ທ່ານພົນຈັດຕະວາ ບົວສ້ຽງ ຈໍາປາພັນ ຮອງຫົວໜ້າກົມໃຫຍ່ເສນາທິການກອງທັບປະຊາຊົນລາວ ໃນຖານະຜູ້ຮັບ ຜິດຊອບການຮອງຮັບເອົາບັນດາຊາວມົ້ງ ທີ່ຖືກທາງການ ໄທສົ່ງກັບຄືນປະເທດລາວ ໄດ້ໃຫ້ການຢືນຢັນວ່າ ທາງການລາວໄດ້ໃຫ້ການຊ່ວຍເຫລືອແລະເບິ່ງແຍງຊາວມົ້ງທຸກຄົນເປັນຢ່າງດີໃນທຸກໆດ້ານ ຊຶ່ງກໍໄດ້ເປັນຜົນ ເຮັດໃຫ້ຊີວິດຄວາມເປັນຢູ່ຂອງພວກເຂົາເຈົ້າ ໄດ້ຮັບການຍົກລະດັບໃຫ້ດີຂຶ້ນນັບມື້ ຫລືດີຂຶ້ນຈົນຕ່າງຊາດບໍ່ຕ້ອງ ເປັນຫ່ວງເປັນໃຍຫລືກັງວົນຕໍ່ຊະຕາກໍາຂອງພວກເຂົາເຈົ້າອີກຕໍ່ໄປແລ້ວ ດັ່ງທີ່ທ່ານພົນຈັດຕະວາ ບົວສ້ຽງ ໄດ້ຖະແຫລງຊີ້ແຈງໃນຕອນນຶ່ງວ່າ:
“ຍ້ອນວ່າປະເທດລາວເປັນປະເທດດ້ອຍພັດທະນາ ຊໍ້າຜັດຕ້ອງປະເຊີນກັບສົງຄາມອັນດຸເດືອດຮ້າຍແຮງໃນຂະນະທີ່ປະຊາຊົນລາວສ່ວນໃຫຍ່ກໍຍັງມີຄວາມທຸກຍາກ ສ່ວນປະຊາຊົນທີ່ກັບມາແຕ່ປະເທດໄທນັ້ນ ກໍຍິ່ງທຸກຫລາຍກວ່າ ຍ້ອນວ່າພວກເຂົາເຈົ້າໝົດຕົນໝົດຕົວແລ້ວ ອັນນີ້ຈຶ່ງເປັນຈຸດສຸມທີ່ເຮັດໃຫ້ລັດຖະບານລາວຕ້ອງ ສຸມທຶນຮອນໃສ່ເພື່ອພັດທະນາໃຫ້ພວກເຂົາເຈົ້າ ແລະຈົນເຖິງເວລານີ້ ຂ້າພະເຈົ້າກໍຢາກສະເໜີວ່າ ເມື່ອມາເຖິງ ຈຸດນີ້ແລ້ວກໍຂໍຢ່າໄດ້ເປັນຫ່ວງເປັນໃຍຊ໊ະ ເພາະວ່າພວກເຂົາເຈົ້າບໍ່ຖືກໂທດ ບໍ່ຖືກຂົ່ມຂູ່ ແລະພວກເຂົາເຈົ້າກໍຢູ່ ດີກິນດີແລ້ວ”
ແຕ່ຢ່າງໃດກໍຕາມ ກ່ອນໜ້ານີ້ ທ່ານ Al Franken ວຸດທິສະມາຊິກຈາກລັດ ມິນເນໂຊຕ້າ ສະຫະລັດອາເມລິກາ ກໍເຄີຍຖະແຫລງ ໃນໂອກາດທີ່ທ່ານພ້ອມດ້ວຍຄະນະໄດ້ເດີນທາງໄປຢ້ຽມຢາມບັນດາຊາວມົ້ງ ທີ່ຖືກສົ່ງກັບຄືນຈາກປະເທດໄທຢູ່ທີ່ເຂດຈັດສັນໃໝ່ບ້ານໂພນຄໍາ ເມືອງບໍລິຄັນ ແຂວງບໍລິຄໍາໄຊ ເມື່ອເດືອນກໍລະກົດຜ່ານ ມາວ່າ ທ່ານບໍ່ພໍໃຈກັບທາງການລາວທີ່ບໍ່ໄດ້ໃຫ້ອິດສະລະແກ່ທ່ານຢ່າງແທ້ຈິງ ໃນການໄປຢ້ຽມຢາມຊາວມົ້ງໃນຄັ້ງດັ່ງກ່າວ ຫາກແຕ່ເປັນການເດີນທາງໄປພາຍໃຕ້ເງຶ່ອນໄຂແລະສະພາບການຕ່າງໆ ທີ່ທາງການລາວໄດ້ຈັດຕຽມໄວ້ກ່ອນແລ້ວ. ພ້ອມກັນນັ້ນ ທ່ານ Al Franken ກໍໄດ້ສະແດງການຄາດຫວັງວ່າ ທາງການລາວຈະເປີດກວ້າງ ກ່ຽວກັບການແກ້ໄຂບັນຫາຊາວມົ້ງຫລາຍຂື້ນໃນໄລຍະຕໍ່ໄປ ເນຶ່ອງຈາກວ່າທາງການສະຫະລັດຖື ວ່າເປັນບັນຫາສໍາຄັນທີ່ຈະຕ້ອງຮ່ວມກັນແກ້ໄຂໃຫ້ລຸລ່ວງໄປ.
