ພັກຄອມມີວນິສລາວບໍ່ມີຄວາມກັງວົນໃຈຕໍ່ສະຖານະການກ່ຽວກັບຄວາມບໍ່ສະຫງົບທາງການເມືອງທີ່ເກີດຂຶ້ນໃນຫຼາຍປະເທດ ເພາະທາງການລາວມີມາດຕະການກວດກາທຸກການເຄື່ອນໄຫວຢູ່ແລ້ວ.
ເຈົ້າໜ້າທີ່ຂັ້ນສູງພາຍໃນພັກປະຊາຊົນປະຕິວັດລາວ ໄດ້ໃຫ້ການຢືນຢັນວ່າບັນດາຜູ້ນໍາພັກບໍ່ໄດ້ສະແດງ ຄວາມກັງວົນໃຈຕໍ່ສະຖານະການກ່ຽວກັບຄວາມບໍ່ສະຫງົບທາງການເມືອງທີ່ເກີດຂຶ້ນໃນປະເທດອີຈິບ, ບາເລນ, ເຍເມນ ແລະລີເບຍໃນເວລານີ້ແຕ່ຢ່າງໃດ ເພາະເຊື່ອໝັ້ນວ່າຈະບໍ່ມີຜົນກະທົບຕໍ່ການເມືອງພາຍໃນ ລາວ ແລະຈະກໍ່ບໍ່ໃຫ້ເກີດການເຄື່ອນໄຫວຢ່າງໃດໆໃນລາວອີກດ້ວຍ.
ທັງນີ້ກໍ່ເນື່ອງຈາກວ່າທາງການລາວໄດ້ດໍາເນີນມາດຕະການກວດກາ ແລະຄວບຄຸມທຸກການເຄື່ອນໄຫວ ໃນສັງຄົມຢ່າງໃກ້ຊິດໃນທຸກລະດັບທົ່ວປະເທດຢູ່ແລ້ວ ໂດຍສະເພາະແມ່ນໃນໂອກາດທີ່ໄດ້ມີການຈັດງານສໍາຄັນຕ່າງໆນັ້ນ ກໍຍັງໄດ້ມີການຈັດເວນຍາມເພື່ອຮັກສາຄວາມສະຫງົບຮຽບຮ້ອຍຕາມໝູ່ບ້ານຕ່າງໆ ຕະຫຼອດ 24 ຊົ່ວໂມງອີກດ້ວຍ.
ກ່ອນໜ້ານີ້ ທ່ານທອງບັນ ແສງອາພອນ ລັດຖະມົນຕີວ່າການກະຊວງປ້ອງກັນຄວາມສະ
ຫງົບພາຍໃນຂອງລາວກໍໄດ້ຖະແຫລງຢືນຢັນວ່າກະຊວງປ້ອງກັນຄວາມສະຫງົບພາຍໃນໄດ້
ວາງຄາດໝາຍໃນການປະຕິບັດພາລະບົດບາດໄວ້ 4 ດ້ານດ້ວຍກັນ ຊຶ່ງກໍຄືການຮັບປະກັນ
ໃນການຮັກສາຄວາມໝັ້ນຄົງທາງການເມືອງໃຫ້ໄດ້, ການຮັບປະກັນຄວາມເປັນລະບຽບ
ຮຽບຮ້ອຍໃນສັງຄົມ, ການເສີມສ້າງກຳລັງປ້ອງກັນຄວາມສະຫງົບໃຫ້ໄດ້ຢ່າງຄົບຖ້ວນ.
