ກອງທັບສະຫະລັດກ່າວວ່າ ເຮືອບິນລົບອາຍພົ່ນລໍານຶ່ງ
ຂອງກອງທັບອາກາດສະຫະລັດ ໄດ້ຕົກທີ່ປະເທດລີເບຍ
ທ່າມກາງການປະຕິບັດງານທາງທະຫານຂອງນາໆຊາດ
ເພື່ອເຮັດໃຫ້ລະບົບປ້ອງກັນໄພທາງອາກາດຂອງຜູ້ນໍາລີ
ເບຍ ທ່ານ Moammar Gadhafi ເປັນອໍາມະພາດ
ແລະປົກປ້ອງພົນລະເຮືອນຈາກການບຸກໂຈມຕີຂອງກໍາ
ລັງຜູ້ກ່ຽວນັ້ນ.
ໂຄສົກຄົນນຶ່ງຂອງກອງບັນຊາການກໍາລັງສະຫະລັດປະຈໍາ
ເຂດພາກພື້ນອາຟຣິກາກ່າວວ່າ ອຸບັດຕິເຫດດັ່ງກ່າວອາດ
ມີສາເຫດມາຈາກບັນຫາທາງເຄື່ອງຈັກ ບໍ່ແມ່ນມາຈາກການ
ຍິງຂອງສັດຕູ. ໂຄສົກເວົ້າຕື່ມວ່າ ນັກບິນຄົນນຶ່ງໄດ້ຖືກ
ຊ່ອຍໄວ້ໄດ້ ແລະອີກຄົນນຶ່ງແມ່ນກຳລັງຢູ່ໃນຂັ້ນຕອນໄດ້
ຮັບການຊ່ອຍເຫຼືອ.
ກໍາລັງຝ່າຍປະສົມໄດ້ທໍາການໂຈມຕີຢ່າງໜັກໃສ່ລີເບຍເປັນຄືນທີ 3 ລຽນຕິດໃນຄືນວັນຈັນ ວານນີ້.
ນາຍພົນ Carter Ham ຈາກກອງທັບສະຫະລັດກ່າວໃນວັນຈັນວານນີ້ວ່າ ກໍາລັງຝ່າຍ
ປະສົມຈະຂະຫຍາຍເຂດຫ້າມບິນທີ່ໄດ້ຮັບອະນຸມັດຈາກສະຫະປະຊາຊາດນັ້ນ ອອກໄປ
ທົ່ວປະເທດລີເບຍ. ແຕ່ທ່ານກ່າວຕື່ມວ່າ ການຖິ້ມລະເບີດໂຈມຕີຂອງຝ່າຍພັນທະມິດ
ເບິ່ງຄືວ່າຈະຫລຸດລົງ ນອກຈາກວ່າມີສິ່ງໃດສິ່ງນຶ່ງເກີດຂຶ້ນຢ່າງບໍ່ຄາດຫວັງໄວ້ກ່ອນນັ້ນ.
ພວກກະບົດທີ່ຖືກພວກກໍາລັງ
ນິຍົມກາດດາຟີຂັບໄລ່ໃຫ້ຖອຍ
ຫລັງຄືນ ກ່ອນການໂຈມຕີທາງ
ອາກາດຂອງຝ່າຍພັນທະມິດນັ້ນ
ຍັງບໍ່ທັນໄດ້ຮັບຜົນປະໂຫຍດ
ຈາກການໂຈມຕີຂອງກໍາລັງປະ
ສົມເທື່ອຊຶ່ງໄດ້ພາໃຫ້ເກີດຄວາມ
ເປັນຫ່ວງຂຶ້ນມາວ່າ ບັນຫາຂັດ
ແຍ້ງທີ່ວ່ານີ້ ສາມາດຕົກຢູ່ໃນສະພາບບໍ່ໄປບໍ່ມາໄດ້.
ພວກນັກຕໍ່ສູ້ຝ່າຍກະບົດທີ່ບໍ່ມີ
ການຈັດຕັ້ງກັນດີ ແລະກໍາລັງ
ພະຍາຍາມຍຶດເອົາເມືອງ
Ajdabiya ຄືນນັ້ນກ່າວວ່າ ເຂົາເຈົ້າຖືກໂຈມຕີຖອຍຄືນໃນວັນຈັນວານນີ້ຈາກການຍິງຈະຫລວດແລະຍິງຈາກລົດຖັງຂອງພວກກໍາລັງທີ່ຈົງຮັກພັກດີຕໍ່ລັດຖະບານກາດດາຟີ ທີ່ຍັງກໍາລັງຄວບຄຸມທາງເຂົ້າສາຍຕ່າງໆໄປຫາ ເມືອງດັ່ງກ່າວນີ້.
ນາຍພົນ Ham ກ່າວວ່າ ຝ່າຍປະສົມບໍ່ໄດ້ຮັບມອບໝາຍອໍານາດໃຫ້ສະໜອງການສະໜັບ
ສະໜຸນໂດຍກົງແກ່ຝ່າຍກະບົດ ທີ່ໄດ້ເລີ້ມພາກັນລຸກຮືຂຶ້ນໃນເດືອນແລ້ວນີ້ ທີ່ມີວັດຖຸປະສົງ
ເພື່ອຍຸດຕິການປົກຄອງ ເປັນເວລາ 42 ປີຂອງທ່ານກາດດາຟີນັ້ນ.