ລິ້ງ ສຳຫລັບເຂົ້າຫາ

ລາວໄດ້ນາຍົກລັດຖະມົນຕີ ແລະ ປະທານສະພາ ຄົນໃໝ່

  • ຊົງຣິດ ໂພນເງິນ

ກອງປະຊຸມສະໄໝສາມັນຄັ້ງທີ 10 ຂອງສະພາແຫ່ງຊາດລາວ ທີ່ອັດລົງດ້ວຍການເລືອກຕັ້ງເອົານາຍົກລັດຖະມົນຕີຄົນໃໝ່ ແລະປະທານສະພາແຫ່ງຊາດຄົນໃໝ່.

ສະພາແຫ່ງຊາດລາວ ອັດກອງປະຊຸມສະໄໝສາມັນຄັ້ງທີ 10 ດ້ວຍການເລືອກຕັ້ງເອົາ ນາຍົກລັດຖະມົນຕີຄົນໃໝ່ ຕາມການນໍາສະເໜີຂອງທ່ານຈູມມະລີ ໄຊຍະສອນ, ປະທານ ປະເທດລາວ.

ກອງ​ປະຊຸມ​ສະ​ໄໝສາມັນ​ຄັ້ງທີ 10 ຂອງສະພາ​ແຫ່ງ​ຊາດ​ລາວ ຊຸ​ດທີ 6 ທີ່​ໄດ້​ເລີ້ມ​ໄຂ​ຂຶ້ນ
ນັບ​ແຕ່​ວັນ​ທີ 14 ທັນວາ​ເປັນຕົ້ນມາ ​ໄດ້​ອັດ​ລົງ​ຢ່າງ​ເປັນ​ທາງ​ການ ​ໃນ​ຕອນ​ແລງ​ວັນ​ທີ
23 ທັນວາ​ນີ້ ດ້ວຍ​ການ​ລົງ​ມະຕິຮັບຮອງ​ເອົາ​ການ​ລາ​ອອກ​ຈາກ​ຕໍາ​ແໜ່ງນາ​ຍົກ​ລັດຖະມົນຕີ
ຂອງ​ທ່ານ ບົວ​ສອນ ບຸບຜາ​ວັນ ​ແລະກໍ​ໄດ້​ມີ​ມະຕິເລືອກ​ຕັ້ງ​ໃຫ້​ທ່ານ ທອງ​ສິງ ທໍາ​ມະ​ວົງ
ເປັນ​ນາຍົກ​ລັດຖະມົນຕີ​ຄົນ​ໃໝ່ ຕາມ​ການ​ນໍາ​ສະ​ເໜີຂອງ​ທ່ານ ​ຈູມ​ມະ​ລີ ​ໄຊ​ຍະ​ສອນ, ປະ
ທານ​ປະ​ເທດ​ລາວ ​ແລະພ້ອມ​ກັນນັ້ນ ກອງ​ປະຊຸມກໍ​ຍັງ​ໄດ້​ແຕ່ງຕັ້ງ​ໃຫ້​ທ່ານ​ນາງປາ​ນີ ຢາ​ທໍ​ຕູ້
ເປັນ​ປະທານ​ສະພາ​ແຫ່ງ​ຊາດ​ລາວ ຄົນ​ໃໝ່ອີກ​ດ້ວຍ.

ຜູ້ນໍາສູງສຸດສາມຄົນຂອງລາວ, ປະທານປະເທດ ທ. ຈູມມະລີ ໄຊຍະສອນ (ກາງ), ນາຍົກ ລມຕ ຄົນໃໝ່ ທ. ທອງສິງ ທໍາມະວົງ(ຂວາ) ແລະ ທ.ນ. ປານີ ຢາທໍຕູ້ ປະທານສະພາຄົນໃໝ່.
ຜູ້ນໍາສູງສຸດສາມຄົນຂອງລາວ, ປະທານປະເທດ ທ. ຈູມມະລີ ໄຊຍະສອນ (ກາງ), ນາຍົກ ລມຕ ຄົນໃໝ່ ທ. ທອງສິງ ທໍາມະວົງ(ຂວາ) ແລະ ທ.ນ. ປານີ ຢາທໍຕູ້ ປະທານສະພາຄົນໃໝ່.

