ເຖິງຈະມີການລະບາດຢ່າງໜັກຂອງໄວຣັສໂຄວິດ-19 ກໍາມະກອນລາວ ໃນ ເກົາຫລີ
ໃຕ້ ກໍຍັງສືບຕໍ່ເຮັດວຽກແບບປົກກະຕິຢູ່
ບັນດາທ່ານຜູ້ຟັງທັງຫລາຍຄົງຮູ້ແລ້ວເນາະວ່າ ນອກຈາກຈີນແລ້ວ ເກົາຫລີໃຕ້ ກໍາລັງ
ເປັນປະເທດທີ່ມີຄົນຕິດເຊື້ອ ແລະເສຍຊີວິດຍ້ອນໄວຣັສໂຄໂຣນາ ຫລື ໂຄວິດ-19
ທີ່ສຸດໃນຂົງເຂດເອເຊຍ ແລະມາຮອດວັນຈັນມື້ນີ້ ກໍຍັງເປັນ ປະເທດທີ່ມີຄົນຕິດເຊື້ອ
ໄວຣັສນີ້ຫລາຍເປັນອັນດັບສີ່ໃນໂລກຢູ່. ມື້ນີ້ທາງວີໂອເອ ຈະນໍາພາທ່ານໄປຟັງຄຳຄິດ
ເຫັນຂອງກໍາມະກອນລາວສອງຄົນທີ່ເຮັດວຽກຢູ່ໃນປະເທດດັ່ງກ່າວທ້າກາງການແຜ່\
ລະບາດຂອງເຊື້ອໄວຣັສນີ້ຢ່າງວ່ອງໄວ. ເຂົາເຈົ້າມີຄວາມຮູ້ສຶກແນວໃດຕໍ່ການເຮັດ
ວຽກຢູ່ໃນບ່ອນທີ່ມີການສ່ຽງໄພຢ່າງສູງ ໃນເວລານີ້ ຂໍເຊີນທ່ານໄປຟັງລາຍລະອຽດຈາກ
ກິ່ງສະຫວັນ ໄດ້ເລີຍ.
ລາວຢູ່ໃນອັນດັບ 7 ຂອງປະເທດອາຊຽນທີ່ສົ່ງກຳມະກອນໄປເຮັດວຽກຢູ່ໃນເກົາຫລີ
ໃຕ້ ຂະນະທີ່ຫວຽດນາມແມ່ນປະເທດອັນດັບນຶ່ງ ໂດຍໄດ້ສົ່ງຄົນໄປອອກແຮງງານໃນ
ປະເທດດັ່ງກ່າວ 55,795 ຄົນ, ອີງຕາມກະຊວງແຮງງານແລະສະຫວັດດັການສັງຄົມທີ່
ເປີດເຜີຍໃຫ້ນັກຂ່າວຂອງໜັງສືພິມເອເຊຍນີວສ໌ ເນັດເວີກ (Asia News Network)
ທີ່ພິມເຜີຍແຜ່ໃນວັນທີ 30 ມັງກອນຜ່ານມານີ້. ປັດຈຸບັນ ມີຄົນລາວ 234 ຄົນໄປເຮັດ
ວຽກຢູ່ເກົາຫລີໃຕ້ ບ່ອນທີ່ມີອັດຕາການເພີ້ມຂຶ້ນຂອງພົນລະເມືອງຕ່ຳກວ່າຄວາມຕ້ອງ
ການຂອງແຮງານເພື່ອໃຫ້ທັນກັບລະດັບຂະຫຍາຍໂຕທາງເສດຖະກິດໄດ້ ຢູ່ພາຍໃຕ້
ສັນຍາລະບົບການໃຫ້ອະນຸຍາດເຮັດວຽກ ຫລື Employment Permit System
Agreement ຊຶ່ງເຊັນກັນລະຫວ່າງລັດຖະບານລາວກັບລັດຖະບານປະເທດດັ່ງກ່າວ.
ຕົວເລກນັ້ນແມ່ນເປັນພຽງໂຕເລກຂອງພວກທີ່ໄປເຮັດວຽກໂດຍຜ່ານລະບົບຈັດຫາ
ງານຕາມສັນຍານັ້ນ. ສ່ວນຈຳນວນຕົວຈິງອາດຈະສູງກວ່ານັ້ນ ເມື່ອລວມທັງຄົນທີ່ໄປ
ເຮັດວຽກຢູ່ໃນຂະແໜງອຸດສາຫະກຳຂອງເກົາຫລີໃຕ້ ພາຍຮຽນຈົບຈາກປະເທດນັ້ນ
ອີງຕາມຄຳເຫັນຂອງອະດີດນັກສຶກສາຄົນນຶ່ງທີ່ຫາວຽກເຮັດໄດ້ ພາຍຫລັງທີ່ຮຽນຈົບ
ຢູ່ໃນປະເທດນັ້ນແລ້ວ.
