ລິ້ງ ສຳຫລັບເຂົ້າຫາ

ຕໍາຫຼວດລາວ ຖະແຫຼງວ່າ ຍັງບໍ່ພົບຫຼັກຖານໃດໆ ກ່ຽວກັບທ່ານສົມບັດ


ທ່ານສົມບັດ ສົມພອນ ທີ່ຫາຍສາບສູນໄປ ໃນວັນທີ 15 ທັນວາ 2012
ພັນເອກ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່
ຕໍາຫຼວດກະຊວງປ້ອງ ກັນຄວາມສະຫງົບ ໄດ້ຖະແຫຼງຜົນ
ການສືບສວນ-ສອບສວນເພື່ອຊອກຫາຕົວທ່ານ ສົມບັດ
ສົມພອນ ນັກພັດທະນາທາງສັງຄົມທີ່ດີເດັ່ນຂອງລາວແລະ
ເອເຊຍ ໃນ ວັນທີ 1 ມີນາຜ່ານມານີ້ ໂດຍຖືເປັນການຖະ
ແຫຼງຄັ້ງທີ່ 2 ຫຼັງຈາກການຫາຍຕົວໄປຂອງທ່ານສົມບັດ
ນັບຕັ້ງແຕ່ວັນທີ 15 ທັນວາ ປີກາຍນີ້ ເປັນຕົ້ນມາ.

ແຕ່ຢ່າງໃດກໍຕາມ ການຖະແຫຼງລາຍງານຜົນໃນຄັ້ງນີ້ ກໍບໍ່ມີ
ຄວາມຄືບໜ້າ ໃນການຕິດຕາມຊອກຫາຕົວທ່ານສົມບັດ ແຕ່
ຢ່າງໃດ ແລະພ້ອມກັນນັ້ນ ພັນເອກເພັງສະຫວັນ ກໍຍັງໄດ້ໃຫ້
ການຍອມຮັບດ້ວຍວ່າ ເປັນການຍາກຫຼາຍທີ່ຈະສາມາດກໍານົດ ໄດ້ວ່າຈະພົບຕົວທ່ານສົມບັດ ໄດ້ເມື່ອໃດ ເນື່ອງຈາກວ່າຍັງມີ
ຄວາມສັບສົນແລະບໍ່ຊັດເຈນໃນຫຼາຍໆດ້ານ ກ່ຽວກັບການຫາຍຕົວໄປຂອງທ່ານສົມບັດ
ດັ່ງກ່າວ. ສ່ວນກ່ຽວກັບການປະຕິບັດງານຂອງຄະນະຮັບຜິດຊອບໃນໄລຍະທີ່ຜ່ານມາ
ນັ້ນ ພັນເອກເພັງສະຫວັນ ກໍໄດ້ໃຫ້ການຢືນຢັນວ່າໄດ້ດໍາເນີນການສືບສວນ-ສອບສວນ
ໃນຫຼາຍໆທາງ ໂດຍລວມເຖິງການສະແຫວງຫາຂໍ້ມູນຈາກພັນລະຍາ ແລະຍາດພີ່ນ້ອງ
ຂອງທ່ານສົມບັດ ແລະການປະສານງານກັບຫ້ອງການປ້ອງກັນຄວາມສະຫງົບທັງຂັ້ນ
ເມືອງແລະແຂວງໃນທົ່ວປະເທດ ແຕ່ກໍຍັງບໍ່ພົບຕົວທ່ານສົມບັດ ກັບທັງຍັງບໍ່ມີພາກ
ສ່ວນໃດທີ່ພົບເຫັນລົດ Jeep ທີ່ເປັນລົດຍົນສ່ວນຕົວຂອງທ່ານສົມບັດ ອີກດ້ວຍ ແລະ
ການສອບປາກຄໍາເຈົ້າໜ້າທີ່ຕໍາຫຼວດຈະລາຈອນ ທີ່ປະຕິບັດໜ້າທີ່ໃນມື້ດັ່ງກ່າວ ກໍໄດ້
ຮັບການຢືນຢັນວ່າ ບໍ່ສາມາດຈົດຈໍາເຫດການໄດ້ແຕ່ຢ່າງໃດ ເພາະເປັນການປະຕິບັດ
ໜ້າທີ່ຕາມປົກກະຕິຢູ່ແລ້ວ ຈຶ່ງບໍ່ຈື່ທະບຽນລົດທີ່ກວດນັ້ນເອງ.
ທ່ານນາຍພັນ ເພັງສະຫວັນ ທິບພະວົງໄຊ
ທ່ານນາຍພັນ ເພັງສະຫວັນ ທິບພະວົງໄຊ
ນອກຈາກນີ້ ເມື່ອໄດ້ທໍາການກວດສອບດ້ານເທັກນິກ ກໍຄືກ່ຽວກັບພາບທີ່ຖືກກ້ອງວົງຈອນປິດບັນທຶກໄວ້ໄດ້
ນັ້ນ ກໍຍັງບໍ່ສາມາດລະບຸໄດ້ວ່າ ລົດຈັກທີ່ຈອດຢູ່ໃກ້ໆ
ກັບປ້ອມຕໍາຫຼວດ ແລະລົດກະບະທີ່ແລ່ນມາ ຈອດຮັບ ຄົນຢູ່ທີ່ປ້ອມຕໍາຫຼວດນັ້ນແມ່ນມີໝາຍເລກທະບຽນໃດ
ເນື່ອງຈາກພາບບໍ່ຊັດເຈນ ແລະເມື່ອໄດ້ທໍາການກວດ
ສອບ ເບິ່ງພາບຈາກກ້ອງວົງຈອນປິດໃນຈຸດອື່ນໆ ກໍບໍ່ພົບ
ຫຼັກຖານໃດອີກດ້ວຍ.

