ອົງການກວດກາແຫ່ງລັດ ພົບວ່າລັດຖະບານລາວສູນເສຍງົບ
ປະມານໄປ ກວ່າ 6,000 ຕື້ກີບ ໃນແຜນການປີ 2013-
2014 ໂດຍມີສາເຫດມາຈາກການທຸຈະລິດ ໃນ 56 ໂຄງການ
ທີ່ບໍ່ຖືກກົດໝາຍ.
ເຈົ້າໜ້າທີ່ຂັ້ນສູງ ໃນກະຊວງແຜນການ ແລະການລົງທຶນ ເປີດເຜີຍວ່າ ການດຳເນີນມາດ
ຕະການກວດສອບໂດຍໜ່ວຍສະເພາະກິດ ຂອງກະຊວງແຜນການ ໄດ້ພົບຂໍ້ມູນໃໝ່ ທີ່
ເຮັດໃຫ້ລັດຖະບານລາວ ຕ້ອງສູນເສຍງົບປະມານໄປ ໃນມູນຄ່າລວມເຖິງ 6,092 ຕື້ກີບ
ຫຼື ເກີນກວ່າ 750 ລ້ານດອນລາ ໃນແຜນການປະຈຳສົກປີ 2013-2014 ທີ່ຜ່ານມາ.
ໂດຍການສູນເສຍດັ່ງກ່າວນີ້ ເກີດຂຶ້ນຈາກການຈັດຕັ້ງປະຕິບັດໂຄງການພັດທະນາ ທີ່ບໍ່
ຖືກຕ້ອງຕາມກົດໝາຍ ກໍຄືເປັນໂຄງການ ທີ່ບໍ່ຜ່ານການເຫັນຊອບ ຂອງກະຊວງການເງິນ ແລະກະຊວງແຜນການ ແລະການລົງທຶນ ຈຳນວນ 56 ໂຄງການ ຊຶ່ງແບ່ງເປັນ 18 ໂຄງການ ຂະໜາດໃຫຍ່ ແລະ 38 ໂຄງການ ທີ່ໄດ້ມີການດັດແກ້ມູນຄ່າ ຂອງໂຄງການໂດຍຜິດ
ກົດໝາຍ ດັ່ງທີ່ທ່ານກິແກ້ວ ຈັນທະບູລີ ລັດຖະມົນຕີຊ່ວຍວ່າການກະຊວງແຜນການ ແລະການລົງທຶນ ໄດ້ໃຫ້ການຢືນຢັນວ່າ:
“ບັນດາຂະແໜງການໄດ້ເຊັນສັນຍາໂຄງການ ເກີນມູນຄ່າສະພາແຫ່ງຊາດ
ອະນຸມັດ ມີ 18 ໂຄງການ ໄດ້ດຳເນີນການດັດແກ້ໂຄງການ ຈຳນວນ 38 ໂຄງການ ມູນຄ່າ 6,092 ຕື້ກີບ ໂດຍບໍ່ໄດ້ນຳສະເໜີຕໍ່ກະຊວງແຜນການ ແລະການລົງທຶນ ກັບກະຊວງການເງິນ ຈຶ່ງຕີລາຄາວ່າ ບໍ່ເຄົາລົບກົດໝາຍຢ່າງເຂັ້ມງວດ.”
ກ່ອນໜ້ານີ້ ທ່ານນາງວຽງທອງ ສີພັນດອນ ປະທານອົງການ
ກວດສອບແຫ່ງລັດ ໄດ້ຖະແຫລງຕໍ່ກອງປະຊຸມສະໄໝສາມັນ
ຄັ້ງທີ 8 ຂອງສະພາແຫ່ງຊາດລາວ ເມື່ອເດືອນທັນວາປີ 2014
ວ່າ ໄດ້ກວດພົບການທຸຈະລິດຫຼາຍກວ່າ 324 ຕື້ກີບໃນ 25
ໂຄງການພັດທະນາ ທີ່ບໍ່ມີຕົວຕົນໃນແຂວງອຸດົມໄຊ ແລະກວດ
ພົບການໃຊ້ຈ່າຍງົບປະມານ ທີ່ເກີນຈິງຫຼາຍກວ່າ 87 ຕື້ກີບ ໃນ
77 ໂຄງການ ທັງຍັງກວດພົບວ່າ ມີຢູ່ເຖິງ 254 ໂຄງການທີ່ດຳ
ເນີນງານບໍ່ສຳເລັດຕາມແຜນການ ທັງໆທີ່ວ່າ ໄດ້ໃຊ້ງົບປະມານ
ຫຼາຍກວ່າ 4,322 ຕື້ກີບ ໄປທັງໝົດແລ້ວນັ້ນ.