ໂດຍສະເພາະແມ່ນການຮັກສາຄວາມໝັ້ນຄົງ ແລະສະຖຽນລະພາບທາງການເມືອງແຫ່ງ
ຊາດນັ້ນ ຖືເປັນຄາດໝາຍທີ່ມີຄວາມສຳຄັນທີ່ສຸດ ຊຶ່ງກໍຄືການສະກັດກັ້ນ ແລະປ້ອງກັນບໍ່
ໃຫ້ມີການເຄື່ອນໄຫວທີ່ມີເປົ້າໝາຍເພື່ອການຊຸມນຸມປະທ້ວງທາງການເມືອງເກີດຂຶ້ນຢູ່ໃນ
ລາວຢ່າງເດັດຂາດ ດັ່ງທີ່ທ່ານ ທອງບັນ ໄດ້ຢືນຢັນວ່າ:
“ຄາດໝາຍທີ 1 ກໍແມ່ນສືບຕໍ່ເຮັດໃຫ້ສະພາບການມີຄວາມສະຫງົບ ແລະມີຄວາມໝັ້ນຄົງທາງການເມືອງ, ຮັບປະ ກັນບໍ່ໃຫ້ມີບັນຫາໜໍ່ແໜງ ຫຼືເຫດການທີ່ພົວພັນເຖິງການເມືອງ ເຊັ່ນການປະທ້ວງ ການຮຸກຮື ແລະການຮຽກຮ້ອງຕ່າງໆນັ້ນບໍ່ໃຫ້ເກີດຂຶ້ນໃນປະເທດຂອງເຮົາຢ່າງເດັດຂາດ. ຄາດໝາຍທີ 2 ກໍແມ່ນການຮັບປະ
ກັນໃຫ້ປະເທດຊາດ ກໍຄືສັງຄົມມີຄວາມເປັນລະບຽບຮຽບຮ້ອຍ. ຄາດໝາຍທີ 3
ກໍແມ່ນການສືບຕໍ່ກໍ່ສ້າງກໍາລັງປ້ອງກັນຄວາມສະງົບໃຫ້ ມີຄຸນນະພາບທັງທາງ
ການເມືອງ ແລະວິຊາການ. ຄາດໝາຍທີ 4 ກໍແມ່ນສຸມໃສ່ວຽກງານພະລາທິການ
ເພື່ອເຮັດໃຫ້ກໍາລັງປ້ອງກັນຄວາມສະຫງົບປະຕິບັດໜ້າທີ່ໄດ້ເປັນຢ່າງດີ”.
ໃນຕະຫຼອດປີ 2010 ທີ່ຜ່ານມາ ກະຊວງປ້ອງກັນຄວາມສະຫງົບພາຍໃນ ກໍໄດ້ປະກອບສ່ວນຢ່າງ
ສໍາຄັນເຂົ້າໃນການຮັກສາຄວາມ
ສະຫງົບຮຽບຮ້ອຍໃນໂອກາດ
ການສະເຫລີມສະຫຼອງການສ້າງ
ຕັ້ງນະຄອນວຽງຈັນຄົບຮອບ
450 ປີທີ່ໄດ້ຈັດຂຶ້ນຢ່າງຍິ່ງໃຫຍ່
ນັ້ນກໍເຮັດໃຫ້ທາງການລາວໄດ້
ເພີ້ມມາດຕະການເຂັ້ມງວດເຂົ້າ
ໃນການປ້ອງກັນຄວາມສະງົບ
ພາຍໃນຫຼາຍຂຶ້ນເປັນພິເສດນັ້ນເອງ.
ສ່ວນໃນເວລານີ້ ກະຊວງປ້ອງກັນຄວາມສະງົບພາຍໃນລາວກໍກໍາລັງປະກອບສ່ວນຢ່າງສໍາຄັນເຂົ້າໃນການປ້ອງກັນ ຄວາມສະຫງົບຮຽບຮ້ອຍໃຫ້ກັບກອງປະຊຸມໃຫຍ່ຄັ້ງທີ 9 ຂອງພັກປະຊາຊົນປະຕິວັດລາວ ແລະການເລືອກຕັ້ງສະມາຊິກສະພາແຫ່ງຊາດຊຸດທີ 7 ທີ່ກໍາໜົດຈະມີຂຶ້ນໃນເດືອນມີນາ ແລະເມສາປີນີ້ຕາມລໍາດັບ.
