ສະຫະລັດແລະລາວສົ່ງເສີມ ການຮ່ວມມືກັນ

ການເອົາ​ບາ​ດກ້າວສົ່ງ​ເສີມ​ການ​ຮ່ວມ​ມື​ກັນລະຫວ່າງ​ສະຫະລັດ​ແລະ​ ສປປ ລາວ​ ​ໄດ້ມີ​ຂຶ້ນ​ໃນ​ລະຫວ່າງ​ການ​ໂອ້​ລົມ​ສົນທະນາກັນ​ທ່ີ​ກຸງ​ວໍ​ຊິງ​ຕັນໃນ​ສັບປະດາ​ຜ່ານ​ມາ​ນີ້ ຊຶ່ງ​ເປັນ​ເວລາ 6 ປີ​ຫລັງ​ຈາກ​ສອງປະ​ ເທດ​ໄດ້ຜູກ​ສາຍສຳພັນ​ທາງ​ດ້ານ​ການ​ຄ້າ​ລະດັບປົກ​ກະຕິ ຕລອດ​ທັງ​ສາຍ​ພົວພັນ​ທາງດ້ານ​ການ​ທູດ​ ທີ່ໃກ້ຊິດ​ກັນ​ຂຶ້ນກ່ວາເກົ່າ.
ການ​ໂອ້​ລົມ​ສົນທະນາ​ກັນ​ລະຫວ່າງ​ທ່ານ​ນາງ​ຮີນ​ເລີຣີ ຄລິນ​ຕັນ ລັດ​ຖະມຸນຕີ​ການ​ຕ່າງປະ​ເທດ​ສະຫະລັດ​ ກັບ​ທ່ານ​ທອງ​ລຸນ ສີ​ສຸ​ລິດ ລັດຖະມຸນຕີ​ການ​ປະ​ເທດ​ລາວ ​ໄດ້​ເປັນ​ພົບ​ປະຫາລື​ກັນ​ລະດັບ​ສູງ​ສຸດລະ ຫວ່າງ​ສອງ​ປະ​ເທດ​ນັບ​ແຕ່​ສົງຄາມ​ຫວຽດນາມ​ສິ້ນ​ສຸດ​ລົງ. ທັງ​ສອງ​ປະ​ເທດ​ຕ່າງກໍໃຫ້​ຄຳ​ໝັ້ນ​ສັນຍາ ທ່ີ​ຈະ​ເພີ່ມ​ທະວີ​ການແລກປ່ຽນ ​ກັນໃນ​ດ້ານ​ຕ່າງໆ​ ​ໂດຍໄດ້​ຕົກລົງ​ເຊັນ​ສົນທິສັນຍາ​ດ້ານການ​ຂົນ​ສົ່ງທາງອາກາດ ຫລື ສັນຍາເປີດກວ້າງ ນ່ານຟ້າ ​ຊຶ່ງ​ຈະ​ອຳນວຍ​ໃຫ້​ສາຍ​ການບິນ​ຂອງທັງ​ສອງ​ຝ່າຍ ບິນບໍລິການ​ລະຫວ່າງ ສອງປະເທດໄດ້ ​ແລະ​ຄາດ​ວ່າ​ຈະ​ສົ່ງ​ເສີມອຸດສາຫະກຳ​ການທ່ອງ ທ່ຽວ​ຂອງ​ລາວ​ນຳ​ອີກ. ທ່ານ Pradumna B. Rana ຮອງ​ສາດສະດາຈານ​ທ່ີ​ສະ​ຖາ​ບັນການ​ ສຶກສາລະ​ຫວ່າງ​ຊາດ S. Rajaratnam ທ່ີ​ສິງກະ​ໂປ ສະ​ແດງຄວາມ ​ຍິນ​ດີ​ນຳ​ການ​ເຄື່ອນ​ໄຫວ​ດັ່ງກ່າວ ​ທ່ີ​ມີ​ຂຶ້ນ​ໃນ​ຂະນະ​ທ່ີ​ສິງ​ກະ​ໂປແລະ ​ກຸ່ມ​ອາ​ຊ່ຽນ ທີ່ປະກອບດ້ວຍສະມາຊິກ 10 ປະ​ເທດ​ ໂຮມທັງສິງກະ ໂປນຳນັ້ນ​ ກຳລັງ​ພະຍາຍາມດຶງເອົາສະຫະລັດ​ເຂົ້າມາພົວພັນ​ໃນ​ຂົງ​ເຂດ​ ​ຫລາຍ​ຂຶ້ນ.