ທາງດ້ານອົງການເພື່ອຄວາມໂປ່ງໃສສາກົນ (Transparency
Internation) ທີ່ໄດ້ດຳເນີນການສຳຫລວດ ຄວາມຄິດເຫັນຂອງນັກທຸລະກິດ ກ່ຽວກັບສະພາບການສໍ້ລາດບັງຫລວງ ຢູ່ໃນ 175 ປະເທດທົ່ວໂລກນັ້ນ ໄດ້ຈັດໃຫ້ລາວຢູ່ອັນດັບທີ 145 ໃນປີ 2014 ນີ້ ໂດຍໄດ້ຮັບຄວາມໄວ້ວາງໃຈຈາກບັນດານັກທຸລະກິດຊາວຕ່າງຊາດ ທີ່ລົງທຶນໃນລາວທີ່ລະດັບ 25 ຄະແນນຈາກ 100 ຄະແນນເຕັມ.
ໂດຍຈາກຄະແນນດັ່ງກ່າວນີ້ ເຖິງແມ່ນວ່າຈະຖືເປັນລະດັບຄວາມໄວ້ວາງໃຈ ທີ່ດີກວ່າ
ປີ 2012 ທີ່ລາວຖືກຈັດໃຫ້ຢູ່ໃນອັນດັບທີ 160 ຊຶ່ງໄດ້ຮັບຄວາມໄວ້ວາງໃຈຈາກບັນດາ
ນັກທຸຸລະກິດຊາວຕ່າງປະເທດທີ່ລົງທຶນໃນລາວພຽງແຕ່ 21 ຄະແນນເທົ່ານັ້ນກໍຕາມ
ຫາກແຕ່ກໍເປັນສະຖານະ ທີ່ຕ່ຳລົງເຖິງ 5 ອັນດັບເມື່ອທຽບກັບປີ 2013 ຊຶ່ງລາວຢູ່ອັນດັບ
ທີ 140 ແລະໄດ້ຮັບຄວາມໄວ້ວາງໃຈ ທີ່ລະດັບ 26 ຄະແນນ ຊຶ່ງກໍໝາຍຄວາມວ່າ ການສໍ້
ລາດບັງຫລວງ ໃນລາວມີທ່າອຽງເພີ້ມຂຶ້ນໃນສາຍຕາຊາວຕ່າງຊາດນັ້ນເອງ.
ໂດຍສາເຫດສຳຄັນປະການໜຶ່ງ ທີ່ເຮັດໃຫ້ລາວໄດ້ຮັບຄວາມໄວ້ວາງໃຈ ໃນລະດັບຕ່ຳ
ລົງນັ້ນ ກໍຍ້ອນວ່າ ການປາບປາມການສໍ້ລາດບັງຫລວງໃນລາວ ຍັງມີປະສິດທິພາບຕ່ຳ
ໂດຍໄດ້ມີການກວດພົບວ່າ ການປະຕິບັດໜ້າທີ່ ໂດຍບໍ່ສຸດຈະລິດຂອງບັນດາພະນັກ
ງານລັດ ໄດ້ກໍ່ໃຫ້ເກີດການເສຍຫາຍດ້ານລາຍຮັບງົບປະມານ ຂອງລັດຖະບານລາວ
ຫຼາຍຂຶ້ນຢ່າງຕໍ່ເນື່ອງ.
ສ່ວນທ່ານກິແກ້ວ ໄຂຄຳພິທູນ ສະມາຊິກສະພາແຫ່ງຊາດ ຈາກເຂດນະຄອນຫລວງ
ວຽງຈັນ ໄດ້ຕັ້ງຂໍ້ສົງໄສວ່າ ສາເຫດທີ່ກໍ່ໃຫ້ເກີດການເສຍຫາຍໄປ ຢ່າງຫລວງຫຼາຍ ຈາກ
ການສໍ້ລາດບັງຫລວງດັ່ງກ່າວນີ້ ຍ່ອມຈະຕ້ອງມີບຸກຄົນທີ່ມີອຳນາດຢູ່ເບື້ອງຫລັງ ຂະບວນ
ການສໍ້ລາດບັງຫລວງຢ່າງແນ່ນອນ.
