ລິ້ງ ສຳຫລັບເຂົ້າຫາ

ສະຫະປະຊາຊາດ ແລະລີເບຍ ຕົກລົງກັນ ກ່ຽວກັບເມືອງ Misrata

  • ສິງ ບູຣົມມະວົງ

ທ່ານນາງ Valerie Amos ຫົວໜ້າດ້ານມະນຸດສະທໍາຂອງ ສປຊ ກ່າວຕໍ່ນັກຂ່າວ ໃນກອງປະຊຸມຖະແຫລງຂ່າວ ທີ່ເມືອງ Benghazi, ລີເບຍ ໃນວັນຈັນ ວັນທີ 18, ເມສາ 2011.




















ສະຫະ​ປະຊາ​ຊາດ​ແລະ​ບັນດາ​ເຈົ້າ​ໜ້າ​ທີ່​ລີ​ເບຍ​ກ່າວ​ວ່າ ພວກ​ເຂົາ​ເຈົ້າ​ໄດ້​ບັນລຸ​ຂໍ້​ຕົກລົງ​ກັນ​ທີ່
ຈະ​ອະນຸຍາດ​ໃຫ້​ພວກ​ພະນັກງານ​ຊ່ອຍ​ເຫລືອ​ບັນ​ເທົາ​ທຸກ​ເຂົ້າ​ໄປ​ຫາ​ເມືອງ Misrata ທີ່​ຖືກ
ປິດ​ລ້ອມ​ໃນ​ພາກ​ຕາ​ເວັນ​ຕົກ​ຂອງ​ປະ​ເທດ​ໄດ້​ຢ່າງ​ປອດ​ໄພ​ນັ້ນ ​ແຕ່​ບໍ່​ໄດ້​ຮັບ​ການ​ຄໍ້າ​ປະກັນ​
ຈາກ​ທ່ານ​ມວມມາ​ກາດ​ດາ​ຟີ ຜູ້​ນໍາ​ລີ​ເບຍ ທີ່ວ່າ​ພວກ​ກໍາລັງ​ຂອງ​ທ່ານ​ ຈະ​ຢຸດ​ລະດົມ​ຍິງ​ປືນ​
ໃຫຍ່​ ໃສ່​ທີ່​ໝັ້ນ​ຂອງ​ຝ່າຍ​ກະບົດ​ໃນເມືອງດັ່ງກ່າວ.

ໂຄສົກ​ຍິງ​ປະ​ຈໍາ​ສະຫະ​ປະຊາ​ຊາດ​ກ່າວໃນ​ວັນ​ຈັນ​ວານ​ນີ້​ວ່າ ທ່ານ​ກາດ​ດາ​ຟີ​ໄດ້​ຕົກລົງ​ອະນຸ
ຍາດ​ໃຫ້​ທີ​ມຊັ່ງຊາ​ຕີ​ລາຄາ​ຂອງ​ນາໆ​ຊາດ​ຈຸ​ນຶ່ງ​ເຂົ້າ​ໄປ​ໃນ​ເມືອງ Misrata ອັນ​ເປັນ​ພາກ
ສ່ວນ​ນຶ່ງ​ຂອງ​ຂໍ້ຕົກລົງ​ກັນ​ສະບັບ​ນຶ່ງ​ວ່າ​ດ້ວຍ​ການ​ໃຫ້ຄວາມຊ່ວຍເຫຼືອ​ດ້ານ​ມະນຸດສະ​ທໍາ​ຕໍ່
ເຂດນະຄອນຫລວງ Tripoli ​ແລະ​ຫົວ​ເມືອງ​ອື່ນໆ​ອີກ​ຂອງ​ລີ​ເບຍ. ​ໂຄສົກ​ຍິງ​ທ່ານ​ນີ້​ກ່າວ
ຕື່ມ​ວ່າ ລັດຖະບານ​ລີ​ເບຍ​ຈະ​ຮັບປະກັນ​ຄວາມ​ປອດ​ໄພ​ໃຫ້​ແກ່​ທີ​ມ ງານດັ່ງກ່າວ​ໃນ​ສະ​ເພາະ
ຂົງ​ເຂດ​ທີ່ຢູ່​ພາຍ​ໃຕ້​ການ​ຄວບ​ຄຸມ​ຂອງ​ຕົນ​ເທົ່າ​ນັ້ນ.

ທ່ານ​ນາງ Valerie Amos ຫົວໜ້າ​ຝ່າຍ​ຊ່ອຍ​ເຫລືອ​ດ້ານ​ມະນຸດສະ​ທໍາ​ປະ​ຈໍາ​ອົງການ​ສະ
ຫະ​ປະຊາ​ຊາດ​ໄດ້​ບັນລຸ​ຂໍ້​ຕົກລົງ​ກັນ​ນີ້​ໃນ​ວັນ​ອາທິດ​ຜ່ານ​ມາໃນ​ລະຫວ່າງ​ທໍາ​ການ​ຢ້ຽມຢາມ
ລີ​ເບຍ​ເປັນ​ເວລາ 2 ມື້.