ທ່ານ Rana ກ່າວ​ວ່າ ພວກ​ປະ​ເທດ​ໃນ​ເຂດ​ເອ​ເຊຍ​ຕາ​ເວັນ​ອອກສຽງ ໃຕ້​ພາກັນ​ຄຶດ​ວ່າ ສົງຄາມ​ໃນ​ອິຣັກ​ແລະ​ໃນ​ອັຟກາ​ນິສຖານໄດ້ເຮັດ​ໃຫ້​ສະຫະລັດ ຫລຸດຜ່ອນການ​ເອົາ​ທ່າ​ທີ​ຢ່າງແຂງຂັນໃນ​ຂົງ​ເຂດ​ຂອງ​ພວກ​ຕົນລົງໃນໄລ​ຍະຫລາຍໆ​ປີຜ່ານມາ. ທ່ານ Rana ກ່າວ​ກ່ຽວ​ກັບ​ປັບປຸງ​ການ​ຮ່ວມ​ມື ລາວ-ສະຫະລັດ ​ດັ່ງ​ນີ້:
“ມັນເປັນການເຄຶ່ອນໄຫວທີ່ໜ້າຍິນດີນຳຫລາຍ ແລະແນ່ນອນວ່າມັນຍົກລະດັບບົດບາດ ຂອງສະຫະລັດ ໃນຂົງເຂດເອເຊຍຕາເວັນອອກສຽງໃຕ້ ແລະຍົກລະດັບບົດບາດຂອງ ສະຫະລັດໃນສ່ວນພູມິພາກ ​ໃຫ້​ຫລາຍ​ຂຶ້ນ​ໄປອີກ. ສິງຄະໂປ​ໄດ້ເປັນຜູ້ມີສ່ວນສຳຄັນ ໃນ​ການ​ຊຸກຍູ້ການຈັດຕັ້ງ ຂອງ ກຸ່ມອາຊ່ຽນບວກແປດ. ​ແລະ​ມາ​ບັດ​ນີ້ ກໍ​ຊຸກຍູ້​ໃຫ້ກຸ່ມຈັດຕັ້ງໃໝ່ ທີ່ ມີສະມາຄົມອາຊ່ຽນ ຮ່ວມ​ກັບສະຫະລັດ ແລະຣັດເຊຍ ທີ່​ເປີດ​ກ້ວາງ​ ຫລາຍຂື້ນຕໍ່​ການ​ພົວພັນຂອງສະຫະລັດ ຊຶ່ງຖືວ່າເປັນການສອດຄ່ອງ ກັນ ຫລາຍກັບຄວາມຄິດອັນນັ້ນ.”
ທ່ານ Carl Thayer ນັກວິ​ເຄາະ​ດ້ານ​ປ້ອງ​ກັນ​ປະ​ເທດ​ປະຈຳ​ຂົງ​ເຂດ​ທ່ີ Australia ກ່າວ​ວ່າ ນອກນັ້ນແລ້ວ ການ​ເຄື່ອນ​ໄຫວເຫລົ່າ​ ນີ້​ຍັງ​ສະທ້ອນ​ເຖິງບາດກ້າວ​ດ້ານ​ນະ​ໂຍບາຍ​ການ​ຕ່າງປະ​ເທດ​ຂອງ​ສະຫະລັດ​ ໃນການຮື້ຟື້ນການພົວພັນກັບ​ເອ​ເຊຍ​ຄືນ​ອີກ ​ແລະ​ເປັນ​ນໍ້າໜັກ ຖ່ວງ​ອິດ​ທິພົນ​ຂອງ​ຈີນ​ໃນ​ຂົງ​ເຂດ.
ທ່ານ Xi Jinping ຮອງ​ປະ​ທານ​ປະ​ເທດ​ຈີນ​ໄດ້​ໄປ​ຢ້ຽມຢາມ ​ສປປ ລາວ ໃນ​ເດືອນ​ແລ້ວ​ນີ້ ພ້ອມ​ກັບ​ໃຫ້​ຄຳ​ໝັ້ນ​ສັນຍາ​ທີ່​ຈະໃຫ້ເງິນລົງທຶນ ສຳລັບກໍ່ສ້າງ​ໂຄງ​ລ່າງ​ພື້ນຖານໃຫ້ລາວ ​ເພື່ອ​ສົ່ງ​ເສີມ​ການ​ຂົນ​ສົ່ງ​ສິນຄ້າ​ຈີນ​ໃນ​ຂົງ​ເຂດ ນຳ​ດ້ວຍ.
