ເກົາຫລີເໜືອໄດ້ປ່ອຍເຮືອປະມົງຂອງເກົາຫລີໃຕ້ ພ້ອມກັບລູກເຮືອທັງ 7 ຄົນ ໃນວັນອັງ
ຄານມື້ນີ້ ຫລັງຈາກໄດ້ຮ້ອງຂໍໃຫ້ເກົາຫລີໃຕ້ຈັດສົ່ງ ເຂົ້າ ຊີມັງ ແລະອຸບປະກອນໜັກໄປ
ຊ່ອຍຕົນເພື່ອຈະໄດ້ຟື້ນໂຕຄືນຈາກໄພນໍ້າຖ້ວມເມື່ອໄວໆມານີ້.
ພຽງຢາງໄດ້ປະກາດໃນມື້ວັນຈັນວານນີ້ວ່າຕົນຈະປ່ອຍເຮືອຫາປາອິຮືຂອງເກົາຫຼີໃຕ້
ພ້ອມກັບລູກເຮືອຊາວເກົາຫລີໃຕ້ 4 ຄົນແລະຊາວຈີນ 3 ຄົນ ທີ່ຖືກຈັບຢູ່ໃນເຂດນ່ານ
ນໍ້າຂອງຕົນເມື່ອນຶ່ງເດືອນກ່ອນ ຍ້ອນຫາປາຢ່າງຜິດກົດໝາຍຕາມຂໍ້ກ່າວຫານັ້ນ. ເກົາ ຫລີເໜືອເອີ້ນການປ່ອຍເຮືອດັ່ງກ່າວວ່າເປັນການສະແດງອອກທາງດ້ານມະນຸດສະທຳ.
ການຮ້ອງຂໍຄວາມຊ່ວຍເຫລືອຂອງເກົາຫລີເໜືອມີຂຶ້ນຫຼັງຈາກເກົາຫຼີໃຕ້ໄດ້ສະເໜີໃນ ສັບປະດາແລ້ວທີ່ຈະໃຫ້ການຊ່ອຍເຫຼືອສຸກເສີນໃນມູນຄ່າ 8 ລ້ານ 5 ແສນໂດລາ
ຮວມທັງອາຫານການກິນ ປັດໄຈບັນ ເທົາທຸກຕ່າງໆ ແລະເຄື່ອງປະຖົມພະຍາບານ.
ການສະເໜີທີ່ວ່ານີ້ ບໍ່ມີເຂົ້າຫຼືເຄື່ອງມືແລະວັດສະດຸກໍ່ສ້າງຮວມຢູ່ນຳ.
ສື່ມວນຊົນຂອງເກົາຫຼີໃຕ້ລາຍງານໃນວັນອັງຄານມື້ນີ້ວ່າ ການປ່ອຍພວກລູກເຮືອທັງ
7 ແມ່ນບາດກ້າວໄປສູ່ການໄດ້ຮັບການຊ່ອຍເຫຼືອທາງດ້ານອາຫານ ແລະກະຊວງ
ທ້ອນໂຮມຊາດກ່າວວ່າ ລັດຖະບານເກົາຫຼີໃຕ້ພວມທຳການທົບທວນເບິ່ງການຮ້ອງຂໍ
ຂອງເກົາຫຼີເໜືອຢູ່.
