ເຈົ້າໜ້າທີ່ຂັ້ນສູງໃນກະຊວງແຮງງານແລະສະວັດດີການ ສັງຄົມຂອງລາວ ໄດ້ໃຫ້ການຍອມຮັບວ່າການດຳເນີນງານ ກ່ຽວກັບການພິສູດສັນຊາດຂອງແຮງງານລາວທີ່ລັກລອບທຳງານໂດຍຜິດກົດໝາຍຢູ່ໃນໄທຕ້ອງປະສົບກັບບັນຫາຊັກຊ້າມາໂດຍຕະຫລອດ ໂດຍມີສາເຫດທີ່ສຳຄັນປະການນຶ່ງມາຈາກບັນຫາຂັດແຍ້ງແລະຄວາມຮຸນແຮງທາງການເມືອງພາຍໃນປະເທດໄທ.
ໂດຍສຳລັບໃນປີ 2010 ນີ້ ເຖິງແມ່ນວ່າທາງການລາວຈະໄດ້ຕຽມພ້ອມຈະດຳເນີນການພິສູດສັນຊາດແຮງງານໃນໄທ ນັບຕັ້ງແຕ່ເດືອນກຸມພາເປັນຕົ້ນມາແລ້ວກໍຕາມ ຫາກແຕ່ດ້ວຍການຊຸມນຸມປະທ້ວງຂອງກຸ່ມຄົນເສື້ອແດງ ທີ່ຕ້ອງການໃຫ້ມີການຍຸບສະພາຜູ້ແທນລາດສະດອນໄທແລ້ວ ຈັດໃຫ້ມີການເລືອກຕັ້ງທົ່ວໄປໃຫ້ໄວທີ່ສຸດນັ້ນ ກໍໄດ້ເປັນຜົນເຮັດໃຫ້ທາງການຝ່າຍໄທບໍ່ສາມາດທີ່ຈະໃຫ້ການຮ່ວມມືກັບທາງການຝ່າຍລາວເພື່ອດຳເນີນ ການດັ່ງກ່າວໄດ້ເລີຍ. ແຕ່ຢ່າງໃດກໍຕາມ ດ້ວຍສະຖານະການທາງການເມືອງທີ່ມີຄວາມສະຫງົບຮຽບຮ້ອຍຫລາຍຂື້ນນັບມື້ໃນເວລານີ້ ກໍໄດ້ເປັນຜົນເຮັດໃຫ້ທາງການລາວແລະໄທສາມາດຮ່ວມກັນເລີ່ມລົງມືດຳເນີນການພິສູດສັນຊາດແຮງງານລາວ ໃນໄທໄດ້ອີກເທື່ອໃໝ່ແລ້ວ ໂດຍກະຊວງແຮງງານຂອງໄທກໍໄດ້ລາຍງານວ່າຍັງຄົງເຫລືອແຮງງານລາວອີກ 62,000 ກວ່າຄົນທີ່ຈະຕ້ອງຖືກພິສູດສັນຊາດຕາມຂໍ້ຕົກລົງວ່າດ້ວຍການພັດທະນາການຈ້າງແຮງງານລະ ຫວ່າງລາວກັບໄທທີ່ໄດ້ລົງນາມຮ່ວມກັນນັບຕັ້ງແຕ່ປີ 2002 ເປັນຕົ້ນມາ ສ່ວນການດຳເນີນງານໃນຕະຫລອດ ໄລຍະທີ່ຜ່ານມານ້ັນ ກໍປາກົດວ່າທາງການລາວແລະໄທສາມາດຮ່ວມກັນພິສູດສັນຊາດແຮງງານລາວໃນໄທໄດ້ຈຳນວນທັງໝົດພຽງແຕ່ 5 ໝື່ນກວ່າຄົນເທົ່ານັ້ນ.
