ເປັນທີ່ຄາດກັນວ່າ ປະທານາທິບໍດີປາແລສໄຕນ໌ທ່ານ Mahmoud Abbas ຈະຮ້ອງຂໍຢ່າງ
ເປັນທາງການຕໍ່ອົງການສະຫະປະຊາຊາດໃຫ້ຮັບຮູ້ປະເທດປາແລສໄຕນ໌ເປັນສະມາຊິກໂດຍ ເຕັມຂອງສະຫະປະຊາຊາດທັງໆທີ່ໄດ້ຮັບການຄັດຄ້ານຈາກສະຫະລັດແລະອິສຣາແອລ.
ທ່ານ Abbas ໄດ້ປະຕິເສດຕໍ່ການຮ້ອງຂໍໃຫ້ທ່ານຍົກເລີກການຂໍເຂົ້າເປັນສະມາຊິກສະຫະ
ປະຊາຊາດໂດຍເວົ້າວ່າ ທ່ານຈະຍື່ນຄຳຮ້ອງຕໍ່ເລຂາທິການໃຫຍ່ອົງການສະຫະປະຊາຊາດ
ທ່ານພັນກີມູນ ໃນວັນສຸກມື້ນີ້.
ການດຳເນີນຄວາມພະຍາຍາມຂອງສະຫະລັດແລະຢູໂຣບ ທີ່ນະຄອນນິວຢອກ ເພື່ອຢາກ
ຫຼີກລ້ຽງ ບໍ່ໃຫ້ເກີດການປະເຊີນໜ້າທາງດ້ານການທູດນັ້ນ ມີຮ່ອງຮອຍວ່າ ບໍ່ໄດ້ມີຄວາມ
ກ້າວໜ້າຫຍັງຫຼາຍ ໃນວັນພະຫັດວານນີ້. ເປັນທີ່ຄາດກັນວ່າ ບັນດາທູດພິເສດ ຂອງກຸ່ມ
Quartet ທີ່ຮັບຜິດຊອບກ່ຽວກັບພາກຕາເວັນອອກກາງຈະປະຊຸມກັນໃນວັນສຸກມື້ນີ້ເພື່ອ
ຫາທາງລິເລີ່ມການເຈລະຈາລະຫວ່າງອິສຣາແອລແລະປາແລສໄຕນ໌ຄືນໃໝ່.
ສະຫະລັດ ແລະອິສຣາແອລ ພວມກົດດັນໃຫ້ບັນດາປະເທດສະມາຊິກຂອງສະພາຄວາມ
ໝັ້ນຄົງໃຫ້ລົງຄະແນນສຽງຄັດຄ້ານຕໍ່ແຜນການດັ່ງກ່າວ ຫຼືບໍ່ອອກສຽງເວລາມີການລົງ
ຄະແນນສຽງກັນ. ເຖິງແມ່ນຝ່າຍປາແລສໄຕນ໌ສາມາດຈັດແຈງໃຫ້ໄດ້ຮັບຄະແນນສຽງສະ
ໜັບສະໜຸນພຽງພໍກໍຈິງ ແຕ່ສະຫະລັດໃຫ້ຄຳໝັ້ນສັນຍາວ່າຈະໃຊ້ສິດຢັບຢັ້ງຕໍ່ແຜນການ
ທີ່ວ່ານີ້.
ສະພາຄວາມໝັ້ນຄົງ ຈະໃຊ້ເວລາຫຼາຍໆອາທິດເພື່ອພິຈາລະນາຄຳຮ້ອງຂໍຂອງຝ່າຍປາ
ແລສໄຕນ໌ຊຶ່ງຈະໃຫ້ເວລາເພີ່ມຕື່ມແກ່ການດຳເນີນການທາງດ້ານການທູດ ກ່ອນທີ່ຝ່າຍ
ປາແລສໄຕນ໌ ຈະພິຈາລະນາກ່ຽວກັບການເຄື່ອນໄຫວຂັ້ນຕໍ່ໄປ ໂດຍຈະຂໍໃຫ້ສະມັດຊາ
ໃຫຍ່ອົງການສະຫະປະຊາຊາດຍົກລະດັບຖານະຂອງ ປາແລສໄຕນ໌ຂຶ້ນເປັນປະເທດສັງ ເກດການທີ່ບໍ່ສາມາດອອກສຽງໄດ້ນັ້ນ.
ຜູ້ຊ່ອຍຄົນນຶ່ງ ຂອງທ່ານ Abbas ກ່າວໃນວັນພະຫັດວານນີ້ວ່າ ປະທານາທິບໍດີປາ
ແລສໄຕນ໌ເຊື່ອວ່າການພະຍາຍາມເຂົ້າເປັນສະມາຊິກຂອງອົງການສະຫະປະຊາຊາດນີ້
ຈະບໍ່ເປັນອຸບປະສັກຂັດຂວາງຕໍ່ການເຈລະຈາສັນຕິພາບຢ່າງຈິງຈັງກັບອິສຣາແອລແຕ່
ປະການໃດ.
ເບິ່ງວີດີໂອພາສາອັງກິດ ກ່ຽວກັບຄວາມເຫັນຂອງຊາວປາແລສໄຕນ໌:
