ລິ້ງ ສຳຫລັບເຂົ້າຫາ

ວັນອັງຄານ, ໑໖ ເມສາ ໒໐໒໔

ສປປ ລາວ ສົ່ງງົວອອກໄປປະເທດຈີນ ໃນປີ 2021 ໄດ້ພຽງ 2,013 ໂຕເທົ່ານັ້ນ


ງົວ ທີ່ລ້ຽງຢູ່ໃນຟາມແຫ່ງນຶ່ງໃນ ສ.ປ.ປ ລາວ ເພື່ອສົ່ງອອກ.
ງົວ ທີ່ລ້ຽງຢູ່ໃນຟາມແຫ່ງນຶ່ງໃນ ສ.ປ.ປ ລາວ ເພື່ອສົ່ງອອກ.

ລາວ ສົ່ງງົວໄປຈີນໄດ້ພຽງແຕ່ 2,013 ໂຕເທົ່ານັ້ນໃນຕະຫຼອດປີ 2021 ທີ່ຜ່ານມາ ເພາະຈີນເຂັ້ມງວດການກວດສຸຂະພາບງົວ ເນື່ອງຈາກວ່າເກີດການລະບາດພະຍາດຜິວໜັງອັກເສບຕິດຕໍ່ງົວ-ຄວາຍໃນລາວ. ຊົງຣິດ ໂພນເງິນ ມີລາຍງານກ່ຽວກັບເລື້ອງນີ້ ຈາກບາງກອກ.

ເຈົ້າໜ້າທີ່ຂັ້ນສູງໃນກະຊວງກະສິກໍາ ແລະປ່າໄມ້ເປີດເຜີຍວ່າ ໃນປີ 2021 ທີ່ຜ່ານມາທາງການລາວໄດ້ວາງເປົ້າໝາຍການສົ່ງອອກງົວ-ຄວາຍໄປຈີນໃຫ້ໄດ້ເຖິງ 50,000 ໂຕ, ແຕ່ວ່າ ກໍສາມາດສົ່ງອອກໄດ້ໂຕຈິງພຽງ 2,013 ໂຕເທົ່ານັ້ນ ຫຼື ບໍເຖິງ 5 ເປີເຊັນຂອງເປົ້າໝາຍ ໂດຍມີສາເຫດສໍາຄັນມາຈາກການເກີດການລະບາດພະຍາດຜິວໜັງອັກເສບຕິດຕໍ່ງົວ-ຄວາຍໃນລາວຢ່າງກວ້າງຂວາງ ຈຶ່ງເຮັດໃຫ້ທາງການ ຈີນ ໄດ້ເພີ້ມມາດຕະການເຂັ້ມງວດເຂົ້າໃນການກວດກາສຸຂະພາບງົວ-ຄວາຍ ກ່ອນທີ່ຈະນໍາເຂົ້າຈາກລາວ ນັບຈາກເດືອນມິຖຸນາ 2021 ເປັນຕົ້ນມາ ເພື່ອປ້ອງກັນບໍ່ໃຫ້ພະຍາດດັ່ງກ່າວເຂົ້າໄປລະບາດໃນຈີນ ຈຶ່ງຕ້ອງເພີ້ມຄວາມເຂັ້ມງວດເຂົ້າງນການກວດກາສຸຂະພາບງົວ-ຄວາຍຫຼາຍຂຶ້ນເປັນພິເສດຈົນເຖິງປັດຈຸບັນ.

