ລິ້ງ ສຳຫລັບເຂົ້າຫາ

logo-print

ປະຕິກິລິຍາ ພວກຜູ້ນຳໂລກ ກ່ຽວກັບການເສຍຊີວິດ ຂອງກາດດາຟີ (ເບິ່ງວີດີໂອແລະສະໄລດ໌)


ປະທານາທິບໍດີສະຫະລັດ ທ່ານບາຣັກໂອບາມາ ຖະແຫຼງທີ່ທຳນຽບຂາວ ກ່ຽວກັບການເສຍຊີວິດ ຂອງອະດີດ ຜູ້ນຳລີເບຍມວມາກາດດາຟີ (20 ຕຸລາ 2011)

ລັດຖະມົນຕີການຕ່າງປະເທດສະຫະລັດ ທ່ານາງ Hillary Clinton ກ່າວວ່າ ການເສຍຊີ
ວິດຂອງອະດີດຜູ້ນຳລີເບຍ ທ່ານມວມມາກາດດາຟີ ໄດ້ປິດສາກລົງບົດຕອນທີ່ໂຊກຮ້າຍທີ່
ສຸດໃນປະວັດສາດ ຂອງປະເທດດັ່ງກ່າວ ແຕ່ຂະນະດຽວກັນ ກໍເປັນຂີດໝາຍໃນການເລີ່ມ
ຕົ້ນຂຶ້ນຂອງຍຸກໃໝ່.

ທ່ານນາງໃຫ້ຄວາມເຫັນດັ່ງກ່າວຈາກປາກິສຖານ ໃນວັນສຸກມື້ນີ້ 3 ມື້ຫຼັງຈາກທ່ານນາງ
ໄດ້ຢຸດແວ່ທີ່ປະເທດລີເບຍ ໃນການເດີນທາງໄປຢ້ຽມຢາມພາກຕາເວັນອອກກາງແລະເອ
ເຊຍໃຕ້ຂອງທ່ານນາງ.

ການໃຫ້ທັດສະນະຄວາມເຫັນຂອງທ່ານນາງມີຂຶ້ນນຶ່ງມື້ຫຼັງຈາກປະທານາທິບໍດີບາຣັກໂອ
ບາມາ ເອີ້ນການເສຍຊີວິດຂອງກາດດາຟີວ່າ ເປັນຄຳເຕືອນຕໍ່ພວກຈອມຜະເດັດການໃນ ທົ່ວພາກຕາເວັນອອກກາງວ່າ ການປົກຄອງແບບຜະເດັດການຈະສິ້ນສຸດລົງແບບບໍ່ມີທາງ
ຫຼີກລ້ຽງໄດ້.

ສ່ວນຈີນກ່າວໃນວັນສຸກມື້ນີ້ວ່າ ລີເບຍໄດ້ເລີ່ມຕົ້ນປະວັດສາດໜ້າໃໝ່ ແລະຮຽກຮ້ອງໃຫ້
ພວກຜູ້ນຳຂອງລັດຖະບານຊົ່ວຄາວລີເບຍ ເລິ່ມດຳເນີນຂັ້ນຕອນ ໃນການປ່ຽນແປງທາງ
ດ້ານການເມືອງແບບມີຫຼາຍພັກຝ່າຍເຂົ້າຮ່ວມ.

ຈີນເປັນສະມາຊິກທີ່ສາມາດໃຊ້ສິດຢັບຢັ້ງໃນຢູ່ສະພາຄວາມໝັ້ນຄົງອົງການສະຫະປະຊາ
ຊາດ. ຈີນບໍ່ໄດ້ອອກສຽງໃນການລົງມະຕິໃນເດືອນມີນາຜ່ານມາທີ່ອະນຸຍາດໃຫ້ໃຊ້ກຳລັງ
ປົກປ້ອງພົນລະເຮືອນຊາວລີເບຍຈາກການໂຈມຕີຂອງກຳລັງກາດດາຟີ.

ນອກນັ້ນແລ້ວ ຈີນຍັງໄດ້ຕຳໜິຕິຕຽນຢ່າງແຮງຕໍ່ການໂຈມຕີທາງອາກາດຂອງອົງການ
ເນໂຕ້ຢູ່ທີ່ລີເບຍ.