ຍິ່ງໄປກວ່ານັ້ນ ທ່ານ Al Franken ກໍຍັງໄດ້ຮຽກຮ້ອງຂໍໃຫ້ທາງການລາວ ຍອມອະນຸຍາດແລະອໍານວຍຄວາມສະດວກໃຫ້ກັບຊາວມົ້ງ ຈໍານວນ 158 ຄົນ ທີ່ໄດ້ຮັບສະຖານະພາບເປັນຜູ້ອົບພະຍົບຈາກສໍານັກງານຂ້າຫລວງ ໃຫຍ່ຜູ້ລີ້ໄພແຫ່ງອົງການສະຫະປະຊາຊາດ ຫລື UNHCR ແລ້ວນັ້ນ ເພື່ອໃຫ້ເດີນທາງໄປຢູ່ປະເທດທີ່ສາມໄດ້ໂດຍອິສະລະອີກດ້ວຍ ເນຶ່ອງ ຈາກວ່າໃນໄລຍະທີ່ຜ່ານມານັ້ນ ທາງການສະຫະລັດ ຄານາດາ ເນເທີແລນດ໌ ແລະອອສ ເຕຣເລຍ ກໍໄດ້ສະແດງຄວາມພ້ອມທີ່ຈະຮັບຮອງເອົາຊາວມົ້ງເຫລົ່ານີ້ແລ້ວ ຫາກແຕ່ກໍຖືກປະຕິເສດ ຈາກທາງການລາວແລະໄທ ມາໂດຍຕະຫລອດ.
ການເດີນທາງໄປຢ້ຽມຢາມຊາວມົ້ງຢູ່ເຂດຈັດສັນໃໝ່ ບ້ານໂພນຄໍາ ໂດຍຄະນະຂອງທ່ານ Al Franken ດັ່ງ ກ່າວ ກໍປາກົດວ່າມີທ່ານພົນຈັດຕະວາບົວສ້ຽງ ຮ່ວມເດີນທາງໄປດ້ວຍ ແລະທາງການລາວກໍຍັງໄດ້ໃຊ້ເຮລິຄອບເຕີ້ ໃນການນໍາພາຄະນະຂອງທ່ານ Al Franken ເພື່ອກວດເບິ່ງສະພາບການໂດຍລວມຂອງເຂດຈັດສັນໃໝ່ບ້ານໂພນຄໍາ ຈາກທາງອາກາດອີກດ້ວຍ. ທາງການໄທໄດ້ຈັດສົ່ງຊາວມົ້ງຊຸດສຸດທ້າຍ ຈໍານວນ 4,711 ຄົນ ຈາກສູນຮອງຮັບຊົ່ວຄາວບ້ານຫ້ວຍນໍ້າຂາວ ໃນເຂດອໍາເພີເຂົາຄໍ້ ຈັງຫວັດເພັດຊະບູນຂອງໄທ ກັບຄືນໄປລາວໃນລະວ່າງວັນທີ່ 28-29 ເດືອນທັນວາ 2009 ທີ່ຜ່ານມາ ໂດຍຊາວມົ້ງໄດ້ພາກັນເລືອກຢູ່ໃນເຂດຈັດສັນໃໝ່ ດັ່ງກ່າວນີ້ ເປັນສ່ວນໃຫຍ່.
ເຂດຈັດສັນໃໝ່ບ້ານໂພນຄໍາ ມີເນື້ອທີ່ທັງໝົດກວ້າງກວ່າ 2,000 ເຮັກຕ້າ ຊຶ່ງໄດ້ມີການຈັດສັນພື້ນທີ່ກວ້າງ 100 ເຮັກຕ້າເປັນເຂດທີ່ຢູ່ອາໃສ ແລະພື້ນທີ່ສ່ວນທີ່ເຫລືອກໍໄດ້ຈັດສັນໃຫ້ເປັນດິນທໍາກິນ ສໍາລັບຊາວມົ້ງຈໍານວນ 600 ກວ່າຄອບຄົວຫລືຫລາຍກວ່າ 3,000 ຄົນ. ທັງນີ້ໂດຍໃນປັດຈຸບັນ ທາງການລາວກໍໄດ້ກໍ່ສ້າງເຮືອນ ພ້ອມດ້ວຍນໍ້າລິນ ວິດຖ່າຍ ທາງຊອຍ ທາງໃຫຍ່ ສຸກສາລາ ໂຮງຮຽນ ແລະວາງສາຍສົ່ງໄຟຟ້າ ເຂົ້າໄປໃນໝູ່ບ້ານຢ່າງຄົບຊຸດແລ້ວ ແລະໃນຂະນະດຽວກັນ ກໍໄດ້ຈັດສັນທີ່ດິນທໍາກິນເທິງເນື້ອທີ່ກວ້າງກວ່າ 1,700 ເຮັກຕ້າ ໃຫ້ກັບຊາວມົ້ງຄອບຄົວລະ 2 ເຮັກຕ້າ ແລະໃນປັດຈຸບັນນີ້ ກໍກໍາລັງດໍາເນີນການກໍ່ສ້າງຄອງຊົນລະປະທານຢ່າງຕັ້ງໜ້າອີກດ້ວຍ.