ການ​ບຸກ​ໂຈມ​ຕີ​ຂອງ​ພວກ​ກໍາລັງ​ທີ່​ນິຍົມ​ທ່ານ​ກາດ​ດາ​ຟີ​ຍັງ​ດໍາ​ເນີນ​ສືບຕໍ່​ມາ​ໃນ​ວັນ​ຈັນ​ວານ​ນີ້
ໃນ​ຂະນະ​ທີ​ເຮືອ​ຮັບ​ເໝົາ​ລໍາ​ນຶ່ງ​ໄດ້​ອົບ​ພະຍົບພວກ​ພະນັກງານ​ຊາວ​ຕ່າງປະ​ເທດແລະ​ພວກ​
ຊາວ​ລີ​ເບຍ​ທີ່​ໄດ້​ຮັບ​ບາດເຈັບຈໍານວນ​ເກືອບ 1 ພັນ​ຄົນອອກ​ຈາກ​ເມືອງ Misrata ນັ້ນ.

ອົງການ​ວ່າ​ດ້ວຍ​ການ​ອົບ​ພະຍົບລະຫວ່າງ​ຊາດແຈ້ງ​ໃຫ້​ຊາບວ່າ ພວກ​ອົບ​ພະຍົບຈໍານວນ
650 ຄົນ ທີ່ຖືກຊ່ອຍອອກ​ຈາກ​ເມືອງ​ດັ່ງກ່າວ​ໃນ​ວັນ​ຈັນ​ວານ​ນີ້ ​ແມ່ນ​ຄົນ Ghana ​ແລະ​
ຊາດ​ອື່ນໆ​ອີກ​ທີ່​ຮວມທັງ​ຄົນ​ຟີລິບ​ປິນ​ແລະ​ຊາວ Ukraine ນໍາ. ອົງການ​ອົບ​ພະຍົບລະ
ຫວ່າງ​ຊາດ ຫລື IOM ກ່າວ​ວ່າ ມີ​ຄົນ​ລີ​ເບຍ​ຈໍານວນ 100 ຄົນ​ຮວມຢູ່​ໃນ​ພວກ​ອົບ​ພະ
ຍົບນີ້. 23ຄົນ​ໄດ້​ຮັບ​ບາດ​ເຈັບ​ຈາກ​ສົງຄາມ ຮວມທັງ​ເດັກນ້ອຍ​ຄົນ​ນຶ່ງ​ທີ່​ຖືກ​ຍິງ​ໃນ​ບໍ​ເວນ​
ໜ້າ​ແລະ​ຜູ້​ຖືກ​ຕັດ​ມື​ຄົນ​ນຶ່ງ.

ຢ່າງ​ໜ້ອຍ​ມີ​ພວກ​ຊາວ​ຕ່າງ​ດ້າວ 4 ພັນ​ຄົນ​ທີ່​ໄດ້​ຕົກ​ຄ້າງ​ຢູ່​ໃນ​ທ່າ​ກໍາ​ປັ່ນ​ເມືອງ Misrata ມາ
ເປັນ​ເວລາ​ຫລາຍ​ສັບປະດາ ຊຶ່ງ​ສ່ວນ​ຫລາຍ​ແມ່ນ​ຄົນ​ໄນ​ຈີ​ເຣຍ ທີ່ຍັງ​ຫວັງ​ວ່າ​ຈະ​ອົບ​ພະຍົບ
ອອກ​ຈາກ​ເມືອງ​ດັ່ງກ່າວ. ​ເມືອງ Misrata ​ເປັນ​ເມືອງ​ດຽວ​ເທົ່າ​ນັ້ນ​ທີ່ຢູ່​ພາຍ​ໃຕ້​ການ​ຄວບ
ຄຸມ​ຂອງ​ຝ່າຍ​ກະບົດ​ໃນ​ພາກ​ຕາ​ເວັນ​ຕົກ​ຂອງ​ປະ​ເທດ ​ແລະ​ໄດ້​ຖືກ​ປິດ​ລ້ອມ​ມາໄດ້​ເກືອບ 2
ເດືອນ​ແລ້ວ.

ອັງກິດ​ປະກາດ​ໃຫ້​ຮູ້​ໃນ​ວັນ​ອາທິດ​ຜ່ານ​ມາ​ນີ້​ວ່າ ຕົນ​ຈະ​ໃຊ້​ຈ່າຍ​ເງິນ​ຈໍານວນ 2 ລ້ານ 4
ແສນ​ໂດ​ລາ​ສໍາລັບ​ຊ່ອຍ​ອົງການ IOM​ໃນ​ການ​ຊ່ອຍ​ອົບ​ພະຍົບຜູ້​ຄົນອອກມາ ​ແລະ​ຈະ​ສົ່ງ
ທີ​ມການ​ແພດ​ແລະ​ສະບຽງ​ໄປ​ຊ່ອຍ.

XS
SM
MD
LG