ຟັງລາຍງານ:
ລາວປະເຊີນກັບສະພາວະຂາດດຸນການຄ້າ ຕ່າງປະເທດຄິດເປັນມູນຄ່າຫຼາຍກວ່າ
1,700 ລ້ານໂດລາ ໃນຊ່ວງ 5 ປີ ທີ່ຜ່ານມາ ແລະຍັງເພີ່ມຂຶ້ນເຖິງ 48% ໃນໄລຍະ
6 ເດືອນ ທໍາອິດຂອງແຜນການປີນີ້.
ທ່ານ ນາມ ວິຍະເກດ ລັດຖະມົນຕີວ່າການກະຊວງອຸດສາຫະກໍາ ແລະການຄ້າຂອງ
ລາວ ໄດ້ຖະແຫຼງໃນໂອກາດກອງປະຊຸມປະຈໍາປິ 2011 ຂອງກະຊວງອຸດສາຫະກໍາ
ແລະການຄ້າ ເມື່ອບໍ່ນານມານີ້ວ່າ ມູນຄ່າການຄ້າຂາອອກ-ຂາເຂົ້າຂອງລາວ ໄດ້ເພີ່ມ
ຂຶ້ນຢ່າງຕໍ່ເນື່ອງໃນຕະຫຼອດໄລຍະ 5 ປີຜ່ານມາ ກໍຄືໃນຊ່ວງປີ 2006-2010 ທີ່ຜ່ານມາ
ນັ້ນ ການສົ່ງອອກສິນຄ້າຂອງລາວມີມູນຄ່າລວມກັນເຖິງ 4,890.8 ລ້ານໂດລາ ຫຼື
ປະມານ 39 ລ້ານຕື້ກີບ.
ຫາກແຕ່ວ່າໃນໄລຍະດຽວກັນນີ້ ກໍປະກົດວ່າລາວໄດ້ນໍາເຂົ້າສິນຄ້າຈາກຕ່າງປະເທດຄິດ ເປັນມູນຄ່າລວມກັນເຖິງ 6,612.3 ລ້ານໂດລາຫຼືປະມານ 52 ລ້ານຕື້ກີບ ເຊິ່ງກໍເປັນຜົນ ເຮັດໃຫ້ລາວຕ້ອງປະສົບກັບບັນຫາຂາດດຸນການຄ້າຕ່າງປະເທດຄິດເປັນມູນຄ່າສະສົມ
ເຖິງ 1,721.5 ລ້ານໂດລາ ຫຼືປະມານ 13.5 ລ້ານຕື້ກີບ.
ຍິ່ງໄປກວ່ານັ້ນ ໃນໄລຍະ 6
ເດືອນທຳອິດຂອງແຜນການ
2010–2011 ກໍຄືນັບຈາກ
ເດືອນຕຸລາ 2010 ເຖິງມີນາ
2011 ທີ່ຜ່ານມານີ້ ປະເທດ
ລາວຕ້ອງປະເຊີນກັບສະພາ
ວະຂາດດຸນການຄ້າຕ່າງປະ
ເທດເພີ່ມຂຶ້ນເຖິງ 48% ຖ້າ
ທຽບກັບໄລຍະດຽວກັນກັບ
ແຜນການປີ 2009–2010 ທີ່ຜ່ານມາ.
ເຊິ່ງກໍຄືໃນຂະນະທີ່ລາວໄດ້ສົ່ງອອກສິນຄ້າໄປຕ່າງປະເທດຄິດເປັນມູນຄ່າລວມ 836 ລ້ານ
ໂດລາ ຫຼືເປັນ 86% ຂອງແຜນການຕະຫຼອດປີນັ້ນ ກໍປະກົດວ່າ ໄດ້ມີການນຳເຂົ້າສິນ
ຄ້າຈາກຕ່າງປະເທດຄິດເປັນມູນຄ່າເຖິງ 1,047 ລ້ານໂດລາ ຫຼືຄິດເປັນ 83% ຂອງແຜນ
ການຕະຫຼອດປີ ຈຶ່ງເຮັດໃຫ້ລາວ ຕ້ອງປະເຊີນກັບສະພາວະຂາດດຸນການຄ້າຕ່າງປະເທດ
ຄິດເປັນມູນຄ່າລວມເຖິງ 211 ລ້ານໂດລາ ນັ້ນເອງ.