ທ່ານ Thayer ກ່າວ​ວ່າ ປະທານາທິບໍດີ​ບາຣັກ​ ໂອ​ບາ​ມາ ​ໄດ້​ສືບຕໍ່ໂຄງການ​ຕ່າງໆ​ທ່ີ​ລີ​ເລີ້ມ​ມາ​ ຕັ້ງ​ແຕ່​ສະ​ໄໝ​ການ​ປົກຄອງ​ຂອງ​ອະດີດ ປະທານາ ທິບໍດີ George W. Bush ​ແລະ​ຈະ​ທຳ​ການ​ເຄື່ອນ​ໄຫວ ເພື່ອຕ້ານຢັນ​ການດຳເນີນຄວາມ​ພະຍາຍາມດ້ານ​ການ​ທູດ​ຂອງ​ຈີນ​ເພື່ອ​ຍົກ​ສູງ​ອິດ​ທິພົນ​ຂອງ​ຕົນ​ໃນ​ເອ​ເຊຍ​ນັ້ນ ຊຶ່ງ​ທ່ານ Thayer ກ່າວ​ອະທິບາຍວ່າ​:
“ລັດຖະບານໂອບາມາ ກຳລັງຄິດທົບທວນຄືນໃໝ່ກ່ຽວ​ກັບຄວາມສຳພັນກັບຂົງເຂດເອເຊຍ ຕາເວັນອອກສ່ຽງໃຕ້ ແລະ​ເປັນທີ່ແຈ້ງຂາວວ່າພາກສ່ວນ​ນຶ່ງ​ຂອງທ່າ​ທີ​ອັນ​ໃໝ່ນັ້ນ ກໍຄືການຫລິ້ນເກມລຸກ ​ແບບເອົາອົກເອົາໃຈພວກ​ປະ​ເທດ​ໃນ​ຂົງ​ເຂດ​ນັ້ນ ອັນ​ເປັນ​ເກ​ມ ທີ່ຈີນ​ໄດ້​ຫລີ້ນ​ມາ​ແລະ​ກໍໄດ້ຮັບ​ໄຊຊະນະ ມາຈົນເຖິງປັດຈຸບັນນີ້ ແລະປະ​ເທດລາວກໍ​ໄດ້ເຫັນ ສາຍສຳພັນທີ່ສູງຂຶ້ນນີ້.”
ທ່ານ Thayer ກ່າວຕື່ມ​ວ່າ ການ​ເພີ່ມ​ທະວີການ​ຮ່ວມ​ມືຂອງ​ສະຫະລັດ​ກັບ​ລາວ ​ໄດ້​ຕິດຕາມ​ມາ​ຫລັງ​ຈາກ​ສະຫະລັດໄດ້ທຳ​ການ​ລິ​ເລີ່​ມຫລາຍ​ຢ່າງ​ ​ເພື່ອ​ສົ່ງ​ເສີມ​ສາຍພົວພັນສອງ​ຝ່າຍ​ກັບ​ກຳປູ​ເຈຍ​ໃນ​ຫວ່າງ​ໄວໆ​ມາ​ນີ້.
ລາວ​ມີ​ຂໍ້​ຕົກລົງ​ດ້ານ​ການ​ຄ້າ​ສອງ​ຝ່າຍ​ກັບ​ສະຫະລັດ​ຢູ່​ແລ້ວ ​ແລະ ຄວາມ​ສຳພັນ​ດ້ານ​ປ້ອງ​ກັນ​ປະ​ເທດ​ກໍດີ​ຂຶ້ນ ຫລັງ​ຈາກ​ໄດ້ມີ​ການ​ແລກປ່ຽນອຸປະ​ທູດທະຫານ​ກັນ​.
