ໃນວັນເລືອກຕັ້ງ ຊາວອາເມຣິກັນ ທົ່ວປະເທດ ພາກັນອອກໄປໃຊ້ສິດອອກສຽງ ເລືອກເອົາປະທານາທິບໍດີ
ຜູ້ມີສິດອອກສຽງຂອງສະຫະລັດຫຼາຍລ້ານຄົນ ໄດ້ພາກັນໄປປ່ອນບັດເລືອກຕັ້ງ ໃນວັນອັງຄານມື້ນີ້ ເພື່ອເລືອກເອົາປະທານາທິບໍດີຄົນໃໝ່ ໂດຍຕ້ອງໄດ້ຕັດສິນໃຈຈະຍົກລະດັບຕຳແໜ່ງຮອງປະທານາທິບໍດີ ຄາມາລາ ແຮຣິສ ໃຫ້ກາຍເປັນ ຜູ້ນຳເພດຍິງຄົນທຳອິດຂອງປະເທດ ຫຼືຈະເລືອກເອົາອະດີດປະທານາທິບໍດີ ດໍໂນລ ທຣຳ ກັບຄືນໄປດຳລົງຕຳແໜ່ງໃນທຳນຽບຂາວ.
ໜ່ວຍເລືອກຕັ້ງທັງຫຼາຍສະແດງໃຫ້ເຫັນວ່າ ທ່ານນາງ ແຮຣິສ ຜູ້ສະໝັກສັງກັດ ພັກເດໂມແຄຣັດ ແລະທ່ານທຣຳ, ຄູ່ແຂ່ງຂອງທ່ານນາງຈາກພັກຣີພັບບລີກັນ, ກຳລັງແຂ່ງຂັນກັນຢ່າງສູສີທີ່ສຸດໃນຮອບຫຼາຍທົດສະວັດຜ່ານມາ ໂດຍຜູ້ຊະນະເລີດຈະເລີ້ມດຳລົງຕຳແໜ່ງປະທານາທິບໍດີ ເປັນເວລາສີ່ປີ ໃນເດືອນມັງກອນ ຈະມາເຖິງນີ້.
ແຜນທີ່ການເລືອກຕັ້ງ ສະຫະລັດ 2024
ທ່ານ ດໍໂນລ ທຣຳ ໄດ້ຊະນະຕື່ມອີກ 5 ລັດ ຄື: ອາລາບາມາ, ຟລໍຣິດາ, ເທັນເນັສຊີ, ມິສຊິສຊິບປີ, ໂອກລາໂຮມາ. ທ່ານນາງ ຄາມາລາ ແຮຣິສ ຊະນະຕື່ມອີກນຶ່ງລັດຄື: ລັດ ແມຣີແລນ. ທ່ານ ທຣຳ ນຳໜ້າທ່ານນາງ ແຮຣິສ ໃນຄະແນນຂອງຄະນະຜູ້ແທນລັດ 86 ຕໍ່ 13.
ມາຮອດປັດຈຸບັນນີ້, ທ່ານ ດໍໂນລ ທຣໍາ ມີຄະແນນຕື່ມອີກ 3 ລັດຄື: ລັດ ຄາໂຣໂລນາໃຕ້ ດ້ວຍ 9 ຄະແນນ, ລັດ ອາແກນຊໍ ດ້ວຍ 6 ຄະແນນ, ແລະ ລັດເວີຈີເນຍຕາເວັນຕົກ ດ້ວຍຄະແນນ 4 ຄະແນນ.