ພ້ອມກັນນີ້ ພັນເອກ ເພັງສະຫວັນ ຍັງໄດ້ຍົກຕົວຢ່າງເຖິງ
ຫຼາຍໆຄະດີທີ່ເກີດຂຶ້ນ ໃນລັກສະນະດຽວກັນນີ້ ທີ່ທາງການຕໍາຫຼວດລາວ ຍັງບໍ່ສາ ມາດຕິດຕາມພົບຕົວຄົນ ຫາຍໄດ້ເລີຍຈົນເຖິງທຸກມື້ນີ້ ຊຶ່ງກໍສອດຄ່ອງກັນກັບການ ໃຫ້ສໍາພາດກັບວີໂອເອ ໂດຍທ່ານສົມສະຫວາດ ເລັ່ງສະຫວັດ ຮອງນາຍົກລັດຖະ ມົນຕີຜູ້ຊີ້ນໍາວຽກງານ ດ້ານເສດຖະກິດຂອງລັດຖະບານລາວ ທີ່ໄດ້ຍົກຕົວຢ່າງເຖິງ ກໍລະນີການຫາຍຕົວໄປຂອງນັກການທູດຍີ່ປຸ່ນໃນລາວເມື່ອປີ 1988 ວ່າ:

ກະເປັນໜ້າເສຍໃຈວ່າມັນໄດ້ເກີດຂຶ້ນ ພວກເຮົາກໍບໍ່ຢາກໃຫ້ມັນເກີດດອກ
ແລ້ວເລຶ່ອງນີ້ທ່ານກະສິຮູ້ແລ້ວໃນຄືສິແມ່ນຊາວກວ່າປີກ່ອນຫຼືສາມສິບກວ່າ
ປີກ່ອນ ມີກໍລະນີຍີ່ປຸ່ນຖືກເຂົາລັກພາຕົວ ສຸດທ້າຍແມ່ນໂດນເຕີບເດວ່າ ໄດ້ໄປຊອກເຫັນຢູ່ປະເທດຂ້າງຄຽງອັນນີ້ແລ້ວ ສະນັ້ນ ອັນນີ້ກະບໍ່ຮູ້ວ່າມັນ
ແມ່ນແນວໃດ ເຈົ້າໜ້າທີ່ເຂົາ ກະດໍາເນີນວຽກງານຂອງເຂົາເຈົ້າຫັ້ນໜ່າ.”


ກ່ອນໜ້ານີ້ ບັນດານັກເຄື່ອນໄຫວດ້ານສິດທິມະນຸດສາກົນຂອງ 84 ອົງການຈາກທົ່ວ
ໂລກໄດ້ຍື່ນຈົດໝາຍເຖິງທາງການລັດຖະບານລາວອີກເທື່ອໃໝ່ໃນອາທິດຜ່ານມານີ້ ເພື່ອຮຽກຮ້ອງແລະທວງຖາມເຖິງຄວາມຄືບໜ້າໃນການສືບສວນ-ສອບສວນ ຫາຄວາມ
ຈິງກ່ຽວກັບການຫາຍຕົວໄປຂອງທ່ານສົມບັດ ແລະນໍາເອົາຜູ້ກະທໍາຜິດ ມາລົງໂທດໃຫ້
ໄດ້ໄວທີ່ສຸດ ທັງນີ້ເນື່ອງຈາກບັນດານັກເຄື່ອນໄຫວເພື່ອສິດທິມະນຸດເຊື່ອວ່າ ດ້ວຍພະ
ຍານຫຼັກຖານທີ່ຖືກບັນທຶກໄວ້ດ້ວຍກ້ອງວົງຈອນປິດຂອງທາງການລາວນັ້ນ ບໍ່ໜ້າທີ່ຈະ
ເປັນ ການຍາກເກີນໄປທີ່ຈະສືບຫາ ເພື່ອຕິດຕາມຈັບກຸມຕົວຜູ້ກະທໍາຜິດ ແລະໃຫ້ການ
ຊ່ວຍເຫຼືອທ່ານສົມບັດ ໄດ້ນັ້ນເອງ.

ທາງດ້ານທ່ານນາງ ສຸພາວະດີ ເພັດຊະຣັດ ຜູ້ອໍານວຍການມູນນິທິອາສາສະໝັກເພື່ອສັງ
ຄົມໃນອາຊ່ຽນ ກໍໄດ້ໃຫ້ການຢືນຢັນກັບວີໂອເອວ່າ ບັນດາອົງການສິດທິມະນຸດສາກົນ
ຈະຍັງຄົງເຄຶ່ອນໄຫວໃນກໍລະນີການຫາຍຕົວໄປຂອງທ່ານສົມບັດ ຕໍ່ໄປຢ່າງບໍ່ຢຸດຍັ້ງ ໂດຍຈະປຸກລະດົມເພື່ອເຜີຍແຜ່ຂໍ້ມູນຂ່າວສານ ໄປສູ່ການຮັບຮູ້ ຂອງເຍົາວະຊົນໃນອາຊ່ຽນ
ແລະໃນທົ່ວໂລກ ຢ່າງກວ້າງຂວາງອີກດ້ວຍ.

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

XS
SM
MD
LG