ກອງປະຊຸມ ເຈລະຈາ ສັນຕິພາບ ຊີເຣຍ ມີຄວາມຫວັງໜ້ອຍ (ສະ​ໄລ​ດ໌/ວີດີໂອ)

ລັດຖະມົນຕີ​ຕ່າງປະ​ເທດຣັດ​ເຊຍ ທ່ານ Sergai Lavrov ກ່າວ​
ວ່າ ການຕັດສິນ​ໃຈ​ ຂອງເລຂາທິການໃຫຍ່ ສະຫະ​ປະຊາ​ຊາດ
ທ່ານ Ban Ki-moon ທີ່​ບໍ່ໃຫ້ອີຣ່ານ ​ເຂົ້າ​ຮ່ວມ​ການ​ເປີດ​ກອງ​
ປະຊຸມ​ເຈ​ລະ​ຈາ​ສັນຕິພາບ ຊີ​ເຣຍ ​ໃນ​ວັນພຸດມື້ອື່ນນີ້ ​ແມ່ນຜິດ
​ພາດ ​ແຕ່​ບໍ່​ເຖິງ​ຂັ້ນພັງ​ພິນາດ.

ທ່ານ Lavrov ​ໄດ້ໃຫ້ຄວາມເຫັນດັ່ງ​ກ່າວ​ໃນ​ວັນ​ອັງຄານ​ມື້​ນີ້
ຫລັງຈາກການ​ຕັດ​ສິນ​ໃຈ​ຂອງທ່ານ Ban ​ໃນ​ວັນ​ຈັນວານນີ້ທີ່
​ວ່າ ອີຣ່ານບໍ່​ເປັນ​ທີ່​ຕ້ອນຮັບອີກແລ້ວ ເພື່ອໃຫ້ໄປມີໜ້າ ໃນການ
ເຈລະຈາສັນຕິພາບ ທີ່ມີ 30 ກວ່າປະເທດເຂົ້າຮ່ວມຢູ່ ທີ່ເມືອງ
Montreux ປະເທດ Switzerland.

​ໃນ​ວັນ​ອາທິດຜ່ານມານີ້ ທ່ານ Ban ​ໄດ້ປະກາດ​ວ່າ ທ່ານ​ໄດ້ເຊື້ອ​ເຊີນໃຫ້ອີຣ່ານ ​ເຂົ້າ​ຮ່ວມ.
ທ່ານ​ຍັງ​ກ່າວ​ອີກ​ວ່າ ທ່ານ​ມີ​ຄວາມ​ເຊື່ອ​ວ່າອີຣ່ານ ​ເຂົ້າ​ໃຈ​ດີ ເຖິງ​ເປົ້າ​ໝາຍ​ຂອງ​ການ​ເຈລະ
​ຈາ ​ແລະ​ຈະ​ເອົາບົດບາດ​ໃນທາງບວກແລະສ້າງສັນ ກ່ຽວ ກັບການເຈລາຈາທີ່ວ່ານີ້.

​ແຕ່​ວ່າ ອີຣ່ານ​ໄດ້​ປະຕິ​ເສດຕໍ່​ແນວ​ຄິດ ກ່ຽວກັບການສ້າງຕັ້ງ ລັດຖະບານ​ໄລຍະ ຂ້າມໃນ
ຊີ​ເຣຍ ​ແລະໂຄສົກ​ຂອງທ່ານ Ban ຄືທ່ານ Martin Nesirky ​ກ່າວ​ວ່າ ການ​ປະຕິ​ເສດ​ບໍ່
ຍອມຮັບເອົາພື້ນຖານທີ່ມີການເຂົ້າໃຈກັນມາເປັນເວລາດົນ ນານແລ້ວກ່ຽວກັບການເຈລະ
ຈາ​ແມ່ນບໍ່ສອດຄ່ອງກັບຄວາມໝາຍໝັ້ນກ່ອນໜ້າ ນີ້ ເພື່ອໃຫ້ເອົາບົດບາດໃນທາງບວກ
ນັ້ນ.

ທ່ານກ່າວ​ວ່າ ທ່ານ Ban ຫວັງວ່າ​ຈະຮ່ວມ​ກັນກັບບັນດາປະເທດທີ່ໄປມີໜ້າໃນ​ຄັ້ງນີ້ “ຊຸກຍູ້​ຄັ້ງສຳຄັນເພື່ອໃຫ້ມີ​ສັນຕິພາບ.” ການ​ປະຊຸມ​ໃນ​ວັນ​ພຸດ​ມື້​ອື່ນນີ້ ຈະ​ເປີດໂອກາດໃຫ້​ບັນດາ
ຜູ້ຕາງໜ້າໄດ້ຖະ​ແຫລ​ງ ກ່ຽວກັບການດຳເນີນຄວາມ​ພະຍາຍາມ ເພື່ອສ້າງ​ສັນຕິພາບ ກ່ອນ
ຈະຫັນໄປສູ່ ການເຈລະຈາໃນມື້​ວັນ​ສຸກ ທີ່​ນະຄອນ​ Geneva ລະຫວ່າງ​ພັກຝ່າຍຕ່າງໆຂອງ
​ຊີ​ເຣຍ ​ເທົ່າ​ນັ້ນ​ ​ກັບທູດ​ພິ​ເສດສະຫະ​ປະຊາ​ຊາດ ແລະສັນນິບາດອາຣັບ ທ່ານ Lakhdar Brahimi.

​