ບໍລິສັດເອກກະຊົນຈາກຍີ່ປຸ່ນ ຈະລົງທຶນ ໃນມູນຄ່າຮວມເຖິງ 77 ລ້ານໂດລາ ເຂົ້າ
ໃນການພັດທະນາຟາມລ້ຽງງົວ ໃນພື້ນທີ່ 5,000 ເຮັກຕາໃນແຂວງຊຽງຂວາງເພື່ອ
ຜະລິດນົມ ແລະຊີ້ນໂກເບ ສົ່ງອອກ ໄປຕ່າງປະເທດ ຊົງຣິດ ໂພນເງິນ ມີລາຍງານ
ຈາກບາງກອກ.
ທ່ານບຸນຕົ້ນ ຈັນທະພອນ ເຈົ້າແຂວງໆຊຽງຂວາງ ຢືນຢັນວ່າບໍລິສັດຍີ່ປຸ່ນພັດທະນາ
ກະສິກຳຈຳກັດ ໄດ້ເລີ້ມຂະຫຍາຍພື້ນທີ່ລ້ຽງງົວ ຈາກ 150 ເຮັກຕາ ເປັນ 500 ເຮັກຕາ
ໃນເຂດເມືອງແປກ ສຳລັບຮອງຮັບພໍ່ພັນແລະແມ່ພັນ ງົວ ສຸຂະພາບດີຈາກ
ອອສເຕຣຍເລຍ ເມື່ອບໍ່ນານມານີ້.
ໂດຍໃນນີ້ ເປັນແມ່ພັນງົວທີ່ອອກລູກແລ້ວຫຼາຍກວ່າ 100 ຕົວ ແລະກຳລັງຖືພາອີກ
ຫຼາຍກວ່າ 900 ໂຕ ຊຶ່ງຄາດວ່າຈະອອກລູກໃນໄວໆນີ້ ອີກກວ່າ 400 ໂຕ ແລະຈະເຮັດ
ໃຫ້ຟາມລ້ຽງງົວດັ່ງກ່າວນີ້ ມີງົວພັນດີ ເພີ້ມຂຶ້ນເປັນຫຼາຍກວ່າ 1,600 ໂຕ ໃນທ້າຍປີ
2018 ແລະຍັງຈະເພີ້ມຂຶ້ນ ຢ່າງຕໍ່ເນື່ອງ ຈຶ່ງເຮັດໃຫ້ຈະຕ້ອງຂະຫຍາຍພື້ນທີ່ຮອງຮັບ
5,000 ເຮັກຕາ ໃນເຂດເມືອງແປກ ເມືອງຜາໄຊ ແລະເມືອງພູກູດ ຊຶ່ງຈະເຮັດໃຫ້
ປະຊາຊົນລາວ ໃນເຂດ 3 ເມືອງ ດັ່ງກ່າວ ມີສ່ວນໄດ້ຮັບຜົນປະໂຫຍດດ້ວຍ ດັ່ງທີ່
ທ່ານບຸນຕົ້ນ ຢືນຢັນວ່າ: “ເຂົາເຈົ້າເຮັດຢູ່ 3 ເມືອງ ຄືຈັ່ງຊີ້ ບໍ່ແມ່ນເຂົາເຈົ້າຈະຜູກຂາດ
ໄວ້ເຮັດເປັນແຕ່ຂອງບໍລິສັດ ຈະເອົາປະຊາຊົນຫັ້ນຫຼະ ເຂົ້າຮ່ວມ ຜູ້ໃດສົນໃຈເລື້ອງ
ລ້ຽງສັດ ທຳອິດນີ້ ກໍເອົາມາເປັນກຳມະກອນລ້ຽງງົວ ໃຫ້ເຂົາເຈົ້າຫັ້ນ ຈັກ 6 ເດືອນ
ຫາປີນຶ່ງ ຫຼັງຈາກນັ້ນມາ ໃຜມີດິນເປັນຂອງສ່ວນຕົວຫັ້ນເດ່ ເຂົາເຈົ້າຈະສະໜອງ
ແນວພັນໃຫ້ ແລ້ວກໍສະໜອງງົວໃຫ້ ແລ້ວກໍສະໜອງສັດຕະວະແພດຂອງເຈົ້າຮັ້ນ
ເປັນຮອບວຽນເນາະ ເຂົາເຈົ້າສັກຂອງເຂົາເຈົ້າ ແລ້ວກໍສັກຂອງອັນທີ່ເຂົາເຈົ້າໄດ້
ສະໜອງລູກງົວນີ້ ໃຫ້ໄປລ້ຽງ ຮອດກຳນົດມາແລ້ວ ກະແມ່ນຂາຍຄືນໃຫ້ກັບບໍລິສັດ
ເພື່ອເປັນສິນຄ້າສົ່ງອອກ.”
