ອອສເຕຣເລຍໄດ້ສົ່ງຕຳຫຼວດ 50 ຄົນໄປຍັງລອນດອນ ໃນການ
ຄາດຄະເນວ່າ ຈະສົ່ງຕຳຫຼວດເຫຼົ່ານີ້ໄປປະຕິບັດງານໃນພາກ
ຕາເວັນອອກຂອງຢູເຄຣນ ເພື່ອຍາມຄຸ້ມກັນຢູ່ບໍລິເວນທີ່ເຮືອບິນ
ມາເລເຊຍຖືກຍິງຕົກ ຊຶ່ງເປັນພາກສ່ວນນຶ່ງຂອງຄະນະປະຕິບັດ
ງານນາໆຊາດ ທີ່ໄດ້ມີການສະເໜີໄປນັ້ນ.
ນາຍົກລັດຖະມົນຕີອອສເຕຣເລຍ ທ່ານ Tony Abbot ໄດ້ກ່າວວ່າ
ລັດຖະມົນຕີການຕ່າງປະເທດຂອງຕົນແລະຂອງ Netherlands
ຈະເດີນທາງໄປນະຄອນ Kyiv ເພື່ອໂອ້ລົມກັນກ່ຽວກັບລາຍລະອຽດ
ຕ່າງໆ ໃນການສົ່ງຄະນະປະຕິບັດງານດັ່ງກ່າວ ທີ່ຢູ່ພາຍໃຕ້ການ
ຄຸ້ມຄອງຂອງອົງການສະຫະປະຊາຊາດ ໄປຍາມຄຸ້ມກັນບໍລິເວນເຮືອບິນຕົກ ຊຶ່ງຢູ່ໃນເຂດຄວບຄຸມຂອງພວກກະບົດ ໃນພາກຕາເວັນອອກຂອງຢູເຄຣນ.
ໃນຂະນະດຽວກັນ ກໍມີເຮືອບິນອີກສອງລຳຈະອອກເດີນທາງຈາກຢູເຄຣນໄປຍັງ Netherlands ທີ່ລຳລຽງສົບພວກເຄາະຮ້າຍອີກຫຼາຍສິບຄົນ ຊຶ່ງໄດ້ເສັຍຊີວິດໃນຖ້ຽວບິນ MH 17 ຂອງມາເລເຊຍ ທີ່ຖືກຍິງຕົກໃນອາທິດແລ້ວນີ້. ຜູ້ໂດຍສານ 298 ຄົນທີ່ໄປກັບເຮືອບິນລຳນັ້ນໄດ້ເສຍຊີວິດ ທັງໝົດເລີຍ.
ຜູ້ຄົນຈຳນວນຫຼາຍສິບພັນຄົນໃນ Netherlands ໄດ້ພາກັນໄປຮ່ວມພິທີໄວ້ອາໄລ ໃນຂະນະທີ່ຖ້ຽວບິນຊຸດທຳອິດ ທີ່ໄດ້ລຳລຽງສົບຂອງພວກເຄາະຮ້າຍຈາກເຫດໂສກນາດຕະກຳດັ່ງກ່າວ ໄປຮອດ Netherlands ໃນວັນພຸດວານນີ້ ຊຶ່ງ 193 ຄົນຂອງພວກເຄາະຮ້າຍແມ່ນເປັນຊາວເນເທີ ແລນ.
ໃນເຊົ້າວັນພະຫັດມື້ນີ້ ຣັດເຊຍ ໄດ້ຮຽກຮ້ອງໃຫ້ສະຫະລັດ ພິສູດວ່າ
ເຮືອບິນອາຍພົ່ນໂດຍສານຂອງມາເລເຊຍໄດ້ຖືກຍິງຕົກ ໂດຍລູກ
ສອນໄຟທີ່ຍິງຈາກພື້ນດິນສູ່ອາກາດ SA-11 ຂອງພວກ ຫົວແບ່ງ
ແຍກດິນແດນ ທີ່ໜຸນຫຼັງໂດຍຣັດເຊຍ ໃນພາກຕາເວັນອອກຂອງຢູເຄຣນ. ຮອງລັດຖະ
ມົນຕີປ້ອງກັນປະເທດຣັດເຊຍ ທ່ານ Anatoly Antonov ຮ້ອງຮຽກໃຫ້ສະຫະລັດ ນຳເອົາຫຼັກຖານມາພິສູດວ່າ ຕົນມີຂໍ້ມູນທາງດ້ານເທັກນິກແລະພາບຈາກດາວທຽມມາສະໜັບສະໜຸນຕໍ່ຂໍ້ກ່າວຫານີ້.
ພວກນັກວິເຄາະຂອງໜ່ວຍສືບລັບສະຫະລັດ ໄດ້ສະຫຼຸບວ່າ ລູກສອນໄຟ SA-11 ຫຼື “Buk” ທີ່ເຮັດໂດຍຣັດເຊຍ ໄດ້ຍິງເຮືອບິນລຳດັ່ງກ່າວຕົກ ແລະມີທ່າທາງວ່າ ພວກກະບົດ
ທີ່ບໍ່ໄດ້ຮັບ ການເຝິກແອບຢ່າງພຽງພໍ ເປັນຜູ້ຍິງລູກສອນໄຟໃສ່ເຮືອບິນລຳນັ້ນໂດຍເຊື່ອ
ວ່າ ເປັນເຮືອບິນຂອງຢູເຄຣນ.
ໃນວັນພຸດວານນີ້ ເຮືອບິນລົບອາຍພົ່ນຂອງຢູເຄຣນ 2 ລຳ ກໍໄດ້ຖືກຍິງຕົກ ໃນພາກຕາເວັນອອກຂອງປະເທດໃນຂະນະທີ່ການສູ້ລົບກັນ ເພີ້ມທະວີຄວາວມຮຸນແຮງຂຶ້ນ ຢູ່ໃນ
ເຂດດັ່ງກ່າວ.
ຜູ້ເຄາະຮ້າຍ ຖ້ຽວບິນ MH17
