ທ່ານຈະຕຸພອນ ໂສພາລັກ ຜູ້ອໍານວຍການຝ່າຍບໍລິຫານຂອງພະລັງງານໄຟຟ້າຣາດຊະບຸຣີ
ປະຈໍາລາວ ໄດ້ຖະແຫລງຢືນຢັນວ່າໂຄງການເຂື່ອນນໍ້າງື່ມ 2 ໃນແຂວງວຽງຈັນໄດ້ດໍາເນີນ
ການກໍ່ສ້າງສຳເລັດແລ້ວ ໂດຍໃນປັດຈຸບັນນີ້ ກໍໄດ້ສໍາເລັດການທົດລອງຜະລິດກະແສໄຟ
ຟ້າສໍາລັບເຄຶ່ອງຈັກໜ່ວຍທີ່ 1 ແລະກໍໄດ້ເລີ້ມສົ່ງອອກ ກະແສໄຟຟ້າທີ່ຜະລິດໄດ້ບາງສ່ວນ
ໄປຂາຍໃຫ້ການໄຟຟ້າຝ່າຍຜະລິດແຫ່ງປະເທດໄທ ຫລື EGAT ແລ້ວ ນັບຈາກເດືອນກັນ
ຍາເປັນຕົ້ນມາ.
ແຕ່ຢ່າງໃດກໍຕາມ ສໍາລັບການສົ່ງອອກກະແສໄຟຟ້າຈາກໂຄງການເຂຶ່ອນນໍ້າງື່ມ 2 ໄປຂາຍ
ໃຫ້ກັບ EGAT ຂອງໄທໄດ້ຢ່າງຄົບຖ້ວນຕາມຄວາມອາດສາມາດທັງໝົດຂອງໂຄງການ ກໍ
ຄື 615 MW ນັ້ນ ກໍຈະຕ້ອງມີການທົດລອງເດີນເຄຶ່ອງຈັກຜະລິດກະແສໄຟຟ້າໜ່ວຍທີ່ 2
ແລະ ໜ່ວຍທີ່ 3 ໃນເດືອນຕຸລາແລະເດືອນພະຈິກນີ້ ຕາມລໍາດັບ ຊຶ່ງຖ້າຫາກວ່າການທົດ
ລອງເປັນໄປດ້ວຍດີ ກໍຈະເຮັດໃຫ້ສາມາດເລີ່ມສົ່ງກະແສໄຟຟ້າໃຫ້ກັບ EGAT ຂອງໄທໄດ້
ຢ່າງຄົບຖ້ວນ ນັບຈາກທ້າຍເດືອນທັນວາປີນີ້ເປັນຕົ້ນໄປ ເປັນລະຍະເວລາ 25 ປີນັ້ນເອງ.
ນອກນີ້ ບໍລິສັດພະລັງງານໄຟຟ້າຣາດຊະບຸລີ ກໍຍັງຈະສາມາດເລີ່ມລົງມືດໍາເນີນການກໍ່ສ້າງ
ໂຄງການເຂື່ອນນໍ້າງື່ມ ທີ່ຢູ່ເໜືອໂຄງການເຂຶ່ອນນໍ້າງື່ມ 2 ຂຶ້ນໄປໄດ້ ພາຍໃນປີ 2011
ອີກດ້ວຍ ດັ່ງທີ່ທ່ານຈະຕຸພອນ ໄດ້ຖະແຫລງຊີ້ແຈງວ່າ:
“ເຂຶ່ອນໄຟຟ້ານໍ້າງື່ມ 2 ໄດ້ທໍາການເດີນເຄຶ່ອງຈັກໜ່ວຍທີ່ 1 ເປັນທີ່ຮຽບຮ້ອຍແລ້ວ ແລະກໍເປັນທີ່ໜ້າດີໃຈວ່າຜົນຈາກການທົດສອບຕ່າງໆນັ້ນຜ່ານໄປດ້ວຍດີບໍ່ມີບັນຫາ ໂດຍໃນປັດຈຸບັນເຮົາກໍສາມາດສົ່ງກະແສໄຟຟ້າບາງ ສ່ວນໄປຂາຍໃຫ້ກັບປະເທດໄທໄດ້ແລ້ວ ແລະໃນປັດຈຸບັນສໍາລັບໃນສ່ວນເຂື່ອນໄຟຟ້ານໍ້າງື່ມ 3 ນັ້ນ ກໍຢູ່ໃນລະຫວ່າງການຊອກຫາຜູ້ຮັບເໝົາເພື່ອທີ່ວ່າຈະໄດ້ເລີ່ມດໍາເນີນການກໍ່ສ້າງໄດ້ພາຍໃນປີໜ້າ”
ບໍລິສັດພະລັງງານໄຟຟ້າຣາດຊະບຸລີ ຈາກປະເທດໄທ ມີສັດສ່ວນການຮ່ວມລົງທຶນໃນໂຄງ ການເຂື່ອນແມ່ນໍ້າງື່ມ 2 ແລະ 3, ໂຄງການລະ 25% ພ້ອມກັນນີ້ ກໍຍັງມີສັດສ່ວນການຮ່ວມລົງທຶນໃນໂຄງການຫົງສາລິກໄນຕ໌ ຢູ່ແຂວງໄຊຍະບຸລີ ແລະໂຄງການເຂື່ອນເຊປຽນ-ເຊນໍ້ານ້ອຍ ຢູ່ທີ່ແຂວງຈໍາປາສັກແລະອັດຕະປື ໃນສັດສ່ວນ 40% ແລະ 25% ຕາມລໍາ ດັບ ໂດຍຖ້າຫາກວ່າ ການກໍ່ສ້າງສໍາເລັດທັງ 4 ໂຄງການພາຍໃນປີ 2017 ເປັນຢ່າງຊ້ານັ້ນ ກໍຈະເຮັດໃຫ້ສາມາດຜະລິດກະແສໄຟຟ້າ ເພື່ອສົ່ງຂາຍໃຫ້ກັບ EGAT ຂອງໄທໄດ້ ໃນປະລິມານລວມຫລາຍກວ່າ 3,000 MW.
