ທາງການ ລາວ ເພີ່ມມາດຕະການເຂັ້ມງວດໃນການກວດກາ ແລະ ລົງໂທດຕໍ່ບັນດາຕຳຫຼວດຈະລາຈອນທີ່ໃຊ້ອຳນາດໜ້າທີ່ໂດຍທຸຈະລິດເພື່ອຮຽກຮັບເອົາສິນບົນ ແລະ ຄ່າປັບໄໝຈາກປະຊາຊົນໂດຍບໍ່ຖືກຕ້ອງ.
ເຈົ້າໜ້າທີ່ຂັ້ນສູງໃນຜະແນກຕຳຫຼວດຈະລາຈອນ ນະຄອນຫຼວງ ວຽງຈັນ ເປີດເຜີຍວ່າ ການປາກົດມີຫາງສຽງຈາກສັງຄົມຢ່າງກວ້າງຂວາງໃນເວາລານີ້ວ່າ ມີການຮຽກຮັບເອົາສິນບົນ ແລະ ການປັບໄໝທີ່ບໍ່ຖືກຕ້ອງຕາມລະບຽບກົດໝາຍໂດຍບັນດາເຈົ້າໜ້າທີ່ຕຳຫຼວດຈະລາຈອນນັ້ນເຮັດໃຫ້ການນຳໃນກອງບັນຊາການປ້ອງກັນຄວາມສະຫງົບ ໄດ້ມີຄຳສັ່ງໃຫ້ກວດກາການປະຕິບັດໜ້າທີ່ຂອງບັນດາຕຳຫຼວດຈະລາຈອນໃນທົ່ວປະເທດຢ່າງເຂັ້ມງວດ ໂດຍສະເພາະແມ່ນໃນເຂດນະຄອນຫຼວງ ວຽງຈັນ ນັ້ນຍັງໄດ້ເປີດນຳໃຊ້ລະບົບໂທລະສັບສາຍດ່ວນເພື່ອໃຫ້ປະຊາຊົນໄດ້ລາຍງານກ່ຽວກັບ ການປະຕິບັດໜ້າທີ່ໂດຍທຸຈະລິດຂອງຕຳຫຼວດຈະລາຈອນໄດ້ໂດຍກົງ ເພື່ອທີ່ວ່າຈະໄດ້ດຳເນີນມາດຕະການລົງໂທດ ຕໍ່ຕຳຫຼວດຈະລາຈອນທີ່ທຸຈະລິດດັ່ງກ່າວ ດັ່ງທີ່ເຈົ້າໜ້າທີ່ຂັ້ນສູງໃນຜະແນກຕຳຫຼວດຈະລາຈອນ ນະຄອນຫຼວງວຽງຈັນ ໄດ້ໃຫ້ການຢືນຢັນວ່າ
"ສຳລັບຕຳຫຼວດຈະລາຈອນ ພວກຂ້າພະເຈົ້າລະກະເວົ້າກັນຕະຫຼອດກັບຮອງຫົວໜ້າຕຳຫຼວດຈາກທັງ 9 ຕົວເມືອງ ເວົ້າເລື່ອງຄຸນສົມບັດ ເວົ້າເລື່ອງຄວາມຈົງຮັກພັກດີ ແລະ ກໍເວົ້າເລື່ອງຄວາມສັດຊື່ບໍລິສຸດ ຄວາມຕັ້ງໃຈບໍລິການປະຊາຊົນຫັ້ນນະ ອັນເລື່ອງເອົາເງິນເອົາຄຳນັ້ນ ຄັນພວກເຮົາຮູ້ ພວກເຮົາກໍຈະມີການລົງໂທດກັນເນາະ ໂທເຂົ້າມາໄດ້ເລີຍ 212702 - 212703 ທັງສອງເບີ ຮູ້ວ່າຕຳຫຼວດຈະລາຈອນຜູ້ໃດທີ່ຈຸດໃດ ພວກເຮົາກະຢາກຮູ້ຄືກັນ ເພາະວ່າໄປເວົ້າແບບລອຍໆ ແບບຊັງແລ້ວກະຢາກຫາເລື່ອງເຮັດຊື່ໆບໍ່ໄດ້ ເພາະພວກເຮົາກະກວດກາຢ່າງເຄັ່ງຄັດທີ່ສຸດ ເພາະວ່າເຮົາສິໄປກວດຄົນອື່ນເຮົາກໍຕ້ອງໄດ້ເບິ່ງຄົນຂອງເອົາເອງຄືກັນວ່າ ປະຕິບັດຕາມລະບຽບໄດ້ໜ້ອຍ-ຫຼາຍຊ່ຳໃດ."
