ທ່ານຈູມມະລີ ໄຊຍະສອນ ປະທານປະເທດ ແລະເລຂາທິ
ການໃຫຍ່ພັກປະຊາຊົນປະຕິວັດລາວ ໄດ້ເປັນປະທານໃນ
ພິທີປະດິດສະຖານແລະສະຫລອງສົມໂພດອະນຸສາວະລີເຈົ້າ
ອະນຸວົງຢ່າງເປັນທາງການ ຢູ່ບໍລິເວນສວນເຈົ້າອະນຸວົງ ຊຶ່ງ
ຕັ້ງຢູ່ແຄມນໍ້າຂອງດ້ານຫລັງຫໍຄໍາ ເມື່ອວັນທີ່ 7 ເດືອນພະ
ຈິກທີ່ຜ່ານມານີ້. ໂດຍໃນພິທີສະຫລອງສົມໂພດອະນຸສາ
ວະລີເຈົ້າອະນຸວົງໃນຄັ້ງນີ້ ປະທານປະເທດລາວໄດ້ຈູດທຽນ
ໄຂບູຊາ ພ້ອມລັ່ນຄ້ອງ 9 ບາດ ແລະປ່ອຍປູມເປົ້າພ້ອມດ້ວຍການສູດໄຊຍັນໂຕຈາກພະສົງ 120 ອົງ ຈາກນັ້ນກໍມີ
ການຮ້ອງເພງສະດຸດີເຈົ້າອະນຸວົງ ໂດຍກອງສິນລະປະກອນ
ສູນກາງແລະກອງທັບປະຊາຊົນລາວ ສ່ວນໃນຕອນກາງຄືນ
ກໍມີການຍິງບັ້ງໄຟດອກຢູ່ບໍລິເວນສວນອະນຸສາວະລີດັ່ງກ່າວ ໂດຍມີປະຊາຊົນລາວນັບໝື່ນ
ຄົນເຂົ້າຮ່ວມທ່າມກາງບັນຍາກາດເບີກບານມ່ວນຊື່ນ ຕໍ່ຈາກນ້ັນກໍເປັນພິທີການສົມໂພດ
ພຸດທາພິເສກອະນຸສາວະລີເຈົ້າອະນຸວົງຢ່າງຕໍ່ເນຶ່ອງກັນໄປ ກໍຄືນັບແຕ່ 2 ໂມງຂອງວັນທີ່
7 ເດືອນພະຈິກ ຈົນເຖິງ 6 ໂມງ ເຄິ່ງຂອງເຊົ້າວັນທີ່ 8 ເດືອນພະຈິກນີ້.
ທັງນີ້ໂດຍສາເຫດທີ່ທາງການລາວໄດ້ຈັດພິທີສະຫລອງສົມໂພດອະນຸສາວະລີເຈົ້າອະນຸວົງຢ່າງຍິ່ງໃຫຍ່ດັ່ງກ່າວນັ້ນກໍໄດ້ຮັບການອະທິບາຍຈາກທ່ານບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງຖະແຫລງຂ່າວແລະວັດທະນະທໍາ ຊຶ່ງຮັບຜິດຊອບວຽກງານດ້ານວັດທະນະທໍາໃນການຈັດງານສະເຫລີມສະຫລອງການສະຖາປະນານະຄອນວຽງຈັນຄົບ ຮອບ 450 ປີ ໃນລະຫວ່າງວັນທີ່ 15-21ເດືອນພະຈິກນີ້ ວ່າ:
“ເພາະວ່າເຈົ້າອະນຸວົງແມ່ນເປັນວີລະກະສັດຜູ້ນຶ່ງທີ່ມີນໍ້າໃຈຮັກຊາດແພງເຊື້ອອັນໂດດເດັ່ນຢູ່ໃນປະວັດສາດຂອງຊາດພວກເຮົາ ຄືພວກເຮົາໄດ້ຮູ້ວ່າພວກສັກດິນາຕ່າງດ້າວຜູ້ລຸກລານຫລັງຈາກຍຶດຄອງປະເທດຊາດຂອງພວກເຮົາແລ້ວຍັງຈັບເອົາເພິ່ນພ້ອມດ້ວຍເຊື້ອພະວົງຕ່າງໆໄປປະເທດຂອງເຂົາເຈົ້າ ແລ້ວກະໄດ້ທຸບຕີທໍລະມານ ຫວັງຈະເຮັດໃຫ້ເພີ່ມຍອມຈໍານົນ ຫລືວ່າທໍລະຍົດຈາກປະເທດຊາດປະຊາຊົນຂອງຕົນເອງ ແຕ່ວ່າເຈົ້າອະນຸວົງ ເພິ່ນເດັດຂາດ ບໍ່ຍອມຈໍານົນ ແລະ ໄດ້ຕໍ່ສູ້ຈົນເຖິງລົມຫາຍໃຈສຸດທ້າຍຂອງເພິ່ນ”
ການກໍ່ສ້າງຮູບຫລໍ່ຂອງເຈົ້າອະນຸວົງຖືເປັນ 1 ໃນທັງໝົດ 21 ໂຄງການທີ່ທາງການລາວໄດ້ວາງໄວ້ໃນແຜນ ການສະເຫລີມສະຫລອງນະຄອນວຽງຈັນຄົບຮອບ 450 ປີ ໂດຍຮູບຫລໍ່ສູງເຖິງ 8 ແມດ ແລະຖ້າຫາກລວມແທ່ນຢືນດ້ວຍກໍຖືເປັນຮູບຫລໍ່ທີ່ສູງທີ່ສຸດໃນລາວ ທີ່ຕ້ອງໃຊ້ທອງແດງສໍາລັບຫລໍ່ຮູບປັ້ນຄິດເປັນນໍ້າໜັກລວມ ເຖິງ 8 ຕັນ ທີ່ທາງການລາວໄດ້ຮັບຄວາມຊ່ວຍເຫລືອຈາກບໍລິສັດ MMG ຜູ້ລົງທຶນຂຸດຄົ້ນແຮ່ຄໍາແລະທອງແດງ ຢູ່ເຊໂປນໃນແຂວງສະຫວັນນະເຂດນັ້ນເອງ.
ສ່ວນໂຄງການອື່ນໆທ່ີເປັນສ່ວນນຶ່ງໃນ 21 ໂຄງການທີ່ສໍາຄັນເຊັ່ນດຽວກັນກໍຄືການປະຕິສັງ ຂອນວັດສີສະເກດການຂະຫຍາຍສະໜາມພະທາດຫລວງ ການພັດທະນາຕະຫລາດເຊົ້າ ການກໍ່ສ້າງຖະນົນວຽງຈັນ 450 ປີ ການກໍ່ສ້າງສໍານັກງານປົກຄອງສະພາເຂດນະຄອນວຽງຈັນ ການວາງຜັງເມືອງໃໝ່ຂອງວຽງຈັນເພື່ອຮອງຮັບ ການພັດທະນາໄປສູ່ຄວາມທັນສະໄໝ ການພັດທະນາເຂດເສດຖະກິດພິເສດຢູ່ດົງໂພສີ ແລະການສ້າງເຂື່ອນ ກັນຕາຝັ່ງເຈຶ່ອນໃນແນວແມ່ນນໍ້າຂອງຈາກເກົ້າລ້ຽວເຖິງທາດຂາວເປັນຕົ້ນ.
