ລິ້ງ ສຳຫລັບເຂົ້າຫາ

ລາວວາງແຜນພັດທະນາ ນະຄອນວຽງຈັນ ໄປສູ່ ຄວາມທັນສະໄໝ ພາຍໃນປີ 2030

  • ຊົງຣິດ ໂພນເງິນ

ພະທາດຫລວງ, ປູສະນີຍະສະຖານແຫ່ງຊາດຂອງລາວ ທີ່ນະຄອນຫລວງວຽງຈັນ.

ທາງການລາວວາງແຜນການແມ່ບົດ ເພື່ອການພັດທະນານະຄອນວຽງຈັນໄປສູ່ຄວາມທັນ ສະໄໝພາຍໃນປີ 2030 ໂດຍມີເປົ້າໝາຍທີ່ຈະເຮັດໃຫ້ນະຄອນວຽງຈັນເປັນເມືອງສູນກາງ ໃນເຂດລຸ່ມແມ່ນໍ້າຂອງ.

ທ່ານບຸນຈັນ ສິນທະວົງ ຮອງເຈົ້າຄອງນະຄອນວຽງຈັນ
ໄດ້ຖະແຫລງຢືນຢັນວ່າ ເປົ້າໝາຍສໍາຄັນທີ່ສຸດໃນແຜນ
ແມ່ບົດ ວ່າດ້ວຍການພັດທະນານະຄອນວຽງຈັນ ນັບ
ຈາກປັດຈຸບັນນີ້ ໄປຈົນເຖິງປີ 2030 ກໍຄືການທີ່ຈະຕ້ອງ
ພັດທະນານະຄອນວຽງຈັນ ໃຫ້ເປັນນະຄອນຫລວງທີ່
ທັນສະໄໝ ເພື່ອກ້າວໄປສູ່ການເປັນສູນກາງຂອງເມືອງ
ຕ່າງໆໃນເຂດລຸ່ມແມ່ນໍ້າຂອງດ້ວຍກັນ ໃຫ້ໄດ້ຢ່າງແທ້ຈິງ.

ດ້ວຍເປົ້າໝາຍດັ່ງກ່າວນີ້ ຈຶ່ງເຮັດໃຫ້ທາງການລາວຕ້ອງ
ມີການຈັດແບ່ງເຂດພັທະນາໃນດ້ານຕ່າງໆອອກຈາກກັນ
ຢ່າງຊັດເຈນ ເຊັ່ນເຂດອະນຸລັກໃນດ້ານປະວັດສາດ ເຂດ
ອະນຸລັກດ້ານໂບຮານສະຖານ ເຂດທຸລະກິດການຄ້າ ເຂດການທ່ອງທ່ຽວ ເຂດອຸດສາຫະ
ກໍາເບົາ ເຂດອຸດສາຫະກໍາໜັກ ແລະເຂດພື້ນທີ່ສີຂຽວ ຫລືສວນ ສາທາລະນະເປັນຕົ້ນ.

ໃນແຕ່ລະເຂດນັ້ນ ກໍຈະມີຂໍ້ກໍານົດກ່ຽວກັບການກໍ່ສ້າງອາຄານ ແລະສະຖານທີ່ຕ່າງໆ ທີ່
ແຕກຕ່າງກັນໄປ ເຊັ່ນ ໃນເຂດອະນຸລັກດ້ານໂບຮານສະຖານນັ້ນ ກໍຈະກໍ່ສ້າງອາຄານສູງ
ໄດ້ບໍ່ເກີນ 7 ແມດ ຫລືບໍ່ເກີນ 12 ແມດ ໃນເຂດອະນຸລັກດ້ານປະວັດສາດ. ສ່ວນເຂດທີ່
ຢູ່ອາໃສ ທີ່ຢູ່ໄກ້ສູນກາງທາງທຸລະກິດການຄ້າ ແລະສູນກາງການບໍລິຫານງານຂອງລັດຖະ
ບານລາວນັ້ນ ກໍຈະສ້າງອາຄານສູງໄດ້ບໍ່ເກີນ 26 ແມດ. ສໍາລັບເຂດອື່ນໆນັ້ນ ຈະສາມາດ
ກໍ່ສ້າງອາຄານໄດ້ສູງ ເຖິງ 50 ແມດ ຫາກແຕ່ວ່າຕ້ອງມີສິ່ງອໍານວຍຄວາມສະດວກຕ່າງໆ
ຢ່າງຄົບຊຸດ ເຊັ່ນພື້ນທີ່ ສ່ວນກາງ ພື້ນທີ່ສີຂຽວ ສິ່ງອໍານວຍຄວາມສະດວກຕ່າງໆ ແລະ
ລະບົບປ້ອງກັນອັກຄີໄພເປັນຕົ້ນ.

ກ່ອນໜ້ານີ້ ທ່ານ ຈູມມະລີ ໄຊຍະສອນ ປະທານປະເທດລາວກໍໄດ້ປະກາດເປົ້າໝາຍຂອງ
ການພັດທະນານະຄອນວຽງຈັນ ໃນໂອກາດເປັນປະທານໃນພິທີສະເຫລີມສະຫລອງການ
ສະຖາປະນາວຽງຈັນເປັນນະຄອນຫລວງ ຄົບຮອບ 450 ປີ ທີ່ໄດ້ຈັດຂຶ້ນຢ່າງຍິ່ງໃຫຍ່ ໃນ
ຄືນວັນທີ 19 ເດືອນພະຈິກທີ່ຜ່ານມາ ຢູ່ສະໜາມກີລາແຫ່ງຊາດແຫ່ງໃໝ່ ທີ່ຫລັກ 16
ຖະໜົນເລກ 13 ໃຕ້ ໃນເຂດເມືອງໄຊທານີ ນະຄອນວຽງຈັນ ວ່າ:

“ຈົ່ງພ້ອມກັນສ້າງນະຄອນຫລວງວຽງຈັນ ໃຫ້ເປັນໃຈກາງດ້ານການເມືອງ ເສດ
ຖະກິດ ວັດທະນະທໍາ ສັງຄົມທົ່ວປະເທດ ເປັນຕົວແບບທີ່ດີເດ່ນ ໃຫ້ແກ່ທົ່ວປະ
ເທດໄດ້ສຶກສາຮໍ່າຮຽນ ແລະເດີນຕາມ . ພ້ອມ​ກັນ​ນັ້ນ ທົ່ວ​ປະ​ເທດ​ຈົງ​ອຸທິດ​ຕົນ
ເພື່ອ​ພັດທະນາ​ປະ​ເທດ​ຊາດ​ ແລະ​ພັດທະນາ​ນະຄອນຫລວງ​ຂອງ​ພວກ​ເຮົາ ໃຫ້​ໜັກ​ແໜ້ນ​ເຂັ້ມ​ແຂງ​ຮອບດ້ານ.”

ໃນ​ປັດຈຸບັນ​ນີ້ ນະຄອນ​ວຽງ​ຈັນ​ມີ​ເນື້ອທີ່​ກວ້າງ 3,920 ກິ​ໂລແມດ​ມົນທົນ ​ໂດຍ​ມີ​ປະຊາ
ກອນ​ອາ​ໃສ​ຢູ່​ ຫລາຍ​ກວ່າ 795,000 ຄົນ ​ແລະ​ທາງ​ການ​ລາວ​ຄາດໝາຍ​ວ່າ ​ຈໍານວນ
ປະຊາກອນ​ໃນ​ເຂດ​ນະຄອນ​ວຽງ​ຈັນ ​ຈະ​ເພີ່ມ​ຂຶ້ນ​ເປັນ​ສອງ​ເທົ່າ​ ພາຍ​ໃນ​ປີ 2030 ຊຶ່ງ​ກໍ
ຈະເຮັດ​ໃຫ້​ຕ້ອງ​ປະ​ເຊີນ​ກັບ​ບັນຫາ ​ແລະ​ມົນ​ພາວະ​ໃນ​ຫລາຍໆ​ດ້ານ​ ຖ້າ​ຫາກບໍ່​ມີ​ການ
ປ້ອງ​ກັນ​ບັນຫາ​ໄວ້ ​ເປັນ​ກາ​ນລ່ວງ​ໜ້າ.

ກໍລະນີ​ບັນຫາ​ທີ່​ເກີດ​ຂຶ້ນ​ໃນ​ເວລາ​ນີ້ ກໍ​ຄືບັນຫາ​ການ​ຈະລາຈອນ​ແອ​ອັດ ​ຍ້ອນ​ວ່າ​ມີ​ຖະໜົນ
ຫົນທາງ​ຢູ່​ຢ່າງ​ຈໍາ​ກັດ ບັນຫາ​ຂີ້​ເຫຍື້ອ​ຕົກ​ຄ້າງ​ຍ້ອນວ່າຄວາມ​ສາມາດ​ໃນ​ການ​ກໍາຈັດ​ຍັງ​ຕໍ່າ
ໃນ​ຂະນະ​ທີ່​ການ​ຜະລິດ​ຂີ້​ເຫຍື້​ອນັ້ນ ກັບ​ເພີ່ມ​ສູງ​ຂຶ້ນນັບ​ມື້ ຊຶ່ງ​ກໍ​ເຊັ່ນ​ດຽວ​ກັນ​ກັບ​ບັນຫາ​ນໍ້າ
ເປື້ອນ​ເປິະ ​ຍ້ອນ​ບໍ່​ມີ​ລະບົບ​ການ​ບໍາບັດ​ທີ່​ໄດ້​ມາດ​ຕະຖານ ​ແລະ​ໃນ​ຂະນະ​ດຽວ​ກັນ ການ
ຕອບ​ສະໜອງ​ນໍ້າ​ປະປາ​ ກໍ​ຍັງ​ບໍ່​ພຽງພໍ​ກັບ​ຄວາມ​ຕ້ອງການ​ທີ່​ເປັນ​ຈິງ​.

XS
SM
MD
LG