ໃນ​ການ​ລາ​ອອກ​ຈາກ​ຕໍາ​ແໜ່ງນາ​ຍົກ​ລັດຖະມົນຕີຂອງ​ທ່ານ
ບົວ​ສອນໃນ​ຄັ້ງນີ້ ທ່ານ​ໄດ້​ໃຫ້​ເຫດຜົນ​ກ່ຽວກັບບັນຫາ​ຄອບ
ຄົວ. ສ່ວນ​ທາງ​ດ້ານ​ທ່ານ​ທອງ​ສິງ ​ໃນ​ຖານະ​ນາ​ຍົກ​ລັດຖະ
ມົນຕີ​ຄົນ​ໃໝ່ຂອງ​ລາວ​ນັ້ນ ກໍ​ໄດ້​ໃຫ້ການຢືນຢັນ​ວ່າ ທ່ານ
ຈະ​ປະຕິບັດໜ້າທີ່​ຢ່າງ​ດີ​ທີ່​ສຸດ ດ້ວຍ​ການ​ປະຕິບັດ​ກົດໝາຍ
ຢ່າງ​ເຄັ່ງ​ຄັດ, ມີ​ຄວາມ​ໂປ່​ງ​ໃສ, ມີ​ເອກະ​ພາບ​ແລະ​ເສີມ​ສ້າງ
ເງື່ອນ​ໄຂ​ສະດວກ​ ໃຫ້​ແກ່​ພາກ​ທຸລະ​ກິດການ​ຄ້າ, ການ​ລົງ
ທຶນ, ລວມ​ເຖິງ​ການ​ພັດທະນາ​ເພື່ອ​ຍົກ​ລະດັບ​ຄວາມ​ເປັນ​ຢູ່
ທີ່​ດີ​ຂຶ້ນຂອງ​ປະຊາຊົນ​ບັນດາ​ເຜົ່າ ທີ່​ມີ​ຄວາມ​ສະ​ເໝີພາບກັນ ພາຍ​ໃຕ້ກົດໝາຍ.

ໃນລະຫວ່າງການ​ປະຕິບັດໜ້າທີ່​ໃນ​ຖານະ​ປະທານ​ສະພາ
ແຫ່ງຊາດ​ໃນ​ໄລຍະ 5 ປີຜ່ານມາ​ນີ້ ທ່ານທອງ​ສິງ ທຳມະ
ວົງ ກໍ​ໄດ້​ວິພາກ​ວິຈານການ​ບໍລິຫານ​ງານ​ຂອງ​ລັດຖະບານ​
ລາວ ທີ່​ມີ​ທ່ານ​ບົວ​ສອນ ​ເປັນ​ນາຍົກ​ມາ​ໂດຍ​ຕະຫລອດ ​
ແລະ​ໃນ​ຄັ້ງຫລ້າ​ສຸດ ກໍ​ຄື ໃນ​ຖານະ​ປະທານ​ສະພາ​ແຫ່ງ​ຊາດໃນມື້ສຸດ​ທ້າຍນັ້ນ ທ່ານທອງ​
ສິງ ​ກໍ​ໄດ້ວິພາກ​ວິຈານການບໍລິຫານ​ງານ​ຂອງຄະນະ​ລັດຖະບານ​ລາວ ​ໂດຍ​ຜ່ານບົດ​ລາຍ
ງານ​ການ​ເມືອງ​ຂອງ​ພັກ​ປະຊາຊົນປະຕິວັດ​ລາວ ສະ​ໄໝທີ 9 ​ໃນ​ຕອນ​ນຶ່ງ​ວ່າ:

ທ່ານທອງສິງ ທໍາມະວົງ ນາຍົກ ລມຕ ຄົນໃໝ່ ຂອງລາວ.
ທ່ານທອງສິງ ທໍາມະວົງ ນາຍົກ ລມຕ ຄົນໃໝ່ ຂອງລາວ.

“ການ​ປະຕິ​ບັດ​ພາລະ​ບົດ​ບາດຂອງ​ອົງການ​ລັດ ​ເວົ້າ​
ເຖິງ​ການ​ຄຸ້ມ​ຄອງ​ບໍລິຫານ​ລັດ ເວົ້າລວມຍັງ​ຂາດ
ຄວາມ​ສັກສິດ ຂາດ​ຄວາມ​ເຂັ້ມງວດ​ ໃນ​ການ​ປະຕິບັດ​ກົດໝາຍ ​ແລະການ​ບໍລິການ​ຮັບ​ໃຊ້​ປະຊາຊົນ​ນີ້ ກະ ຍັງ​ບໍ່ທັນ​ດີ, ທັງ​ຍັງ​ບໍ່ທັນ​ແທດເຖິງ ຍັງ​ຫລາຍ​ບັນ​ຫາ​ ທີ່​ອືດ​ອາດ​ ຊັກ​ຊ້າ​ຖ່ວງ​ດຶງ ​ແລະຫລາຍ​ບັນຫາ​ທີ່​ບໍ່ຈຳ​ເປັນ​ໃນ​ລະ​ບົບການ​ຄຸ້ມ​ຄອງ, ລະບົບ​ການ​ບໍລິການ​ປະຊາຊົນ​ຂອງ​ພວກ​ເຮົາ​ນີ້ ຍັງ​ມີ​ບັນຫາ.”