ສ່ວນຫວຽດນາມ​ນັ້ນ ກໍ​ໄດ້​ມີ​ບົດ​ບາດ​ເຊັ່ນ​ກັນ​ໃນ​ການ​ຊຸກຍູ້​ໃຫ້​ລາວ​ຍົກ​ລະດັບສາຍ​ພົວພັນ​ຂອງ​ຕົນກັບ​ສະຫະລັດຂຶ້ນ ຫລັງ​ຈາກ​ທີ່ຈີນ​ໃຫ້ການ​ຊ່ອຍ​ເຫລືອທາງ​ທະຫານ​ໃຫ້​ແກ່​ກຳປູ​ເຈຍ. ​ທ່ານ Thayer ກ່າວ​ດັ່ງ​ນີ້:
“ເລື້ອງນີ້​ໄດ້ເຮັດໃຫ້ຫວຽດນາມເກີດຄວາມ​ວິຕົກກັງວົນໃຈ ແລະຂ້າພະ ເຈົ້າຂໍເວົ້າວ່າ ສິ່ງທີ່ເກີດຂຶ້ນກັບລາວຢູ່ໃນເວລານີ້ ​ເກີດ​ຂຶ້ນ​ໄດ້ກໍ​ເພາະວ່າ ທັງລາວແລະສະຫະລັດ​ໄດ້ ຕົກລົງກັນທີ່ຈະຍົກລະດັບສາຍພົວພັນ ລະຫວ່າງ​ກັນ ສູງຂຶ້ນໄປອີກລະດັບນຶ່ງ ຊຶ່ງ ມັນກໍບໍ່​ແມ່ນລະດັບທີ່ສູງຫລາຍ ແລະຈິງໆແລ້ວ ຫວຽດນາມກໍ​ໄດ້ຊຸກຍູ້ໃຫ້ເລຶ່ອງນີ້​ເກີດ​ຂຶ້ນ​ໄດ້ ເນື່ອງຈາກວ່າຕົນບໍ່ສາມາດທີ່​ຈະສະໜອງຄໍ່າຈູນລາວ ດ້ວຍຕົນເອງໄດ້.”
ສະຫະລັດ​ໄດ້​ໃຫ້ການ​ຊ່ອຍ​ເຫລື​ອ​ແກ່​ລາວ​ມາ​ແລ້ວ ​ໃນ​ການ​ເກັບກູ້​ລະ​ເບີດ​ທ່ີ​ຍັງ​ບໍ່​ທັນ​ແຕກ​ ທ່ີ​ຫລົງ​ເຫລືອ​ມາ​ຕັ້ງ​ແຕ່​ປາງ​ສົງຄາມ​ຫວຽດນາມ ​ແລະກໍ​ຍັງສືບ​ຕໍ່​ເຮັດ​ໃຫ້​ປະຊາຊົນ​ພິການ​ແລະ​ເສຍ​ຊີວິດ​ຢູ່​ຕໍ່ມາ 35 ປີຫລັງ​ຈາກ​ສົງຄາມໄດ້ຍຸດຕິ​ລົງ​. ສະຫະລັດ​ໄດ້​ທຳ​ການ​ຖິ້ມລະ​ເບີດ​ຢ່າງ​ ໜັກ​ໃສ່​ເປົ້າ​ໝາຍ​ແຫ່ງ​ຕ່າງໆ​ໃນ​ລາວ​ໃນ​ລະຫວ່າງ​ສົງຄາມ​ຫວຽດນາມນັ້ນ.
ສາຍ​ພົວພັນ​ທາງ​ການ​ທູດ​ລະຫວ່າງ​ກັນໄດ້​ຕົກ​ຢູ່​ໃນ​ສະພາວະ​ທີ່ເຄັ່ງ​ຕຶງເປັນ​ບາງ​ຄັ້ງບາງ​ຄາວ ຍ້ອນ​ການ​ປະຕິບັດ​ຂອງ​ລັດຖະບານ​ລາວ​ຕໍ່​ຊົນ​ເຜົ່າ​ມົ້ງ ທີ່ທຳ​ການ​ຕໍ່ສູ້​ຄຽງ​ບ່າ​ຄຽງ​ໄຫລ່​ ກັບ​ກຳລັງ​ສະຫະລັດ​ໃນ​ປາງ​ສົງຄາມ​ນັ້ນ. ​ໃນ​ເວລາ​ຕໍ່​ມາ ພວກ​ຊາວ​ມົ້ງຫລາຍ​ພັນ​ຄົນ​ໄດ້​ເຂົ້າ​ມາ​ຕັ້ງ​ຖິ່ນ​ຖານ​ຢູ່​ໃນ​ສະຫະລັດ ຊຶ່ງ​ຈຳນວນຫລາຍ​ ​ແມ່ນ​ມາ​ຈາກສູນ​ອົບ​ພະຍົບ​ແຫ່ງ​ຕ່າງໆ​ ໃນປະ​ເທດໄທ ​ເພື່ອນ​ບ້ານ​ຂອງ​ລາວ​.