ບັນດາເຈົ້າໜ້າທີ່ຍີ່ປຸ່ນກ່າວວ່າ ລະດັບຂອງກໍາມັນຕະພາບ
ລັງສີໄດ້ເຖິງຂີດທີ່ເປັນອັນຕະລາຍແລ້ວ ໃນເຂດອ້ອມແອ້ມ
ໂຮງໄຟຟ້ານີວເຄລຍທີ່ໄດ້ຮັບຄວາມເສຍຫາຍຈາກໄພແຜ່ນ
ດິນໄຫວ ຫລັງຈາກເກີດໄຟໄໝ້ຂຶ້ນໃນໜອງເກັບມ້ຽນທ່ອນ
ເຊື້ອໄຟນີວເຄລຍທີ່ໃຊ້ແລ້ວ.
ໃນຖະແຫລງການສະບັບນຶ່ງທີ່ອອກອາກາດທາງໂທລະພາບ
ໃນທົ່ວປະເທດໃນວັນອັງຄານມື້ນີ້ ນາຍົກລັດຖະມົນຕີ
Naoto Kan ກ່າວວ່າລະດັບຂອງກໍາມັນຕະພາບລັງສີແມ່ນ
ສູງຫລາຍ ແລະວ່າມີຄວາມສ່ຽງຫລາຍທີ່ກໍາມັນຕະພາບ
ລັງສີຈະຮົ່ວໄຫລອອກມາຕື່ມອີກ. ປະຊາຊົນຄົນໃດກໍຕາມທີ່
ອາໄສຢູ່ໃນເຂດອ້ອມແອ້ມຂອງໂຮງໄຟຟ້ານີວເຄລຍ
Fukushima ທີ່ປະສົບກັບບັນຫານັ້ນພາຍໃນວົງລັດສະໜີ
30 ຫລັກກິໂລແມັດໃຫ້ພາກັນຢູ່ໃນບ້ານເຮືອນ.
ໄດ້ມີການກວດພົບກໍາມັນຕະພາບລັງສີເພີ່ມຂຶ້ນໃນໄລຍະໄກໄປຮອດກຸງໂຕກຽວ ຊຶ່ງຢູ່ໄກ
ຈາກໂຮງໄຟຟ້າດັ່ງກ່າວໄປທາງທິດໃຕ້ປະມານ 240 ຫລັກກິໂລແມັດ ແຕ່ບັນດາເຈົ້າໜ້າທີ່
ກ່າວວ່າ ລະດັບກໍາມັນຕະພາບລັງສີທີ່ນັ້ນ ບໍ່ເປັນໄພຂົ່ມຂູ່ຕໍ່ສຸຂະພາບປະຊາຊົນ.
ໃນທາງທິດເໜືອຂຶ້ນໄປອີກ ພວກຊ່ອຍກູ້ໄພຍັງກໍາລັງຕໍ່ສູ້ທໍາການຊອກຄົ້ນຕາມຊາກສະ
ຫລັກຫັກພັງທີ່ກີດກັນຖະໜົນຫົນທາງເພື່ອເຂົ້າໄປຫາປະຊາຊົນຫລາຍແສນຄົນທີ່ເມືອງ
ແລະໝູ່ບ້ານຂອງເຂົາເຈົ້າທີ່ໄດ້ຖືກທໍາລາຍຢ່າງຮາບຄາບຍ້ອນໄພແຜ່ນດິນໄຫວທີ່ມີຄວາມ
ແຮງ 9. Richter ແລະເກີດຄື້ນຟອງຍັກສຸນາມິໃນເວລາຕໍ່ມານັ້ນ. ບັນດາເຈົ້າໜ້າທີ່
ກ່າວວ່າ ມາຮອດປັດຈຸບັນນີ້ໄດ້ພົບຊາກສົບຈໍານວນຫລາຍກວ່າ 2400 ສົບແລ້ວ ແລະ
ຍັງມີອີກຫລາຍພັນຄົນຍັງຫາຍສາບສູນໄປຢູ່.
ໄຟໄໝ້ໃນວັນອັງຄານມື້ນີ້ ກໍໄດ້ເປັນບັນຫາໃຫຍ່ຫລ້າສຸດສໍາລັບພວກນາຍຊ່າງຂອງໂຮງໄຟຟ້ານີວເຄລຍ Fukushima ຊຶ່ງໄດ້ປະສົບກັບຄວາມລົ້ມແຫລວຂອງລະບົບທໍາຄວາມເຢັນຫລັງຈາກເກີດໄພແຜ່ນດິນໄຫວແລະຄື້ນຟອງຍັກສຸນາມິແລ້ວ. ເຄື່ອງປັ່ນໄຟຟ້າອີກ 3 ໜ່ວຍໄດ້ປະສົບກັບການລະເບີດຂຶ້ນແລ້ວ ຊຶ່ງໄດ້ທໍາລາຍຂ້າງນອກຂອງຕຶກ ທີ່ບັນຈຸເຄື່ອງປັ່ນໄຟຟ້າເຫລົ່ານັ້ນ ຊຶ່ງຫຼ້າສຸດແມ່ນເກີດຂຶ້ນໃນເຊົ້າວັນອັງຄານມື້ນີ້.
ອົງການຄວບຄຸມພະລັງປະລະມະນູສາກົນ ຫລື IAEA ກ່າວວ່າ ຕົນໄດ້ຮັບຊາບຈາກທາງການຍີ່ປຸ່ນວ່າ ໄຟໄໝ້ເກີດຂຶ້ນທີ່ີໜອງເກັບມ້ຽນທ່ອນເຊື້ອເພິງນີວເຄລຍທີ່ໃຊ້ແລ້ວ ໃນເຕົາແຍກໜ່ວຍທີ 4 ຂອງໂຮງໄຟຟ້າ ແລະວ່າ ກໍາມັນຕະພາບລັງສີໄດ້ຮົ່ວໄຫລອອກມາສູ່ອາວະກາດໃນອັດຕາເທົ່າໆກັນກັບກາຍສາຍແສງເອກສະເຣ (X-ray)ໜ້າເອິກ 4000 ເທື່ອ ໃນທຸກໆຊົ່ວໂມງນັ້ນ.
ພວກເຈົ້າໜ້າທີ່ທີ່ບໍ່ຈໍາເປັນທັງໝົດໄດ້ຖືກຍົກຍ້າຍອອກຈາກໂຮງໄຟຟ້າກ່ອນມອດໄຟໄວ້ໄດ້ໃນເວລາບໍ່ດົນກ່ອນຕອນທ່ຽງນ້ອຍນຶ່ງຕາມເວລາໃນທ້ອງຖິ່ນ. ໄດ້ມີການຮັກສາພວກພະນັກງານບໍ່ເທົ່າໃດຄົນໄວ້ເພື່ອໃຊ້ປໍ້ານໍ້າທະເລເຂົ້າໃສ່ເຄື່ອງປັ່ນໄຟຟ້າ 3 ໜ່ວຍທີ່ໄດ້ຮັບຄວາມເສຍຫາຍ ເພື່ອພະຍາຍາມບໍ່ໃຫ້ທ່ອນເຊື້ອໄຟນີວເຄລຍລະລາຍ ຊຶ່ງສາມາດສ້າງຜົນສະທ້ອນທີ່ເປັນອັນຕະລາຍຮ້າຍແຮງໄດ້ໃນພາຍຫລັງນັ້ນ.