ທ່ານ ​ທອງ​ສິງ ​ເຄີຍ​ດໍາລົງຕໍາ​ແໜ່ງລັດຖະມົນຕີ​ວ່າການ​
ກະຊວງ​ວັດທະນາ​ທໍາ​ໃນ​ຊ່ວງ​ປີ 1983 -1988, ຕໍ່ຈາກ ​
ນັ້ນ ກໍໄດ້​ຮັບ​ຕຳ​ແໜ່ງ​ເຈົ້າຄອງ​ເຂດ​ກຳແພງ​ນະຄອນ
ວຽງ​ຈັນໃນ​ຊ່ວງ​ປີ 2002-2006 ​ແລະຕິດຕາມ​ດ້ວຍການ
ເປັນ​ປະທານ​ສະພາ​ແຫ່ງ​ຊາດ​ລາວ ຊຸດ​ທີ່ ​6 ​ໃນ​ປີ 2006 ຈົນ​ເຖິງ​ວັນ​ທີ 23 ທັນວາ 2010.

ສ່ວນ​ທ່ານ​ ບົວ​ສອນ ກໍ​ໄດ້​ກ້າວ​ຂຶ້ນສູ່​ຕຳ​ແໜ່ງນາຍົກລັດຖະມົນຕີ​ຂອງ​ລາວ​ໃນ​ເດືອນມິຖຸນາ
2006 ​ແລະຈົນ​ເຖິງ​ມື້ລາ​ອອກຈາ​ກຕຳ​ແໜ່ງນັ້ນ ທ່ານ​ກໍ​ໄດ້​ປະຕິບັດໜ້າທີ່​ໃນ​ຖານ​ະນາຍົກ
ລັດຖະມົນຕີ​ ນັບ​ເປັນ​ເວລາ​ໄດ້​ 4 ປີກັບ 6 ​ເດືອນ​ພໍດີ.

ກອງ​ປະ​ຊຸມ​ຄັ້ງຫລ້າ​ສຸດ​ນີ້ ຖື​ເປັນຄັ້ງສຸດ​ທ້າຍ​ຂອງ​ສະພາ​ແຫ່ງ​ຊາດ​ລາວ​ຊຸດ​ທີ່ 6. ​ດ້ວຍ​ເຫດ​ນີ້ ຈຶ່ງ​ໄດ້​ມີ​ການ​ຮັບຮອງເອົາ​ກົດໝາຍວ່າ​ດ້ວຍ​ສະພາ​ແຫ່ງ​ຊາດ ​ແລະກົດໝາຍວ່າ​ດ້ວຍ​ການ​ ເລືອກ​ຕັ້ງສະມາຊິກ​ສະພາ​ແຫ່ງ​ຊາດ​ ສະບັບ​ດັດ​ແກ້​ໃໝ່ ​ເພື່ອ​ຮອງ​ຮັບ​ການ​ເລືອກ​ຕັ້ງສະມາ ​ຊິກ​ສະພາ​ແຫ່ງ​ຊາດ​ຊຸດ​ໃໝ່ ກໍ​ຄື​ຊຸດ​ທີ່ 7 ທີ່​ຈະ​ມີ​ຂຶ້ນຢ່າງ​ເປັນ​ທາງການ​ໃນຕົ້ນປີ 2011 ​ເປັນ ຕົ້ນ​ໄປ.

ນອກຈາກ​ນີ້ ກອງ​ປະຊຸມ​ຍັງ​ໄດ້​ຮັບຮອງ​ເອົາ​ກົດໝາຍວ່າ​ດ້ວຍ ການ​ແກ້​ໄຂ​ຂໍ້​ຂັດແຍ່ງ​ທາງ​ເສດຖະກິດ ກົດໝາຍວ່າ​ດ້ວຍ​ການວັດ​ແທກ​ແຜນການ​ພັດທະນາ​ເສດຖະກິດ-ສັງຄົມ ​ແຫ່ງ​ຊາດ​ສະບັບ​ທີ່ 7 ຈາກ​ປີ 2011 ຫາ​ປີ 2015 ​ແລະບົດ​ລາຍ​ງານກ່ຽວກັບ​ໂຄງການ​ທາງ​ລົດ​ໄຟ​ຄວາມ​ໄວ​ສູງ ເຊື່ອ​ມຕໍ່ລະຫວ່າງລາວ​ກັບ​ຈີນ ​ເປັນຕົ້ນ.

XS
SM
MD
LG