຄົວ​ເຮືອນ ສະ​ຫະ​ລັດ ແມ່ນ​ຜູ້​ທີ່​ເຊົ່າ​ເຮືອນ ຫຼື ອາ​ພາດ​ເມັ້ນ​ຢູ່. ຜູ້​ເຊົ່າຈຳ​ນວນ 34.4 ເປີ​ເຊັ​ນ​ແມ່ນ​ມີ​ອາ​ຍຸ​ຕ່ຳ​ກວ່າ 35 ປີ. 38 ເປີ​ເຊັນ​ຂອງ​ຜູ້​ເຊົ່າ​ແມ່ນ​ອາ​ໃສ​ຢູ່​ຄົນ​ດຽວ, ໃນຂະ​ນະ​ທີ່​ຜູ້ເປັນ​ເຈົ້າ​ຂອງ​ເຮືອນ 59.5 ເປີ​ເຊັນ​ແມ່ນ​ຄູ່​ສາ​ມີ​ພັນ​ລະ​ຍາ, ອີງ​ຕາມ​ບໍ​ລິ​ສັດ RubyHome.

ສຳ​ລັບ​ຂໍ້​ຮຽກ​ຮ້ອງຂອງຜູ້​ທີ່​ຕ້ອງ​ການ​ຢາກ​ເຊົ່າ​ອາ​ພາດ​ເມັ້ນ ຫຼື ເຮືອນ​ນັ້ນ, ເຂົາ​ເຈົ້າ​ຕ້ອງ​ມີ​ລາຍ​ໄດ້​ເທົ່າ ຫຼື ຫຼາຍກວ່າຄ່າ​ເຊົ່າ 2.5 ເທື່ອຕໍ່​ເດືອນ. ຍົກ​ຕົວ​ຢ່າງ​ຄ່າ​ເຊົ່າ​ແມ່ນ 2,000 ໂດ​ລາ​ຕໍ່​ເດືອນຜູ້​ເຊົ່າ​ຕ້ອງ​ມີ​ລາຍ​ໄດ້ຢ່າງ​ໜ້ອຍ 5,000 ໂດ​ລາ ຫຼືຫຼາຍກວ່າ​ນັ້ນ​ຕໍ່​ເດືອນ.

ໃນ​ໄລ​ຍະ​ໂຣກ​ລະ​ບາດໂຄວິດ-19 ກຳ​ລັງ​ຮຸນ​ແຮງ, ປະ​ຊາ​ຊົນ​ຈຳ​ນວນຫຼາຍ​ແມ່ນ​ໄດ້​ສູນ​ເສຍ​ບ້ານ​ຍ້ອນ​ເຂົາ​ເຈົ້າ​ບໍ່​ມີ​ວຽກ​ເຮັດ ແລະ ພວກ​ຊາວ​ໜຸ່ມ​ກໍ​ໄດ້​ກັບ​ຄືນ​ບ້ານ​ເກີດ ຫຼື ໄປ​ຢູ່​ນຳ​ພໍ່​ແມ່​ຍ້ອນ​ບັນ​ຫາ​ດ້ານ​ການ​ເງິນ. ​ພໍ່​ແມ່​ບາງ​ຄົນເຫັນ​ວ່າ​ການ​ທີ່​ລູກ​ອອກ​ຈາກ​ບ້ານ​ໄປ​ຢູ່​ດ້ວຍ​ຕົນ​ເອງ​ແມ່ນ​ສິ່ງ​ທີ່​ຈະ​ຫຼໍ່ຫຼອມ​ໃຫ້​ເຂົາ​ເຈົ້າ​ເປັນ​ຄົນ​ທີ່​ເຂັ້ມ​ແຂງ ແລະ ສາ​ມາດ​ກຸ້ມ​ຕົ້ນ​ເອງ​ໄດ້.

