ທ່ານຜູ້ຟັງທີ່ເຄົາລົບ ມື້ອື່ນນີ້ ວັນທີ 25 ທັນວາ ກໍຈະແມ່ນວັນ
ສະຫລອງ ບຸນຄຣິສມັສກັນແລ້ວ ບັນຍາກາດໃນທົ່ວສະຫະລັດ
ຕອນນີ້ ແມ່ນຄຶກຄຶ້ນໄປດ້ວຍສຽງເພງຄຣິສມັສ ແລະການເອ້
ຍ້ອງທີ່ສວຍງາມຢູ່ຕາມຫົວເມືອງນ້ອຍໃຫຍ່ ໂຮມທັງນະຄອນ
ລອສ ແອນຈີແລສ ທີ່ຕັ້ງຢູ່ແຄມທະເລ ຂ້ອນໄປທາງພາກໃຕ້
ຂອງລັດແຄລິຟໍເນຍ ເປັນເມືອງທີ່ມີອາກາດເຢັນສະບາຍ ໂດຍ
ສະເພາະໃນຊ່ວງເທດສະການຄຣິສມັສນີ້ ແມ່ນໜ້າເບິ່ງໜ້າຊົມ
ເປັນພິເສດໃນຍາມຄ່ຳຄືນ ຍ້ອນແສງໄຟແລະແສງສີເອ້ຍ້ອງ
ຂອງບຸນຄຣິສມັສ ຢູ່ທົ່ວຕົວເມືອງ. ດາຣາຈະພາເຮົາໄປຊົມ
ສະຖານທີ່ເອ້ຍ້ອງທີ່ເດັ່ນໆຫລາຍໆແຫ່ງຂອງເມືອງນີ້ ທີ່ຖືວ່າ
ເປັນສູນກາງຄວາມບັນເທີງແລະອຸດສາຫະກຳຮູບເງົາຂອງ
ສະຫະລັດ ອິງຕາມລາຍງານຂອງ Elizabeth Lee.
ສຽງບັນເລງເພງຄຣິສມັສຂອງວົງດົນຕີ ການຕົກແຕ່ງເອ້ຍ້ອງຕ່າງໆ ແລະແສງສີຂອງ
ດອກໄຟນ້ອຍໆຫລາຍຮ້ອຍດອກຢູ່ຕາມຕົ້ນໄມ້ ເຮັດໃຫ້ຄຣິສມັສປີນີ້ ຮຸ່ງແຈ້ງສະຫວ່າງ
ສະໄຫວ ມີສີສັນ ແລະຄຶກຄື້ນມ່ວນຊື່ນເປັນພິເສດຢູ່ໃນພາກໃຕ້ລັດແຄລິຟໍເນຍ ສຳຫລັບ
ຫລາຍໆຄົນ ເຊັ່ນທ້າວ Marquis Rosales ທີ່ມາຊົມການເອ້ຍ້ອງບຸນຄຣີສມັສໃນນະ
ຄອນ Los Angeles ເປັນປີທີສອງ ນີ້ແລ້ວ.
ທ້າວ Rosales ເວົ້າວ່າ “ຢູ່ນີ່ແມ່ນພິເສດຫລາຍກ່ວາຢູ່ບ່ອນອື່ນ ເພາະວ່າທຸກໆ
ຄົນແມ່ນມີຈິດໃຈດີງາມ ຕ້ອນຮັບແລະເປັນມິດ. ກໍຄືເຈົ້າເຫັນຫັ້ນແຫລະ ເຂົາເຈົ້າພາກັນຕົກແຕ່ງເອ້ຍ້ອງຢ່າງເຕັມທີ່ເລີຍ.”
ຈາກຖະໜົນ Rodeo Drive ທີ່ເຕັມໄປດ້ວຍຮ້ານຄ້າຫລູໆຢູ່ Beverly Hills ຄຸ້ມບ້ານເຮືອນຂອງພວກດາລານັກສະແດງ ໄປຫາຄຸ້ມ The Grove ໃນ Los Angeles ຍ່ານຊອບປິ້ງແລະຈຸດທ່ອງທ່ຽວເຫລົ່ານີ້ ໄດ້ຖືກຫັນປ່ຽນໄປເປັນ ດິນແດນມະຫັດສະຈັນຂອງແສງໄຟ ແລະແສງສີແຫ່ງການຕົກແຕ່ງເອ້ຍ້ອງບຸນຄຣິສມັສ ທີ່ສ້າງຄວາມຕື່ນຕາຕື່ນໃຈ
ໃຫ້ແກ່ຜູ້ໄປຊົມ. ຫລາຍໆຄົນຮູ້ສຶກຄືກັນກັບວ່າ ເຂົາເຈົ້າກຳລັງທ່ຽວຢູ່ໃນສວນສະໜຸກ ເຊັ່ນແມ່ຍິງຄົນນີ້ ທີ່ເວົ້າວ່າ:
“ແສງສີ ແລະສຽງຮ້ອງເພງ ກັບສຽງດົນຕີ ເຮັດໃຫ້ຂ້ອຍຮູ້ສຶກຄືກັນກັບວ່າ ກຳລັງທ່ຽວຢູ່ສວນສະໜຸກ Disneyland ຫັ້ນແຫລະ.”
ທ້າວ Rosales ເວົ້າອີກວ່າ “ມັນມີໝົດທຸກສິ່ງທຸກຢ່າງອີ່ຫລີ ແຕ່ກໍມີຫລາຍໆຄອບ
ຄົວພາກັນມາທ່ຽວ ມາຫລາຍຄອບຄົວອີ່ຫລີ ແລະມັນກໍມ່ວນສະໜຸກຫລາຍ.”