ທັງນີ້ ພະຍາດຜິວໜັງອັກເສບຕິດຕໍ່ງົວ-ຄວາຍ ໄດ້ເກີດການລະບາດໃນ 126 ບ້ານຂອງ 30 ເມືອງໃນຂົງເຂດ 7 ແຂວງພາກກາງ ໂດຍມີງົວ-ຄວາຍຫຼາຍກວ່າ 25,000 ໂຕທີ່ຕິດພະຍາດດັ່ງກ່າວ ໃນນີ້ກໍຄິດເປັນເກີນກວ່າ 15 ເປີເຊັນທີ່ຕາຍໄປ ສ່ວນກີນກວ່າ 80 ເປີເຊັນ ໄດ້ຮັບການຮັກສາຈົນດີ​ແລ້ວ ຫາກແຕ່ທາງການຈີນກໍຍັງບໍ່ອະນຸຍາດໃຫ້ນໍາເຂົ້າງົວ-ຄວາຍຈາກລາວຈົນເຖິງປັດຈຸບັນນີ້ ເຮັດໃຫ້ທາງການລາວຕ້ອງຕ້ອງດໍາເນີນການເພື່ອເຮັດໃຫ້ທາງການ ຈີນ ໝັ້ນໃຈວ່າບໍ່ມີການລະບາດພະຍາດຜິວໜັງອັກເສບຕິດຕໍ່ງົວ-ຄວາຍຢູ່ໃນລາວແລ້ວທັງ 18 ແຂວງ ໂດຍສະເພາະແມ່ນເຂດເມືອງສິງ ໃນແຂວງຫຼວງນໍ້າທາທີ່ເປັນຈຸດສົ່ງງົວ-ຄວາຍຈາກລາວໄປຈີນນັ້ນກໍໄດ້ກໍໄດ້ເພີ້ມມາດຕະການກວດກາຢ່າງເຂັ້ມງວດຫຼາຍຂຶ້ນເປັນພິເສດ ດ້ວຍຫວັງວ່າທາງການຈີນຈະເລີ້ມນໍາເຂົ້າງົວ-ຄວາຍກວ່າ 8,000 ໂຕຈາກແຂວງຫຼວງນໍ້າທາໃນໄວໆນີ້, ດັ່ງທີ່ ທ່ານຖິ່ນແກ້ວ ທໍາລາສິນ ຫົວໜ້າພະແນກກະສິກໍາ ແລະປ່າໄມ້ແຂວງຫຼວງນໍ້າທາ ໄດ້ໃຫ້ການຢືນຢັນວ່າ:

“ກໍໄດ້ສົ່ງເສີມການລຽງສັດແບບເປັນກຸ່ມເປັນຟາມ ປັດຈຸບັນກໍມີຟາມລ້ຽງງົວ-ຄວາຍທັງໝົດ 54 ຟາມ, ໃນນັ້ນ ກໍມີຟາມລ້ຽງງົວ 47 ຟາມ. ສະເພາະຟາມລ້ຽງງົວເພື່ອສົ່ງອອກນີ້ກໍມີ 6 ຟາມ ສາມາດສົ່ງອອກໄດ້ປະມານ 8,800 ໂຕຕໍ່ຊຸດ, ດ້ານການບໍລິໂພກ ຊີ້ນ-ປາ-ໄຂ່ ພາຍໃນທ້ອງຕະຫຼາດຮັບໃຊ້ເຂົ້າໃນປະເທດທັງໝົດກໍມີ 9,500 ກວ່າໂຕນ, ໂດຍລວມແລ້ວ ການສະໜອງ ຊີ້ນ-ປາ-ໄຂ່ ໃຫ້ແກ່ຜູ້ບໍລິໂພກພາຍໃນແຂວງ ແລະກາຍເປັນສິນຄ້າປ້ອນຕະຫຼາດຈໍານວນນຶ່ງ.”

ກະຊວງການຄ້າຂອງຈີນ ໄດ້ສະແດງຄວາມຕ້ອງການທີ່ຈະຮັບຊື້ງົວຈາກລາວ 5 ແສນໂຕຕໍ່ປີ ເມື່ອປີ 2019 ທີ່ຜ່ານມາ ແຕ່ວ່າການລ້ຽງງົວໃນລາວຈະຕ້ອງໄດ້ມາດຕະຖານຕາມຄວາມຕ້ອງການຂອງຕະຫຼາດໃນຈີນ ໂດຍທາງການຈີນໄດ້ຕັ້ງດ່ານກວດ ແລະຈັດສົ່ງຄະນະຜູ້ຊ່ຽວຊານມາກວດຟາມລ້ຽງງົວໃນລາວທີ່ຈະສົ່ງໄປຈີນ ເພາະການສົ່ງງົວຈາກລາວໄປຈີນໃນໄລຍະຜ່ານມານັ້ນເປັນການລັກລອບຢ່າງຜິດກົດໝາຍ ເຊິ່ງທາງການຈີນຢ້ານວ່າຈະເຮັດໃຫ້ເກີດພະຍາດໃນສັດ ຈຶ່ງຕ້ອງຕັ້ງດ່ານກວດສັດດັ່ງກ່າວ.

