ລິ້ງ ສຳຫລັບເຂົ້າຫາ

ລັດຖະບານເມັກຊິໂກ ສົ່ງກໍາລັງໄປເສີມ ເພື່ອສູ້ລົບ ກັບພວກຄ້າຢາເສບຕິດ.

  • ສິງ ບູຣົມມະວົງ

ປະທານາທິບໍດີ Felipe Calderón ແຫ່ງເມັກຊິໂກ

ປະທານາທິບໍດີ​ເມັກ​ຊິ​ໂກ​ກ່າວ​ວ່າ ທ່ານ​ຈະ​ສົ່ງ​ທະຫານ​ຕື່ມ​ອີກ 4 ກອງພັນ ໄປ​ເສີມ​ໃນ​ພາກ​ເໜືອ​ຂອງ​ເມັກ​ຊິ​ໂກ ບ່ອນ​ທີ່​ກໍາລັງ​ຂອງ​ລັດຖະບານ​ພວມທໍາ​ການ​ສູ້ລົບກັນ​ຢ່າງ​ນອງ​ເລືອດ​ກັບ​ພວກ​ລັກລອບຄ້າ​ຢາ​ເສບ​ຕິດ​ຢູ່​ໃນ​ຂົງ​ເຂດ.

ປະທານາທິບໍດີ Felipe Calderon ກ່າວ​ໃນ​ວັນ​ເສົາ​ວານ​ນີ້​ວ່າ ພວກທະຫານ​ ເຫລົ່າ​ນີ້​ຈະ​ໄປປະຕິບັດ​ງານ​ໃນ​ລັດ Tamaulipas ​ເລາະ​ຕາມຊາຍ​ແດນ​ຕິ​ດກັບ ​ສະຫະລັດ.

ທ່ານ Calderon ກ່າວ​ຕື່ມ​ວ່າ ທ່ານ​ຈະ​ສົ່ງ​ລົດ​ຫຸ້ມ​ເກາະ​ແລະເສື້ອ​ກັນ​ລູກປືນໄປເຊ່ນກັນ ​ແລະ​ໃຫ້​ຄໍາ​ໝັ້ນ​ສັນຍາ​ວ່າ​ ຈະ​ຂຶ້ນ​ເງິນເດືອນ​ໃຫ້​ແກ່​ພວກ​ທະຫານ​ແລະ​ເພີ່ມ​ເງິນ​ສົງ​ເຄາະ​ຫລືເບ້ຍລ້ຽງໃຫ້​ບັນດານາງ​ໝ້າຍ​ຂອງ​ພວກ​ທະຫານ​ ທີ່​ໄດ້​ເສຍ​ຊີວິດ​ໄປ​ນັ້ນ. ທ່ານ Calderon ຖະ​ແຫລ​ງ​ເຊ່ນ​ນີ້ ຢູ່​ທີ່​ຖານ​ທັບ​ແຫ່ງ​ນຶ່ງ​ໃນ​ເມືອງ Reynosa ຢູ່​ລັດ Tamaulipas ໃນພິທີສະ​ເຫລີ​ມສະຫລອງວັນ​ກອງທັບ​ຂອງ​ເມັກ​ຊິ​ໂກ​ ວັນເສົາ​ວານ​ນີ້.

ທ່ານ Calderon ​ໄດ້​ເລີ້ມ​ເປີດ​ສາກທໍາ​ການ​ໂຈມ​ຕີເພື່ອ​ປາບ​ພວກ​ກຸ່ມ​ຄ້າ​ຢາ​ເສບ​ຕິດ ​ທີ່ມີ​ອໍານາດ​ອິດ​ທິພົນ​ຂອງ​ເມັກ​ຊິ​ໂກ ​ໃນ​ທັນທີ​ຫລັງຈາກຂຶ້ນ​ຄອງ​ຕໍາ​ແໜ່​ງ ປະທານາທິບໍດີ​ໃນ​ເດືອນ​ທັນວາ​ປີ 2006. ບັນດາ​ເຈົ້າ​ໜ້າ​ທີ່​ລັດຖະບານ​ກ່າວ​ວ່າ ນັບ​ແຕ່​ນັ້ນ​ມາ ປະຊາຊົນໃນ​ຈໍານວນ​ຢ່າງ​ໜ້ອຍ 34 ພັນ​ຄົນ​ເສຍ​ຊີວິດ ​ໃນຄວາມ​ຮຸນ​ແຮງທີ່ພົວພັນ​ກັບ​ຂອງ​ຢາ​ເສບ​ຕິດ​ນັ້ນ.

XS
SM
MD
LG