ລັດວິສາຫະກິດໄຟຟ້າລາວເຂົ້າຖືຫຸ້ນ 20 ເປີເຊັນ ຂອງມູນຄ່າການລົງທຶນທັງໝົດໃນໂຄງການກໍ່ສ້າງເຂຶ່ອນຜະລິດກະແສໄຟຟ້າດອນສະຫົງໃນເຂດ ພາກໃຕ້ຂອງລາວ ໃນຂະນະທີ່ນັກອະນຸລັກກໍໄດ້ລະບຸວ່າໂຄງການດັ່ງກ່າວນີ້ຈະສົ່ງຜົນກະທົບຕໍ່ສະພາບແວດລ້ອມແລະສັດນ້ຳຢ່າງຮຸນແຮງ
ທ່ານຄຳມະນີ ອິນທິລາດ ຜູ້ອຳນວຍການບໍລິຫານລັດວິສາຫະກິດໄຟຟ້າລາວ ແລະທ່ານ Goh Nan Kioh ປະທານບໍລິສັດ Mega First Corporation Berhad ແຫ່ງປະເທດມາເລເຊຍ ໄດ້ລົງນາມໃນສັນຍາຮ່ວມລົງທຶນເພື່ອການກໍ່ສ້າງໂຄງການເຂຶ່ອນດອນສະຫົງຢ່າງເປັນທາງການ ເມື່ອບໍ່ນານມານີ້ຢູ່ຂະຄອນວຽງຈັນ. ໂດຍພາຍໃຕ້ສັນຍາການຮ່ວມລົງທຶນໃນຄັ້ງນີ້ ລັດວິສາຫະກິດ ໄຟຟ້າລາວຈະຖືຫຸ້ນໃນສັດສ່ວນ 20 ເປີເຊັນ ຂອງມູນຄ່າການລົງທຶນທັງໝົດ 600 ລ້ານໂດລາ ສະຫະລັດ ດ້ວຍເປົ້າໝາຍທີ່ຈະຮ່ວມກັນດຳເນີນການກໍ່ສ້າງເຂຶ່ອນໃຫ້ສຳເລັດແລະສົ່ງກະແສໄຟ ຟ້າຂາຍໃຫ້ກັບການໄຟຟ້າຝ່າຍຜະລິດແຫ່ງປະເທດໄທໃຫ້ໄດ້ນັບຈາກປີ 2016 ເປັນຕົ້ນໄປ ເປັນ ລະຍະເວລາເຖິງ 25ປີ.
ທັງນີ້ໂດຍໂຄງການເຂຶ່ອນດອນສະຫົງຈະມີກຳລັງການຜະລິດກະແສໄຟຟ້າໄດ້ເຖິງ 240 ເມກະວັດ ຫລືຫລາຍກວ່າ 1,756 ລ້ານກິໂລວັດຕໍ່ຊົ່ວໂມງ ຕໍ່ປີ. ຊຶ່ງພະລັງງານໄຟຟ້າສ່ວນໃຫຍ່ນັ້ນຈະ ສົ່ງຂາຍໃຫ້ກັບການໄຟຟ້າຝ່າຍຜະລິດແຫ່ງປະເທດໄທ ຫາກແຕ່ວ່າກໍຈະມີການຕອນສະໜອງໄຟ ຟ້າໃຫ້ກັບທ້ອງຖິ່ນໃນແຂວງຈຳປາສັກຢ່າງພຽງພໍກັບຄວາມຕ້ອງການເຊັ່ນດຽວກັນ ໂດຍລວມເຖິງ ການຕອບສະໜອງໄຟຟ້າໃຫ້ກັບໂຮງແຮມ ຣີສອທແລະສະຖານທີ່ທ່ອງທ່ຽວຕ່າງໆໃນເຂດເມືອງ ໂຂງດ້ວຍ. ເນຶ່ອງຈາກວ່າໂຄງການເຂຶ່ອນດອນສະຫົງດັ່ງກ່າວນີ້ເປັນໂຄງການທີ່ຈະຕ້ອງສ້າງຢູ່ ເທິງແນວແມ່ນ້ຳຂອງ ຈຶ່ງເຮັດໃຫ້ຖືກຕໍ່ຕ້ານຈາກບັນດາກຸ່ມອະນຸລັກຊັບພະຍາກອນທຳມະຊາດໃນ ພູມິພາກເອເຊຍຕາເວັນອອກສຽງເໜືອໄດ້ມາ ຢ່າງຕໍ່ເນຶ່ອງ ໂດຍສະເພາະແມ່ນເຄືອຂ່າຍອົງການ ພັນທະມິດເພື່ອການອະນຸລັກແມ່ນ້ຳຂອງນັ້ນ ເຖິງກັບໄດ້ຍື່ນໜັງສືຮຽກຮ້ອງເຖິງບັນດາຜູ້ນຳລັດ ຖະບານອາຊຽນ ແລະຈີນເພື່ອສະແດງການຄັດຄ້ານຕໍ່ທຸກໂຄງການກໍ່ສ້າງທີ່ເຂຶ່ອງເທິງແນວແມ່ນ້ຳ ຂອງ ມາແລ້ວຫລາຍຄັ້ງທີ່ມີການປະຊຸມສຸດຍອດ ຜູ້ນຳລັດຖະບານໃນອາຊຽນ ແລະໃນກຸ່ມແມ່ນ້ຳ ຂອງນັ້ນເອງ ໂດຍສຳຫລັບການຄັດຄ້ານຕໍ່ໂຄງການເຂຶ່ອນດອນສະຫົງນີ້ ກຸ່ມອົງການອະນຸລັກ ດັ່ງກ່າວກໍໄດ້ໃຫ້ເຫດຜົນວ່າເປັນໂຄງການທີ່ຈະສົ່ງຜົນກະທົບຢ່າງຮຸນແຮງຕໍ່ສະພາບແວດລ້ອມທຳ ມະຊາດແລະສັດນ້ຳທີ່ຢູ່ໃນແມ່ນ້ຳຂອງທີ່ຕິດຕໍ່ ລະວ່າງເຂດພາກໃຕ້ຂອງລາວກັບເຂດພາກເໜືອລົງໄປຈົນເຖິງທະເລສາບໃຫຍ່ຂອງກຳປູເຈຍ ເນຶ່ອງຈາກວ່າເຂດດັ່ງກ່າວນີ້ຖືເປັນເຂດທີ່ມີຊັບພະຍາ ກອນສັດນ້ຳທີ່ອຸດົມສົມບູນທີ່ສຸດ ເພາະສະນັ້ນ ເມື່ອມີເຂຶ່ອນມາຂວາງກັ້ນເສັ້ນທາງການອົພຍົບໄປ ມາຂອງສັດນ້ຳເຫລົ່ານີ້ ກໍຍ່ອມຈະເຮັດໃຫ້ສັດນ້ຳ ເຫລົ່ານີ້ບໍ່ສາມາດທີ່ຈະຜະສົມພັນແລະວາງໄຂ່ໄດ້ ເລີຍ ແລະຜົນທີ່ຈະຕິດຕາມມາກໍຄືການລົດລົງຂອງປະຊາກອນສັດນ້ຳຈົນຕ້ອງສູນພັນໄປໃນທີ່ສຸດ ດັ່ງທີ່ທ່ານນາງ ເປຣມລຶດີ ດາວເຣືອງ ຜູ້ປະສານງານຂອງເຄືອຂ່າຍອົງການພັນທະມິດເພື່ອການ ອະນຸລັກແມ່ນ້ຳຂອງໄດ້ໃຫ້ການຢືນຢັນວ່າ:
“ຈຸດນີ້ທີ່ຈະສ້າງເຂຶ່ອນເປັນຈຸດທີ່ປາທານໄດ້ຕະຫລອດປີພຽງຈຸດດຽວໃນພື້ນທີ່ນັ້ນ ເພາະສະນັ້ນ ຊາວບ້ານຕ້ອງຍ້າຍໜີທັນທີ ແລ້ວປາກໍຄົງຫາຍໄປທັນທີ ແລະຈະກະທົບຢ່າງກວ້າງຂວາງ ໄລ່ໄປຕັ້ງແຕ່ໄທ ລາວ ກຳປູເຈຍ ໃນທັນທີໃນເລຶ່ອງປະມົງ ຊຶ່ງສຳຫລັບພວກເຮົານີ້ເປັນຄວາມເສຍຫາຍທີ່ຮ້າຍແຮງທີ່ສຸດ”