ງົວ ທີ່ລ້ຽງຢູ່ໃນຟາມແຫ່ງນຶ່ງ ໃນ ສປປ ລາວ.
ງົວ ທີ່ລ້ຽງຢູ່ໃນຟາມແຫ່ງນຶ່ງ ໃນ ສປປ ລາວ.

ນອກຈາກນັ້ນ ງົວທີ່ຈະສາມາດສົ່ງໄປຈີນໄດ້ກໍຍັງຈະຕ້ອງມີນໍ້າໜັກຕັ້ງແຕ່ 350 ກິໂລກຣາມຂຶ້ນໄປ ແລະມີອາຍຸບໍ່ເກີນ 4 ປີ ໂດຍໃນປີ 2019 ລາວໄດ້ສົ່ງງົວ-ຄວາຍໄປຈີນ 8 ໝື່ນໂຕ ແລະ 2 ໝື່ນໂຕຕາມລໍາດັບ ແລະຫຼຸດລົງມາໃນປີ 2020-2021 ຍ້ອນການລະບາດຂອງພະຍາດໂຄວິດ-19 ແລະໃນລາວຍັງມີຟາມລ້ຽງງົວ-ຄວາຍທີ່ໄດ້ມາດຕະຖານພຽງ 290 ແຫ່ງ ມີງົວ 45,000 ໂຕກັບຄວາຍ 7,000 ໂຕເທົ່ານັ້ນ.

ທັງນີ້ ໂດຍກົມຜະລິດກະສິກໍາກອງທັບປະຊາຊົນລາວ ກັບບໍລິສັດສາງຈຽງການລົງທຶນຮ່ວມຈາກຈີນ ໄດ້ຮ່ວມກັນສ້າງຕັ້ງບໍລິສັດຮ່ວມທຶນກະສິກໍາຄົບວົງຈອນຈໍາກັດ ເຊິ່ງມີມູນຄ່າລວມ 300 ລ້ານ ແລະມີໄລຍະເວລາໃນການດໍາເນີນກິດຈະການ 30 ປີ ທັງຍັງຈະຕໍ່ສັນຍາໄດ້ 2 ຄັ້ງ ຄັ້ງລະ 30 ປີ ພາຍໃຕ້ເປົ້າໝາຍເພື່ອການພັດທະນາການລ້ຽງສັດໃນລາວໃຫ້ໄດ້ມາດຕະຖານສາກົນ ໂດຍແນໃສ່ການຜະລິດ ແລະສົ່ງອອກງົວໄປຈີນໃຫ້ໄດ້ເຖິງ 400,000 ໂຕຕໍ່ປີ, ເຊິ່ງຄິດເປັນ 80 ເປີເຊັນຂອງໂຄຕ້າທັງໝົດທີ່ລັດຖະບານຈີນໄດ້ຕົກລົງທີ່ຈະຮັບຊື້ງົວ-ຄວາຍຈາກລາວເຖິງ 5 ແສນໂຕຕໍ່ປີ ສ່ວນການພັດທະນາການລ້ຽງງົວ-ຄວາຍຂອງກະສິກອນລາວນັ້ນ ກໍຄາດວ່າລາວຈະສາມາດຕອບສະໜອງຄວາມຕ້ອງການຂອງຈີນໄດ້ແທ້ໃນ 8-10 ປີຕໍ່ໜ້າ ດ້ວຍການຮຽນຮູ້ ແລະຮັບການຖ່າຍທອດວິທະຍາການລ້ຽງສັດຈາກບໍລິສັດສາງຈຽງຂອງຈີນດັ່ງກ່າວ.

XS
SM
MD
LG