ທາງດ້ານກະຊວງແຜນການ ແລະການລົງທຶນຂອງລາວ ກໍໄດ້ລະບຸອີກດ້ວຍວ່າ ສາເຫດ
ທີ່ເຮັດໃຫ້ລາວ ຕ້ອງປະເຊີນກັບສະພາວະຂາດດຸນການຄ້າຕ່າງປະເທດຫຼາຍ ທີ່ສຸດນັ້ນ
ກໍແມ່ນການນຳເຂົ້າສິນຄ້າອຸປະໂພກ, ບໍລິໂພກທີ່ກວາມເອົາເຖິງ 72% ຂອງມູນຄ່າການ
ນຳເຂົ້າທັງໝົດໃນຂະນະທີ່ການນຳເຂົ້າສິນຄ້າປະເພດທຶນຂອງບັນດາໂຄງການລົງທຶນ
ຕ່າງໆໃນລາວນັ້ນກໍກວາມເອົາພຽງແຕ່ 28% ເທົ່ານັ້ນ. ທັງນີ້ ໂດຍສະເພາະແມ່ນນ້ຳ
ມັນເຊື້ອໄຟນັ້ນ ຖືເປັນສິນຄ້ານຳເຂົ້າທີ່ເຮັດໃຫ້ລາວຕ້ອງຂາດດຸນການຄ້າຕ່າງປະເທດ
ເພີ່ມຂຶ້ນຫຼາຍທີ່ສຸດ.
ທ່ານຄໍາຈັນ ລັດຕະນະວົງ, ປະທານສະມາຄົມນໍ້າມັນ
ເຊື້ອໄຟແລະອາຍແກັສລາວ ກໍໄດ້ໃຫ້ການຢືນຢັນວ່າ
ການຊົມໃຊ້ນໍ້າມັນເຊື້ອໄຟຢູ່ໃນລາວໄດ້ເພີ້ມຫລາຍຂຶ້ນ
ທຸກປີ.ສໍາລັບໃນຕະຫລອດປີ 2011ນີ້ ກໍຄາດໝາຍວ່າ
ລາວຈະນໍາເຂົ້ານໍ້າມັນເຊື້ອໄຟຈາກຕ່າງປະເທດໃນປະ
ລິມານລວມເກີນກວ່າ 750 ລ້ານລິດ ດັ່ງທີ່ທ່ານຄໍາຈັນ
ໄດ້ຊີ້ແຈງວ່າ:
“ການຊົມໃຊ້ນ້ຳມັນຂອງປະເທດເຮົານີ້ກະເພິ່ມຂຶ້ນ 7%-10% ຕໍ່ປີ ສະນັ້ນແລ້ວ
ໃນປີ 2009 ພວກເຮົາກໍ່ໃຊ້ນ້ຳມັນທົ່ວປະເທດນີ້ 640 ກວ່າລ້ານລິດແລະໃນປີ
2010 ນີ້ ຕາມເສດຖະຕິທີ່ເກັບມາໄດ້ເຖິງປັດຈຸບັນນີ້ກໍປະມານ 700 ກວ່າ
ລ້ານລິດແລະຖ້າມັນເພີ້ມຂຶ້ນປະມານ 7%-10%. ໃນປິ 2011 ນີ້ ພວກເຮົາ
ຈະໃຊ້ນໍ້າມັນບໍ່ຕ່ຳກວ່າ 750 ລ້ານລິດ ເພາະການພັດທະນາສ້າງສາປະເທດ
ຂອງພວກເຮົາກະເພີ້ມຂຶ້ນເນາະ.”
ໃນປັດຈຸບັນນີ້ ລາຄາຈໍາໜ່າຍຢູ່ພາຍໃນເຂດນະຄອນວຽງຈັນໄດ້ ໄດ້ປັບຂຶ້ນເປັນ 10,580
ກີບ ຕໍ່ລິດ ສໍາລັບນໍ້າມັນແອັດຊັງ ກັບ 9,190 ກີບ ແລະ 9,670 ກີບຕໍ່ລິດສຳນໍ້າມັນກາຊວນ ຫາກແຕ່ວ່າສໍາລັບປະຊາຊົນລາວຢູ່ແຂວງບໍ່ແກ້ວນັ້ນ ຈະຕ້ອງຊື້ນໍ້າມັນ ແພງກວ່າປະຊາຊົນ
ລາວຢູ່ເຂດນະຄອນວຽງຈັນ ກໍຄື 10,710 ກີບຕໍ່ລິດສໍາລັບນໍ້າມັນແອັດຊັງຊະນິດ. ສ່ວນນໍ້າ
ມັນກາຊວນນັ້ນ ກໍມີລາຄາຈໍາໜ່າຍ 9,310 ກີບຕໍ່ລິດ ແລະຍັງຈະມີການປັບຂຶນລາຄາອີກ ຖ້າຫາກວ່າລາຄານໍ້າມັນໃນຕະຫລາດໂລກ ໄດ້ປັບຕົວສູງຂຶ້ນອີກ.