ທາງດ້ານເຈົ້າໜ້າທີ່ຂັ້ນສູງໃນກະຊວງປ້ອງກັນຄວາມສະຫງົບຢືນຢັນວ່າ ການຂັບຂີ່ຍານພາຫະນະທີ່ຜິດລະບຽບກົດໝາຍຈະລາຈອນ ຄືຊ່ອງທາງທີ່ເຮັດໃຫ້ມີການຮຽກຮັບເອົາສິນບົນຫຼາຍທີ່ສຸດ ເພາະວ່າຜູ້ຂັບຂີ່ທີ່ຜິດລະບຽບກົດໝາຍນັ້ນ ກໍບໍ່ຢາກຖືກດຳເນີນຄະດີໃນສານ ຈຶ່ງຍອມຈ່າຍຄ່າສິນບົນຕາມຕ້ອງການຂອງຕຳຫຼວດຈະລາຈອນທີ່ທຸຈະລິດໃນໜ້າທີ່ນັ້ນ ທັງນີ້ໃນປີ 2019 ລາວ ມີອຸບັດຕິເຫດບົນທ້ອງຖະໜົນເກີດຂຶ້ນ 6,616 ຄັ້ງໃນນີ້ເກີດຈາກຜູ້ກະທຳຜິດບໍ່ມີໃບຂັບຂີ່ 3,218 ຄັ້ງ, ເມົາເຫຼົ້າ 1,662 ຄັ້ງ, ອາຍຸບໍ່ເຖິງເກນ 864 ຄັ້ງ ແລະ ອື່ນໆ 1,567 ຄັ້ງເຮັດໃຫ້ມີຜູ້ເສຍຊີວິດ 1,134 ຄົນ, ບາດເຈັບ 10,644 ຄົນ, ຍານພາຫະນະເສຍຫາຍ 11,642 ຄັນ ແລະ ຄິດເປັນມູນຄ່າຫຼາຍກວ່າ 101 ຕື້ກີບ ໂດຍໃນນະຄອນຫຼວງ ວຽງຈັນ ຖືເປັນເຂດທີ່ມີອຸບັດຕິເຫດບົນທ້ອງຖະຫນົນເກີດຂຶ້ນຫຼາຍທີ່ສຸດຄື 1,250 ຄັ້ງ ແລະ ເສຍຊີວິດ 235 ຄົນ.
ຍິ່ງໄປກວ່ານັ້ນນະຄອນຫຼວງ ວຽງຈັນ ກໍຍັງປະເຊີນກັບອາຊະຍາກຳ ທີ່ກ່ຽວຂ້ອງກັບຢາເສບຕິດເພີ່ມຂຶ້ນນັບມື້ອີກດ້ວຍ ໂດຍມີສາເຫດມາຈາກການມົ້ວສຸມເສບຢາ ແລະ ຈັດຕັ້ງເປັນກຸ່ມແກັ່ງຕ່າງໆຂອງບັນດາຊາວໜຸ່ມທີ່ບໍ່ມີງານທຳ ແລະ ບໍ່ມີໂອກາດໃນດ້ານການສຶກສາ ການດຳເນີນມາດຕະການປາບປາມທີ່ມີປະສິດທິພາບຕ່ຳ ແລະ ຂາດການຮ່ວມມືຈາກສັງຄົມ ດັ່ງທີ່ພົນຈັດຕະວາ ບຸບຜາ ສີພົມມາ ຫົວໜ້າກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ໄດ້ໃຫ້ການຢືນຢັນວ່າ
"ການສະກັດກັ້ນ ແລະ ການຕ້ານການລັກລອບການລຳລຽງຂົນສົ່ງການຄ້າຂາຍຢາເສບຕິດຍັງເຮັດບໍ່ທັນໄດ້ດີ ການປະຕິບັດມາດຕະການທາງດ້ານກົດໝາຍຕໍ່ຜູ້ກະທຳຜິດ ຍັງບໍ່ທັນເຂັ້ມງວດ ຍັງມີລັກສະນະບ່ອນເຄັ່ງບ່ອນຍານ ການມີສ່ວນຮ່ວມຂອງສັງຄົມຕໍ່ບັນຫານີ້ຍັງບໍ່ທັນຫຼາຍ ພໍ່ແມ່ປະຊາຊົນຍັງບໍ່ທັນເອົາໃຈໃສ່ສຶກສາອົບຮົມລູກຫຼາຍຂອງຕົນ ພໍ່ແມ່ຈຳນວນນຶ່ງປະຖິ້ມຄວາມຮັບຜິດຊອບໃຫ້ກາຍເປັນພາລະຂອງລັດ ແລະ ສັງຄົມຕ້ອງໄດ້ແບກຫາບໃນການປິ່ນປົວ ແລະ ລ້ຽງລູກຂອງເຂົາເຈົ້າເຫຼົ່ານັ້ນ."
ທາງດ້ານພົນຕີ ສົມຫວັງ ທຳມະສິດ ຮອງລັດຖະມົນຕີກະຊວງປ້ອງກັນຄວາມສະຫງົບຖະແຫຼງວ່າ ການດຳເນີນມາດຕະການປາບປາມການຄ້າຢາເສບຕິດ ໃນໄລຍະ 3 ປີຜ່ານມາດສາມາດຈັບຜູ້ກະທຳຜິດໄດ້ຫຼາຍກວ່າ 13,900 ຄົນໃນ 9,430 ກວ່າຄະດີ ໃນນີ້ເປັນນັກຄ້າຢາເສບຕິດຊາວຕ່າງຊາດຫຼາຍກວ່າ 200 ຄົນ, ຍຶດຢາບ້າໄດ້ 37 ລ້ານເມັດ, ເຮໂຣອິນກວ່າ 735 ກິໂລກຣາມ, ຢາໄອສ໌ກວ່າ 2 ໂຕນ, ກັນຊາແຫ້ງ 6.3 ໂຕນ, ຝິ່ນກວ່າ 500 ກິໂລກຣາມ, ໂຄເຄນ ກວ່າ 8 ກິໂລກຣາມ, ສານເຄມີທີ່ຜະລິດຢາເສບຕິດກວ່າ 10 ໂຕນ ແລະ ອື່ນໆ.
