ວຽກງານໄດ້ເລີ່ມຕົ້ນຄືນໃໝ່ໃນວັນພະຫັດມື້ນີ້ທີ່ຖານທັບອາກາດໃໝ່ ຂອງ ສະຫະລັດ ໃນເກາະ ໂອກິນາວະ ຢູ່ທາງພາກໃຕ້ຂອງ ຍີ່ປຸ່ນ, ເປັນການສະເຫຼີມສະຫຼອງໄຊຊະນະສຳລັບລັດຖະບານກາງໃນໂຕກຽວ ກ່ຽວກັບຄວາມພະຍາຍາມທີ່ຢາກກີດກັ້ນການຍ້າຍຖານທັບອາກາດທີ່ເປັນບັນຫາ ໂດຍເຈົ້າຄອງເກາະດັ່ງກ່າວ.
ບັນດາຜູ້ປະທ້ວງທີ່ບໍ່ພໍໃຈໄດ້ເຕົ້າໂຮມກັນຢູ່ນອກສະຖານທີ່ກໍ່ສ້າງເທິງອ່າວ Henoko ໃນຂະນະທີ່ກຳມະກອນຫຼາຍຄົນໄດ້ເດີນທາງໄປຮອດພ້ອມກັບອຸປະກອນເຄື່ອນຍ້າຍດິນ, ນັກປະທ້ວງຫຼາຍຄົນໄດ້ພາກັນນັ່ງຢູ່ເທິງຫົນທາງ ແລະ ກີດກັ້ນທາງເຂົ້າ.
ການກໍ່ສ້າງໄດ້ຢຸດຊະງັກຕັ້ງແຕ່ເດືອນ ສິງຫາ ທີ່ຜ່ານມາ ເມື່ອ ໂຕກຽວ ໄດ້ດຳເນີນການເຈລະຈາກັບ ເຈົ້າຄອງເກາະ ໂອກິນາວະ ທ່ານ Takeshi Onaga ໂດຍເພັ່ງເລັງໃສ່ເພື່ອໃຫ້ບັນລຸການຜ່ອນສັ້ນຜ່ອນຍາວກ່ຽວກັບ ທີ່ຕັ້ງໃໝ່ຂອງຖານທັບອາກາດ Futenma ຂອງທະຫານນາວິທະໂຍທິນ ສະຫະລັດ. ຫຼັງຈາກການເຈລະຈາບໍ່ປະສົບຄວາມສຳເລັດ, ທ່ານ Onaga ໄດ້ຍົກເລີກໃບອະນຸຍາດຕົ້ນສະບັບສຳລັບຖານທັບໃໝ່ ທີ່ໄດ້ອອກໃຫ້ໂດຍຜູ້ທີ່ດຳລົງຕຳແໜ່ງຄົນກ່ອນ. ກະຊວງປ້ອງກັນປະເທດໄດ້ຂໍອຸທອນຕໍ່ການຍົກເລີກຂອງທ່ານ Onaga ຕໍ່ລັດຖະມົນຕີທີ່ດິນ ທ່ານ Keiichi Ishii, ຜູ້ທີ່ໄດ້ເຮັດໃຫ້ການຕັດສິນໃຈຂອງທ່ານ Onaga ເປັນໂມຄະໃນວັນອັງຄານທີ່ຜ່ານມາ.
ລັດຖະບານ ໂອກິນາວະ ໄດ້ວາງແຜນທີ່ຈະຮ່າງຄຳຮ້ອງທຸກກັບຄະນະກຳມະການໄກ່ເກ່ຍ ທີ່ຮັບຟັງການຂັດແຍ້ງ ລະຫວ່າງ ລັດຖະບານໃນທ້ອງຖິ່ນກັບ ໂຕກຽວ.
ທ່ານ Onaga ກ່າວວ່າ ນີ້ແມ່ນການກົດຂີ່ໂດຍລັດຖະບານ, ແລະ ມັນກໍໜ້າເສຍໃຈຫຼາຍ ທີ່ລັດຖະບານບໍ່ມີບ່ອນວ່າງທີ່ຈະຄິດກ່ຽວກັບ ສະຖານະການຂອງພວກເຮົາ, ມັນຮູ້ສຶກຄືວ່າພວກເຂົາເຈົ້າທຳການກໍ່ກວນ. ພວກເຮົາຈະຕໍ່ລອງຢ່າງເດັດດ່ຽວກັບການດຳເນີນໄປຂ້າງໜ້າຂອງພວກເຂົາເຈົ້າ.
