ການກໍ່ສ້າງເຂື່ອນໄຊຍະບູລີ ເທິງແມ່ນ້ຳຂອງໃນລາວໄດ້ຄືບໜ້າ
ແລ້ວຫຼາຍກວ່າ 40 ເປີເຊັນ ຂອງແຜນການທີ່ວາງໄວ້ ຊຶ່ງໃນນີ້
ກໍລວມເຖິງການທີ່ໄດ້ດຳເນີນການອ່ວຍແລວນ້ຳໄຫລ ໃນແມ່
ນ້ຳຂອງແລ້ວອີກດ້ວຍ.
ບໍລິສັດໄຊຍະບູລີ ພາວເວີ ຈຳກັດ ຊຶ່ງເປັນຜູ້ລົງທຶນກໍ່ສ້າງເຂື່ອນ
ໄຊຍະບູລີຂອງລາວ ໄດ້ສະເໜີລາຍງານວ່າ ການກໍ່ສ້າງເຂື່ອນໃນພາກຕົວຈິງ ທີ່ໄດ້ເລີ້ມ
ດຳເນີນການ ນັບແຕ່ ປີ 2012 ເປັນຕົ້ນມາຈົນເຖິງປັດຈຸບັນໄດ້ຄື້ບໜ້າໄປແລ້ວ ຫຼາຍກວ່າ 40 ເປີເຊັນ ຂອງແຜນການທັງໝົດ ກໍຄືໄດ້ສຳເລັດການກໍ່ສ້າງຕົວເຂື່ອນຢູ່ຝັ່ງເບື້ອງຂວາ
ຂອງໂຄງການ ແລະໄດ້ດຳເນີນການອ່າຍແລວນ້ຳຂອງໃນທ້າຍເດືອນມັງກອນທີ່ຜ່ານມາ ໂດຍມີທ່ານຈຸມມາລີ ໄຊຍະສອນ ປະທານປະເທດ ແລະເລຂາທິການໃຫຍ່ພັກປະຊາຊົນ
ປະຕິວັດລາວ ໃຫ້ກຽດເປັນປະທານໃນພິທີ.
ທາງດ້ານທ່ານເຣວັດ ສຸວັນນະກິດຕິ ຮອງຜູ້ຈັດການດ້ານເທັກນິກຂອງບໍລິສັດໄຊຍະບູລີ
ພາວເວີ ກໍໄດ້ຖະແຫລງຢືນຢັນວ່າ ການກໍ່ສ້າງເຂື່ອນໄຊຍະບູລີໄດ້ດຳເນີນໄປຕາມແຜນ
ການທີ່ວາງໄວ້ໃນທຸກດ້ານ ດັ່ງນັ້ນ ຈຶ່ງເຊື່ອໝັ້ນວ່າ ການກໍ່ສ້າງເຂື່ອນຈະສຳເລັດຕາມກຳ
ນົດການ ທີ່ວາງໄວ້ໃນປີ 2019 ຢ່າງແນ່ນອນ.
ໃນຂະນະດຽວກັນ ທ່ານວີລະພົນ ວີລະວົງ ລັດຖະມົນຕີຊ່ວຍວ່າການ ກະຊວງພະລັງງານ
ແລະບໍ່ແຮ່ ກໍໄດ້ໃຫ້ການຢືນຢັນວ່າ ການກໍ່ສ້າງເຂື່ອນໄຊຍະບູລີ ໄດ້ດຳເນີນໄປໂດຍການ
ປຶກສາຢ່າງໃກ້ຊິດກັບຄະນະວິສະວະກອນ ທີ່ມີຄວາມຊ່ຽວຊານ ໃນລະດັບສາກົນ ຊຶ່ງ
ປະກອບດ້ວຍ ນັກວິສະວະກອນຂອງບໍລິສັດ POYRY ແລະບໍລິສັດ AF-Consult ຈາກ
ສະວິດເຊີແລນ ລວມເຖິງບໍລິສັດ CNR ຈາກຝຣັ່ງເສດ ແລະ ບໍລິສັດ TEAM Group ຈາກປະເທດໄທ ເພາະສະນັ້ນ ຈຶ່ງສາມາດຮັບປະກັນໄດ້ວ່າ ໂຄງການກໍ່ສ້າງເຂື່ອນໄຊຍະ
ບູລີ ຈະບໍ່ສົ່ງຜົນກະທົບ ຕໍ່ສິ່ງແວດລ້ອມທຳມະຊາດ ໃນເຂດຕອນລ່າງ ຢ່າງແນ່ນອນ.
ທັງນີ້ ທ່ານວີລະພົນ ໄດ້ໃຫ້ການອະທິບາຍວ່າ ການກໍ່ສ້າງ
ເຂື່ອນໄຊຍະບູລີ ໄດ້ນຳໃຊ້ເທັກໂນໂລຈີ ທີ່ທັນສະໄໝໃນຂັ້ນສຸດ
ຍອດຂອງໂລກ ທັງໃນສ່ວນທີ່ເປັນເຄື່ອງກຳເນີດໄຟຟ້າ ລະບົບ
ສົ່ງໄຟຟ້າແລະລະບົບຄວບຄຸມໄຟຟ້າ ທັງຍັງໄດ້ນຳໃຊ້ອຸປະກອນ
ທີ່ເປັນມິດຕໍ່ສິ່ງແວດລ້ອມທຳມະຊາດອີກດ້ວຍ ຕົວຢ່າງກໍຄືລະບົບ
ປະຕູນ້ຳ ແລະ ລະບົບກັງຫັນທີ່ບໍ່ເປັນອັນຕະລາຍຕໍ່ສັດນ້ຳເປັນຕົ້ນ.