ໃນວັນສຸກມື້ນີ້ ອາຟຣິກາໃຕ້ກໍກ່າວວ່າ ຕົນຫວັງວ່າການເຫດການໃນລີເບຍຈະນຳໄປສູ່ ການຍຸຕິລົງໃນການເປັນປໍລະປັກກັນ ແລະການຟື້ນຟູຄວາມສະຫງົບ. ແລະອີຣ່ານໄດ້
ສະແດງປະຕິກິລິຍາໂດຍກ່າວວ່າ ຕົນຫວັງວ່າ ສົງຄາມກາງເມືອງຄົງຈະຍຸຕິລົງແລະສະ
ຖຽນລະພາບຈະກັບຄືນມາ.

ໃນວັນພະຫັດວານນີ້ຜູ້ນຳສັນນິບາດອາຣັບທ່ານ Nabil al-Arabi ກ່າວວ່າ ທ່ານຫວັງ
ວ່າການເສຍຊີວິດຂອງກາດດາຟີຈະປ່ຽນໂສມໜ້າໃໝ່ຂອງການປົກຄອງທີ່ກົດຂີ່ຜະເດັດ
ການ. ທ່ານໄດ້ຮຽກຮ້ອງໃຫ້ປະຊາຊົນຊາວລີເບຍເອົາຊະນະໃນການຮຳບາດແຜສົງຄາມ
ໃນອະດີດຜ່ານມາ ແລະປະຖິ້ມຄວາມຮູ້ສຶກທີ່ຢາກແກ້ແຄ້ນ.

ໃນເດືອນສິງຫາປີນີ້ ບັນດາປະເທດອາຣັບໄດ້ປະກາດຄວາມເປັນນໍ້ານຶ່ງໃຈດຽວກັບສະ ພາປົກຄອງໃນໄລຍະຂ້າມຜ່ານແຫ່ງຊາດຂອງລີເບຍ.

ນອກນັ້ນແລ້ວ ໃນວັນພະຫັດວານນີ້ ເລຂາທິການໃຫຍ່ຂອງອົງການສະຫະປະຊາຊາດ
ທ່ານ Ban Ki-moon ກໍກ່າວວ່າ ການເສຍຊີວິດຂອງກາດດາຟີ ແມ່ນຂີດໝາຍຂອງ
ບາດລ້ຽວໃໝ່ທາງປະວັດສາດ ສຳລັບລີເບຍ. ທ່ານໄດ້ຮຽກຮ້ອງໃຫ້ທຸກພັກຝ່າຍທີ່ເປັນ
ປໍລະປັກໃນການສູ້ລົບໃຫ້ພາກັນວາງອາວຸດ.

ສ່ວນປະເທດອີຕາລີ ຊຶ່ງເປັນອະດີດເຈົ້າອານານິຄົມຂອງລີເບຍນັ້ນ ນາຍົກລັດຖະມົນຕີ
Silvio Berlusconi ກ່າວກ່ຽວກັບການເສຍຊີວິດຂອງກາດດາຟີວ່າ ເວລານີ້ ສົງຄາມ
ສິ້ນສຸດລົງແລ້ວ.

ປະທານາທິບໍດີຝຣັ່ງ ທ່ານ Nicolo Sarkozy ແລະນາຍົກລັດຖະມົນຕີເຢຍຣະມັນທ່ານ
ນາງ Angela Merkel ຕ່າງກໍເວົ້າວ່າການເສຍຊີວິດຂອງກາດດາຟີແມ່ນຊ່ອງທາງສຳລັບ ກ້າວເດີນໄປສູ່ປະຊາທິປະໄຕຂອງລີເບຍ.

ປະທານສະຫະພາບຢູໂຣບ ທ່ານ Herman Van Rompu ແລະປະທານກຳມາທິການ
ຢູໂຣບ ທ່ານ Jose Manuel Barroso ໄດ້ອອກຖະແຫຼງການຮ່ວມສະບັບນຶ່ງ ເວົ້າວ່າ ການເສຍຊີວິດຂອງອະດີດຜູ້ນຳລີເບຍ ແມ່ນຂີດໝາຍຂອງການສິ້ນສຸດລົງ ໃນການປົກຄອງ
ແບບຜະເດັດການແລະການກົດຂີ່ຢູ່ລີເບຍ.

ເບິ່ງວີດີໂອການປົກຄອງທີ່ໂຫດຮ້າຍຂອງກາດດາຟີ

XS
SM
MD
LG