ແຕ່ຢ່າງໃດກໍຕາມ ເຈົ້າໜ້າທີ່ລາວກໍຍອມຮັບວ່າບັນຫາທາງການເມືອງພາຍໃນໄທບໍ່ແມ່ນສາເຫດດຽວທີ່ເຮັດໃຫ້ການພິສູດສັນຊາດແຮງງານລາວໃນໄທຕ້ອງປະສົບກັບບັນຫາຊັກຊ້າດັ່ງກ່າວ ຫາກແຕ່ຍັງລວມໄປເຖິງການ ຊັກຊ້າໃນການດຳເນີນງານຂອງທາງການຝ່າຍລາວດ້ວຍ ໃນຂະໜະດຽວກັນບັນດາແຮງງານລາວສ່ວນໃຫຍ່ໃນໄທກໍບໍ່ໃຫ້ການຮ່ວມມືກັບທາງການລາວແລະໄທດ້ວຍເຊັ່ນກັນ ທັງນີ້ກໍເນຶ່ອງຈາກວ່າບັນດາແຮງງານລາວ ສ່ວນໃຫຍ່ໃນໄທເຫັນວ່າການພິສູດສັນຊາດດັ່ງກ່າວຈະເຮັດໃຫ້ພວກເຂົາເຈົ້າສາມາດທຳງານໃນໄທໄດ້ພຽງແຕ່ 4 ປີແລະຫລັງຈາກນັ້ນ ກໍະຕ້ອງເດີນທາງກັບຄືນມາລາວເປັນເວລາຢ່າງໜ້ອຍ 2 ປີ ຈຶ່ງຈະສາມາດຂໍອະນຸ ຍາດກັບຄືນໄປທຳງານໃນໄທໄດ້ອີກເທື່ອໃໝ່. ຊຶ່ງດ້ວຍເງຶ່ອນໄຂດັ່ງກ່າວນີ້ ກໍຍັງເຮັດໃຫ້ແຮງງານລາວສ່ວນໃຫຍ່ນິຍົມຂໍອະນຸຍາດໄປທຳງານຢູ່ໃນໄທໂດຍ ຜ່ານບໍລິສັດຈັດຫາງານທີ່ໄດ້ຮັບອະນຸຍາດຈາກລັດຖະບານລາວອີກດ້ວຍ ເພາະວ່າການດຳເນີນການດັ່ງກ່າວນັ້ນມີຄ່າໃຊ້ຈ່າຍສູງກວ່າການລັກລອບເຂົ້າໄປທຳງານໃນໄທໂດຍຜ່ານນາຍໜ້າເຖິງ 4 ເທົ່າຕົວ ກໍຄືໃນຂະໜະທີ່ການຂໍອະນຸຍາດຜ່ານບໍລິສັດຈັດຫາງານຈະຕ້ອງໃຊ້ຈ່າຍເຖິງ 2 ໝື່ນກວ່າບາດ ຫາກແຕ່ການລັກລອບເຂົ້າໄປທຳງານໂດຍຜ່ານນາຍໜ້າໃນລາວແລະໄທຈະມີຄ່າໃຊ້ຈ່າຍພຽງແຕ່ 5 ພັນບາດເທົ່ານັ້ນ
ນອກຈາກນີ້ ການທີ່ໃນລາວເອງກໍມີຕໍາແໜ່ງງານຢ່າງຈໍາກັດ ແລະມີອັດຕາຄ່າຈ້າງຕໍ່າກວ່າອັດຕາຄ່າຈ້າງຂັ້ນຕໍ່າໃນໄທດ້ວຍແລ້ວ ຈຶ່ງເຮັດໃຫ້ແຮງງານລາວສ່ວນໃຫຍ່ ພາກັນສະໝັກໃຈເດີນທາງໄປລັກລອບທໍາງານຢູ່ໃນໄທຫລາຍຂື້ນນັບມື້ ດັ່ງທີ່ເຈົ້າໜ້າທີ່ໃນກະຊວງແຮງງານຂອງລາວ ໄດ້ໃຫ້ການອະທິບາຍວ່າ:
“ການໄປອອກແຮງງານຢູ່ຕ່າງປະເທດນັ້ນ ກໍມີຫລາຍສາເຫດອັນທີ່ນຶ່ງກໍແມ່ນຕຳແໜ່ງງານຢູ່ໃນບ້ານເຮົາມັນກໍ ບໍ່ຫລາຍ ສອງມາກໍຍ້ອນວ່າຊາວໜຸ່ມລາວກໍບໍ່ມັກເຮັດວຽກໃນພາກກະສິກຳ ໂດຍສ່ວນໃຫຍ່ທີ່ໄປອອກແຮງງານໃນບ້ານເຮົາຜັດມີໜ້ອຍແລ້ວກຳລັງແຮງງານກໍມີຫລາຍ ກໍເລີຍເຮັດໃຫ້ຊີວິດການເປັນຢູ່ຂອງພວກເຂົາ ເຈົ້າດີກວ່າຢູ່ໃນລາວ ເພາະວ່າໄດ້ຄ່າຈ້າງດີກວ່າ”
ໂດຍໃນປັດຈຸບັນນີ້ ອົງການເຄືອຂ່າຍເພື່ອການຄຸ້ມຄອງແຮງງານຕ່າງດ້າວໃນໄທເຊື່ອວ່າມີແຮງງານລາວທີ່ ລັກລອບທຳງານໂດຍຜິດກົດໝາຍໃນໄທຫລາຍກວ່າ 4 ແສນຄົນ ໃນຂະໜະທີ່ທາງການລາວເຊື່ອວ່າມີຢູ່ພຽງ ແຕ່ 2 ແສນກວ່າຄົນເທົ່ານັ້ນ.