ໂຄງການເຂື່ອນໄຊຍະບູລີ ມີກຳນົດກໍ່ສ້າງແລ້ວເສັດພາຍໃນປີ 2019 ໂດຍຈະສາມາດ
ຜະລິດພະລັງງານໄຟຟ້າໄດ້ເຖິງ 1,280 MW ແລະ ຈະສົ່ງກະແສໄຟຟ້າຂາຍໃຫ້ໄທ
ເປັນເວລາ 29 ປີ ກໍຄືນັບແຕ່ປີ 2019-2048 ໂດຍຫລັງຈາກນັ້ນ ກໍຄືໃນປີ 2049 ໂຄງ
ການເຂື່ອນໄຊຍະບູລີ ກໍຈະຖືກໂອນມາເປັນຂອງລັດຖະບານລາວທັງໝົດ.
ກ່ອນໜ້ານີ້ ທ່ານສຸລິວົງ ດາລາວົງ ລັດຖະມົນຕີວ່າການ ກະຊວງພະລັງງານ ແລະບໍ່ແຮ່
ກໍຖະແຫລງຢືນຢັນວ່າ ການພັດທະນາດ້ານພະລັງງານໃນລາວ ທີ່ສ່ວນໃຫຍ່ຈະເປັນການ
ກໍ່ສ້າງເຂື່ອນໄຟຟ້ານ້ຳຕົກນັ້ນ ຖືເປັນພະລັງງານທາງເລືອກ ແລະພະລັງງານທົດແທນ ທີ່
ສະອາດ ແລະເປັນມິດຕໍ່ສິ່ງແວດລ້ອມທຳມະຊາດ ທັງຍັງຈະສົ່ງຜົນກະທົບດ້ານລົບ ຕໍ່ສັງ
ຄົມ ໃນລະດັບທີ່ຕ່ຳຫຼາຍອີກດ້ວຍ.
ຍິ່ງໄປກວ່ານັ້ນ ການກໍ່ສ້າງເຂື່ອໄຟຟ້ານ້ຳຕົກ ກໍຍັງຈະສົ່ງຜົນດີຕໍ່ການພັດທະນາ ທາງ
ເສດຖະກິດເພື່ອຍົກບະດັບ ຄຸນນະພາບຊີວິດການເປັນຢູ່ ຂອງປະຊາຊົນລາວໃຫ້ດີຂຶ້ນ
ເທື່ອລະກ້າວ ເນື່ອງຈາກລາວສາມາດທີ່ຈະສ້າງລາຍຮັບຈາກການຂາຍກະແສໄຟຟ້າ
ແລະໃນຂະນະດຽວກັນ ການຕອບສະໜອງກະແສໄຟຟ້າ ໄປໃຫ້ປະຊາຊົນລາວໄດ້ຊົມໃຊ້
ຢ່າງກວ້າງຂວາງຫຼາຍຂຶ້ນນັບມື້ນັ້ນ ກໍຍັງໄດ້ປະກອບສ່ວນຢ່າງສຳຄັນເຂົ້າໃນການພັດທະ
ນາພາກການຜະລິດຕ່າງໆໄດ້ເປັນຢ່າງດີ ດັ່ງທີ່ ທ່ານສຸລິວົງ ໄດ້ກ່າວວ່າ:
“ການພັດທະນາໄຟຟ້າຢູ່ ສປປ ລາວ ສ່ວນໃຫຍ່ແມ່ນໄຟຟ້ານ້ຳຕົກ ຊຶ່ງຈັດເປັນ
ພະລັງງານໃນກຸ່ມແຫລ່ງພະລັງງານ ທີ່ສະອາດ ເປັນພະລັງງານທົດແທນໄດ້ ແລະ
ມີຜົນກະທົບນ້ອຍຕໍ່ສິ່ງແວດລ້ອມທຳມະຊາດ ແລະສັງຄົມ ພ້ອມກັນນັ້ນ ຍັງໄດ້
ປະກອບສ່ວນອັນໃຫຍ່ຫລວງ ຕໍ່ການພັດທະນາຊົນນະບົດ ເປັນການປະກອບ
ສ່ວນສ້າງລາຍຮັບແຫ່ງຊາດ ຈາກການຂາຍໄຟຟ້າ ແລະກໍຍັງເປັນການຊ່ວຍໃຫ້
ຂະແໜງການອື່ນໆ ໄດ້ຮັບການພັດທະນາອີກດ້ວຍ.”
ທັງນີ້ ກະຊວງພະລັງງານ ແລະບໍ່ແຮ່ໄດ້ວາງແຜນການ ທີ່ຈະເພີ້ມລະດັບຄວາມອາດ
ສາມາດ ໃນການຜະລິດພະລັງໄຟຟ້າຈາກ 3,200 MW ໃນປັດຈຸບັນ ເປັນບໍ່ໜ້ອຍກວ່າ
12,500 MW ໃນປີ 2020 ຊຶ່ງກໍໝາຍຄວາມວ່າ ລັດຖະບານລາວ ຈະຕ້ອງສົ່ງເສີມການ
ລົງທຶນເຂົ້າມາໃນພາກພະລັງງານໃຫ້ໄດ້ເພີ້ມຂຶ້ນຢ່າງຕໍ່ເນື່ອງ ໂດຍສຳຫລັບນັບແຕ່
ປັດຈຸບັນໄປຈົນເຖິງປີ 2020 ດັ່ງກ່າວກໍຈະຕ້ອງກໍ່ສ້າງເຂື່ອນໄຟຟ້າ ໃຫ້ໄດ້ 38 ໂຄງການ
ພ້ອມດ້ວຍໂຮງງານຜະລິດໄຟຟ້າ ຈາກຖ່ານລິກໄນຕ໌ອີກ 1 ໂຄງການ.
