ອິສຣາແອລ ໄດ້ເປີດການໂຈມຕີທາງອາກາດຂະໜາດໃຫຍ່ຄັ້ງໃໝ່ໃສ່ເປົ້າໝາຍຕ່າງໆໃນເຂດກາຊາ ທີ່ຖືກຄວບຄຸມໂດຍກຸ່ມຮາມາສ ເມື່ອຂ້າມຄືນວັນອັງຄານວານນີ້, ດ້ວຍບັນດາເຈົ້າໜ້າທີ່ເວົ້າວ່າປະຊາຊົນຫຼາຍຮ້ອຍຄົນໄດ້ເສຍຊີວິດ, ລວມທັງຜູ້ທີ່ຢູ່ໃນສູນອົບພະຍົບແຄມທະເລ.
ໃນຂະນະທີ່ເຂົາເຈົ້າໄດ້ເລື່ອນການບຸກລຸກທາງພື້ນດິນເຂົ້າໄປໃນເຂດແດນປາແລັສໄຕນ໌ ທີ່ຖືກປິດລ້ອມທີ່ແນເປົ້າເພື່ອກວາດລ້າງກຸ່ມຮາມາສນັ້ນ, ກອງທັບອິສຣາແອລໄດ້ກ່າວວ່າການໂຈມຕີທາງອາກາດຂອງເຂົາເຈົ້າໄດ້ທຳລາຍຫຼາຍກວ່າ 400 ສະຖານທີ່ໃນ 24 ຊົ່ວໂມງທີ່ຜ່ານມາ, ຫຼັງຈາກໄດ້ໂຈມຕີ 320 ແຫ່ງເມື່ອນຶ່ງວັນກ່ອນໜ້ານັ້ນ.
ກະຊວງສາທາລະນະສຸກກາຊາ ທີ່ຖືກຄວບຄຸມໂດຍພວກຫົວຮຸນແຮງຮາມາສ ໄດ້ກ່າວວ່າປະຊາຊົນຢ່າງໜ້ອຍ 704 ຄົນໄດ້ເສຍຊີວິດ, ແນວໃດກໍ່ຕາມຕົວເລກສູງສຸດແມ່ນບໍ່ສາມາດຢືນຢັນໄດ້ຢ່າງເປັນອິດສະຫຼະ. ກະຊວງສາທາລະນະສຸກປາແລັສໄຕນ໌ ໄດ້ກ່າວໃນວັນອັງຄານວານນີ້ວ່າ ຈຳນວນຜູ້ເສຍຊີວິດສູງສຸດໃນເຂດກາຊາ ຍ້ອນສົງຄາມທີ່ດົນກວ່າສອງອາທິດນັ້ນໄດ້ເພີ່ມຂຶ້ນເປັນຢ່າງໜ້ອຍ 5,791 ຄົນ.
ດ້ວຍຕົວເລກຜູ້ເສຍຊີວິດສູງສຸດກຳລັງເພີ່ມຂຶ້ນນັ້ນ, ເລຂາທິການໃຫຍ່ອົງການ ສະຫະປະຊາຊາດທ່ານ ແອນໂຕນີໂອ ກູເຕເຣສ ໄດ້ຮຽກຮ້ອງສຳລັບການຢຸດຍິງໃນເຂດກາຊາ, ເຊິ່ງແມ່ນການຢືນຢັດທີ່ໄດ້ຜັກດັນໃຫ້ ອິສຣາແອລ ຮຽກຮ້ອງໃຫ້ທ່ານລາອອກ.
ໃນນະຄອນຫຼວງ ວໍຊິງຕັນ, ທີ່ໂຄສົກສະພາຄວາມໝັ້ນຄົງແຫ່ງຊາດຂອງທຳນຽບຂາວທ່ານ ຈອນ ເຄີບີ ຍັງໄດ້ປະຕິເສດການຢຸດຍິງໃນທັນທີ, ໂດຍເວົ້າວ່າມັນມີແຕ່ຈະໃຫ້ຜົນປະໂຫຍດແກ່ພວກຫົວຮຸນແຮງຮາມາສ. ແນວໃດກໍ່ຕາມ, ທ່ານ ເຄີບີ ບໍ່ໄດ້ປະຕິເສດການຢຸດດ້ານມະນຸດສະທຳເພື່ອອະນຸຍາດໃຫ້ການຊ່ວຍເຫຼືອເພີ່ມເຕີມເຄື່ອນຍ້າຍເຂົ້າໄປໃນເຂດກາຊາ ເພື່ອຊ່ວຍເຫຼືອປະຊາຊົນທີ່ບໍ່ມີບ່ອນຢູ່ອາໄສຫຼາຍຮ້ອຍພັນຄົນ.
ດ້ວຍ ອິສຣາແອລ ວາງແຜນທີ່ຈະທຳການບຸກໂຈມຕີທາງພາກພື້ນດິນໃນເຂດກາຊານັ້ນ, ທ່ານ ເຄີບີ ໄດ້ເຕືອນ ກ່ຽວກັບ ການນອງເລືອດເພີ່ມເຕີມ ແລະ ຈະມີພົນລະເຮືອນເສຍຊີວິດ ແລະ ບາດເຈັບ.
ທ່ານໄດ້ກ່າວຕໍ່ບັນດານັກຂ່າວຢູ່ທຳນຽບຂາວວ່າ “ນີ້ແມ່ນສົງຄາມ. ນີ້ແມ່ນການຕໍ່ສູ້. ນີ້ແມ່ນການນອງເລືອດ. ມັນເປັນຕາຢ້ານ ແລະ ມັນຈະຫຍຸ້ງຍາກ. ແລະ ພົນລະເຮືອນທີ່ບໍລິສຸດແມ່ນຈະໄດ້ຮັບຄວາມເຈັບຊ້ຳໃນຕໍ່ໜ້າ. ຂ້າພະເຈົ້າຫວັງວ່າຈະສາມາດບອກສິ່ງອື່ນທີ່ແຕກຕ່າງກວ່ານີ້. ຂ້າພະເຈົ້າຫວັງວ່າມັນຈະບໍ່ເກີດຂຶ້ນ.”
ອ່ານຂ່າວນີ້ເປັນພາສາອັງກິດ