ຂະນະດຽວກັນກໍາມະກອນ ແລະນັກສຶກສາລາວທີ່ໄປຮຽນ ແລະເຮັດວຽກໃນປະເທດ
ດັ່ງກ່າວ ກໍປະເຊີນກັບຄວາມສ່ຽງສູງຫລາຍຕໍ່ການຕິດເຊື້ອໄວຣັສໂຄໂຣ ນາ ຫລື ໂຄ
ວິດ-19 ທີ່ກໍາລັງແຜ່ລະບາດຢ່າງໜັກຢູ່ນັ້ນ. ມາຮອດຕອນເຊົ້າ ວັນຈັນມື້ນີ້ ເກົາຫລີໃຕ້
ມີເກືອບຮອດ 8,162 ຄົນແລ້ວທີ່ໄດ້ຮັບການຢືນຢັນວ່າຕິດເຊື້ອ ແລະ 75 ຄົນແລ້ວທີ່
ເສຍຊີວິດຍ້ອນເຊື້ອໄວຣັສນີ້.ສະພາບການນີ້ ເຮັດໃຫ້ປະເທດດັ່ງກ່າວ ກາຍເປັນປະ
ເທດທີ່ມີຄົນຕິດເສຍຊີວິດຍ້ອນໄວຣັສທີ່ວ່ານີ້ສູງອັນດັບສອງຢູ່ໃນຂົງເຂດເອເຊຍ ແລະ
ເປັນອັນດັບສີ່ຂອງໂລກ, ລອງ ລົງມາຈາກຈີນ, ອີຕາລີ ແລະອີຣ່ານ. ເຖິງຈະມີຄວາມຢ້ານ
ກົວວ່າຈະຕິດ ເຊື້ອ ພະຍາດທີ່ອັນຕະລາຍຮ້າຍແຮງດັ່ງກ່າວນີ້ຢູ່ກໍຕາມ ແຕ່ກໍາມະກອນ
ລາວ ຫລາຍ ຄົນກໍຍັງສືບຕໍ່ການເຮັດວຽກເຮັດການຕາມປົກກະຕິ ແລະກໍບໍ່ທັນຢາກກັບ
ບ້ານ ເທື່ອເນື່ອງຈາກໄດ້ລາຍຮັບດີກວ່າຢູ່ລາວ. ດັ່ງການໃຫ້ສໍາພາດກໍາມະກອນ ຄົນນຶ່ງ
ທີ່ເຮັດວຽກຢູ່ໃນນະຄອນຫລວງໂຊລຂອງເກົາຫລີໃຕ້ເລີຍຫລັງຈາກ ຮຽນຈົບຊັ້ນສູງໃນວິຊາເທັກໂນໂລຈີດ້ານຂໍ້ມູນຂ່າວສານ ຫລື ໄອທີແລ້ວ ຊຶ່ງຜູ້ກ່ຽວເລົ່າສູ່ຟັງວ່າ:
“ກະເຮັດວຽກຢູ່ໂຮງງານອາຫານ, ບໍລິສັດມັນຊັອກ. ເງິນເດືອນກະລ້ານປາຍ ວອນໜິ
ລະ, ສະເລ່ຍເງິນກີບກາ ປະມານ 8-9 ລ້ານກີບເນາະ. ໄວຣັສ ຊ່ວງນີ້ກະຢ້ານຢູ່ໃດ
ເພາະຢູ່ພີ້ລະບາດແຮງ ເພີ້ມມື້ລະ 700 ຫາ 800 ຄົນ. ກະຍັງບໍ່ຢາກມາເທື່ອຂໍທ້ອນ
ເງິນກ່ອນ.”
ສ່ວນພໍ່ແມ່ຂອງຜູ້ກ່ຽວນັ້ນ ກໍແມ່ນມີຄວາມເປັນຫ່ວງຕໍ່ສຸຂະພາບລູກຊາຍ ແຕ່ກໍບໍ່ສາມາດ
ເຮັດຫຍັງໄດ້ຫລາຍ ມີແຕ່ໄດ້ໂທໄປຢື້ຢາມຖາມຂ່າວຜູ້ກ່ຽວຢູ່ເລື້ອຍໆ.ໃນການໃຫ້ສໍ
າພາດກັບວີໂອເອ ນັ້ນພໍ່ແລະແມ່ຂອງລາວທີ່ຢູ່ໃນນະຄອນຫລວງ ວຽງຈັນສະແດງຄວາມ
ຄິດເຫັນອອກມາວ່າ:
“ມັນເຮັດການແລ້ວມັນບໍ່ໄດ້ມາ. ມັນເຮັດວຽກຕໍ່, ມັນຊອກວຽກເຮັດຕໍ່ເລີຍ ກະບໍ່ເຫັນ
ມັນວ່າຫຍັງລະ ກະໂທຫາມັນຫວ່າງອາທິດນີ້, ວັນຈັນ ຫລື ວັນຄານນີ້ລະ ເລື້ອງສະ
ພາບກາເປັນຫວ່ງຢູ່ຫັ້ນລະ ຈັກໂຄວິດ ໂຄເວີດ ຫັ້ນ ໄດ້ຍິນແຕ່ຂ່າວ.”