ສຳຫລັບເດັກນ້ອຍຫລາຍໆຄົນແລ້ວ ຄວາມມ່ວນຊື່ນແມ່ນການໄດ້ໄປຖ່າຍຮູບກັບ Santa Claus ຫລື ປາປາໂນແອລ ແລະບອກເພິ່ນວ່າ ເຂົາເຈົ້າຢາກໄດ້ຂອງຂວັນຫຍັງສຳຫລັບຄຣິສມັສ. ອີກສິ່ງໜຶ່ງທີ່ດຶງດູດຄວາມສົນໃຈ ຢູ່ໃນຄຸ້ມ the Grove ກໍຄື ຕົ້ນຄຣິສມັສສີຂາວ
ທີ່ສູງ 30 ກ່ວາແມັດ ປະດັບປະດາດ້ວຍເຄື່ອງເອ້ຍ້ອງ ຫລາຍກ່ວາໝື່ນອັນ. ສຳຫລັບນັກທ່ອງທ່ຽວທີ່ມາຈາກຕ່າງປະເທດແລ້ວ ມີສິ່ງອື່ນໆອີກ ນອກເໜືອໄປຈາກການເອ້ຍ້ອງຢ່າງງົດງາມເຫລົ່ານີ້ ທີ່ເຮັດໃຫ້ເທດສະການຄຣິສມັສ ຢູ່ລອສ ແອນຈີແລສ ພິເສດກ່ວາໝູ່ ແລະບໍ່ມີບ່ອນໃດເໝືອນ.
ຜູ້ມາທ່ຽວຄົນນີ້ເວົ້າວ່າ “ມີຜູ້ຄົນຈາກປະເທດອື່ນໆ ມາທ່ຽວເປັນຈຳນວນ
ຫລວງຫລາຍ.”
ເບິ່ງວີດີໂອ ກ່ຽວກັບການເອ້ຍ້ອງບຸນຄຣິສມັສ ຢູ່ເຮືອນປະຊາຊົນ ໃນຄຸ້ມ Pasadena ຂອງ ລອສ ແອນຈີແລສ:
ນັກທ່ອງທ່ຽວຫລາຍໆຄົນເວົ້າວ່າ ອາກາດທີ່ເປັນສະບາຍບໍ່ຮ້ອນບໍ່ໜາວຫລາຍຢູ່ເມືອງນີ້ ແມ່ນເຮັດໃຫ້ການທ່ອງທ່ຽວຂອງເຂົາເຈົ້າມ່ວນເປັນພິເສດ ໂຮມທັງນາງ Carolina Oliveros ຈາກ Spain ທີ່ມາກັບສາມີ.
Carolina Oliveros ເວົ້າວ່າ “ອາກາດແມ່ນວິເສດຫລາຍ ເພາະວ່າມັນບໍ່ໜາວ
ແລະຜູ້ຄົນກໍສາມາດຢ່າງເລາະຊົມໄດ້ ຢ່າງສະບາຍ.”
ອາກາດໃນເມືອງນີ້ ໃນຊ່ວງນີ້ອາດຈະຮ້ອນຈົນສາມາດນຸ່ງສົ້ງຂາສັ້ນໄດ້ພຸ້ນແຫລະ ແຕ່ວ່າ ຫລາຍໆຄົນກໍຄົງຢາກຈະເຫັນຄຣິສມັສ ທີ່ເຕັມໄປດ້ວຍຫິມະ ຄືກັນກັບຢູ່ຫລາຍໆເມືອງໃນ
ສະຫະລັດ ບ່ອນທີ່ມີ White Chrismas ດັ່ງໃນເພງນີ້:
ເພງ: Whie Christmas
ສະນັ້ນ ມັນກໍຈະບໍ່ແມ່ນຄຣິສມັສຢູ່ຄຸ້ມ The Grove ຖ້າຫາກບໍ່ມີຫິມະ. ບັນດາຜູ້ຈັດງານກໍ
ເລີຍເຮັດຫິມະປອມ ຄ່ອຍໆຕົກລົງມາຈາກທ້ອງຟ້າ.
ທ້າວ Marquis Rosales ເວົ້າວ່າ “ມ່ວນຫລາຍແທ້ໆ. ນີ້ແມ່ນຍາມຄຣິສມັສ
ສະນັ້ນ ກໍຕ້ອງຫລິ້ນໃຫ້ມ່ວນແດ່ແຫລະ.”
ສຳຫລັບນັກທ່ອງທ່ຽວຫລາຍໆຄົນແລ້ວ ທັງໜຸ່ມນ້ອຍແລະໄວຊະລາ ບຸນຄຣິສມັສຂອງເຂົາເຈົ້າ ຢູ່ L.A. ຫລືນະຄອນ ລອສ ແອນຈີແລສ ລັດແຄລິຟໍເນຍ ກໍແມ່ນຈະລືມໄດ້ຍາກ.
ພ້ອມນີ້ ຂ້າພະເຈົ້າຂໍຕ່າງໜ້າພະແນກພາສາລາວຂອງວີໂອເອ ອວຍພອນໃຫ້ບັນດາທ່ານ
ຈົ່ງມ່ວນຊື່ນແລະສົມຫວັງ ໃນວັນຄຣິສມັສນີ້. Merry Christmas and Happy New Year.
ເບິ່ງວີດີໂອກ່ຽວກັບ ປະເພນີການໄຫລເຮືອໄຟ ສະຫລອງເທດສະການຄຣິສມັສ ທີ່
ເມືອງ Anneapolis ລັດ Maryland ທາງຝັ່ງຕາເວັນອອກ ຂອງສະຫະລັດ:
