ທ່ານໄຊສົມພອນ ພົມວິຫານ ຮອງປະທານສະພາແຫ່ງຊາດລາວໄດ້ຖະແຫຼງລາຍງານ
ຜົນການປະຕິບັດຈັດຕັ້ງວຽກງານໃນດ້ານນິຕິບັນຍັດ ຕໍ່ກອງປະຊຸມສະໄໝສາມັນຄັ້ງ
ທີ່ 3 ຂອງສະພາແຫ່ງຊາດຊຸດທີ່ 7 ທີ່ກໍາລັງດໍາເນີນກອງປະຊຸມຢູ່ໃນເວລານີ້ວ່າ ໃນ
ຮອບ 1 ປີ ທີ່ຜ່ານມາ ສະພາແຫ່ງຊາດລາວໄດ້ຮັບຮອງເອົາກົດໝາຍຈໍານວນທັງໝົດ
13 ສະບັບດ້ວຍກັນ ຫຼືຄິດເປັນ 76.47% ຂອງແຜນການປີ 2011-2012.
ແຕ່ຢ່າງໃດກໍຕາມ ຖ້າຫາກ
ພິຈາລະນາເຖິງແຜນການ
ລວມຈົນເຖິງປີ 2015 ນັ້ນ
ທ່ານໄຊສົມພອນ ກໍຍອມຮັບ
ວ່າ ການພັດທະນາໃນດ້ານ
ນິຕິບັນຍັດຂອງສະພາແຫ່ງ
ຊາດລາວໃນໄລຍະ 1 ປີຜ່ານ
ມາ ສາມາດປະຕິບັດໄດ້ພຽງ
ແຕ່ 14.44% ຂອງເປົ້າໝາຍ
ເທົ່ານັ້ນ ແລະທີ່ສໍາຄັນກໍຄືໃນ
ຈໍານວນກົດໝາຍທັງ 13 ສະ
ບັບດັ່ງກ່າວນີ້ ກໍຍັງ ເປັນກົດ
ໝາຍໃໝ່ພຽງແຕ່ 3 ສະບັບເທົ່ານັ້ນ ສ່ວນອີກ 10 ສະບັບ ກໍຄືກົດໝາຍເກົ່າທີ່ຕ້ອງມີການ
ດັດແກ້ໃໝ່ເພື່ອໃຫ້ສອດຄ່ອງກັບສະພາບການ ທີ່ປ່ຽນແປງໄປຢ່າງໄວວາ.
ຊຶ່ງດ້ວຍສະພາບການທີ່ສະພາແຫ່ງຊາດລາວຕ້ອງດັດແກ້ກົດໝາຍເກົ່າຫຼາຍກວ່າການສ້າງ
ກົດໝາຍໃໝ່ດັ່ງກ່າວນີ້ ກໍເຮັດໃຫ້ທ່ານ ທອງສິງ ທໍາມະວົງ ນາຍົກລັດຖະມົນຕີທີ່ເຄີຍເປັນ
ປະທານສະພາແຫ່ງຊາດລາວດ້ວຍນັ້ນ ກໍໄດ້ໃຫ້ການຍອມຮັບວ່າ ການພັດທະນາໃນດ້ານ
ນິຕິບັນຍັດຂອງສະພາແຫ່ງຊາດລາວຍັງດໍາເນີນໄປຢ່າງຊັກຊ້າ ເພາະການທີ່ຕ້ອງໃຊ້ເວລາ
ສ່ວນໃຫຍ່ກັບໄປດັດແກ້ກົດໝາຍເກົ່ານັ້ນ ໄດ້ສົ່ງຜົນເຮັດໃຫ້ສາມາດສ້າງກົດໝາຍໃໝ່ໄດ້
ໜ້ອຍລົງ ແລະຍັງເປັນການສະທ້ອນເຖິງຄຸນນະພາບທີ່ຕໍ່າຂອງກົດໝາຍໃນລາວອີກດ້ວຍ.
ດັ່ງທີ່ທ່ານທອງສິງ ໄດ້ຖະແຫຼງເນັ້ນຍໍ້າໃນຕອນນຶ່ງວ່າ:
“ສະພາແຫ່ງຊາດລາວຂອງພວກເຮົາ ເຖິງວ່າໄດ້ພິຈາລະ
ນາຮັບເອົາກົດໝາຍຫຼາຍສົມຄວນ ຫາກແຕ່ເນື້ອໃນຂອງ
ກົດໝາຍຈໍານວນນຶ່ງ ຍັງມີບາງບັນຫາທີ່ບໍ່ທັນສອດຄ່ອງ
ສະນັ້ນພວກເຮົາສ້າງກົດໝາຍກັບພວກເຮົາປັບປຸງກົດ
ໝາຍໃນໄລຍະ 5 ປີຜ່ານມາເກືອບເທົ່າກັນ ແທນທີ່ຈະ
ໄດ້ສ້າງໃໝ່ໃຫ້ຫຼາຍກວ່ານີ້. ແຕ່ວ່າຕ້ອງເສຍເວລາກັບ
ການປັບປຸງກົດໝາຍເກົ່າຫຼາຍສົມຄວນ ອັນນີ້ສະແດງ
ເຖິງຄຸນນະພາບຂອງກົດໝາຍພວກເຮົາ”
ສະພາແຫ່ງຊາດລາວຊຸດທີ່ 7 ໄດ້ວາງເປົ້າໝາຍທີ່ຈະສ້າງກົດໝາຍໃໝ່ໃຫ້ໄດ້ ບໍ່ໜ້ອຍ
ກວ່າ 30 ສະບັບ ໃນຕະຫຼອດວາລະ 5 ປີຂອງການຢູ່ໃນຕໍາແໜ່ງ ແລະໃນຂະນະດຽວ
ກັນ ກໍຈະດັດແກ້ກົດໝາຍເກົ່າໃຫ້ສອດຄ່ອງກັບສະພາບການໃຫ້ໄດ້ອີກບໍ່ໜ້ອຍກວ່າ
60 ສະບັບ ໂດຍຖ້າຫາກການດໍາເນີນງານເປັນໄປຕາມແຜນການທີ່ ວາງໄວ້ດັ່ງກ່າວກໍ
ຈະເຮັດໃຫ້ລາວມີກົດໝາຍບັງຄັບໃຊ້ ຫຼາຍກວ່າ 120 ສະບັບ ພາຍໃນປີ 2015.
ສໍາລັບໃນໄລຍະກອງປະຊຸມສະໄໝສາມັນຄັ້ງທີ່ 3 ນີ້ ສະພາແຫ່ງຊາດລາວກໍມີ ວາລະ
ໃນການພິດຈາລະນາກົດໝາຍຈໍານວນ 7 ສະບັບດ້ວຍກັນ ຊຶ່ງໃນນີ້ເປັນການດັດແກ້
ກົດໝາຍເກົ່າ 5 ສະບັບ ຄືກົດໝາຍວ່າດ້ວຍການດໍາເນີນການຄະດີອາຍາ ກົດໝາຍວ່າ
ດ້ວຍການດໍາເນີນຄະດີແພ່ງ ກົດໝາຍວ່າດ້ວຍກິລາ ແລະກາຍະກໍາ ກົດໝາຍວ່າດ້ວຍ
ຊັບສິນຂອງລັດ ແລະກົດໝາຍວ່າດ້ວຍການກວດສອບແຫ່ງລັດ ສ່ວນກົດໝາຍທີ່ສ້າງ
ໃໝ່ 2 ສະບັບ ກໍຄືກົດໝາຍວ່າດ້ວຍນິຕິກໍາ ກັບກົດໝາຍວ່າດ້ວຍການສົ່ງຜູ້ຮ້າຍຂ້າມ
ແດນຕາມລໍາດັບ.
ນອກຈາກນີ້ ສະພາແຫ່ງຊາດລາວກໍຍັງໄດ້ລາຍງານອີກດ້ວຍວ່າ ໃນຮອບ 1 ປີຜ່ານມາ
ໄດ້ຮັບການຮ້ອງຮຽນເພື່ອຂໍຄວາມເປັນທໍາຈາກປະຊາຊົນລາວທັງໝົດ 1,389 ກໍລະນີ
ໂດຍສ່ວນໃຫຍ່ເປັນການຮ້ອງຮຽນກ່ຽວກັບຂໍ້ຂັດແຍ້ງໃນທີ່ດິນ ແລະມູນມໍລະດົກ ຊຶ່ງ
ໃນນີ້ ສະພາແຫ່ງຊາດລາວກໍໄດ້ແກ້ໄຂໄປແລ້ວ 903 ກໍລະນີ ຈຶ່ງຍັງເຫຼືອ 486 ກໍລະນີ
ທີ່ຍັງບໍ່ໄດ້ຮັບການແກ້ໄຂຈົນເຖິງປັດຈຸບັນນີ້ ໂດຍລວມເຖິງກໍລະນີປະຊາຊົນ 200 ກວ່າ
ຄອບຄົວ ທີ່ຖືກກະທົບຈາກໂຄງການເມືອງໃໝ່ ຢູ່ບຶງທາດຫຼວງຂອງກຸ່ມທຶນຈີນອີກດ້ວຍ.