ພ້ອມກັນນັ້ນ ກໍມີຄົນລາວອີກຜູ້ນຶ່ງທີ່ເປັນພະນັກງານບັນທຶກຂໍ້ມູນຕົວເລກເພື່ອ ລາຍງານ
ຜົນຜະລິດປະຈຳວັນ ຢູ່ໃນໂຮງງານຜະລິດປາກະປ໋ອງແຫ່ງນຶ່ງ ໃນ ເຂດພາກເໜືອຂອງ
ເກົາຫລີໃຕ້ ໂດຍຜ່ານການຈັດຫາງານຢູ່ພາຍໃຕ້ສັນຍາລະບົບການອະນຸຍາດເຮັດວຽກ
ບອກ ວີໂອເອ ໃນອາທິດແລ້ວນີ້ວ່າ ຜູ້ກ່ຽວກໍບໍ່ໄດ້ ຢ້ານກົວຫຍັງຫລາຍກ່ຽວກັບຄວາມ
ສ່ຽງໃນການຕິດເຊື້ອພະຍາດນີ້ເພາະມີ ການເອົາໃຈໃສ່ແນະນໍາຈາກບໍລິສັດຈັດຫາງານ
ແລະລາຍຮັບກໍຍັງໄດ້ສູງກວ່າ ຢູ່ໃນລາວຢູ່ ຊຶ່ງຜູ້ກ່ຽວເລົ່າສູ່ຟັງວ່າ:
"ການເຮັດວຽກກະຢ້ານຢູ່ປະເທດເຂົາໄດ້ຍິນຂ່າວຈາກອິນເຕີແນັດ ທາງເຟັສບຸກ ມີ
ທຸກມື້ ແຕ່ກະບໍ່ຢ້ານຫຼາຍ ເພາະທຸກການເຄື່ອນໄຫວບໍລິສັດຈັດ ຫາງານ ຈະເປັນຜູ້
ແນະນໍາເລື້ອງການຮັກສາຄວາມປອດໄພ ສໍາຄັນແມ່ນເງິນຄ່າ ຈ້າງກໍດີກວ່າບ້ານເຮົາ
ແຖມຍັງໄດ້ຮູ້ພາສາເຂົາກໍ່ພໍໄດ້ຮຽນນໍາກະດີ.”
ຜູ້ກ່ຽວບໍ່ໄດ້ເປີດເຜີຍໃຫ້ຮູ້ວ່າເຖິງຕົວເລກເງິນເດືອນແທ້ໆ ຂອງຜູ້ກ່ຽວແຕ່ຢ່າງໃດ ແຕ່ວ່າ
ອີງຕາມສັນຍາລະບົບການໃຫ້ອະນຸຍາດເຮັດວຽກນັ້ນ ກຳມະກອນຕ່າງປະເທດໃນເກົາ
ຫລີໃຕ້, ລວມທັງຜູ້ທີ່ໄປຈາກລາວ ແມ່ນໄດ້ເງິນເດືອນຕໍ່ສຸດ 1,400 ໂດລາ ຕໍ່ເດືອນ ຊຶ່ງ
ເປັນລາຍໄດ້ທີ່ສູງສົມຄວນ ເມື່ອທຽບໃສ່ກັບອັດຕາເງິນເດືອນຢູ່ໃນລາວ. ແຕ່ຢ່າງໃດກໍດີ
ເນື່ອງຈາກວ່າອັນຕະລາຍຮ້າຍແຮງນີ້ຍັງບໍ່ມີທ່າທີວ່າຈະຊັກຊ້າລົງເລີຍນັ້ນຜູ້ກ່ຽວ ເວົ້າ
ຕື່ມວ່າ:
“ກະມີແຕ່ລະມັດລະວັງຫັ້ນລະ ແລະຂໍ້ສໍາຄັນແມ່ນຕ້ອງປະຕິບັດຕາມຄໍາແນະນໍາ
ຂອງເຈົ້າໜ້າທີ່ພະນັກງານບໍລິສັດ ບໍ່ໄປທ່ຽວໂລເລ ກໍ່ແມ່ນປອດໄພແລ້ວ.
”ສະຫລຸບແລ້ວ ກໍາມະກອນລາວທີ່ໄປເຮັດວຽກຢູ່ໃນເກົາຫລີໃຕ້ບ່ອນທີ່ກໍາລັງມີ ການລະ
ບາດຂອງໄວຣັສໂຄວິດ-19 ຢ່າງວ່ອງໄວນັ້ນ ຍັງສືບຕໍ່ເຮັດວຽກງານ ຕາມປົກກະຕິ ເຖິງ
ແມ່ນວ່າຈະມີຄວາມເປັນຫ່ວງຢ້ານຕິດເຊື້ອພະຍາດດັ່ງກ່າວ ຫລາຍສົມຄວນຢູ່ກໍຕາມ.
ທັງນີ້ກໍຍ້ອນວ່າ ຄ່າແຮງງານຢູ່ໃນປະເທດທີ່ຕ້ອງການແຮງງານສູງແຫ່ງນັ້ນ ແມ່ນຫລາຍ
ກວ່າຄ່າແຮງງານຢູ່ໃນລາວຫລາຍ.