ຍາ​ປ້າ ຈັນ​ແດງ, ຜູ້​ທີ່ຢາກ​ໃຫ້​ລູກ​ສາ​ມາດ​ອອກ​ຈາກ​ບ້ານ​ໄປ​ຕັ້ງ​ຊີ​ວິດ​ຂອງ​ຕົນ​ເອງ​ໄດ້​ກ່າວ​ວ່າ “ເພື່ອ​ເຮົາ​ຢາກ​ພັດ​ທະ​ນາ​ ຖ້າ​ເຂົາ​ຂາດ​ແມ່​ຢາກ​ໃຫ້​ເຂົາ​ເຈົ້າ​ຮູ້​ເບິ່ງ​ຄອບ​ຄົວ​ເຂົາ​ເຈົ້າ​ໃຫ້​ມັນ​ໄປ​ໄດ້​ຫັ້ນ​ນະ ຄັນ​ຖ້າ​ເຂົາ​ເຈົ້າ​ຢູ່​ນຳ​ແມ່ ລະ​ແມ່​ຫັ້ນ​ນະ​ມີ​ແຕ່​ອູ້ມ​ເຂົາ​ເຈົ້າ​ຊ່ອຍ​ເຂົາ​ເຈົ້າ​ໝົດ ລະ​ເຂົາ​ເຈົ້າ​ບໍ່​ຮູ້​ບິນ​ຮູ້​ບິວ ບໍ່​ຮູ້​ລາຍ​ຈ່າຍ​ຂອງ​ເຂົາ​ເຈົ້າ ລະ​ເຂົາ​ເຈົ້າ​ມີ​ເງິນ​ເຂົາ​ເຈົ້າ​ໃຊ້​ໄປ​ແບບບໍ່​ໄດ້​ຄຶດ​ວ່າ​ຊິ​ມີ​ບິວ​ຫຍັງ ເພາະ​ບິວ​ມັນ​ຢູ່​ນຳ​ແມ່​ໝົດ​ເດະ ຄັນ​ລູກ​ຢູ່​ນຳ ເພາະ​ວ່າ​ເຂົາ​ເຈົ້າ​ບໍ່​ໄດ້​ຮູ້​ບິວ​ໃດ​ລູກ​ຢູ່​ນຳ. ຕົວ​ຢ່າງ​ເວົ້າ​ລູກ​ຢູ່​ນຳ ຮູ້​ກະ​ຮູ້​ໜ້ອຍ​ນຶ່ງ​ທີ່​ວ່າ​ເຂົາ​ເຈົ້າ​ຢາກ​ຊ່ອຍ​ເຮົາ​ຊື່ໆ ທີ່​ຈິງ​ເຮົາ​ກະ​ບໍ່​ໄດ້​ຢາກ​ນັ້ນ​ຢາກ​ໃຫ້​ລູກ​ເກັບ​ເງິນ ເພື່ອ​ວ່າ​ໃຫ້​ລູກ​ຕັ້ງ​ໂຕ ເມື່ອ​ເວ​ລາ​ເຂົາ​ເຈົ້າ​ອອກ​ໄປ​ຢູ່​ແຕ່​ເຂົາ​ເຈົ້າ​ຫັ້ນ​ນະ ເຂົາ​ເຈົ້າ​ຮູ້​ວ່າ​ເຂົາ​ເຈົ້າ​ຕ້ອງ​ຫາ​ເງິນ​ມ​າ​ຕ້ອງ​ຈ່າຍ​ບ້ານ, ຕ້ອງ​ຈ່າຍ​ນ້ຳ​, ຕ້ອງ​ຄ່າ​ໄຟ, ຄ່າ​ຮີດ (ອາຍ​ອຸ່ນ), ຄ່າ​ຕະຫຼາດ. ຖ້າ​ມີ​ລູກ​ກະ​ຍັງ​ລູກ, ໃຫ້​ເຂົາ​ເຈົ້າ​ຮູ້​ຮັບ​ຜິດ​ຊອບ​ໂຕນີ້. ຖ້າຈະຢູ່ນຳແມ່ປ້າໝົດຫັ້ນນະເຂົາເຈົ້າບໍ່ຮູ້. ສະນັ້ນລະເຂົາາເຈົ້າມີຄອບຄົວ ຢູ່ນຳເຮົາຕັ້ງໂຮມເງິນໄປຊື້ເຮືອນ, ດາວເຮືອນລະແມ່ປ້າເຮັດໃຫ້ຈັ່ງຊັ້ນ. ເວລາເຂົາເຈົ້າຊື້ເຮືອນແມ່ປ້າກະບໍ່ໄດ້ມອບຊັບສົມບັດໃຫ້ດອກແຕ່ວ່າແມ່ປ້າໃຫ້ເງິນກ້ອນນຶ່ງ ເພື່ອໄປຈ່າຍນຶ່ງ, ຄືວ່າແທັກໝື່ນນຶ່ງແມ່ປ້າຊ່ອຍ.”

ປັດ​ຈຸ​ບັນ​ນີ້​ຄ່າ​ເຊົ່າ​ອາ​ພາດ​ເມັ້ນ​ແມ່ນ​ໄດ້ຫຼຸດ​ລົງຫຼາຍ​ແລ້ວ​ເມື່ອ​ປຽບ​ທຽບ​ໃສ່​ເດືອນ​ສາມ​ຂອງ​ປີ 2022 ເຊິ່ງ​ຄ່າ​ເຊົ່າ​ແມ່ນ​ໄດ້​ເພີ່ມ​ຂຶ້ນ​ເຖິງ 15 ເປີ​ເຊັນ ແລະ ມາ​ຮອດ​ເດືອນ​ສາມ​ປີ 2023 ​ນີ້​ມັນໄດ້ຫຼຸດ​ລົງ​ມາ​ເປັນ 6 ເປີ​ເຊັນ. ຄ່າ​ເຊົ່າ​ອາ​ພາດ​ເມັ້ນ​ໃນ​ນະ​ຄອນ ນິວຢອກ ​ແມ່ນສູງ​ທີ່​ສຸດ​ຢູ່​ໃນ ສະ​ຫະ​ລັດ ເຊິ່ງ​ຫ້ອງ​ເຊົ່າ​ພ້ອມ​ກັບ​ນຶ່ງ​ຫ້ອງນອນ​ແມ່ນ​ປະ​ມານ ສາມ​ພັນ​ສາມ​ຮ້ອຍ​ໂດ​ລາ​ຕໍ່​ເດືອນ ອີງ​ຕາ​ມ​ເວັບ​ໄຊ້ Zumper.

XS
SM
MD
LG