ກອງທັບຢູເຄຣນກ່າວວ່າ ຕົນໄດ້ທຳລາຍຄ້າຍທະຫານແຫ່ງນຶ່ງຂອງຣັດເຊຍ ຢູ່ໃນ ເຂດໂດເນດ (Donetsk) ທາງພາກຕາເວັນອອກຂອງຢູເຄຣນ.
ຢູເຄຣນກ່າວວ່າ ການໂຈມຕີໄດ້ເກີດຂຶ້ນຢູ່ໃນເຂດມາຄີຟກາ (Makiivka) ທີ່ຍຶດຄອງ ໂດຍຣັດເຊຍ.
ເຈົ້າໜ້າທີ່ຣັດເຊຍກ່າວວ່າ ການໂຈມຕີຂອງຢູເຄຣນໄດ້ສັງຫານພົນລະເຮືອນຄົນນຶ່ງ ແລະເຮັດໃຫ້ 36 ຄົນໄດ້ຮັບບາດເຈັບ.
ຢູເຄຣນ ແລະຣັດເຊຍຕ່າງກໍໄດ້ກ່າວຫາຊຶ່ງກັນແລະກັນວ່າ ຝ່າຍກົງກັນຂ້າມໄດ້ວາງແຜນໂຈມຕີໂຮງໄຟຟ້ານີວເຄລຍຊາໂປຣີສເຊຍ (Zaporizhzhia) ທີ່ຖືກຍຶດຄອງ ໂດຍຣັດເຊຍ ໃນພາກຕາເວັນອອກສຽງໃຕ້ຂອງຢູເຄຣນ.
ສະຖານທີ່ດັ່ງກ່າວເປັນຈຸດໃຈກາງຂອງຄວາມຢ້ານກົວວ່າ ຈະມີຄວາມຂັດແຍ້ງກັນ ເຊັ່ນນັ້ນເກີດຂຶ້ນຫລາຍ ນັບຕັ້ງແຕ່ຣັດເຊຍໄດ້ທຳການບຸກລຸກໃນເດືອນກຸມພາ 2022 ເປັນຕົ້ນມາ. ອົງການສິ້ງຊອມດ້ານນິວເຄລຍຂອງສະຫະປະຊາຊາດໄດ້ເຕືອນ ຫຼາຍ ຄັ້ງແລ້ວ ກ່ຽວກັບໄພພິບັດທີ່ອາດເປັນໄປໄດ້ ຍ້ອນການທີ່ມີການຍິງປືນຖະຫລົ່ມໃສ່ ພື້ນທີ່ ທີ່ທັງຣັດເຊຍ ແລະຢູເຄຣນຕ່າງກໍຖິ້ມໂທດໃສ່ກັນແລະກັນແຫ່ງນັ້ນ.
ປະທານາທິບໍດີຢູເຄຣນ ທ່ານໂວໂລດິເມຍ ເຊເລນສ໌ກີ ກ່າວວ່າ ທ່ານໄດ້ສົນທະນາຫາລື ກ່ຽວກັບບັນຫາດັ່ງກ່າວ ທາງໂທລະສັບກັບປະທານາທິບໍດີຝຣັ່ງ, ທ່ານ ເອມມານູແອລ ມາກຣົງ.
“ດຽວນີ້ຄົນໝົດທັງໂລກຕ້ອງຮັບຮູ້ວ່າ ຄວາມໝັ້ນຄົງລວມ ແມ່ນຂຶ້ນຢູ່ກັບຄວາມສົນ ໃຈຂອງຄົນທົ່ວໂລກ ຕໍ່ການກະທຳຂອງຜູ້ຍຶດຄອງໂຮງໄຟຟ້ານັ້ນ. ຣັດເຊຍ ຕ້ອງຮັບຮູ້ ຢ່າງຈະແຈ້ງວ່າ ໂລກໄດ້ເຫັນສະຖານະການອັນທີ່ພວກກໍ່ການ ຮ້າຍກໍາລັງກະກຽມ ເຮັດຢູ່ ແລະໂລກພ້ອມທີ່ຈະຕອບໂຕ້ຄືນ," ນັ້ນຄືຄຳເວົ້າຂອງທ່ານເຊເລນສ໌ກີທີ່ ກ່າວ ຢູ່ໃນຄໍາປາໄສໃນຕອນກາງຄືນວັນອັງຄານຜ່ານມາ. "ກຳມັນຕະພາບລັງສີແມ່ນ ໄພຂົ່ມຂູ່ຕໍ່ທຸກຄົນໃນໂລກ, ແລະໂຮງໄຟຟ້ານິວເຄຼຍຕ້ອງ ໄດ້ຮັບການປົກປ້ອງຢ່າງ ເຕັມສ່ວນບໍ່ໃຫ້ມີເຫດການກຳມັນຕະພາບລັງສີເກີດຂຶ້ນ."
