ສາມສົບໄດ້ຖືກຄົ້ນພົບ ໃນການປະຕິບັດງານກູ້ໄພເຮືອອົບພະຍົບລຳນຶ່ງທີ່ຫລົ້ມໃນທະເລ ເມດີແຕເຣນຽນ ໃນຕອນເຊົ້າວັນສຸກມື້ນີ້ ອີງຕາມຄຳເວົ້າຂອງເຈົ້າໜ້າທີ່ກຣີສ.
ຜູ້ໂດຍສານຈຳນວນນຶ່ງ ຂອງອົບພະຍົບຫລາຍກວ່າ 300 ຄົນ ຊຶ່ງໄດ້ໂດດລົງນ້ຳນັ້ນໄດ້ ຖືກຊ່ອຍຊີວິດໄວ້ໄດ້ ຢູ່ນອກແຄມຝັ່ງເກາະ Crete ຂອງກຣີສ.
ໂຄສົກຍິງຄົນນຶ່ງຂອງໜ່ວຍຍາມຝັ່ງກຣີສກ່າວວ່າ ພວກທີ່ຕົກລົງໄປໃນນ້ຳເຮືອທີ່ແລ່ນ ຜ່ານໄປມາ ໃນເຂດດັ່ງກ່າວ ໄດ້ໂຍນເຄື່ອງຊູຊີບລົງໄປໃຫ້ ແລະພວມ ເຄື່ອນໄຫວເພື່ອ ຊ່ອຍຊີວິດພວກອົບພະຍົບ.
ໂຄສົກກ່າວຕື່ມວ່າ ຈຳນວນຜູ້ຄົນທີ່ຕົກຢູ່ໃນອັນຕະລາຍອາດຈະມີຈຳນວນເຖິງຫລາຍ ຮ້ອຍຄົນ.
ຍັງບໍ່ທັນເປັນທີ່ຈະແຈ້ງໃນທັນທີເທື່ອວ່າ ເຮືອລຳນີ້ມາແຕ່ໃສ ແລະຜູ້ໂດຍສານສ່ວນໃຫຍ່ ທີ່ຢູ່ໃນເຮືອເປັນຄົນສັນຊາດໃດ. ຊາວໄນຈີເຣຍ ແລະແກມເບຍແມ່ນປະກອບເປັນພວກ ອົບພະຍົບສ່ວນໃຫຍ່ທີ່ເດີນທາງແຕ່ແຄມຝັ່ງທະເລຂອງລີເບຍໄປຫາກຣີສ ເຖິງແມ່ນວ່າມີ ຊາວໂຊມາເລຍ ແລະເອຣິເທຣຍໃນຈຳນວນເພີ້ມຂຶ້ນພາກັນຫລົບໜີກໍຕາມ.
ເຖິງແມ່ນອົບພະຍົບຊາວຊີເຣຍສ່ວນໃຫຍ່ ເດີນທາງເຂົ້າໄປໃນຢູໂຣບໂດຍທາງພາກພື້ນ ດິນຜ່ານເທີກີກໍຈິງແຕ່ເຮືອລຳນຶ່ງທີ່ບັນທຸກຊາວຊີເຣຍ 65 ຄົນ ຊາວປາ ກິສຖານແລະອັຟ ການິສຖານ ໄດ້ຖືກຈັບຢູ່ນອກແຄມຝັ່ງທະເລຂອງກຣີສ ໃນອາທິດແລ້ວນີ້.
ມີການກະປະມານກັນວ່າ ມີພວກຍົກຍ້າຍຖິ່ນຖານແລະອົບພະຍົບ 880 ຄົນໄດ້ເສຍຊີວິດ ຂະນະທີ່ພະຍາຍາມຂ້າມທະເລເມດີແຕເຣນຽນ ໃນຮອບອາທິດທີ່ຜ່ານມາ ອີງຕາມອົງ ການອົບພະຍົບຂອງສະຫະປະຊາຊາດ.
ໂຕເລກດັ່ງກ່າວ ເຮັດໃຫ້ຈຳນວນຜູ້ເສຍຊີວິດທັງໝົດ ຈາກຫລາຍພັນຄົນ ທີ່ພະຍາຍາມ ເດີນທາງໄປຢູໂຣບໃນໄລຍະ 5 ເດືອນທຳອິດ ຂອງປີ 2016 ເພີ້ມຂຶ້ນ ເປັນຫລາຍກວ່າ 2,500 ຄົນ ສົມທຽບໃສ່ 1,855 ຄົນ ໃນໄລຍະດຽວກັນ ຂອງປີ 2015.