ທັງນີ້ ໂດຍບໍລິສັດຍີ່ປຸ່ນພັດທະນາກະສິກຳຈຳກັດ ຈະນຳໃຊ້ເງິນລົງທຶນຄິດເປັນມູນຄ່າ
ຮວມ 77 ລ້ານໂດລາ ຊຶ່ງນອກຈາກຈະລ້ຽງງົວ ເພື່ອແປຮູບເປັນຊີ້ນງົວທີ່ມີຄຸນນະພາບ
ລະດັບດຽວກັນກັບຊີ້ນໂຄເບ ໃນຍີ່ປຸ່ນແລ້ວກໍຍັງຈະກໍ່ສ້າງໂຮງງານຜະລິດນົມງົວຄຸນນະ
ພາບສູງເພື່ອສົ່ງອອກໄປຕ່າງປະເທດເປັນດ້ານຫຼັກ ທັງຈະສົ່ງເສີມປະຊາຊົນ ໃນທ້ອງ
ຖິ່ນໃຫ້ລ້ຽງງົວຕອບສະໜອງໃຫ້ບໍລິສັດເພີ່ມຂຶ້ນນັບມື້ອີກດ້ວຍ. ທ່ານບຸນຕົ້ນ ຢືນຢັນ
ດ້ວຍວ່າ ການລົງທຶນຂອງບໍລິສັດຈາກຍີ່ປຸ່ນ ດັ່ງກ່າວນີ້ຈະປະກອບສ່ວນຢ່າງສຳຄັນເຂົ້າ
ໃນການພັດທະນາເສດຖະກິດຂອງແຂວງຊຽງແຂວງ ຊຶ່ງໃນໄລຍະ 5 ປີ ຜ່ານມາໄດ້
ຂະຫຍາຍຕົວເພີ້ມຂຶ້ນ ໃນອັດຕາສະເຫຼ່ຍເຖິງ 8.5 ເປີເຊັນ ຕໍ່ປີ ໂດຍໃນນີ້ ກໍເປັນການ
ຂຫຍາຍຕົວຂອງພາກບໍລິການກວ່າ 12 ເປີເຊັນ ພາກອຸດສາຫະກຳ ກວ່າ 11 ເປີເຊັນ
ແລະພາກກະສິກຳ ຕ່ຳສຸດທີ່ລະດັບ 3.1 ເປີເຊັນ ຕໍ່ປີ ຫາກແຕ່ ດ້ວຍການລົງທຶນຂອງ
ບໍລິສັດຈາກຍີ່ປຸ່ນ ດັ່ງກ່າວ ກໍເຊື່ອວ່າຈະສົ່ງຜົນດີ ທັງຕໍ່ການຜະລິດໃນພາກກະສິກຳ
ໃນແຂວງຊຽງຂວາງ ແລະຂະຫຍາຍກ້ວາງອອກໄປ ໃນທົ່ວປະເທດລາວອີກດ້ວຍ.
ທັງນີ້ ລັດຖະບານລາວ ໄດ້ວາງແຜນການຊຸກຍູ້ ການຜະລິດພາກກະສິກຳ ໃນປີ 2018 ໃຫ້ຂະຫຍາຍຕົວເພີ້ມຂຶ້ນ ໃນອັດຕາສະເຫຼ່ຍ 2,8 ເປີເຊັນ ທຽບໃສ່ປີ 2017 ຊຶ່ງກໍຈະເຮັດໃຫ້ຜົນຜະລິດ ໃນພາກກະສິກຳຄິດເປັນ 15.73 ເປີເຊັນ ຂອງຍອດຜະລິດຕະພັນຮວມ (GDP) ໃນປີ 2018 ນີ້ ແຕ່ດ້ວຍຜົນກະທົບຈາກໄພນ້ຳຖ້ວມຄັ້ງໃຫຍ່ ໃນຊ່ວງເດືອນກໍລະກົດ ຫາເດືອນກັນຍາ ທີ່ຜ່ານມາ ກໍເຮັດໃຫ້ຜົນຜະລິດກະສິກຳເສຍຫາຍ ໄປແລ້ວເກີນກວ່າ 5 ເປີເຊັນ ຂອງເປົ້າໝາຍແຜນການທີ່ລັດຖະບານລາວ ໄດ້ວາງເອົາໄວ້ດັ່ງກ່າວ.
ທັງນີ້ ໂດຍເຈົ້າໜ້າທີ່ອົງການອາຫານແລະການກະເສດແຫ່ງສະຫະປະຊາຊາດ (FAO) ສຳນັກງານປະຈຳບາງກອກ ປະເທດໄທ ເປີດເຜີຍວ່າ FAO ໄດ້ປະເມີນ ເບື້ອງຕົ້ນວ່າໄພນ້ຳຖ້ວມຄັ້ງໃຫຍ່ ທີ່ເກີດຂຶ້ນທົ່ວປະເທດລາວນັບແຕ່ກາງເດືອນກໍລະກົດ 2018 ເປັນຕົ້ນມາ ໄດ້ເຮັດໃຫ້ເກີດການເສຍຫາຍ ໄປແລ້ວຫຼາຍກວ່າ 1,800 ຕື້ກີບ ໂດຍພາກກະສິກຳເສຍຫາຍ ຫຼາຍ ກວ່າ 1,260 ຕື້ກີບ.
ຍິ່ງໄປກວ່ານັ້ນ ກະເສດຕະກອນລາວ ຍັງຕ້ອງສູນເສຍເຂົ້ານາປີໄປ 96,000 ກວ່າເຮັກຕາ ຫຼື 12 ເປີເຊັນ ຂອງນາປີ ທີ່ປັກດຳໄດ້ທັງໝົດ ຊຶ່ງບໍ່ຮວມເຖິງເຂົ້າໄຮ່ແລະພື້ນທີ່ປູກພືດຕ່າງໆ ທີ່ເສຍຫາຍໄປກວ່າ 15,000 ເຮັກຕາ ພ້ອມດ້ວຍ ໜອງລ້ຽງປາ 5,387 ແຫ່ງ ງົວ ຄວາຍ ໝູ ແບ້ ຫຼາຍກວ່າ 23,000 ໂຕ ຂອງສັດປີກ 70,000 ກວ່າໂຕ ຮວມທັງສວນປູກຜັກ ອີກຫຼາຍກວ່າ 5,200 ເຮັກຕາ ໃນທົ່ວປະເທດ.
